Social Issues, ព័ត៌មានជាតិ, សង្គម

ថៃបន្តរកឃើញជនសង្ស័យចម្រុះជាតិសាសន៍ពាក់ព័ន្ធបទល្មើសឆបោកក្នុងក្រុងប៉ោយប៉ែត

លោក ប៉ុល សម្បត្តិ
| ២៤ កុម្ភៈ ២០២៥
ម៉ោង ២២:០៤

ថៃបានអះអាងថា ខ្លួនបានសហការជាមួយសមត្ថកិច្ចកម្ពុជា បង្រ្កាបបទល្មើសឆបោកអនឡាញខុសច្បាប់ ចាប់ជនសង្ស័យចម្រុះជាតិសាសន៍ ប្រមាណជាង ២០០នាក់ ក្នុងក្រុងប៉ោងប៉ែត ទឹកដីកម្ពុជា នាពេលថ្មីៗនេះបន្ថែមទៀត ដែលការណ៍នេះ ហាក់ស៊ីគ្នាទៅនឹងការចោទថា គ្រួសារហ៊ុននៅពីក្រោយបទឧក្រិដ្ឋនេះ ។

កាលពីថ្ងៃទី២៣ ខែកុម្ភៈ សារព័ត៌មានថៃ Bangkork Post បានចុះផ្សាយថា «ជនបរទេសចំនួន ២១៥នាក់ រួមទាំងជនជាតិថៃ ត្រូវបានជួយសង្គ្រោះលើទឹកដីកម្ពុជាពាក់ព័ន្ធនឹងអំពើឆបោកនៅកម្ពុជា»។

ប្រភពបន្តថា នគរបាលកម្ពុជាបានជួយសង្គ្រោះជនបរទេសចំនួន ២១៥នាក់ ក្នុងនោះ ១០៩នាក់ ជាជនជាតិថៃ ចេញពីបរិវេណឆបោកក្នុងក្រុងប៉ោយប៉ែត បន្ទាប់ពីមានការសហការគ្នារវាងថៃ និងកម្ពុជា។

ប្រភពនោះ អះអាងថា ប្រតិបត្តិការនេះ ធ្វើឡើងបន្ទាប់ពីកិច្ចប្រជុំបន្ទាន់កាលពីថ្ងៃសុក្រ រវាងអគ្គអធិការនគរបាលភូមិន្ទថៃ និងមន្ត្រីនគរបាលកម្ពុជា ដើម្បីលុបបំបាត់ក្រុមឆបោក ឬហៅ Call Centre។

ប្រភពបន្តថា ប៉ូលិសកម្ពុជាបានឆ្មក់ចូលអគារ ៣ជាន់ ក្នុងខេត្តបន្ទាយមានជ័យ ដែលព័ត៌មានរាយការណ៍ថា ជនឆបោកចិនជួលអគារ ដើម្បីធ្វើអាជីវកម្មឆបោក តាមអ៊ីនធឺណិត និងល្បែងស៊ីសងនៅកម្ពុជា។

ជនបរទេសទាំង ២១៥នាក់ ចាប់បានអំឡុងពេលឆ្មក់ចូល រួមមានជនជាតិថៃ ១០៩នាក់ (ស្រី៥៤នាក់) ប៉ាគីស្ថាន៥០នាក់ ឥណ្ឌា៤៨នាក់ តៃវ៉ាន់៥នាក់ និងឥណ្ឌូនេស៊ី៣នាក់ ខណៈប៉ូលីសកម្ពុជាកំពុងសាកសួរនិងកំណត់ទិន្នន័យពួកគេ។

ជុំវិញរឿងនេះ តំណាងរាស្រ្តបក្សសង្គ្រោះជាតិ លោក សួន សូរីដា និយាយប្រាប់VODនៅថ្ងៃទី២៤ ខែកុម្ភៈនេះថា ករណីនេះ ឆ្លុះបញ្ចាំងពីកម្សោយរបស់មេដឹកនាំកម្ពុជា។

លោកបន្តថា ករណីអាជ្ញាធរថៃជួយបង្រ្កាបនេះ មិនមែនជាលើកទី១ទេ ដែលឆ្លុះបញ្ចាំងកាន់តែច្បាស់ថា មេដឹកនាំកម្ពុជាគ្មានឆន្ទៈចង់បង្រ្កាប ឬលុបបំបាត់អំពើឆបោកនៅកម្ពុជា ។

លោកហាក់ស្តីបន្ទោសថា មេដឹកនាំដែលក្តោបអំណាចយូរ មិនខ្វល់ពីមុខមាត់ប្រទេស ឬបង្កគ្រោះថ្នាក់ ដល់ពលរដ្ឋនោះទេ ដោយធ្វើយ៉ាងណាឱ្យតែការពារអំណាចបាន។

