ករណីឧក្រិដ្ឋជនចិនរួមដៃគ្នាសម្លាប់ស្ត្រីខ្មែរយកទៅកប់ក្នុងដីខ្សាច់ ដើម្បីបំបាត់ដានដែលបានកើតឡើងនៅរាជធានីភ្នំពេញ នាពេលថ្មីៗនេះ ជំរុញឱ្យមានការលើកឡើងពីការគំរាមកំហែងកម្ពុជា ជុំវិញបញ្ហាអសន្តិសុខសង្គម ដែលនឹងនាំទៅដល់ការភ័យខ្លាច ប៉ះពាល់ដល់សេដ្ឋកិច្ច និងមុខមាត់រដ្ឋាភិបាល បើមិនមានការទប់ស្កាត់បន្ទាន់ទេនោះ។
ការជំរុញពីសំណាក់មន្ត្រីបក្សប្រឆាំង និងសង្គមស៊ីវិលនេះ ចំពេលដែលកម្ពុជារងការរិះគន់ថា បានក្លាយជាជម្រកពួកឧក្រិដ្ឋជន គំរាមកំហែងទាំងសន្តិសុខជាតិ បង្កការភ័យខ្លាចដល់ភ្ញៀវទេសចរបរទេស អ្នកនិយោគ និងជីវភាពរស់នៅពលរដ្ឋជាម្ចាស់ប្រទេសជាដើម។
កាលពីថ្ងៃទី០៣ ខែមីនា ឆ្នាំ២០២៥នេះ សមត្ថកិច្ចកម្ពុជា បានបំបែកសំណុំរឿងឃាតកម្ម សម្លាប់នារីខ្មែរម្នាក់ ពីសំណាក់ជនជាតិចិន រួចយកសពកប់ក្នុងដីខ្សាច់ នៅក្បែរផ្សារទំនើបអ៊ីអន៣ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ ដោយសមត្ថកិច្ចបានចាប់ខ្លួនជនសង្ស័យ ២នាក់ ជាជនជាតិចិន ក្នុងនោះមានឈ្មោះ CHEN CONG អាយុ៣០ឆ្នាំ ជាសង្សារនារីរងគ្រោះ និងឈ្មោះ LI HAOHAO ភេទប្រុស អាយុ៣៤ឆ្នាំ។ នេះបើតាមការផ្សព្វផ្សាយក្នុងទំព័រហ្វេសប៊ុករបស់អគ្គស្នងការដ្ឋាននគរបាលជាតិ។
ប្រភពដដែល បន្តថា ក្រោយពីការសាកសួរជនសង្ស័យជនជាតិចិនទាំង ២នាក់នោះ គឺពួកគេបានសារភាពថា ពួកគេពិតជាបានចូលរួមក្នុងសកម្មភាពសម្លាប់នារីជនរងគ្រោះនោះមែន កាលពីយប់ថ្ងៃទី២៧ ខែកុម្ភៈ ឆ្នាំ២០២៥ ដោយមានឈ្មោះ YANG KAIXIN ភេទប្រុស អាយុ២៦ឆ្នាំ ជាជនជាតិចិន ដែលកំពុងរត់គេចខ្លួន ជាអ្នករៀបចំគម្រោងសម្លាប់នារីជនរគ្រោះ ដោយមូលហេតុនារីរងគ្រោះបានដឹងរឿងសង្ងាត់របស់ពួកខ្លួន។
ការឈានទៅដល់បំបែកសំណុំរឿងឃាតកម្មនេះ ដោយសារតែម្តាយនារីរងគ្រោះ បានដាក់ពាក្យបណ្តឹងទៅកាន់នាយកដ្ឋាននគរបាលព្រហ្មទណ្ឌ កាលពីថ្ងៃទី១ ខែមីនា ឆ្នាំ២០២៥ ពាក់ព័ន្ធករណីបាត់កូនស្រីរបស់គាត់ ឈ្មោះ ហេង សៀវលី អាយុ១៨ឆ្នាំ។
បច្ចុប្បន្នជនសង្ស័យទាំង ២នាក់ និងវត្ថុតាងដែលដកហូតបាន ត្រូវបាននាយកដ្ឋានបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី។
ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការនគរបាលជាតិ លោក ង៉ែង ជូ នៅថ្ងៃអង្គារនេះ បានបដិសេធផ្តល់ព័ត៌មានលម្អិតជុំវិញឃាតកម្មនេះ ដោយសារនៅមានមេខ្លោងជនជាតិចិនម្នាក់ទៀត ដែលសមត្ថកិច្ចកំពុងស្រាវជ្រាវតាមរកចាប់ខ្លួន។
លោកថា៖ «ដោយសារនៅមុខសញ្ញាមួយទៀត អីចឹងខ្ញុំអត់ទាន់ឆ្លើយបានទេណា ចាំឱ្យវាចប់សព្វគ្រប់អស់ ចាំឱ្យអ្នកនាំពាក្យគាត់ឆ្លើយតបជាមួយនឹងអ្នកសារព័ត៌មាន»។
ជុំវិញបញ្ហានេះ អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរិទ្ធ សង្កេតឃើញថា នាពេលបច្ចុប្បន្ននេះ មានករណីអសន្តិសុខសង្គម បានកើតឡើងជាហូរហែរដែលបង្កឡើងដោយជនបរទេស ក្នុងនោះភាគច្រើនជាជនជាតិចិន ដូចជា ករណីឃាតកម្ម ហិង្សា ការប្រើប្រាស់អាវុធខុសច្បាប់បាញ់ប្រហារគ្នាតាមទីធ្លាសាធារណៈ ការចាប់ជំរិត និងការឆបោកតាមអនឡាញជាដើម។ ចំណែកឯការបង្ក្រាបវិញ លោកថា ហាក់ដូចជាបានតិចតួច និងមិនទាន់មានប្រសិទ្ធិភាពនៅឡើយ។
ករណីនេះ លោកជំរុញឱ្យមានការពិនិត្យឡើងវិញ និងធ្វើការស៊ើបអង្កេតថាតើបញ្ហាដែលបានកើតឡើងទាំងនោះមានមន្ត្រីចូលទៅពាក់ព័ន្ធទេ? ហើយមួយទៀត ត្រូវធ្វើយុទ្ធនាការផ្សព្វផ្សាយឱ្យបានទូលំទូលាយពីបញ្ហាឧក្រិដ្ឋកម្មទាំងនោះ ទៅដល់ប្រជាពលរដ្ឋនៅទូទាំងប្រទេស ដើម្បីឱ្យពលរដ្ឋមានការប្រុងប្រយ័ត្ន។
លោក អ៊ូ ច័ន្ទរិទ្ធិ បន្តថា បើបញ្ហានេះមិនត្រូវបានទប់ស្កាត់ទាន់ពេល និងមានប្រសិទ្ធិភាពទេ នោះនឹងបង្កឱ្យមានផលប៉ះពាល់ដល់ការរស់នៅរបស់ពលរដ្ឋ ប៉ះពាល់ដល់វិស័យទេសចរណ៍ ការវិនិយោគ សេដ្ឋកិច្ចជាតិ និងមុខមាត់របស់រដ្ឋាភិបាលផងដែរ។
លោកថា៖ «ដូច្នេះបើការទប់ស្កាត់នេះវាមិនមានបញ្ហាទេ[មិនមានប្រសិទ្ធភាពទេ] វាធ្វើឱ្យប៉ះពាល់ដល់ប្រជាពលរដ្ឋខ្មែរហ្នឹង ទាំងសេដ្ឋកិច្ចផងដែរ ទាំងសន្តិសុខក្នុងការរស់នៅ ទាំងសេដ្ឋកិច្ច ហើយវាប៉ះពាល់ដល់មុខមាត់រាជរដ្ឋាភិបាលហ្នឹង ជាពិសេសភ្ញៀវទេសចរ យើងដឹងហើយប៉ុន្មានឆ្នាំមកនេះ មានការផ្សព្វផ្សាយច្រើន ពីរឿងឧក្រិដ្ឋកម្មអនឡាញ មានការចាប់ជំរិត មានការប្រើប្រាស់អំពើហិង្សាអីជាដើម នៅតាមដងផ្លូវតាមអីចឹង មានការបាញ់បោះអីចឹង រួមទាំងក្មេងក្មាំងទំនើង ក្មេងអីក្នុងស្រុកផងដែរ ឃើញមួយរយៈមុន មានការបង្ក្រាបច្រើន ហើយនៅតែបន្តចឹងជាហូរហែរ»។
