មន្រ្តីរដ្ឋាភិបាលអះអាងពីសេដ្ឋកិច្ចកម្ពុជាងើបយ៉ាងឆាប់រហ័ស ក្រោមការដឹកនាំរបស់រដ្ឋាភិបាលគ្រួសារហ៊ុនបើទោះបីបន្ទាត់នយោបាយនេះ បានបន្សល់ទុកពលរដ្ឋច្រើនលាននាក់ កំពុងធ្លាក់ក្នុងវិបត្តិបំណុលវណ្ឌក ខ្លះប្រឈមដាច់បាយ គ្មានលុយព្យាបាលជំងឺ កសិករជួបវិបត្តិទីផ្សារច្រើនទសវត្សរទៅនេះក្តី។
ការអះអាងរបស់មន្រ្តីរដ្ឋាភិបាលនេះ ធ្វើឡើងក្នុងវេទិកាសារព័ត៌មានលើកទី៦ រៀបចំឡើងដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី២៧ ខែកុម្ភៈ ឆ្នាំ២០២៥នេះ។
ក្នុងវេទិកានោះ រដ្ឋមន្រ្តីប្រតិភូអមនាយករដ្ឋមន្រ្តី លោក តាន់ ហ្សង់ហ្រ្វង់ស័រ ថ្លែងថា ក្នុងឆ្នាំ២០២៤ សេដ្ឋកិច្ចកម្ពុជាកើនបាន៦ភាគរយ ពោលគឺបានវិលមករកស្ថានភាពដើម មុនផ្ទុះជំងឺកូវីដ-១៩ ក្នុងឆ្នាំ២០២០ ហើយថា បើគ្មានសង្គ្រាមនៅលើពិភពលោកទេ ក្នុងឆ្នាំ២០២៥នេះ សេដ្ឋកិច្ចកម្ពុជានឹងបន្ដកើនអាចដល់៦.៣ភាគរយ ។
លោកថា៖ «ជារួមស្ថានភាពម៉ាក្រូសេដ្ឋកិច្ចកម្ពុជា បើប្រៀបធៀបនឹងស្ថានភាពម៉ាក្រូសេដ្ឋកិច្ចសកល មិនអាក្រក់នោះទេ ប៉ុន្ដែផ្ទុយទៅវិញវាមានសន្ទុះខ្លាំង និងមានកម្ពស់ខ្ពស់។ ខ្ញុំលើកឡើងបែបនេះ ព្រោះថា តាងនាមរាជរដ្ឋាភិបាល តាងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ខ្ញុំចង់លើកទឹកចិត្តឲ្យប្រជាជនខ្មែរមានសុទិដ្ឋិនិយម ដោយសារតែតួលេខដែលខ្ញុំលើកឡើងមុននេះ សុទ្ធតែចេញមកពីស្ថាប័នហិរញ្ញវត្ថុអន្ដរជាតិដូចជា ធនាគារពិភពលោក និងIMF»។
ផ្ទុយពីការថ្លែងរបស់មន្រ្តីរដ្ឋាភិបាលនេះ អ្នកចាញ់បោកក្រុមហ៊ុនពិភពដីមាស អស់លុយចំនួន២ម៉ឺនដុល្លារ គឺលោក ប៊ុន ធឿន ប្រាប់VODថា តាមលោកដឹងមានអ្នកសា្លប់ជិត១០នាក់ហើយ ដោយសារវិបត្តិបំណុលក្រោយចាញ់បោកក្រុមហ៊ុនមួយនេះ ខណៈវិបត្តិនេះកំពុងគំរាមដល់ជីវិតលោកផងដែរ។
លោកថា៖ «រាល់ថ្ងៃនេះហូបឱ្យតែត្រឹមមួយរស់ទេ បើរឿងថាឱ្យហូបទៅមានសាច់មានឈាម មានកម្លាំងមាំមួន គឺអត់មានទេ យើងអត់មានអីហូបទេ។ រាល់ថ្ងៃនេះមានស្អី ឧបមាថា បើសិនជាឈឺចាំតែដេកចាំតែថ្ងៃស្លាប់។ ពីមុនៗមកយើងមាន មានប្លង់ផ្ទះ ប្លង់ដី មួយសន្លឹក ពីរសន្លឹក ដាក់ទៅមើលខ្លួនមើលអីទៅ តែឥលូវបើក្រុមហ៊ុនហ្នឹងវាឆបោក ក្រុមបក្សពួកវា ហ្នឹងមកបោកលួងលោមយកទៅអស់ហើយ ដាក់ធនាគារ យកលុយឱ្យវាអស់ហើយ។ រាល់ថ្ងៃហ្នឹងចាំមើលតែតុលាការ បើតុលាការមិនជួយពន្លឿន ជួយជំរុញ ពលរដ្ឋស្លាប់អស់ហើយរាល់ថ្ងៃនេះ ពិបាកខ្លាំងបំផុត រឿងធនាគារ»។
