Social Issues, ព័ត៌មានជាតិ, សង្គម

សង្គមអយុត្តិធម៌នឹងរងគ្រោះគ្រប់គ្នារួមទាំងអ្នកនៅក្បែរមេដឹកនាំគ្រាន់តែខ្លះមិនទាន់ដល់វេន

លោក ញឹម សុខន
| ២០ កុម្ភៈ ២០២៥
ម៉ោង ២២:៣៩

ករណី លោកបណ្ឌិត សុខ ទូច ប្រធានរាជបណ្ឌិតសភាកម្ពុជា មានឋានៈស្មើរដ្ឋមន្ត្រីដែលត្រូវបានកម្លាំងនគរបាលចរាចរណ៍ក្រុងភ្នំពេញ រុញច្រាននិងប្រើពាក្យសម្តីប្រមាថមើលងាយ ធ្វើហាក់បីដូចលោកជាឧក្រិដ្ឋជន ដោយសារតែលោកបានទាមទារ សុំឱ្យប្តូរទុយោផ្លុំរកជាតិអាល់កុលកាលពីយប់ថ្ងៃទី១៧ ខែកុម្ភៈនោះ វាជាជ្រុងមួយដែលឆ្លុះបញ្ចាំងឱ្យឃើញកាន់តែច្បាស់ថែមទៀត ពីការអនុវត្តច្បាប់ និងកម្រិតសីលធម៌របស់កងកម្លាំងសមត្ថកិច្ច របស់រដ្ឋាភិបាលដែលតែងតែបង្កឱ្យមានការឈឺចាប់ដល់ប្រជាពលរដ្ឋ ដែលជាអ្នករកប្រាក់បង់ពន្ធ ដើម្បីបើកប្រាក់ខែឱ្យមន្ត្រីទាំងនោះ។

នៅពេលដែលលោកបណ្ឌិត សុខ ទូច ត្រូវបានសមត្ថកិច្ចស្នើឱ្យចុះពីរថយន្ត ដើម្បីផ្លុំត្រួតពិនិត្យជាតិអាល់កុល នៅតាមដងផ្លូវកាលពីយប់ថ្ងៃទី១៧ ខែកុម្ភៈ ប្រធានរាជបណ្ឌិតសភាកម្ពុជារូបនេះ ក៏ចុះពីរថយន្តហើយស្នើសុំប្តូរទុយោផ្លុំ ដោយសារតែបារម្ភខ្លាចឆ្លងមេរោគ។ ប៉ុន្តែសមត្ថកិច្ចម្នាក់បាននិយាយមកកាន់លោកថា «ហ្ហែងស្អី មកបញ្ជាសមត្ថកិច្ច?»។

សម្តីអសីលធម៌នេះ បានធ្វើឱ្យលោក សុខ ទូច ទ្រាំមិនបាន ក៏ខឹងច្រឡោត។ ប៉ុន្តែក្រោយមកលោកក៏បានសហការផ្លុំដល់ទៅ៤-៥ដង នៅតែមិនឃើញជាតិអាល់កុល។ តែប៉ូលិសក៏នៅតែបង្ខំឱ្យគាត់ផ្លុំទៀត ដែលរូបភាពនេះ វាហាក់បីដូចជាដាក់សម្ពាធ ដើម្បីចាប់កំហុសដោយប៉ូលិសលើកហេតុផលថា ផ្លុំមិនបានត្រឹមត្រូវ។

នៅពេលនោះ លោក សុខ ទូច ក៏ឈប់ផ្លុំ ហើយក៏ដើរសំដៅទៅរថយន្តរបស់លោក ដើម្បីអូសវ៉ាលីចេញ ពីរថយន្តតែត្រូវបានកម្លាំងប៉ូលិសទប់ស្កាត់ដោយរុញច្រានលោក មិនឱ្យចេញពីកន្លែងកើតហេតុ ធ្វើហាក់បីដូចជារូបលោក សុខ ទូច ជាឧក្រិដ្ឋជន។

