តំណាងពលករអះអាងថា បាតុកម្មលើទឹកដីប្រទេសកូរ៉េខាងត្បូង បានដំណើរការទៅដោយរលូន គ្មានការគំរាមវាយខ្នោះពីអាជ្ញាធរកូរ៉េ ដូចការគំរាមរបស់ឯកអគ្គរាជទូតខ្មែរនោះទេ ដែលការណ៍នេះ រងការរិះគន់ថា ជាភាពអាម៉ាស់នៃប្រព័ន្ធដឹកនាំគំរាមឆ្លងដែនរបស់គ្រួសារហ៊ុន។
អនុប្រធានផ្នែកព័ត៌មានរៀបចំបាតុកម្ម លោក អន ចាន់ថន ប្រាប់ VOD នៅថ្ងៃទី៤ ខែមិនានេះថា បាតុកម្មនេះ គ្មានការរារាំងណាមួយពីប៉ូលីសកូរ៉េនោះទេ។ លោកថា តែផ្ទុយទៅវិញ អាជ្ញាធរកូរ៉េ និងពលរដ្ឋកូរ៉េ បានលើកទឹកចិត្តឱ្យមានសកម្មភាពបែបនេះបន្តទៀត ដោយថា ស្របតាមគោលការណ៍ប្រជាធិបតេយ្យ។
លោកថា៖ «វាបានបង្ហាញអំពីមុខមាត់ ពីចរិតដឹកនាំនយោបាយរបស់រដ្ឋាភិបាលខ្មែរបច្ចុប្បន្ននេះ កម្ពុជាគឺជាប្រទេសមួយដែលមិនមែនជាប្រទេសប្រជាធិបតេយ្យ ទោះបីជារដ្ឋាភិបាលទាំង លោក ហ៊ុនម៉ាណែត ទៀត លោក ហ៊ុន សែន ធ្លាប់អះអាងថា ប្រទេសកម្ពុជាជាប្រទេសប្រជាធិបតេយ្យក៏ដោយ ប៉ុន្តែសកម្មភាពទាំងអស់នេះវាបានបង្ហាញឲ្យឃើញ អំពីការរឹតត្បិតសិទ្ធិប្រជាពលរដ្ឋ ការធ្វើទុក្ខបុកម្នេញផ្សេងៗ អ៊ីចឹងហើយវាបានបង្ហាញអំពីចរិតលក្ខណៈ ឬក៏បង្ហាញអំពីអត្តចរិតផ្ដាច់ការរបស់រដ្ឋាភិបាលកម្ពុជា» ។
បន្ថែមពីនេះ លោកថា រាល់សកម្មភាពដែលក្រុមពលករធ្វើនេះ ក៏ដើម្បីតែបុព្វហេតុទឹកដី ដោយមិនចង់ឃើញកម្ពុជាបន្តបាត់បង់ទឹកដីទៅប្រទេសជិតខាងបន្តទៀត។
មុនពេលបាតុកម្ម ពលករខ្មែរនៅកូរ៉េខាងត្បូង ធ្លាប់ប្រាប់ VOD ថា មន្រ្តីទូតកម្ពុជាបានគំរាមថា នឹងមានការ «ចាប់វាយខ្នោះ» ពីសំណាក់សមត្ថកិច្ចកូរ៉េ បើពួកគេនៅបន្តធ្វើបាតុកម្មទាមទារកោះគុត តាមការគ្រោងទុកលើទឹកដីកូរ៉េនោះ ។
យ៉ាងណា ក្រោយរលកបាតុកម្មរបស់យុវជន នៅប្រទេសកូរ៉េ រដ្ឋាភិបាលហាក់បង្ហាញមោទកភាពលើសារគំរាមរបស់មន្ត្រីខ្លួនប្រចាំនៅប្រទេសកូរ៉េ ដោយចែករំលែកព័ត៌មាន ក្រុមអ្នកតវ៉ាមានប្រមាណមួយភាគរយប៉ុណ្ណោះ បើគិតពីចំនួនពលករសរុបដែលធ្វើការនៅប្រទេសកូរ៉េខាងត្បូងនេះ។
សម្រាប់ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា សកម្មភាពគំរាមកំហែងរបស់រដ្ឋាភិបាលដោយបំបិទសិទ្ធិពលរដ្ធមិនឱ្យធ្វើសកម្មភាពផ្សេងៗ ហាក់បង្ហាញពីភាពអាម៉ាស់របស់រដ្ឋាភិបាល ដែលការអនុវត្តនយោបាយបែបឆ្លងដែននេះ ដើម្បីតែការពារអំណាច។