លោកថា៖ «បើនៅពេលដែលរដ្ឋាភិបាលថៃ ចុះមកបង្ក្រាបល្បែងអនឡាញខុសច្បាប់នៅច្រកប៉ោយប៉ែតជាប់ព្រំដែនកម្ពុជាថៃបែបនេះ វាបង្ហាញពីភាពអាម៉ាស់របស់រដ្ឋាភិបាលកម្ពុជា ដែលកង្វះសមត្ថភាពគ្រប់គ្រង និងកង្វះឆន្ទៈនៅក្នុងការបំបាត់ល្បែងអនឡាញខុសច្បាប់នៅកម្ពុជាយើង»។

សម្រាប់ លោក សូរីដា បញ្ហានេះ វានឹងជំរុញឱ្យមានចលាចលសង្គម បើបទឧក្រិដ្ឋនេះកាន់តែរីកធំ ព្រោះវាបង្កការភ័យខ្លាចដល់ប្រទេសក្នុងតំបន់ និងគំរាមកំហែងជីវភាពប្រជាពលរដ្ឋស្លូតត្រង់។

លោកថា៖ «ប្រទេសកម្ពុជា ជាជម្រកល្បែងអនឡាញ និងអំពើឆបោកអីចឹងទៅ អាហ្នឹងជាមុខមាត់ទី១ ហើយទី២ ល្បែងស៊ីសងកើតឡើងបែបនេះ ជះឥទ្ធិពលទៅលើសន្តិសុខជាតិ អន្ដរជាតិ ដូចជា អំពើឆក់ប្លន់ ហើយភាពក្រីក្ររបស់ពលរដ្ឋខ្មែរយើង ព្រោះល្បែងហ្គេមអនឡាញនេះ មិនមែនលេងតែជនជាតិបរទេសទេ សូម្បីតែជនជាតិខ្មែរយើងក៏លេងដែរ ដូច្នេះវាបង្កផលប៉ះពាល់ដល់សង្គមជាតិ»។

ឆ្លើយតបរឿងនេះ អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានការពារវិធានបង្ក្រាបបទល្មើសលើទឹកដីកម្ពុជានេះ ដោយអះអាងថា ភាគីថៃនឹងមិនអាចធ្វើទៅបានជោគជ័យទេ បើកម្ពុជាមិនសហការនោះ ។

លោកគូសបញ្ជាក់ថា មុនឈានដល់វិធានការឆ្មក់ចូលបង្ក្រាបបទល្មើសនៅក្រុងប៉ោងប៉ែតនេះ មន្ត្រីជំនាញកម្ពុជា និងថៃ បានសហការគ្នាជាង៣ខែមកហើយ។

លោកថា៖« គ្មានប៉ូលិសថៃណាម្នាក់មកធ្វើការជាមួយយើងទេ យើងអត់មានទេ ប៉ុន្តែគ្រាន់ថារបៀបនេះគេប្រើប្រាស់ព័ត៌មាន ដើម្បីលុបលាងនូវអ្វីដែលពាក់ព័ន្ធនឹងប្រទេសគេ ហើយគេចង់បង្ហាញថាគេមានអំណាចធ្វើអីផ្ដេសផ្ដាសបាន»។

យ៉ាងណា អតីតឧកញ៉ា លោក ហេង សិទ្ធី ធ្លាប់និយាយថា អ្នកឧកញ៉ា ហ៊ុន តូ នៅពីក្រោយឧក្រិដ្ឋជន លក់គ្រឿងញឿន និងបទឧក្រិដ្ឋឆបោកតាមអនឡាញ ដែលលោកចង់ឃើញ លោក ហ៊ុន ម៉ាណែត ដែលត្រូវជាបងប្អួនជីដូនមួយចាត់វិធានការនេះ។

លោកថា៖ «កាលពីមុនគេស្គាល់កម្ពុជា ជាប្រទេសអច្ឆរិយ អង្គរវត្ត ឥឡូវនេះគេស្គាល់កម្ពុជាដោយសារ ហ៊ុន តូ ការពារឧក្រិដ្ឋជនអនឡាញកម្ពុជា ក្លាយទៅជាកន្លែងបោកប្រាស់ រកស៊ីអនឡាញខុសច្បាប់»។

យ៉ាងណា ក្រោយទម្លាយរឿងនេះ អតីតឧកញ៉ា ហេង សិទ្ធី ត្រូវគេអះអាងថាលោកត្រូវគេចាប់ខ្លួនលើទឹកដីរុស្ស៊ី។

ដោយឡែក ប្រធានសមាគមការពារសិទ្ធិមនុស្សអាដហុក លោក នី សុខា គាំទ្រចំពោះការបង្រ្កាប និងទប់ស្កាត់បទល្មើសឆបោកនេះ។ ប៉ុន្តែលោកថា កម្ពុជាគួរបង្ហាញឆន្ទៈមុះមុតក្នុងការបង្រ្កាបដោយខ្លួនឯង។

លោកបន្តថា ដើម្បីកុំឱ្យខ្មាស់ប្រទេសជិតខាង រដ្ឋាភិបាលនិងអាជ្ញាធរពាក់ព័ន្ធ គួរតែដាក់ចិត្តដាក់កាយបង្រ្កាបបទល្មើសទាំងនេះឱ្យមានប្រសិទ្ធភាព គឺកុំបណ្តោយឱ្យករណីនេះបន្តកើតមានក្នុងសង្គមកម្ពុជា។

