ការបង្កើតក្រុមបង្រ្កាបបទឧក្រិដ្ឋឆបោកតាមអនឡាញ ត្រូវគេមើលឃើញថាជាយុទ្ធសាស្រ្តចាស់ ដើម្បីបិទបាំងកំហុសមេដឹកនាំដែលបានប្រមូលក្រុមឧក្រិដ្ឋជនដាក់ក្បែរខ្លួន ធ្វើឱ្យកម្ពុជារងភាពអាម៉ាស់លើឆាកអន្តរជាតិ និងបានគំរាមគំហែងជីវភាពពលរដ្ឋច្រើនលាននាក់។
ពួកគេព្រួយបារម្ភថា រូបភាពនេះនឹងបន្តគំរាមគំហែងជីវិតពលរដ្ឋខ្មែរ យូរឆ្នាំទៀត បើគ្មានចរន្តផ្លាស់ប្តូរ ដើម្បីពង្រឹងប្រព័ន្ធនីតិរដ្ឋទេនោះ។
ការលើកឡើងនេះ ក្រោយរដ្ឋាភិបាលគ្រួសារហ៊ុន បានបង្កើតគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលមាននាយករដ្ឋមន្រ្តី លោក ហ៊ុន ម៉ាណែតជាប្រធាន ខណៈមេឧក្រិដ្ឋជនជាច្រើនជាទីប្រឹក្សាលោក ហ៊ុន សែន។
បើតាមសេចក្តីសម្រេចចុះថ្ងៃទី២០ ខែកម្ភៈ ឆ្នាំ២០២៥នោះ បញ្ជាក់ថា ក្រុមថ្មីនេះ មានភារកិច្ចស៊ើបអង្កេតដើម្បីបង្រ្កាបការឆបោកតាមប្រព័ន្ធបច្ចេកវិទ្យា ដាក់ចេញវិធានការទប់ស្កាត់អំពើឆបោកតាមប្រព័ន្ធបច្ចេកវិទ្យា និងសហការជាមួយប្រទេសពាក់ព័ន្ធ ដើម្បីប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ជាដើម។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន ចាត់ទុកថា ការបង្កើតក្រុមថ្មីនេះ គ្រាន់តែជាល្បិចជួយបិទបាំងកំហុស លោក ហ៊ុន សែន ដែលបានឱបក្រសោបពួកឧក្រិដ្ឋជនដាក់ក្បែរខ្លួនតែប៉ុណ្ណោះ។
លោកព្រមានថា បទឧក្រិដ្ឋឆបោកតាមអនឡាញ នឹងបន្តពង្រីកខ្លួនជ្រកក្រោមឆ័ត្រមេដឹកនាំកាន់តែខ្លាំង ដោយថា មន្រ្តីអនុវត្តច្បាប់ នឹងមិនហ៊ានចាត់វិធានការលើមេឧក្រិដ្ឋជនទាំងនោះទេ ព្រោះលោក ហ៊ុន សែន គឺជាអ្នកកាងនៅពីក្រោយ ដើម្បីឱ្យឧក្រិដ្ឋជនទាំងនោះ រកលុយចិញ្ចឹមអំណាចរបស់ខ្លួន។
លោកថា៖ «បទល្មើសទាំងអស់នេះ គឺកើតឡើងដោយសារតែអំពើពុករលួយជាប្រព័ន្ធ នៅកម្ពុជា ហើយមួយទៀតដោយសារតែតុលាការយើង ជាតុលាការពុករលួយ ជាតុលាការមិនឯករាជ្យ។ សំខាន់មួយទៀត ដោយសារមេដឹកនាំប្រទេស ដូចជាលោក ហ៊ុន សែន លោក ហ៊ុន ម៉ាណែត ហ្នឹងយកពួកឧក្រិដ្ឋជនទៅដាក់ជុំវិញខ្លួន ជាពិសេសលោក ហ៊ុន សែន តែម្តងគឺ យកឧកញ៉ា លី យ៉ុងផាត់ ឧកញ៉ា កុក អាន ឧកញ៉ា ចេន ហ្ស៊ី សុទ្ធតែជាអ្នកពាក់ព័ន្ធទៅនឹងបទឧក្រិដ្ឋនៃការបង្ខាំងមនុស្សឱ្យឆបោកតាមអនឡាញ»។
ជាការកត់សម្គាល់ ក្រុមឧកញ៉ាដែលអន្តរជាតិរកឃើញថា ជាឧក្រិដ្ឋជន សុទ្ធសឹងតែជាមនុស្សដែលនៅគៀកនឹងគ្រួសារហ៊ុន។
ពួកគេទាំងនោះ រួមមានដូចជា ឧកញ៉ា លី យ៉ុងផាត់ ឧកញ៉ា ហ៊ុន តូ និងឧកញ៉ា ចេន ហ្ស៊ី ដែលត្រូវតុលាការចិនរកឃើញថា ជាឧក្រិដ្ឋជនលាងលុយ និងឆបោកតាមអនឡាញ ជាដើម។
ថ្មីៗនេះ ឧកញ៉ា លី យ៉ុងផាត់ អ្នកគ្រប់គ្រងលុយឱ្យបក្សកាន់អំណាច ត្រូវក្រសួងរតនាគារជាតិអាមេរិក ដាក់ទណ្ឌកម្មបង្កកទ្រព្យសម្បត្តិ ក្រោយមានជាប់ពាក់ព័ន្ធការជួញដូរមនុស្ស ការរកស៊ីឆបោកតាមអនឡាញ។