ជាមួយគ្នានេះ តំណាងរាស្រ្តគណបក្សសង្រ្គោះជាតិ លោក សួន សូរីដា យល់ឃើញថា នៅកម្ពុជា មានការរីកចំរើនខ្លាំង គឺមានតែការរកស៊ីឆបោកតាមអនឡាញ ការលក់គ្រឿងញៀន និងគ្រឿងស្រវឹងទេ ហើយថា បើពិនិត្យមើលជីវភាពរាស្រ្តខ្មែរបច្ចុប្បន្នគឺធ្លាក់ចុះខ្លាំង ខ្លះជួបបំណុលវណ្ឌក រីឯអាជីវកម្មផ្សេងៗបិទទ្វារស្ទើរគ្រប់កន្លែង។
លោកថា៖ «ការនិយាយរបស់ ហ្សង់ហ្រ្វង់ស័រតាន់ ហើយនិង លោក ប៉ែន បូណា ដែលប្រជាពលរដ្ឋខ្មែរ តែងនិយាយថា គ្រាន់តែជាសេក និយាយឱ្យតែពិរោះ ហើយនិយាយលើកជើងម្ចាស់របស់ខ្លួនតែប៉ុណ្ណោះ។ បើសិនជាប្រមុខរដ្ឋាភិបាលស្តាប់តែមនុស្សបញ្ជើចបញ្ចើ និយាយបំផ្លើសការពិត អាហ្នឹងគឺវារុញឱ្យរដ្ឋាភិបាលកាន់តែធ្លាក់ទឹកទៅៗ។ ប្រជាពលរដ្ឋខ្លួនឯង ច្បាស់ណាស់មិនអាចនិយាយតាមបែបប្រជាភិថុត បោកប្រជាពលរដ្ឋបានទេ ព្រោះប្រជាពលរដ្ឋគាត់រងគ្រោះផ្ទាល់ពីការគ្រប់គ្រង»។
បើតាម លោក សួន សូរីដា ក្នុងឆ្នាំ២០២៥នេះ រដ្ឋាភិបាលគ្រួសារហ៊ុន កំពុងខ្វះថវិកាជាតិជាង ១ពាន់លានដុល្លារទៀត ហើយទៅដើររកខ្ចីលុយចិនតែចិនមិនឱ្យទៀត ដែលលោកថា នេះជាភស្តុតាង បង្ហាញថា ជាការធ្លាប់ចុះនៃសេដ្ឋកិច្ចជាតិធ្ងន់ធ្ងរ ។
សារព័ត៌មានអន្តរជាតិ Reuters បានរាយការណ៍កាលពីខែធ្នូ ឆ្នាំ២០២៤ថា ចិនដែលជាម្ចាស់បំណុលឈរនៅលំដាប់ទី១របស់កម្ពុជា បានផ្អាកអនុម័តផ្តល់កម្ចីដល់កម្ពុជាក្នុងឆ្នាំ២០២៤។
Reuters បញ្ជាក់ថា ប្រទេសចិនដែលជាម្ចាស់បំណុលធំជាងគេរបស់កម្ពុជា ពោលគឺជាងមួយភាគបីនៃបំណុលចំនួន ១១,៦ពាន់លានដុល្លាររបស់ខ្លួន បានផ្អាកការផ្តល់កម្ចីសម្រាប់រយៈពេល៣ត្រីមាសដំបូងនៃឆ្នាំ២០២៤។
ជាមួយគ្នានេះ អំឡុងខែតុលា ឆ្នាំ២០២៤ រដ្ឋាភិបាលគ្រួសារហ៊ុន បានចេញអនុក្រឹត្យបោះពុម្ពក្រដាសប្រាក់ប្រភេទ២០ម៉ឺនរៀល ចំនួន២០លានសន្លឹក ស្មើប្រមាណ១ពាន់លានដុល្លារអាមេរិក ខណៈចំនួននេះ គឺប្រហាក់ប្រហែលនឹងថវិកាដែលរដ្ឋាភិបាលកំពុងខ្វះខាតសម្រាប់គម្រោងចំណាយក្នុងឆ្នាំ២០២៤ កន្លងទៅ។
ដោយឡែកអ្នកឯកទេសផ្នែកសង្គម គោលនយោបាយ និងសេដ្ឋកិច្ច លោក ឌី គន្ធា មើលឃើញថា កម្ពុជាមានវិបត្តិជាច្រើនទាំងវិស័យកសិកម្ម ទេសចរណ៍ វិបត្តិបំណុល វិស័យទេសចរណ៍ ហើយក៏មានអត្រាពលរដ្ឋចំណាកស្រុករាប់លាននាក់ បើប្រៀបធៀបជាមួយវៀតណាម និងថៃ។