លោកថា៖ «ការដឹកនាំរបៀបដូចគ្រួសារហ៊ុនសព្វថ្ងៃ នៅប្រទេសកម្ពុជា នឹងធ្វើឲ្យប្រទេសកម្ពុជាអន្តរាយអន្តរាយទីមួយហ្នឹង គឺបំបែកបំបាក់ស្មារតីជាតិរបស់ប្រជាពលរដ្ឋខ្មែរមិនឲ្យស្រឡាញ់ជាតិ មិនឱ្យសាមគ្គីគ្នាមិនឲ្យចេញតវ៉ាការពារសូម្បីតែសេរីភាពបញ្ចេញមតិ គាត់និយាយអត់បានការគំរាមកំហែងអ៊ីចឹង វាហាក់ដូចជាបម្រើឲ្យនយោបាយបរទេសជិតខាង ពីព្រោះអ្នកដែលចេញទាមទារតវ៉ានោះ គឺដើម្បីផលប្រយោជន៍ជាតិ» ។
រដ្ឋធម្មនុញ្ញ មាត្រា៣៥ ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ។
កាលពីនៅថ្ងៃទី២ ខែមីនា ពលករខ្មែរនៅកូរ៉េ ប្រមាណ៣ពាន់នាក់ បាននាំគ្នាធ្វើបាតុកម្មជំរុញឱ្យរដ្ឋាភិបាលខ្មែរប្តឹងតុលាការអន្តរជាតិ (ICJ) ការពារកោះគុត រួមទាំង ស្តារប្រជាធិបតេយ្យ គោរពតាមកិច្ចព្រមព្រៀងទីក្រុងប៉ារីស ដោះលែងអ្នកទោសមនសិកា និងបញ្ឈប់ការគំរាមកំហែងឆ្លងដែនជាដើម។
រដ្ឋាភិបាលគ្រួសារហ៊ុនដែលបានក្តោបអំណាចច្រើនទសវត្សរ៍ទៅនេះ រងការរិះគន់ថា ធ្វើឱ្យបាត់បង់ទឹកដីជាច្រើនទៅប្រទេសវៀតណាម ទាំងដីគោក និងប្រជុំកោះ មានកោះត្រល់ជាដើម រួមទាំងបានគំរាមរំលាយរបបរាជានិយមអាស្រ័យធម្មនុញ្ញ បើព្រះអង្គហ៊ានជំទាស់នឹងមហិច្ឆតាវៀតណាមលេបទឹកដី តាមរយៈធ្វើឱ្យសន្ធិសញ្ញាព្រំដែនខុសច្បាប់រស់ឡើងវិញនៅឆ្នាំ២០០៥នោះ។
លើសពីនេះ ក៏រងការចោទថា ធ្វើឱ្យបាត់បង់ទឹកដីទៅប្រទេសថៃដែរ ក្នុងនោះមានទាំងកោះគុត ដែលថៃកំពុងគ្រប់គ្រងទាំងស្រុង ដែលបច្ចុប្បន្នក្រុមប្រឆាំងកំពុងជំរុញឱ្យប្រើយន្តការអន្តរជាតិ ដើម្បីទប់ស្កាត់មហិច្ឆតាបរទេសឈ្លានពាន ប៉ុន្តែក្រុមអ្នកទាមទារនៅក្នុងប្រទេស ត្រូវបានបង្ក្រាប និងចាប់ដាក់ពន្ធនាគារ ដែលវិធាននេះហាក់បំពានរដ្ឋធម្មនុញ្ញត្រង់មាត្រា៥២។
មាត្រា៥២នៃរដ្ឋធម្មនុញ្ញ ចែងថា រាជរដ្ឋាភិបាលកម្ពុជាប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការឯកភាពជាតិ។
ដោយឡែកមាត្រា៤៤០ នៃក្រមព្រហ្មទណ្ឌ ចែងថា អ្នកធ្វើឱ្យបាត់ដីទាំងស្រុង ឬមួយផ្នែក មានទោសក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត៕