តែយ៉ាងណា លោក សុខ ទូច នៅតែខំព្យាយាមអូសវ៉ាលីគេចចេញពីកន្លែងកើតហេតុ រហូតទាល់តែបាន។ នេះបើយោងតាម លោក សុខ ទូច និងវិដេអូឃ្លីប ដែលត្រូវបានបង្ហោះនិងចែកចាយព្រោងព្រាតតាមបណ្តាញសង្គម ចាប់តាំងពីថ្ងៃទី១៨ ខែកុម្ភៈ ឆ្នាំ២០២៥។

លោក សុខ ទូច ធ្លាប់បានថ្លែងនៅក្នុងវេទិកាមួយ កាលពីពេលថ្មីៗនេះថា ប្រសិនបើការចាប់ផាកពិន័យតាមដងផ្លូវយកប្រាក់ក្នុងចំនួនដ៏ច្រើនពីប្រជាពលរដ្ឋ ប៉ុន្តែបើមិនបានធ្វើឱ្យចំនួនគ្រោះថ្នាក់ចរាចរណ៍ ដែលធ្វើឱ្យមនុស្សស្លាប់មានការថយចុះទេ គេគួរតែឈប់ដាក់កម្លាំងនគរបាលធ្វើការត្រួតពិនិត្យទៅ ពីព្រោះវារំខានណាស់ សូម្បីតែលោកចេញពីកន្លែងធ្វើការ ទម្រាំទៅដល់ផ្ទះ គឺមានប៉ូលិសចរាចរណ៍ត្រួតពិនិត្យ ដល់ទៅ៤កន្លែង។

ប៉ុន្តែលោកថា បើដាក់កម្លាំងប៉ូលិសត្រួតពិនិត្យធ្វើឱ្យចំនួននៃគ្រោះថ្នាក់ចរាចរណ៍ថយចុះ ក៏បន្តដាក់ទៀតទៅ។ អ្នកប្រើប្រាស់បណ្តាញសង្គមជាច្រើន បានបញ្ចេញប្រតិកម្មព្រោងព្រាត ចំពោះករណីលោកបណ្ឌិត សុខ ទូច នេះដោយពួកគេមួយចំនួន បានលើកឡើងថា ពួកគេក៏ធ្លាប់ត្រូវបានប៉ូលិសចរាចរណ៍ ជេរប្រមាថ និងរឹបអូសម៉ូតូយកទៅឃុំចោល នៅអធិការខណ្ឌ និងត្រូវតម្រូវ ឱ្យបង់ប្រាក់ពិន័យ ក្នុងចំនួនដ៏ច្រើនផងដែរ។

អ្នកខ្លះទៀត សរសេរថា ការផាកពិន័យ ក្នុងចំនួនទឹកប្រាក់ដ៏ច្រើនពីអ្នកប្រើប្រាស់ផ្លូវ ដែលអ្នកខ្លះមិនទាំងមានកំហុសអ្វីធំដុំផងនោះ គឺហាក់បីដូចជាបានក្លាយជាមុខរបររកប្រាក់យ៉ាងកាក់កប របស់ប៉ូលិសចរាចរណ៍ទៅហើយ។

ពលរដ្ឋខ្លះសរសេរថា ប៉ូលិសចរាចរណ៍បច្ចុប្បន្ន ប្រៀបដូចជាចោរចាប់ជម្រិតស្របច្បាប់ ដោយទាមទារយកប្រាក់ច្រើនៗ មានលើសពី១០ម៉ឺនរៀល និងរហូតដល់២-៣រយដុល្លារក៏មាន បើទោះបីជាករណីខ្លះគ្រាន់តែជាកំហុសបន្តិចបន្តួចក៏ដោយ។

