សហជីពនៅក្រុមហ៊ុនណាហ្គាវើលដ៏ បន្តទាមទារឱ្យក្រសួងការងារ និងក្រុមហ៊ុនណាហ្គាវើលដ៏ រកដំណោះស្រាយបញ្ចប់វិវាទការងារ និងជំរុញឱ្យមានការលក្ខខណ្ឌការងារល្អប្រសើរនៅក្នុងក្រុមហ៊ុនកាស៊ីណូមួយនេះ ខណៈភាគីក្រុមហ៊ុននៅបន្តរំលោភបំពានសិទ្ធិសេរីភាពសហជីព និងបញ្ឈប់បុគ្គលិកផ្ទុយពីច្បាប់ការងារ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានលើកឡើងនៅថ្ងៃទី២០ ខែកុម្ភៈនេះថា កូដករណាហ្គាវើលដ៏ប្រមាណ ៥០នាក់ គ្រោងនឹងទៅក្រសួងការងារ នៅថ្ងៃស្អែកនេះ ដើម្បីតាមដានពាក្យបណ្តឹងរបស់ខ្លួន ដែលបានដាក់ទៅក្រសួង កាលពីថ្ងៃទី១០ ខែមករា ដែលមកដល់ពេលនេះ មានរយៈពេលជាង១ខែមកហើយ ដែលក្រសួងមិនមានការឆ្លើយតប។
កញ្ញាបន្តថា កូដករនៅតែបន្តទាមទារឱ្យក្រសួងដោះស្រាយ ទៅលើការប្តឹងទាមទារចំនួន ៣ចំណុច ក្នុងនោះមាន ទាមទារឱ្យក្រុមហ៊ុនទទួលយកកម្មករនិយោជិតចំនួន ២៩នាក់ នៅមជ្ឈមណ្ឌលបណ្តុះបណ្តាល(Naga Academy) ចូលធ្វើការវិញ, ទាមទារឱ្យក្រុមហ៊ុនទទួលយកកម្មករនិយោជិត ចំនួន ២៨១នាក់ និង ETP ចំនួន ១១នាក់ ដែលបានចូលរួមធ្វើកូដកម្ម ចូលធ្វើការងារនៅកន្លែងដើមវិញ និងទាមទារឱ្យក្រុមហ៊ុនទទួលយកកម្មករនិយោជិតចំនួន ៨៥នាក់ ដែលក្រុមហ៊ុនបានបញ្ឈប់ដោយខុសច្បាប់ចូលធ្វើការវិញ ដោយគិតប្រាក់រំលឹកចាប់ពីថ្ងៃបញ្ឈប់រហូតដល់ថ្ងៃចូលធ្វើការវិញ។
កញ្ញាថា៖ «តាំងពីខែមករា ឆ្នាំ២០២៥ហ្នឹងមក រយៈពេលជាង១ខែហើយ យើងអត់មានទទួលបានដំណឹងអីសោះពីខាងក្រសួង ថាតើក្រសួងនឹងចាត់វិធានការទៅតាមបណ្តឹងរបស់កម្មករឬអត់? អីចឹងបានជាស្អែកហ្នឹង ពួកយើងសម្រេចថា នឹងទៅតាមដាន ស្នើសុំពន្លឿន ឱ្យក្រសួងគាត់នីតិវិធីពន្លឿនឱ្យលឿន ដើម្បីចាត់វិធានការទៅលើបណ្តឹងរបស់កម្មករចំនួន ៣ចំណុចហ្នឹង»។
កញ្ញា ឈឹម ស៊ីថរ បន្តថា ការទាមទារនេះ ដោយសារតែសហជីពនៅតែរកឃើញថា ក្រុមហ៊ុនណាហ្គានៅតែបន្តការរើសអើងកម្មករនិយោជិត ដែលចូលរួមធ្វើកូដកម្មទាមទារឱ្យក្រុមហ៊ុនគោរពលក្ខខណ្ឌការងារទៅតាមច្បាប់ស្តីពីការងារ។
