ជនរងគ្រោះ អះអាងថា ឧក្រិដ្ឋជនឆបោក អតីតឧកញ៉ា ហ៊ី គឹមហុង បានចាប់ផ្តើមដំណើរការទីផ្សារផ្សព្វផ្សាយលើបណ្តាញសង្គម ដើម្បីទាក់ទាញអតិជនថ្មី ខណៈពួកគេជាង ៨ពាន់គ្រួសារ កំពុងរងគ្រោះ ដែលការណ៍នេះពួកគេទាមទារឱ្យរដ្ឋាភិបាលទប់ស្កាត់ និងផ្តល់យុត្តិធម៌។
បើតាមទំព័រហ្វេសបុករបស់ក្រុមហ៊ុនពិភពដីមាសរបស់អតីតឧកញ៉ា ហ៊ី គឹមហុង ដែលបានបង្ហោះនៅថ្ងៃទី២២ ខែកុម្ភៈ ឆ្នាំ២០២៥ បានផ្សព្វផ្សាយពី សកម្មភាពថ្នាក់ដឹកនាំក្រុមហ៊ុននេះចុះទៅពិនិត្យដី ដោយភ្ជាប់រូបភាពចំនួន៧សន្លឹក ដែលគេឃើញរូបអតីតឧកញ៉ា ហ៊ី គឹមហុង រួមទាំងក្រុមការងារច្រើននាក់ នៅទីតាំងវាលស្រែមួយកន្លែង នៅខេត្តកំពង់ស្ពឺ។
បើតាមពលរដ្ឋប្រាប់ VOD ថា ដីដែលលោក ហ៊ី គឹមហុង ទិញនោះមានទីតាំងស្ថិតនៅសង្កាត់ត្រាចទង ក្រុងឧដុង្គម៉ែជ័យ ក្នុងខេត្តកំពង់ស្ពឺ។
ជនរងគ្រោះម្នាក់ លោក មម ម៉េត ប្រាប់VODនៅថ្ងៃទី២៤ ខែកុម្ភៈថា អតីតឧកញ៉ា ហ៊ី គឹមហុង សន្យាលក់ទ្រព្យសងជនរងគ្រោះដែលស្ម័គ្រចិត្តរងចាំដំណោះស្រាយ ក្នុងរយៈពេល ៣៦ខែទៀត ចំពេលតុលាការបានចេញដីការក្សាការពារទ្រព្យអតីតឧកញ៉ារូបនេះ រួចរាល់ហើយតាមបណ្តឹងជនរងគ្រោះកើនឡើងជាង ៣ពាន់នាក់។
បើតាម លោក ម៉ម ម៉េត ការឱ្យរងចាំដំណោះស្រាយ ៣៦ខែនោះ ជាល្បិចបោករបស់លោក ហ៊ី គឹមហុង តែប៉ុណ្ណោះ ហើយថា អ្នកទទួលយកដំណោះស្រាយនេះ មានប្រមាណ ២០០នាក់ប៉ុណ្ណោះក្នុងចំណោមអ្នកចាញ់បោកជាង ៣ពាន់នាក់។
លោកថា៖ «តើលោក ហ៊ី គឹមហុង គាត់សន្យា ជាមួយអ្នកដែលគាំទ្រ៣៦ខែ នោះគាត់ថានឹងលក់ទ្រព្យដើម្បីដោះបំណុល ដោះស្រាយជាមួយនឹងអតិថិជនដែលគាត់រងចាំ ៣៦ខែ អតិថិជនទាំងអស់គ្នាដែលគាត់ដាក់ពាក្យប្ដឹងហ្នឹង! គឺគាត់បានបង្កកខ្លះឃើញចេញដីការក្សាការពារខ្លះចេញដីកាសេចក្ដីបន្ទុកបណ្ដាក់អស់ហើយ តើគាត់បានទ្រព្យពីណាយកមកលក់។ ដូច្នេះហើយបានខ្ញុំគិតថា លោក ហ៊ី គឹមហុង កំពុងតែបន្ដបោកបងប្អូនយើងបន្តទៀត ដូច្នេះហើយសូមឲ្យបងប្អូនទាំងអស់ មេត្តាគិតឡើងវិញ ថាតើទ្រព្យសម្បត្តិ បានពីណាមកទៀត បើអតិថិជនដែលគាត់ដាក់ពាក្យបណ្ដឹងនេះ គឺគាត់បានបង្កកអស់ហើយនោះ»។
