កម្ពុជាអះអាងថា ខ្លួនបានឆ្មក់ចូលទីតាំងពីរកន្លែងក្នុងក្រុងប៉ោយប៉ែត ខេត្តបន្ទាយមានជ័យ រកឃើញជនបរទេស ២៣០នាក់ ភាគច្រើនជនជាតិថៃ កំពុងសំងំលាក់ខ្លួនធ្វើប្រតិបត្តិការអនឡាញខុសច្បាប់ និងមានមេក្លោងជាជនជាតិចិន។
អគ្គស្នងការនគរបាលជាតិ និយាយក្នុងលិខិតចុះថ្ងៃទី២៤ ខែកុម្ភៈនេះថា កាលពីថ្ងៃទី២២ និង២៣កុម្ភៈនេះ សមត្ថកិច្ចកម្ពុជា ឆ្មក់ចូលទីតាំង ២កន្លែង ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត រកឃើញជនបរទេសសរុបចំនួន ២៣០នាក់ បន្ទាប់ពីធ្វើការស្រាវជ្រាវជាង៣ខែ។
ប្រភពនោះបញ្ជាក់ថា ជនសង្ស័យទាំងជាង២០០នាក់នោះ មានជនជាតិថៃចំនួន ១២៣នាក់ កំពុងសំងំខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន។
ប្រភពដដែល បន្តថា ការឆ្មក់ចូលទីតាំងអនឡាញខុសច្បាប់នេះ បានធ្វើឡើងក្រោយពីបានស៊ើបអង្កេតរយៈពេល ៣ខែមក ដោយជនបរទេសទាំងនោះ បានរស់នៅក្នុងស្ថានភាពធម្មតា និងព្រមទទួលយកការងារខុសច្បាប់ទាំងនោះដោយស្ម័គ្រចិត្ត។
អគ្គស្នងការដ្ឋាននគរបាលជាតិ បានបន្ថែមទៀតថា ក្រោយចាប់ខ្លួនពលរដ្ឋថៃទាំង ១២៣នាក់នោះ កម្ពុជានឹងស្នើសុំកិច្ចសហការជាមួយនគរបាលភូមិន្ទថៃ ដើម្បីមានវិធានការបន្ត និងសហការ ដើម្បីកំណត់មុខសញ្ញាមេក្លោងសំខាន់ដទៃទៀត នឹងឈានទៅការស្វែងរកចាប់ខ្លួនជនល្មើសជាមេក្លោងយកមកអនុវត្តច្បាប់នៃព្រះរាជាណាចក្រកម្ពុជា ខណៈជនបរទេសផ្សេងទៀត សមត្ថកិច្ចកំពុងសួរនាំ និងចាត់វិធានការផ្លូវច្បាប់ផងដែរ៕