ជាញឹកញាប់គេឃើញមានឃ្លីបវិដេអូជាច្រើន ត្រូវបានគេបង្ហោះតាមបណ្តាញសង្គម ដែលប៉ូលិសចរាចរណ៍បានកាក់រថយន្តអ្នកដំណើរ ឬអ្នកបើកបរម៉ូតូ ទាំងដែលអ្នកបើកបរទាំងនោះ មិនបានបើកបរល្មើសច្បាប់ ហើយមានករណីខ្លះ ប៉ូលិសចរាចរណ៍ បានចាប់ទាញដៃម៉ូតូធ្វើឱ្យអ្នកបើកបរម៉ូតូដួលច្រង៉ាប់ច្រង៉ិល បណ្តាលឱ្យរងរបួស និងករណីខ្លះធ្វើឱ្យអ្នកបើកបរម៉ូតូ រេដៃចង្កូតម៉ូតូប៊ិះចូលឡាន ដែលកំពុងបើកបរក្នុងល្បឿនយ៉ាងលឿនក៏មាន។

លោក ជួន ណារិន្ទ អគ្គស្នងការរងនគរបាលជាតិ កាលពីថ្ងៃទី១៨ខែកុម្ភៈ បានបញ្ជាឱ្យការិយាល័យបុគ្គលិក អញ្ជើញមន្រ្តីនគរបាល ដែលចុះអនុវត្តច្បាប់ចរាចរណ៍ នៅគោលដៅខណ្ឌសែនសុខ និង លោក សុខ ទូច ចូលទៅដោះស្រាយបញ្ហាដែលមានការបង្ហោះផ្សព្វផ្សាយតាមបណ្តាញសង្គម ដោយចោទប្រកាន់មកលើសមត្ថកិច្ចថា បានប្រើពាក្យមិនសមរម្យចំពោះគាត់។

លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ មិនអាចទាក់ទងសុំធ្វើអត្ថាធិប្បាយលើបញ្ហានេះបានទេ នៅថ្ងៃទី១៩ ខែកុម្ភៈនេះ។

ប៉ុន្តែ លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានសរសេរបង្ហោះលើហ្វេសប៊ុករបស់លោក នៅថ្ងៃទី១៩ខែកុម្ភៈនេះថា ករណីបណ្ឌិត សុខ ទូច ជាមួយនគរបាលចរាចរណ៍បានក្លាយជាអាជីវកម្មដោយមិនដឹងខ្លួន។

លោកលើកឡើងថា អ្នកមិនចូលចិត្តបណ្ឌិត សុខ ទូច បានថែមអំបិលប្រហុក ដើម្បីទាញទម្លាក់បណ្ឌិត សុខ ទូច ។ ឯអ្នកមិនចូលចិត្តនគរបាលចរាចរណ៍ ក៏ប្រឹងថែមទឹកត្រីនិងប៊ីចេង ដើម្បីវាយប្រហារនគរបាលចរាចរណ៍។

លោក ហ៊ុន សែន បានចោទសួរថា តើអ្នកណាជាអ្នកទទួលផលចំណេញលើហេតុការណ៍នេះ? លោកក៏បានឆ្លើយក្នុងសម្តីដើមថា៖ «គ្មានអ្នកណាចំណេញនោះឡើយ តែផ្ទុយទៅវិញគឺខាតទាំងអស់គ្នា»។

លោកជំរុញឱ្យអ្នកពាក់ព័ន្ធ សូមបញ្ចប់រឿងនេះ តាមរបៀបឈ្នះឈ្នះ រាប់ទាំងអ្នកផ្តល់សារមកលោក វាយប្រហារម្ខាងៗ ដោយថា បើលុបសារនោះចោលខ្លួនឯងជាការល្អ ព្រោះលោកបានមើលរួចហើយ។

យ៉ាងណាក្តី លោក យង់ ពៅ អគ្គលេខាធិការរាជបណ្ឌិតសភាកម្ពុជារបស់រដ្ឋាភិបាល លើកឡើងថា ប៉ូលិសមិនគួរយកការផាកពិន័យ ជាគោលការណ៍ធំ ដូចពេលបច្ចុប្បន្ននេះទេ។