កញ្ញានិយាយថា៖ «យើងឃើញថា អ្វីដែលពួកយើងទទួលរងពីក្រុមហ៊ុនណាហ្គាវើលដ៏ គឺវាអយុត្តិធម៌ហួសហេតុ ហើយវាជាការបំពានទៅលើសេរីភាពសហជីព ហើយនិងច្បាប់ការងារ ដោយអត់មានប៉ប្រិចភ្នែក អត់មានញញើតអ្វីទាំងអស់ អីចឹងទៅអ្វីដែលទាំងអស់គ្នា យើងមិនអាចបោះបង់ចោលការទាមទារហ្នឹង ដោយសារយើងអត់ចង់ឱ្យក្រុមហ៊ុនហ្នឹង កើតជាគំរូអាក្រក់ នៅក្នុងការរំលោភសិទ្ធិការងារកម្មករ បំបិទសិទ្ធិសេរីភាពសហជីពទេ ព្រោះថា បើសិនជាក្រុមហ៊ុនហ្នឹងធ្វើបាន បានន័យថា ក្រុមហ៊ុនផ្សេងទៀតក៏ធ្វើបានដែរ ហើយខាងក្រសួងទៀតសោត ក៏អត់ត្រូវនៅក្នុងការចូលដៃចូលជើង ឬក៏បណ្តោយឱ្យខាងក្រុមហ៊ុនហ្នឹងធ្វើអញ្ចឹងតាមអំពើចិត្តទេ»។
ប្រធានសហជីពរូបនេះ ក៏បានអំពាវនាវឱ្យក្រសួងការងារ ពន្លឿនការដោះស្រាយវិវាទនេះឱ្យបានឆាប់ ព្រោះថាការបន្តអូសបន្លាយពេលវេលាមិនដោះស្រាយបញ្ហានេះ នឹងធ្វើឱ្យកម្ពុជាបាក់មុខ និងរងការរិះគន់ពីសហគមន៍អន្តរជាតិ។
VOD មិនអាចសុំការអត្ថាធិប្បាយពីថៅកែក្រុមហ៊ុនណាហ្គាវើលដ៏ លោក ចេន យីហ្វុង និងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានទេ នៅថ្ងៃនេះ។
តែយ៉ាងណា លោក កត្តា អ៊ន ធ្លាប់បានគូសបញ្ជាក់យ៉ាងខ្លីថា ករណីវិវាទការងារនៅក្រុមហ៊ុនណាហ្គានេះ ក្រសួងបានដោះស្រាយមកជាហូរហែមកហើយ ហើយខាងក្រុមហ៊ុនក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារ ចូលគណនីធនាគារអតីតបុគ្គលិកដែលក្រុមហ៊ុនបានបញ្ចប់កិច្ចសន្យាការងារចំនួន ៣៧៣នាក់ រួចមកហើយដែរ។
អ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា មានប្រសាសន៍នៅថ្ងៃនេះថា បញ្ហាវិវាទការងារនៅក្រុមហ៊ុនណាហ្គា បានកើតឡើងជាង ៣ឆ្នាំមកហើយ ប៉ុន្តែការដោះស្រាយពីសំណាក់ក្រសួងការងារ និងអ្នកពាក់ព័ន្ធ ហាក់មិនបានដោះស្រាយឱ្យចំនឹងស្ថានភាពដែលបានកើតឡើងនោះទេ បែរជាមានការចោទប្រកាន់កូដករ ទៅជារឿងញុះញង់ ទៅជារឿងនយោបាយទៅវិញ បើទោះជាក្រុមកូដករបានអះអាងម្តងហើយម្តងទៀតថា វាជាវិវាទការងារក៏ដោយ។
អ្នកស្រីថា៖ «រឿងប៉ុនត្រឹមតែវិវាទការងារទេ ប៉ុន្តែយើងមើលឃើញថា ទំហំនៃការចោទប្រកាន់វាធំលើសពីទំហំការងារ បើទោះបីជាកម្មករនិយោជិតប្រឹងបង្ហាញអំពីជំហរខ្លួនឯងច្បាស់លាស់ ថាវាគឺជាវិវាទការងារ ដែលចែងក្នុងច្បាប់ការងារម៉េចក៏ដោយ ប៉ុន្តែកាលណាអត់ដោះស្រាយទៅតាមនីតិវិធី ទៅជាដាក់រឿងកម្មករនិយោជិត ទៅជារឿងនយោបាយ រឿងញុះញង់ រឿងអីហ្នឹង ខ្ញុំមើលឃើញថា វាអត់បានដោះស្រាយបញ្ហាចំពោះមុខទេ អីចឹងក្នុងនាមយើងជាប្រជាពលរដ្ឋខ្មែរ ក្នុងនាមយើងជាថ្នាក់ដឹកនាំសហជីព យើងចង់ឃើញរដ្ឋហ្នឹង បើសិនជាមានការអន្តរាគមន៍ គឺអន្តរាគមន៍ឱ្យស្របទៅតាមអំណាចរបស់ខ្លួន ហើយមើលសុភវិនិច្ឆ័យឱ្យបានត្រឹមត្រូវ ហើយមិនលម្អៀង»។