លោក ម៉ម ម៉េត ចាញ់បោកក្រុមហ៊ុនពិភពដីមាសអស់ជាង ៣ម៉ឺនដុល្លារ ដែលលុយខ្ចីធនាគារ ហើយលោកត្រូវបង់ធនាគារក្នុងមួយខែជាង ៦០០ដុល្លារ តែដោយសារលោកគ្មានលទ្ធភាពបង់សង ទើបធ្វើឱ្យធនាគារព្រមានប្រើវិធានការច្បាប់។
ជនរងគ្រោះម្នាក់ទៀត លោក ប៊ុន ធឿន ស្នើរដ្ឋាភិបាលទប់ស្កាត់កុំឱ្យអតីតឧកញ៉ា ហ៊ី គឹមហុង បន្តធ្វើសកម្មភាពឃោសនាណាមួយ ព្រោះអាចធ្វើឱ្យពលរដ្ឋផ្សេងទៀត បន្តចាញ់បោកឧកញ៉ារូបនេះកាន់តែច្រើន។
លោកថា ៖ «ប្រជាពលរដ្ឋប្ដឹងស្នើដាក់ពាក្យបណ្ដឹងប្ដឹងចង់បានលុយចង់បានដាក់ឲ្យច្បាប់ដោះស្រាយ ឲ្យបានលុយហ្នឹងមកទូទាត់សងធនាគារវិញទេ។ ប្តឹងទី១ ចង់បានឲ្យ ហ៊ី គឹមហុង ចេញមុខមកដោះស្រាយទូទាត់សំណង ចង់ឲ្យលក់ទ្រព្យ ដែលយកលុយប្រជាពលរដ្ឋទៅទិញរបស់របរ សម្ភារៈលក់សងមកប្រជាពលរដ្ឋវិញ។ ហើយបើអត់មានដំណោះស្រាយទេ បើ ហ៊ី គឺមហុង គ្មានដំណោះស្រាយណាមួយ ចង់ឱ្យចាប់ចូលគុកវិញ»។
ជាមួយគ្នានេះ ហ្វេសប៊ុកឈ្មោះ សេង ហាន បានចែករំលែករូបភាពអតីតឧកញ៉ា ហ៊ី គឺមហុង ដោយបញ្ចេញមតិក្នុងន័យដើមថា៖ «រឿងជំពាក់លុយប្រជាពលរដ្ឋរាប់រយលានដុល្លារ ថតរូបពីរបីប៉ុស្តិ៍ ដើម្បីបន្លំភ្នែកប្រជាពលរដ្ឋមែនទេ? ស្ទីលបែបហ្នឹងប្រើដល់កាលទៀត ការពិតនៅតែការពិត សងលុយប្រជាពលរដ្ឋវិញទៅ ចប់រឿងហើយ។ ឈប់សំដែងអាស្ទីលបែបហ្នឹងទៀតទៅ មិចហើយ ស្ទីលបង្កើតគណៈកម្មការ បន្លែសរីរាង្គ លក់ទ្រព្យ ពូកែណាស់អាខាងល្បិចកលបោកហ្នឹង»។
ហ្វេសប៊ុកខ្លះទៀត ចាត់ទុកសកម្មភាព លោក ហ៊ី គឹមហុង នៅពេលនេះ ជាល្បិចដើម្បីចុះទៅបោកលុយពលរដ្ឋទៀត ហើយពួកគេបានស្នើឱ្យពលរដ្ឋទូទាំងប្រទេស ប្រុងប្រយ័ត្ន កុំឱ្យធ្លាក់ខ្លួនជាជនរងគ្រោះកាន់តែច្រើនទៀត។
អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ក្រោយមក ក្រុមជនរងគ្រោះ អះអាងថា អតីតឧកញ៉ា ហ៊ី គឹមហុង បានប្រើល្បិចបង្កើតគណៈកម្មាធិការ ដោយគ្មានការចូលរួមជនរងគ្រោះ ហើយសម្រេចពន្យាពេល៣ឆ្នាំទៀត ដើម្បីរកសងលុយសងតាមលទ្ធភាព ដែលការណ៍នេះ ពួកគេទាមទារឱ្យចាប់ខ្លួនជនឆបោករូបនេះដាក់ពន្ធនាគារវិញ និងរឹបអូសទ្រព្យសម្បត្តិសងពលរដ្ឋ ខណៈចំនួនអ្នកស្លាប់បានកើនឡើងជិត ២០នាក់ ក្រោមវិបត្តិបំណុល។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ចាត់ទុកការបណ្តែតបណ្តោយឱ្យក្រុមហ៊ុនធ្វើសកម្មភាពបែបនេះ នោះអាចនឹងធ្វើឱ្យមានជនរងគ្រោះកាន់តែច្រើនទៀត បើរដ្ឋាភិបាលមិនចេញមុខទប់ស្កាត់បន្ទាន់ទេនោះ។
លោកថា៖ «បញ្ហាប្រជាពលរដ្ឋដែលលោកត្រូវបានចាញ់បោកក្រុមហ៊ុនហ្នឹង មិនទាន់ត្រូវបានដោះស្រាយហ្នឹង! គួរតែដោះស្រាយសិន ហើយបើសិនជារឿងហ្នឹង មិនទាន់បានដោះស្រាយហើយដំណើរការក្រុមហ៊ុន នៅតែបន្តលក់ដីលក់អីជាបន្ត! អ៊ីចឹង វាអាចមានបញ្ហាកើតឡើងជាបន្តទៀតទេ ពីព្រោះរឿងចាស់មិនទាន់ដោះស្រាយផង ហើយបើក្រុមហ៊ុនដំណើរការលក់ដីហ្នឹងបន្តទៅទៀតមែន អាហ្នឹងវាជាបញ្ហាមួយដែលមិនគួរដំណើរការ ពេលហ្នឹងគួរតែដោះស្រាយរឿងប្រជាពលរដ្ឋដែលមានបញ្ហាឲ្យបានចប់ជាមុនសិន»។
ជុំវិញអំពើឆបោកនេះ ក្រោយយុត្តិធម៌សម្រាប់អ្នកចាញ់បោក អតីតឧកញ៉ា ហ៊ី គឹមហុង ត្រូវបានកប់ចោលច្រើនឆ្នាំ និងមានអ្នកស្លាប់កើនឡើង តែនៅតែគ្មានដំណោះស្រាយនោះ ក្រុមជនរងគ្រោះបានធ្វើយុទ្ធនាការលើបណ្តាញសង្គមចោទថា ឧបសគ្គរារាំងដល់ការស្វែងរកយុត្តិធម៌សម្រាប់ពួកគេ អាចជាប់ពាក់ព័ន្ធមន្ត្រីមានអំណាច នៅពីក្រោយក្រុមហ៊ុនឆបោកនេះ ដោយក្នុងនោះ ពួកគេបានរំលេចមុខអនុប្រធានគណបក្សប្រជាជនកម្ពុជា លោកស្រី ម៉ែន សំអន និងអតីតប្រធានរដ្ឋសភា លោក ហេង សំរិន ផងដែរ៕