ចំណែក អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា កាលណាប្រទេសមួយ មានអសន្តិសុខសង្គមកើតឡើងច្រើន វាមិនមែនជាចំណុចល្អរបស់ប្រទេស ឬអ្នកដឹកនាំនោះទេ ព្រោះបញ្ហានេះ វាបានបង្កឱ្យផលប៉ះពាល់ដល់ការរស់នៅរបស់ប្រជាពលរដ្ឋ បង្កការភ័យខ្លាចដល់អ្នកទេសចរ និងអ្នកវិនិយោគជាដើម។ ត្រង់នេះហើយ លោកថា ប្រទេសនិមួយៗ ត្រូវតែធានាឱ្យបានពីបញ្ហាសន្តិសុខ សុវត្ថិភាពជូនប្រជាពលរដ្ឋរបស់ខ្លួន និងភ្ញៀវបរទេស។
លោកបន្តថា ចំពោះករណីឃាតកម្មទៅលើនារីរងគ្រោះខ្មែរ ពីសំណាក់ជនជាតិចិននេះ ក៏ដូចជាករណីឧក្រិដ្ឋកម្ម និងបទល្មើសផ្សេងៗ ដែលបង្កដោយជនបរទេសនេះ សមត្ថកិច្ចត្រូវតាមចាប់មេខ្លោងយកមកផ្តន្ទាទោសឱ្យបាន និងត្រូវស៊ើបអង្កេតទៅដល់ឬសគល់នៃបញ្ហា ដើម្បីធានាសុវត្ថិភាពសង្គមឡើងវិញ ក៏ដូចជាផ្តល់នូវយុត្តិធម៌ដល់ជនរងគ្រោះ។
លោក យិន ម៉េងលី បន្ថែមថា៖ «យើងឃើញថា អំពើល្មើសកើតឡើងជាបន្តបន្ទាប់ ដូចជាមានក្រុមឧក្រិដ្ឋជនខ្លះ មានទាំងកាំភ្លើងទាញចេញពីសណ្ឋាគារមកដេញបាញ់ដេញអីស្រស់ៗហ្នឹង អីចឹងពេលដែលយើងបង្ក្រាប យើងមិនមែនត្រឹមតែបង្ក្រាបទៅលើការប្រើប្រាស់អាវុធខុសច្បាប់ មិនមែនត្រឹមតែបង្ក្រាបលើអំពើឃាតកម្ម សួរថាតើអ្នកទាំងអស់ហ្នឹងបានអាវុធមកពីណាទៅ រកឬសគល់នៃបញ្ហាអស់ហ្នឹង។ បើសិនជាយើងគ្រាន់តែបង្ក្រាបទៅលើរឿងឃាតកម្ម ដែលយើងមើលឃើញហើយយើងអត់រកអ្វីដែលនៅពីក្រោយហ្នឹង អំពើអសន្តិសុខនេះវាអត់ថយចុះទេ អាការដែលប្រព្រឹត្តបទល្មើសដែលមានអាវុធនេះ ដែលវាធ្វើឱ្យមានការប៉ះពាល់ហ្នឹង អីចឹងការស៊ើបអង្កេតត្រូវលាតត្រដាង ត្រូវពង្រីកការស៊ើបអង្កេតឱ្យបានគ្រប់ជ្រុងជ្រោយ ពាក់ព័ន្ធទៅនឹងបញ្ហារឿងឃាតកម្ម ក៏ដូចជាការឆបោកតាមអនឡាញដែរ បើយើងគ្រាន់តែបង្ក្រាបនៅចំពោះមុខ អីចឹងវាអត់បំបែកបាន អ្នកហ្នឹងគេចពីកន្លែងមួយទៅកន្លែងមួយ»៕