ចំណែក ឧកញ៉ា ហ៊ុន តូ ត្រូវបានអន្តរជាតិរកឃើញថា ជាឧក្រិដ្ឋជនលាងលុយកខ្វក់ មេខ្លោងឆបោកតាមអនឡាញ និងឧក្រិដ្ឋជនគ្រឿងញៀន តែ គ្មានស្ថាប័នជាតិនៅកម្ពុជា បើកការស៊ើបអង្កេតលើក្មួយប្រុស លោក ហ៊ុន សែន រូបនេះទេ។
សម្រាប់ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត និយាយថា ការបង្កើតក្រុមថ្មីដើម្បីបង្រ្កាបអំពើឆបោកតាមអនឡាញនេះ វាគ្មានប្រសិទ្ធិភាពទេ ព្រោះឧក្រិដ្ឋជនទាំងនោះ ជាប់ពាក់ព័ន្ធយ៉ាងស៊ីជម្រៅជាមួយគ្រួសារហ៊ុន។
លោកសង្កត់ធ្ងន់ថា ការបរាជ័យរបស់រដ្ឋាភិបាលក្នុងការទប់ស្កាត់បទឧក្រិដ្ឋឆបោកនេះ បានធ្វើឱ្យបាត់បង់ភ្ញៀវទេសចរ និងអ្នកមកវិនិយោគ នាំឱ្យប៉ះពាល់ដល់សេដ្ឋកិច្ចជាតិ ហើយថាពលរដ្ឋខ្មែរនឹងធ្លាក់ខ្លួនក្រីក្រ ដែលវានឹងគំរាមដល់ជីវភាពពលរដ្ឋនៅទូទាំងប្រទេស បើមេដឹកនាំមិនហ៊ានវះកាត់ឧក្រិដ្ឋជនដែលជាទីប្រឹក្សារបស់ខ្លួននោះ។
លោកថា៖ «សូម្បីតែមានភស្តុតាងជាក់ស្តែង ដែលផ្តល់ដោយភ្នាក់ងារស៊ើបអង្កេតអន្តរជាតិ ឬក៏ប្រទេសលោកសេរីហើយ នៅតែរដ្ឋាភិបាលកម្ពុជាស៊ុំគ្រលំដដែល។ បន្តលាក់លៀមពួកឧក្រិដ្ឋជន ជាពិសេសពួកមន្រ្តីធំៗរបស់រដ្ឋាភិបាលហ្នឹង! នៅជាប់ស្រកាកនៅពីខាងក្រោយខ្នងនៃអំពើឧក្រិដ្ឋកម្ម ហើយគ្រួសារ លោក ហ៊ុន សែន ជាអ្នកការពារពួកឧក្រិដ្ឋជនទាំងអស់នោះ ។ លោក ហ៊ុន សែន ខ្លួនឯងហ្នឹងកំពុងតែប្រើប្រាស់យន្តការសេវាកម្ម បទឧក្រិដ្ឋកម្មឆបោកហ្នឹង ដើម្បីបន្តជីវិតនយោបាយយ៉ាងជូរជត់ធ្វើបាបប្រជាពលរដ្ឋខ្មែរ បំផ្លិចបំផ្លាញកេរ្តិ៍ឈ្មោះកម្ពុជា»។
កាលពីខែឧសភា ឆ្នាំ២០២៤ របាយការណ៍របស់វិទ្យាស្ថានសហរដ្ឋអាមេរិកដើម្បីសន្តិភាព (USIP) ដែលមានមូលដ្ឋាននៅរដ្ឋធានីវ៉ាស៊ីនតុន ចេញផ្សាយរកឃើញថា កម្ពុជាបានលួចលុយពីពិភពលោកជាង ១២ពាន់លានដុល្លារក្នុង១ឆ្នាំៗ តាមរយៈឧស្សាហកម្មឆបោកតាមអនឡាញ។
ប្រភពនោះថា ក្រុមអ្នកមានអំណាចនៅកម្ពុជា ជាអ្នកចាំការពារឧស្សាហកម្មឆបោកតាមអនឡាញ ដោយសារតែភាពចំណេញមហាសាលនៃឧស្សាហកម្មមួយនេះ។
ជាមួយគ្នានេះ ក្នុងឆ្នាំ២០២៤ដដែល ប្រទេសកូរ៉េ ក៏បានប្រកាសអាសន្នពីការភ័យខ្លាចអំពើចាប់ជំរិតនៅកម្ពុជាផងដែរ ដោយហាមពលរដ្ឋខ្លួនមិនឱ្យធ្វើដំណើរមកកាន់កម្ពុជា ខណៈ ប្រទេសឥណ្ឌាក៏ធ្លាក់រកឃើញថា ជនជាតិខ្លួនប្រមាណ ៥ ០០០នាក់ បានរងគ្រោះដោយការបង្ខាំងមនុស្សខុសច្បាប់នៅកម្ពុជា។
ដោយឡែក នៅថ្ងៃទី២៣ ខែកុម្ភៈ ឆ្នាំ២០២៥ សារព័ត៌មានថៃ Bangkork Post បានចុះផ្សាយថា «ជនបរទេសចំនួន ២១៥នាក់ រួមទាំងជនជាតិថៃ ត្រូវបានជួយសង្គ្រោះលើទឹកដីកម្ពុជា ពាក់ព័ន្ធនឹងអំពើឆបោកនៅកម្ពុជា»។
ប្រភពបន្តថា នគរបាលកម្ពុជា បានជួយសង្គ្រោះជនបរទេសចំនួន ២១៥នាក់ ក្នុងនោះ ១០៩នាក់ ជាជនជាតិថៃ ចេញពីបរិវេណឆបោកក្នុងក្រុងប៉ោយប៉ែត បន្ទាប់ពីមានការសហការគ្នារវាងថៃ និងកម្ពុជា៕