តែត្រូវយកការអប់រំជាធំវិញ ទើបជួយដល់ពលរដ្ឋ ពីព្រោះបើយកការផាកពិន័យ ជាគោលការណ៍ធំនោះ ធ្វើឱ្យពលរដ្ឋគុំគួនរដ្ឋាភិបាលទៅវិញ។

បើតាមលោក យង់ ពៅ បញ្ហាចរាចរណ៍នេះ ពលរដ្ឋឈឺចាប់យូរហើយ ដូចករណីកសិករដឹកបន្លែមកផ្សារលក់ចំណេញបានប្រាក់ ៣ម៉ឺនរៀល ហើយបើចំថ្ងៃស៊យ នគរបាលចាប់ល្បឿន អស់៥ម៉ឺនរៀល នោះកសិកររូបនោះនឹងខាតចូលដើម ខណៈត្រូវសន្សំប្រាក់បង់សងធនាគារថែមទៀត ហើយបញ្ហាទាំងអស់នេះ អ្នកខុសចុងក្រោយ គឺថ្នាក់ដឹកនាំកំពូលរបស់រដ្ឋាភិបាល។

លោក យង់ ពៅ បានសរសេរក្នុងសម្តីដើមថា៖ «ករណីខ្ញុំផ្ទាល់, ខ្ញុំចុះឃោសនាបោះឆ្នោត មានម្តងនោះ ក៏លោកបងនគរបាលផាកល្បឿនអស់៣០ម៉ឺនរៀលដែរ។ អាសូរផងអស់លោក កុំឱ្យពលរដ្ឋ ទ្រាំនឹងការអនុវត្តច្បាប់ មិនសុចរិតភាពពេកអី កែផង»។

ចំណែកលោកបណ្ឌិត មាស នី អ្នកសិក្សាស្រាវជ្រាវពីការអភិវឌ្ឍសង្គម បានសរសេរនៅលើហ្វេសប៊ុករបស់លោកថា ករណីលោកបណ្ឌិត សុខ ទូច អាចបានជាមេរៀនមួយសម្រាប់ឱ្យមានការពិនិត្យមើលឡើងវិញលើក្រមសីលធម៌របស់មន្ត្រីអនុវត្តន៍ច្បាប់ ដែលទទួលប្រាក់ខែពីការបង់ពន្ធរបស់រាស្ត្រ និងបម្រើរាស្រ្ត។

ជាមួយគ្នានេះដែរ លោកឧកញ៉ា ម៉ុង ឫទ្ធី សមាជិកព្រឹទ្ធសភាគណបក្សប្រជាជនកម្ពុជា ក៏បានសរសេរនៅលើហ្វេសប៊ុកផងដែរថា មិនយូរមិនឆាប់ទេ ទង្វើរដូចករណីលោក សុខ ទូច នេះវានឹងអាចរីករាលដាលដល់រូបលោក ឬអ្នកតូច អ្នកធំ និងអ្នកមធ្យមផ្សេងទៀតជាក់ជាមិនខាន។

អ្នកឃ្លាំមើលសង្គម បានលើកឡើងថា ករណីរបស់លោកបណ្ឌិត សុខ ទូច ដែលរងការប្រមាថមាក់ងាយពីកម្លាំងនគរបាលចរាចរណ៍ វាជារឿងតូចតាចមួយ ហើយការដែលពលរដ្ឋហ៊ានបញ្ចេញមតិព្រោងព្រាតនៅលើបណ្តាញសង្គម ធ្វើឱ្យរឿងនេះ ហាក់ដូចជារឿងធំដុំ គឺដោយសារតែលោក សុខ ទូច គឺជាមនុស្សដែលគាំទ្ររដ្ឋាភិបាល ខណៈដែលកន្លងមក ប្រជាពលរដ្ឋធម្មតា រងការរំលោភបំពាន ជម្រិតទារប្រាក់យ៉ាងច្រើនក្រោមលេសអនុវត្តច្បាប់ របស់ប៉ូលិសចរាចរណ៍។