ក្នុងន័យនេះ លោកចាត់ទុកការលើកឡើងរបស់មន្រ្តីរដ្ឋាភិបាល គ្រាន់តែជាលេសការពារខ្លួនតែប៉ុណ្ណោះ ហើយវប្បធម៌បែបនេះ កំពុងរុញឱ្យពលរដ្ឋកាន់តែរងគ្រោះពីការដឹកនាំមិនទទួលស្គាល់ការពិតបែបនេះ។
លោកថា៖ «រដ្ឋាភិបាលពីមួយអាណត្តិទៅមួយអាណត្តិ នៅតែបន្តវប្បធម៌អភិរក្ស ជំងឺដោះសារទៅលើវិបត្តិសេដ្ឋកិច្ចសង្គមកម្ពុជា ម្ដងហើយម្ដងទៀត មិនត្រឹមតែមិនបានដោះស្រាយអ្វីដែលជាបញ្ហា កាត់បន្ថយភាពក្រីក្រ ឬភាពអត់ឃ្លាន ឬក៏ការលើកកម្ពស់គុណភាពអប់រំ ឬក៏គុណភាពសេវាថែទាំសុខភាពសាធារណៈប៉ុណ្ណឺងទេ។ មានន័យថា អ្វីដែលជាជំងឺរ៉ាំរ៉ៃនៅក្នុងវិបត្តិសេដ្ឋកិច្ចកម្ពុជាដ៏ធ្ងន់ធ្ងរហ្នឹង! នឹងក្លាយទៅជារោគមហារីក ហើយនឹងអាចធ្វើឲ្យប្រទេសកម្ពុជានឹងប្រឈមមុខមហាគ្រោះមហន្តរាយហិរញ្ញវត្ថុ»។
បើតាមរបាយការណ៍ពី CBC ចេញផ្សាយអំឡុងខែមេសា ឆ្នាំ២០២៤ រកឃើញថា ពលរដ្ឋខ្មែរជិត៥លាននាក់ជាប់បំណុល។ ចំនួននេះមិនទាន់រាប់បញ្ចូលជនរងគ្រោះ រាប់ម៉ឺនគ្រួសារទៀត ដែលកំពុងរួមរឹតដោយវិបត្តិបំណុល ដោយសារពួកគេចាញ់បោកក្រុមឧកញ៉ាលក់អចលនទ្រព្យ ដែលស្និទ្ធនឹងមេដឹកនាំ មានឧកញ៉ា ឡេង ណាវ៉ាត្រា អតីតឧកញ៉ា ហ៊ី គឹមហុង និងអតីតឧកញ៉ា ឡេង ចាន់ណា ជាដើម។
ករណីនេះ ធ្វើឱ្យជនរងគ្រោះខ្លះបានសម្លាប់ខ្លួនជាបន្តបន្ទាប់ ដោយសារតែយុត្តិធម៌របស់ពួកគេ ត្រូវបានប្រព័ន្ធយុត្តិធម៌ដែលជាឧបករណ៍នយោបាយ បានកប់ចោលច្រើនឆ្នាំ។ ក្រៅពីនេះ កសិករនៅតាមបណ្តាខេត្ត-រាជធានីខ្លះ កំពុងរងការរំលោភបំពានដីធ្លី រួមទាំងជនជាតិដើមភាគតិច ។
រីឯវិបត្តិទីផ្សារលក់កសិផលវិញ កសិករនៅតែបន្តរងគ្រោះ ដែលជាផ្នែកជំរុញឱ្យមានលំហូរចំណាកស្រុកខុសច្បាប់ ប្រឈមនឹងគ្រោះថ្នាក់ច្រើនម៉ឺននាក់ក្នុងមួយឆ្នាំៗ ដែលខ្លះគេចផុតពីការស្លាប់ ត្រូវបានភាគីថៃដឹកមកទម្លាក់ចោលនៅតាមព្រំដែនជាដើម។
បន្ថែមលើនេះ ហេតុការណ៍មនុស្សរាប់រយនាក់ មានទាំងចាស់ជរា ជនពិការ ស្ត្រីទន់ខ្សោយ និងមនុស្សពេញកម្លាំងផងនោះ ហើយមានពលរដ្ឋ៤នាក់ស្លាប់ ក្នុងពេលប្រជ្រៀតគ្នាយកអង្ករ២គីឡូក្រាម និងលុយ៤ម៉ឺនរៀល ពីឧកញ៉ា សុខ គង់ កាលពីខែមករា ឆ្នាំ២០២៥ ត្រូវបានគេមើលឃើញថា វាជាភស្តុតាងបញ្ជាក់ច្បាស់ថា រាស្រ្តខ្មែរមិនទាន់ងើបផុតពីភាពក្រីក្រទេ៕
