ទីបំផុតទៅ ច្បាប់ស្តីពីការប្រឆាំងការមិនទទួលសស្គាល់ឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃរបបកម្ពុជាប្រជាធិបតេយ្យខ្មែរក្រហម ដែលមេដឹកនាំបក្សកាន់ លោក ហ៊ុន សែន ស្នើឡើង ត្រូវបានព្រះមហាក្សត្រឡាយព្រះហស្តលេខា កាលពីថ្ងៃទី១ ខែមិនានេះ ដែលជាថ្ងៃសៅរ៍ ជាថ្ងៃឈប់សម្រាក។
នេះបើតាមការចែកចាយលើបណ្តាញសង្គម និងនៅលើគេហទំព័ររបស់ក្រសួងយុត្តិធម៌ ដែលបានផ្សព្វផ្សាយនៅថ្ងៃទី៤ ខែមិនានេះ។
ច្បាប់ថ្មីនេះ មានចុះហត្ថលេខា អមដោយនាយករដ្ឋមន្ត្រីកម្ពុជា លោក ហ៊ុន ម៉ាណែត និងរដ្ឋមន្ត្រីក្រសួងយុត្តិធម៌ លោក កើត រិទ្ធ។
ច្បាប់នេះ មាន៧មាត្រា ដែលសភាបានអនុម័តយល់ព្រមទាំងស្រុង គ្មានសំឡេងជំទាស់ កាលពីថ្ងៃទី១៨ខែកុម្ភៈ បន្ទាប់មកព្រឹទ្ធសភា បានអនុម័តយល់ព្រម នៅថ្ងៃទី២៦ ខែកុម្ភៈ ពោលគឺប្រមាណជា៨ថ្ងៃបន្ទាប់។
ច្បាប់ដែលដំណើរការទៅលឿន ក្រោមសារជំរុញរបស់ លោក ហ៊ុន សែន នេះបានកំណត់ពីវិធានផ្តន្ទាទោស ចំពោះបុគ្គលទាំងឡាយណាដែលបំពានច្បាប់នេះ ត្រូវដាក់ពន្ធនាគារពី ១ឆ្នាំ ទៅ៥ឆ្នាំ និងពិន័យជាប្រាក់ពី ១០លានរៀល ទៅ ៥០លានរៀល។
សម្រាប់អ្នកវិភាគបញ្ហាសង្គម លោក គឹម សុខ បានលើកឡើងនៅលើហ្វេសប៊ុករបស់លោក ហាក់មិនឱ្យតម្លៃច្បាប់នេះទេ ដោយលោកនិយាយថា អ្នកណាធ្វើច្បាប់ស្អី ក៏ធ្វើទៅ ពីព្រោះ ពួកគេគ្មានសមត្ថភាពជួយជាតិ ហើយធ្វើបានតែរឿងឥតតម្លៃ។
តែផ្ទុយទៅវិញ លោកថា រីឯពលរដ្ឋខ្មែរ អ្នកសង្គ្រោះប្រទេសជាតិ ត្រូវរឹងមាំលើផ្លូវផ្លាស់ប្ដូរត្រូវ ដែលត្រូវបន្ដទាមទារកោះគុត ប្ដឹងទៅតុលាការអន្តរជាតិ បន្តទាមទារឱ្យដោះលែងអ្នកទោសមនសិការ ដោយឥតលក្ខខណ្ឌ។ ក្រៅពីនេះ ត្រូវទាមទារឱ្យស្ដារប្រជាធិបតេយ្យ និងការបោះឆ្នោតត្រឹមត្រូវ រួមទាំងយុត្តិធម៌សង្គម និង ការគោរពសិទ្ធិមនុស្ស បន្តទាមទារឱ្យសើរើដីសម្បទាននៃក្រុមហ៊ុនប្រទេសជិតខាង និងបញ្ហាអន្តោប្រវេសន្ដខុសច្បាប់ជាដើម។
ដោយឡែក ប្រធានក្រុមឃ្លាំមើលកម្ពុជា លោក ម៉ែន ណាត បានហៅច្បាប់នេះថាមានខ្លឹមសារបង្កប់នូវគោលដៅអវិជ្ជមាន ផ្ទុយពីគោលការណ៍ប្រជាធិបតេយ្យ មិនស្របស្មារតីរដ្ឋធម្មនុញ្ញកម្ពុជា ដែលជាច្បាប់កំពូលរបស់ជាតិ។
លោកថា អ្នកធ្វើច្បាប់នេះ មានចរិតបំបែកបំបាក់ស្មារតីជាតិខ្មែរ និងខ្មែរ បង្ក្រាបអ្នកប្រជាធិបតេយ្យមានបំណងដាក់ទោសទណ្ឌដល់អ្នកប្រឆាំងនឹងទិវា ៧មករា ដែលជាថ្ងៃរំឭកដល់ការឈ្លានពានរបស់វៀតណាម កាលពីឆ្នាំ១៩៧៩៕
