ព្រឹទ្ធសភា ក្នុងសំឡេង៥៥ នៅថ្ងៃទី២៦ ខែកុម្ភៈ ឆ្នាំ២០២៥ បានលើកដៃគាំទ្រទាំងស្រុង គ្មានការកែប្រែសេចក្តីព្រាងច្បាប់ស្តីពី «ការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ»។
ច្បាប់នេះ ត្រូវបានសមាជិកសភាចំនួន ១១៥នាក់ អនុម័តកាលពីថ្ងៃទី១៨ ខែកុម្ភៈ ឆ្នាំ២០២៥។
ច្បាប់នេះមាន៧មាត្រា កំណត់ដាក់ទោសទណ្ឌដល់ជនទាំងឡាយណា ដែលមិនទទួលស្គាល់ថា មានរបបប្រល័យពូជសាសន៍នៅកម្ពុជា ឱ្យជាប់ពន្ធនាគារពី១ឆ្នាំរហូតដល់៥ឆ្នាំ និងពិន័យជាប្រាក់ពី ២៥០០ដុល្លារទៅ ១២៥០០០ដុល្លារអាមេរិក។
ទាំងរដ្ឋសភា និងព្រឹទ្ធសភា សុទ្ធតែបញ្ជាក់ថា សេចក្តីព្រាងច្បាប់ស្តីពីការមិនទទួលស្គាល់ឧក្រិដ្ឋកម្មដែលបានប្រព្រឹត្តឡើងក្នុងរយៈកាលកម្ពុជាប្រជាធិបតេយ្យនេះ បានរៀបចំឡើងក្នុងគោលបំណងកំណត់អំពីការផ្តន្ទាទោស ចំពោះបុគ្គលទាំងឡាយដែលមិនទទួលស្គាល់ ឬសម្រាល ឬបដិសេធ ឬជំទាស់អត្ថិភាពនៃឧក្រិដ្ឋកម្មលើកតម្កើងឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ ក្នុងគោលបំណងផ្តល់យុត្តិធម៌ដល់ជនរងគ្រោះ និងទប់ស្កាត់កុំឱ្យឧក្រិដ្ឋកម្មទាំងនេះ វិលត្រឡប់មកវិញនៅកម្ពុជា។
អ្នកឃ្លាំមើល និងអ្នកនយោបាយក្រៅរដ្ឋាភិបាលខ្លះថា ច្បាប់នេះមិនមានភាពចាំបាច់ និងថាធ្វើឡើងដើម្បីបំបិទសិទ្ធិបញ្ចេញមតិទាក់ទងនឹងរឿងប្រវត្តិសាស្រ្ត ធ្វើដើម្បីផ្គាប់ចិត្តវៀតណាម និងបំបិទមាត់មិនឱ្យនិយាយរិះគន់ថ្ងៃ៧មករាជាដើម៕
