ក្រសួងសុខាភិបាល បានអំពាវនាវឱ្យមានការប្រុងប្រយ័ត្នជំងឺផ្តាសាយបក្សី(H5N1) ដែលឆ្លងពីសត្វមាន់ទៅមនុស្ស ក្រោយពីរកឃើញកុមារម្នាក់ទៀតនៅខេត្តព្រៃវែងបានស្លាប់ ដោយសារតែសមាជិកគ្រួសារទុកឱ្យកុមារនោះ មានស្ថានភាពជំងឺធ្ងន់ធ្ងរមិនអាចសង្គ្រោះបាន។
ក្រសួងសុខាភិបាល លើកឡើងក្នុងលិខិតចុះថ្ងៃទី២៥ ខែកុម្ភៈនេះថា កុមារដែលស្លាប់នោះ អាយុ២ឆ្នាំ៧ខែ មានទីលំនៅក្នុងភូមិតាង៉ក ឃុំរំចេក ស្រុកព្រះស្តេច ខេត្តព្រៃវែង។
សម្រាប់ក្រសួង ការឆ្លងជំងឺផ្តាសាយបក្សី(H5N1)រហូតកុមារនេះស្លាប់ ដោយសារកុមារមកដល់មន្ទីរពេទ្យ ស្ថិតក្នុងស្ថានភាពធ្ងន់ធ្ងរ រួមមាន គ្រុនក្តៅ ក្អក ហត់ និងពិបាកដកដង្ហើមធ្ងន់ធ្ងរ។
តាមការសាកសួរបង្ហាញថា ផ្ទះអ្នកជំងឺមានចិញ្ចឹមមាន់ជាលក្ខណៈគ្រួសារ និងមានមាន់ងាប់ ប្រហែល១៥ក្បាល និងខ្លះទៀតកំពុងឈឺ ហើយកុមារបានដេកនិងលេងនៅក្រោមផ្ទះជិតទ្រុងមាន់។
ជុំវិញបញ្ហានេះ ក្រសួងសុខាភិបាល ក្រើនរំលឹកសារជាថ្មីម្តងទៀត ដល់ប្រជាពលរដ្ឋទាំងអស់ សូមយកចិត្ត ទុកដាក់ប្រុងប្រយ័ត្ន លើជំងឺផ្តាសាយបក្សីប្រភេទនេះ។
ក្រសួងគូសបញ្ជាក់ថា ជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋ ដែលការណ៍នេះ ត្រូវប្រញាប់ទៅមន្ទីរពេទ្យរកសេវាសង្គ្រោះ ប្រសិនបើមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើមមានរោគសញ្ញា។
បន្ថែមពីនេះ កុំប៉ះពាល់ ឬទទួលទាន មាន់ទា ឈឺ ឬងាប់ និងពាក់ស្រោមដៃឬម៉ាស់ មុនពេលចាប់កាន់មាន់ទាធ្វើម្ហូប និងត្រូវប្រកាន់ខ្ជាប់នូវការអនុវត្តអនាម័យ មុនចាប់កាន់ចំណីអាហារ៕