ប៉ុន្តែមិនសូវមានអ្នកហ៊ានលើកយកមកនិយាយតាមបណ្តាញសង្គមឡើយ ដោយសារតែខ្លាចត្រូវសមត្ថកិច្ចប្តឹងចាប់ដាក់ពន្ធនាគារ។

បន្ថែមពីនេះ កន្លងមក មានរឿងអយុត្តិធម៌ច្រើនណាស់ ដែលធ្វើឡើងដោយកម្លាំងសមត្ថកិច្ចអាជ្ញាធរនានា ទៅលើសកម្មជនគណបក្សប្រឆាំង។

មានទាំងការវ៉ៃដំ បណ្តាលឱ្យរងរបួសធ្ងន់ធ្ងរ ស្ត្រីសកម្មជនដីធ្លី សកម្មជនបរិស្ថាន និងបុគ្គលិកនៅក្រុមហ៊ុនណាហ្គាវើលជាដើម ត្រូវបានកម្លាំងសមត្ថកិច្ចរុញច្រាន ចាប់បោះដាក់ឡានដូចសត្វធាតុ ប្រមាថមើលងាយ ខណៈពួកគាត់គ្រាន់តែធ្វើការតវ៉ាទៅតាមផ្លូវច្បាប់ ប្រឆាំងនឹងការរំលោភបំពានផ្សេងៗ និងការអនុវត្តច្បាប់មិនត្រឹមត្រូវជាដើម។

រឿងរ៉ាវអយុត្តិធម៌របស់ពួកគាត់ កុំថាឡើយដល់ទៅមានអ្នកហ៊ានថតបង្ហោះ ចែករំលែក ឬក៏បញ្ចេញមតិ សូម្បីតែចុចឡៃក៏មិនហ៊ានផង ដោយសារតែមន្ត្រីរដ្ឋាភិបាលបានចោទប្រកាន់និងលាបពណ៌ពលរដ្ឋរងគ្រោះទាំងនោះថា ជាក្រុមបដិវត្តន៍ពណ៌ ជ្រុលនិយម បម្រើបរទេសជាដើម។

សម្រាប់លោក ហេង គឹមហុង ប្រធានប្រតិបត្តិសមាគមបណ្តាញយុវជនកម្ពុជា(CYN) និងជាសកម្មជនការពារបរិស្ថាន និងធនធានធម្មជាតិ បានថ្លែងថា ការប្រើកម្លាំងដោយកំរោល ឬជាក្រុមគ្មានសមាមាត្រ និងការប្រមាថមាក់ងាយមិនគួរប្រព្រឹត្ត ដោយមន្ត្រីរាជការដែលទទួលប្រាក់ខែ កើតចេញពីញើសឈាមដែលរាស្ត្រខំត្រដរបង់ពន្ធឡើយ ស្តាយពន្ធដែលខំបង់។

គួររំលឹកថា លោកបណ្ឌិត កែម ឡី អ្នកសិក្សាស្រាវជ្រាវពីការអភិវឌ្ឍសង្គម និងជាអ្នកវិភាគឯករាជ្យ ដែលត្រូវបានខ្មាន់កាំភ្លើងបាញ់សម្លាប់ កាលពីថ្ងៃទី១០ ខែកក្កដា ឆ្នាំ២០១៦ ធ្លាប់បានថ្លែងកាលលោកនៅមានជីវិតថា «សង្គមមួយដែលគ្របដណ្តប់ទៅដោយអំពើអយុត្តិធម៌ ការអនុវត្តច្បាប់មិនបានត្រឹមត្រូវ មនុស្សគ្រប់គ្នានៅក្នុងសង្គមនោះនឹងទទួលរងគ្រោះ រងនូវភាពអយុត្តិធម៌ដោយចៀសមិនរួច គ្រាន់តែមិនទាន់ដល់វេនរបស់អ្នកប៉ុណ្ណោះ»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។