ចំណែក លោក ឃុន ថារ៉ូ មន្ត្រីកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ ក៏ធ្លាប់លើកឡើងដែរថា ការរកដំណោះស្រាយដើម្បីបញ្ចប់វិវាទការងារនៅក្រុមហ៊ុនណាហ្គាវើលដ៏ អាចនឹងធ្វើទៅបាន បើខាងភាគីក្រុមហ៊ុន និងក្រសួងការងារ មានឆន្ទៈក្នុងការដោះស្រាយ និងផ្សះផ្សាបញ្ចប់វិវាទ ព្រោះរឿងនេះពាក់ព័ន្ធនឹងការទទួលយកកូដករឱ្យចូលធ្វើការងារវិញ និងការទទួលស្គាល់សហជីព ខណៈតួលេខកូដករ ដែលនៅតវ៉ាមានចំនួនតិចតួចទេ បើធៀបនឹងពេលកន្លងមក។
ករណីនេះ លោកជំរុញឱ្យគ្រប់ភាគីពាក់ព័ន្ធ ទាំងនិយោជក កម្មករនិយោជិត និងក្រសួងការងារដែលជាអ្នកសម្របសម្រួល លើកបញ្ហាដាក់លើតុរួមគ្នាដើម្បីចរចា និងធ្វើសម្បទានឱ្យគ្នាទៅវិញទៅមក នោះការរកដំណោះស្រាយនឹងអាចបញ្ចប់ទៅបាន។
កូដកម្មអហិង្សារបស់កម្មករនិយោជិតនៅក្រុមហ៊ុនណាហ្គាវើលដ៍ បានចាប់ផ្ដើមកាលពីថ្ងៃទី១៨ ខែធ្នូ ឆ្នាំ២០២១ នៅខាងមុខអាគារក្រុមហ៊ុនកាស៊ីណូមួយនេះ ក្នុងរាជធានីភ្នំពេញ ដោយសារតែក្រុមហ៊ុនបានបញ្ឈប់បុគ្គលិកប្រមាណ ១ ៣០០ នាក់ កាលពីអំឡុងខែមេសា ឆ្នាំ២០២១ ដែលកូដករអះអាងថា ជាចេតនាបំបាត់សហជីពឯករាជ្យក្នុងក្រុមហ៊ុន។
រយៈពេល ៣ឆ្នាំនេះ រដ្ឋាភិបាលត្រកូលហ៊ុន មិនបានខ្វល់ខ្វាយដោះស្រាយបញ្ចប់បញ្ហាឡើយ តែពេលខ្លះអាជ្ញាធរបែរជាប្រើហិង្សាបង្ក្រាបទៅលើក្រុមកូដករ ប្ដឹងផ្ដល់ប្រឆាំងក្រុមកូដករទៅកាន់តុលាការ និងចាប់ខ្លួនប្រធានសហជីពរបស់ពួកគេ ដូចជា កញ្ញា ឈឹម ស៊ីថរ ដាក់ពន្ធនាគារជាដើម។
ទោះជាយ៉ាងណា ក្នុងអំឡុងពេលតវ៉ារយៈពេលជាង ៣ឆ្នាំមកនេះ មានកូដករខ្លះបានអះអាងថា ពួកគេយល់ព្រមទទួលយកសំណោះស្រាយមិនសមរម្យពីក្រុមហ៊ុន ដោយសារការបង្ខិតបង្ខំ និងការគំរាមកំហែងពីអាជ្ញាធរ និងក្រសួងការងារ។ ប៉ុន្តែក្នុងពេលនេះ ក៏នៅមានកម្មកររាប់សិបនាក់ទៀត នៅតែបន្តធ្វើកូដកម្មដើម្បីទាមទារយុត្តិធម៌ និងការគោរពសិទ្ធិការងារ បើទោះជាពួកគេត្រូវប្រឈមនឹងការលំបាកក្នុងជីវភាព និងរងការគំរាមកំហែងក៏ដោយ៕
