បុរសម្នាក់ បានអះអាងថា មន្ទីពេទ្យបង្អែកខេត្តតាកែវ មិនបានយកចិត្តទុកដាក់ ជួយសង្គ្រោះប្រពន្ធរបស់ខ្លួន ដែលឈឺពោះឆ្លងទន្លេ ដែលទៅរកសេវាសង្គ្រោះនោះទេ ទុកចោលជាង២ថ្ងៃ រហូតស្លាប់កូនក្នុងផ្ទៃ ដែលការណ៍នេះ គាត់អំពាវនាវកុំឱ្យគ្រូពេទ្យមើលងាយជីវិតមនុស្ស។
ហ្វេសប៊ុកឈ្មោះ វង្ស សុភភ្តី កាលពីថ្ងៃទី១៧ ខែកុម្ភៈនេះ បានអំពាវនាវឱ្យអ្នកប្រើប្រាស់បណ្តាញសង្គមជួយចែករំលែក ដើម្បីឱ្យស្ថាប័នពាក់ព័ន្ធបានដឹងនិងជួយអន្តរាគមន៍។
ប្រភពនោះបានអះអាងថា កាលពីថ្ងៃទី១៣ ខែកុម្ភៈនេះ ប្រពន្ធគាត់ ឈឺពោះឆ្លងទន្លេ គាត់បានដឹកប្រពន្ធទៅសំរាលនៅមន្ទីរពេទ្យបង្អែកខេត្តតាកែវ។ លោកថា ពេលនោះមន្ទីពេទ្យបានទុកអ្នកជំងឺជាប្រពន្ធនោះចោល មិនព្រមជួយ។
សម្រាប់លោក សុភក្តី អ្នកជំងឺឈឺពោះចាប់តាំងពីយប់ថ្ងៃទី១១ ខែកុម្ភៈ តែគ្រូពេទ្យបានទុកអ្នកជំងឺចោលរហូតដល់ថ្ងៃទី១៣ ខែកុម្ភៈ អ្នកជំងឺទ្រាំលែងបានរហូតដល់ស្លាប់កូនក្នុងផ្ទៃ នៅក្នុងមន្ទីរពេទ្យ។
លោករៀបរាប់ទៀតថា ក្រោយពីកូនក្នុងផ្ទៃបានស្លាប់ ក្រុមគ្រួសារអ្នកជំងឺ បានសុំឱ្យក្រុមគ្រូពេទ្យជួយវះកាត់ ដើម្បីជួយសង្រ្គោះម្តាយ តែពេទ្យមិនព្រមរហូតដល់មានការប្រកែកគ្នា ប្រហែលកន្លះម៉ោង ទើបគ្រូពេទ្យព្រមវះកាត់ឱ្យ។
លោក សុភក្តី ឱ្យVODដឹងបន្ថែមនៅថ្ងៃទី១៨ ខែកុម្ភៈនេះ ដោយចោទជាសំណួរថា ចុះបើសិនជារឿងនេះ កើតលើគ្រួសារគ្រូពេទ្យវិញ តើមានឈឺចាប់បែបណាដែរ?។
លោកថា៖ «ជុំវិញនឹងករណីរឿងប្រពន្ធខ្ញុំសម្រាលកូននេះ ខ្ញុំចង់ជម្រាបបងថា ខ្ញុំមិនបានដាក់ពាក្យបណ្ដឹងឬឲ្យរកយុត្តិធម៌ទេ គ្រាន់តែខ្ញុំចង់អំពាវនាវដល់អ្នកគ្រូពេទ្យលោកគ្រូពេទ្យ ដែលបម្រើការងារទាំងអស់ សូមមេត្តាយកចិត្តទុកដាក់ជួយមើលថែអ្នកជំងឺ ឱ្យដូចជាក្រុមគ្រួសារយើងអ៊ីចឹង ព្រោះថាជីវិតមនុស្សថ្លៃណាស់ យើងមិនអាចមើលងាយជីវិតមនុស្សបានទេ អ៊ីចឹងខ្ញុំមានទៅលើកម្រាមដៃសុំឲ្យលោកគ្រូអ្នកគ្រូទាំងអស់ មេត្តាយកចិត្តទុកដាក់ជាមួយនឹងអ្នកជំងឺ»។
កន្លងទៅគ្លីនិកឯកជនមួយឈ្មោះ សុងហាក់ ម៉ារីណា មានទីតាំងស្ថិតនៅស្រុកបាទី ខេត្តតាកែវ បានដឹកសពស្រ្តីម្នាក់ អាយុ៤១ឆ្នាំ និងក្មេងអាយុ៣ឆ្នាំម្នាក់ ដែលនៅរស់ ទៅប្លុងចោលនៅគម្ពោធព្រៃមួយកន្លែង ស្ថិតក្នុងភូមិបឹងពញ្ញាគុក ឃុំត្រពាំងក្រសាំង ស្រុកបាទី ដែលគេប្រទះឃើញកាលពីថ្ងៃទី១៩ ខែវិច្ឆិកា ឆ្នាំ២០២៤នេះ។
ក្រោយមកម្ចាស់គ្លីនិកនោះ ត្រូវបានចាប់ខ្លួន ចោទពីបទ «មនុស្សឃាតដោយអចេតនា» និងបទ «ទារុណកម្ម និងអំពើឃោរឃៅមានស្ថានទម្ងន់ទោស» ជាដើម៕