លោកថា៖ «ប្រទេសយើងជាប្រទេសមួយ ដែលមានកន្លែងរកស៊ីដែលមិនត្រឹមត្រូវ មិនសុចរិតមានការឆបោក មានការបោកប្រាស់គ្នា ឬក៏មានល្បែងស៊ីសងមានអីហ្នឹងហូរហែរ ជារឿងមួយដែលវាបង្កហានិភ័យទៅដល់អ្នកដែលវិនិយោគទុន ឬក៏អ្នកដែលចូលជាភ្ញៀវទេសចរ ដើម្បីបើករកស៊ី ដូចជាមកកម្សាន្តនៅស្រុកយើង អាហ្នឹងវាជះឥទ្ធិពលមិនល្អធ្វើឲ្យគេខ្លាចរអា គេអត់អាចមករកស៊ី ឬក៏មកលេងស្រុកយើងទេ អ៊ីចឹងអាហ្នឹងវាជះឥទ្ធិពលមិនល្អដល់បញ្ហាទាំងអស់ហ្នឹង វាធ្វើឲ្យធ្លាក់ចុះនូវបញ្ហាសេដ្ឋកិច្ច»។

កាលពីថ្ងៃទី២៩ ខែមករា ប្រព័ន្ធផ្សព្វផ្សាយព័ត៌មានថៃ THAIRATH NEWS ចុះផ្សាយថា តាមរយៈការចុះសង្កេតផ្ទាល់ អគារខ្ពស់ៗច្រើនកន្លែង ភាគច្រើនមានម្ចាស់ជាជនជាតិចិន ក្នុងក្រុងប៉ោយប៉ែត ខេត្តបន្ទាយមានជ័យ បានក្លាយជាជម្រកពួកឧក្រិដ្ឋជនឆបោកតាមប្រព័ន្ធអនឡាញ នាំឱ្យមានការព្រួយបារម្ភ និងបង្កភាពភ័យខ្លាចក្នុងតំបន់នោះ។

ប្រភពនោះ បញ្ជាក់ថា នៅក្រុងប៉ោយប៉ែត មានក្រុមឆបោកតាមអនឡាញ (Callsenter) នៅតាមអគារផ្សេងៗរាប់រយអគារ មានជនជាតិចិន ជាម្ចាស់ហើយមានបុគ្គលិកប្រហែល ១៥០០នាក់ រស់នៅគ្មានការលួចលាក់នៅអគារ ២៥ជាន់ ដែលជាកាស៊ីណូធំនៅក្រុងប៉ោយប៉ែត។

យ៉ាងណា ប៉ុន្មានឆ្នាំចុងក្រោយនេះ ខេត្តមួយចំនួនទៀតរបស់ប្រទេសកម្ពុជា ក៏ត្រូវបានរកឃើញបទឧក្រិដ្ឋឆបោកតាមអនឡាញនេះដូចគ្នាដែរ។

ក្នុងរយៈពេល ៦ខែដើមឆ្នាំ២០២៤ អាជ្ញាធរកម្ពុជា បានបញ្ជូនជនសង្ស័យជនជាតិចិនជាង ១ពាន់ ២រយនាក់ (១២០០នាក់) ឱ្យត្រឡប់ទៅប្រទេសចិនវិញ ក្រោយរកឃើញថា ពួកគេពាក់ព័ន្ធប្រតិបត្តិការនៃអំពើឆបោកតាមអនឡាញនៅកម្ពុជា។

លើសពីនេះរយៈពេល ៩ខែដើមឆ្នាំ២០២៤ កម្ពុជាបានសហការជាមួយស្ថានទូតឥណ្ឌាប្រចាំក្រុងភ្នំពេញ ជួយសង្គ្រោះជនជាតិឥណ្ឌាជិត ៨រយនាក់ (៧៧០) ចេញពីកន្លែងឆបោកតាមអនឡាញបញ្ជូនទៅប្រទេសកំណើតពួកគេវិញ។

បន្ថែមពីនេះ ប៉ុន្មានថ្ងៃមុននេះ កម្ពុជាបានបណ្តេញជនជាតិវៀតណាម ប្រមាណជា ២១៣នាក់ ចេញពីកម្ពុជា តាមច្រកទ្វារព្រំដែនអន្តរជាតិបាវិត ខេត្តស្វាយរៀង ក្រោយរកឃើញពួកគេពាក់ព័ន្ធបទឆបោកតាមអនឡាញ និងបង្ខាំងមនុស្សខុសច្បាប់ និងកំហែងយក ជាដើម។

ករណីដូចគ្នានេះ អំឡុងខែមេសាឆ្នាំ២០២៤ កម្ពុជាបានបណ្តេញជនជាតិវៀតណាមជាង ២៣១នាក់ ចេញពីកម្ពុជា ពាក់ព័ន្ធពីបទល្មើសបទឆបោកតាមអនឡាញដូចគ្នា ដែលរកឃើញក្នុងខេត្តព្រះសីហនុ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។