កម្មករក្នុងវិស័យកាត់ដេរ បានអំពាវនាវឱ្យភាគីពាក់ព័ន្ធ និងថៅកែរោងចក្រ ពង្រឹងប្រព័ន្ធពង្រឹងសុវត្ថិភាពនៅកន្លែងធ្វើការ និងបញ្ឈប់ការរើសអើងអ្នកមានផ្ទៃពោះ ដើម្បីកាត់បន្ថយបញ្ហាប្រឈមរបស់ស្ត្រី ដែលមានប្រមាណជា ៧៥ភាគរយ ក្នុងវិស័យកាត់ដេរ។
នេះបើតាមការលើកឡើងរបស់មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស(សង់ត្រាល់) ដែលបានផ្សព្វផ្សាយលើគេហទំព័ររបស់ខ្លួននៅថ្ងៃទី២១ ខែកុម្ភៈ ឆ្នាំ២០២៥នេះ ក្នុងទិវាលើកកម្ពស់និងពង្រឹងប្រព័ន្ធគាំ ពារសង្គមសម្រាប់ទាំងអស់គ្នាឱ្យកាន់តែប្រសើរឡើង។
បើតាមសង់ត្រាល់ កម្មករនិយោជិតបម្រើការងារក្នុងវិស័យកាត់ដេរ ដេរស្បែកជើង កាបូប និងសម្ភារៈធ្វើដំណើរ រួមទាំងវិស័យផ្សេងៗក្នុងប្រទេសកម្ពុជា ស្នើទៅនិយោជក ជួយពង្រឹងសុវត្ថិភាពនៅកន្លែងការងារ និងពេលធ្វើដំណើរដល់កម្មករនិយោជិត ព្រមទាំងបញ្ឈប់ការរើសអើងលើស្រ្តីមានផ្ទៃពោះ។
បន្ថែមពីនេះ អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ និយាយថា ការទាមទាររបស់ក្រុមកម្មករនេះ ជាផ្នែកមួយនៅក្នុងយុទ្ធនាការសប្តាហ៍គាំពារសង្គម និង ចូលរួមចំណែកក្នុងការជំរុញទៅដល់ភាគីពាក់ព័ន្ធ ធ្វើគោលនយោបាយបន្ថែមដល់សុវត្ថិភាពស្រ្តី។
លោកថា៖ «ពាក់ព័ន្ធទៅហ្នឹងបញ្ហាសុវត្ថិភាពនៅកន្លែងការងារនេះ សំខាន់ណាស់ដែលយើងឃើញហើយកម្មករនិយោជិតគាត់នៅតែប្រឈម ទៅនិងបញ្ហាគ្រោះថ្នាក់ការងារ ពិសេសប្រព័ន្ធសុវត្ថិភាពនៃការដឹកជញ្ជូននៅពេលបច្ចុប្បន្ន ដែលជាហានិភ័យសម្រាប់កម្មករនិយោជិក ហើយវាមិនមានភាពធានាទៅដល់សុវត្ថិភាព សម្រាប់កម្មករនិយោជិតធ្វើដំណើរពីផ្ទះទៅកន្លែងការងារ និងពីកន្លែងការងារទៅផ្ទះ»។
លោកបន្តថា ពាក់ព័ន្ធបញ្ហាសុខភាពរបស់កម្មករនិយោជិតដែលជាស្រ្តីប្រឈមខ្លាំង ពាក់ព័ន្ធនឹងការសម្រាលកូនប្រកបដោយសុវត្ថិភាព ដែលកម្មករនិយោជិតជាស្រ្តីមួយចំនួន ប្រឈមនឹងការសម្រាលកូនដោយមិនជោគជ័យ។
លោកថា រឿងដែលសំខាន់បំផុតសម្រាប់ស្រ្តី និងតម្រូវឱ្យមានការយកចិត្តទុកដាក់បន្ថែមទៀតនោះ បញ្ហាឈប់សម្រាកលំហែមិត្តភាពដែលចំណុច ចាំបាច់សម្រាប់ស្រ្តីភាគច្រើនដែលធ្វើការងារនៅក្នុងវិស័យនេះ ដែលមានប្រមាណ ៧៥ភាគរយ ភាគច្រើនជាស្រ្តី។
VOD មិនអាចសុំការអត្ថាធិប្បាយពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានទេ នៅថ្ងៃនេះ៕
