តំណាងអ្នកមានជម្លោះដីធ្លី ជាមួយក្រុមហ៊ុនវៀតណាម នៅខេត្តក្រចេះ នៅថ្ងៃចន្ទនេះ បានបន្តឡើងមកភ្នំពេញជាថ្មីទៀត ស្នើឱ្យមេដឹកនាំជួយអន្តរាគមន៍យកដីជាង ៥០០ហិកតា ដើម្បីឱ្យពួកគេបានអាស្រ័យផលឡើងវិញ ក្រោយរងគ្រោះជិត១ឆ្នាំ គំរាមកំហែងជីវិតពួកគេជិត ៣០០គ្រួសារ ។
បើតាមតំណាងអ្នកតវ៉ា នៅថ្ងៃទី២៤ ខែកុម្ភៈ ឆ្នាំ២០២៥នេះ ពួកគេ៦នាក់ បានដើរដាក់ញត្តិទៅក្រសួងយុត្តិធម៌ និងក្រសួងកសិកម្ម ឱ្យជួយពន្លឿនការដោះស្រាយ ។
ពួកគេអះអាងថា ការអូសបន្លាយរកដំណោះស្រាយនេះ មិនត្រឹមធ្វើឱ្យពួកគេជួបវិបត្តិជីវភាពប៉ុណ្ណោះទេ តែក្រុមហ៊ុនវៀតណាមនេះ បានប្តឹងតំណាងពួកគេចំនួន៦នាក់ ដែលសកម្មចេញមកតវ៉ាទៅតុលាការ ចោទថាកសិករជាអ្នកបំពានក្រុមហ៊ុនទៅវិញ។
អ្នកស្រី អែល រ៉ូហ្សា និយាយថា មន្ត្រីនៅក្រសួងយុត្តិធម៌បានអះអាងថា ពួកគេនឹងផ្តល់ព័ត៌មានតាមក្រោយពីសំណើរសុំកិច្ចអន្តរាគមន៍ ដើម្បីស្វែងរកយុត្តិធម៌ជុំវិញជម្លោះដីធ្លីនេះ។
អ្នកស្រីថា៖ «ដីពលរដ្ឋមានតិចទេសម្រាប់អាស្រ័យផល ប៉ុន្តែសម្រាប់ដៃមន្ត្រីវិញមានច្រើន ២០ទៅ៣០ហិកតា និងខ្លះ១០០ហិកតា ។ រីឯត្រឹមមេការវៀតណាមសោះ មានដីលក់ហើយមានដីជួលឱ្យក្រុមហ៊ុនទៀត។ ខ្ញុំចង់ឱ្យមន្ត្រីរដ្ឋាភិបាលរកយុត្តិធម៌កន្លែងហ្នឹងឱ្យច្បាស់»។
ដូចគ្នានេះដែរ តំណាងអ្នកភូមិមា្នក់ទៀត គឺលោក ភេម ឡៃ ឱ្យដឹងថា ជិត១ឆ្នាំទៅនេះ ពួកគេបានឡើងមកភ្នំពេញ រកកិច្ចអន្តរាគមន៍ពីមេដឹកនាំញឹកញាប់ ប៉ុន្តែថា មកដល់ពេលនេះគ្មានដំណោះស្រាយទេ។
លោកថា៖ «ក្រុមហ៊ុនពីមុនគេថា គេកាយក្រវ៉ាត់ព្រំដីហ្នឹង គេកាយសិនទេ ចំាំគេដោះដូរដីឱ្យប៉ុន្តែជិត១ឆ្នាំទៅនេះ អត់មានដីដោះដូរឱ្យទេ។ អាជ្ញាធរវិញរកដំណោះស្រាយឱ្យដែរ ប៉ុន្តែដំណោះស្រាយប្រជាពលរដ្ឋទទួលយកអត់បាន ហៅទៅដោះស្រាយកាន់ជើងតែខាងភាគីក្រុមហ៊ុន»។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថាការបន្តអូសបន្លាយមិនព្រមដោះស្រាយនេះ ធ្វើឱ្យប៉ះពាល់ដល់ជីវភាពពលរដ្ឋជាខ្លាំង ជាពិសេសកូនៗពួកគេអាចប្រឈមបោះបង់ការសិក្សាដោយសារខ្វះខាតថវិកា និងបំណុល។
លោកថា៖ «ក្រសួងដែលពាក់ព័ន្ធដែលប្រជាពលរដ្ឋឡើងមកតវ៉ា ដាក់ពាក្យបណ្ដឹង ហាក់ដូចជាស្ងៀមស្ងាត់ ហើយឱ្យក្រុមហ៊ុនប្ដឹងប្រជាពលរដ្ឋទៅតុលាការធ្វើឱ្យប៉ះពាល់ដល់ជីវភាពរស់នៅរបស់ពួកគាត់ ប៉ះពាល់ដល់ការសិក្សាប៉ះពាល់ដល់ធនធានរបស់ប្រទេសទៅទៀត»។
បើតាមញត្តិចុះថ្ងៃទី១៩ ខែមិថុនា ឆ្នាំ២០២៤ ដែលអ្នកភូមិដាក់ទៅក្រសួងដែនដី បានឱ្យដឹងថា កាលពីថ្ងៃទី៣០ ខែឧសភា ឆ្នាំ២០២៤ ក្រុមហ៊ុនកសិកម្មយុវជនស្វាយរៀង ដែលគេស្គាល់ថាជាក្រុមហ៊ុនវៀតណាម បានយកគ្រឿងចក្រមកឈូសឆាយព័ទ្ធ និងបំផ្លាញដំណាំស្រូវ ដំឡូងមី និងដើមស្វាយចន្ទី ដើម្បីយកដីពលរដ្ឋ ស្ថិតនៅឃុំកោះខ្ញែរ ស្រុកសំបូរ ខេត្ដក្រចេះ បានប៉ះពាល់ពលរដ្ឋ៥ភូមិសរុបជាង ២០០គ្រួសារ។
បើទោះបីពួកគេបានកាន់កាប់ និងអាស្រ័យផលតាំងពីឆ្នាំ១៩៨២មក និងអ្នកខ្លះទៀតឆ្នាំ២០០៨ មុន រដ្ឋផ្ដល់ដីឱ្យក្រុមហ៊ុនវៀតណាមក្នុងការវិនិយោគ។
ជុំវិញបញ្ហានេះ ពួកគេបានឡើងមកភ្នំពេញរកក្រសួងពាក់ព័ន្ធ ជួយអន្តរាគមន៍ញឹកញាប់ ឱ្យជួយទប់ស្កាត់ ប៉ុន្តែថាមកដល់ពេលនេះគ្មានដំណោះស្រាយទេ។
ពួកគាត់ថា ចំពេលយុត្តិធម៌ត្រូវបានស្ថាប័នជាតិកប់ចោល ក្រុមហ៊ុនវៀតណាម បានបង្កើនការប្រើដៃតុលាការ ប្តឹងចោទប្រកាន់តំណាងពួកគាត់ជាជនរងគ្រោះទៅវិញ៕
