កូដករណាហ្គាវើលដ៍ដែលអះអាងថា ត្រូវបានថៅកែបញ្ឈប់ពីការងារក្រោមរូបភាពរើសអើងសហជីពនោះ នៅថ្ងៃទី៦ខែមិនានេះ បន្តជួបជុំតាមការគ្រោងទុក មុខក្រុមហ៊ុនជិតរបងរដ្ឋសភា បន្លឺសំឡេងជំរុញឱ្យមានការដោះស្រាយ ដោយសំអាងថា ទោះរងភាពអយុត្តិធម៌ជាង៣ឆ្នាំទៅនេះក្តី។
ជុំវិញបញ្ហានេះ អ្នកនាំពាក្យក្រសួងការងារលោក កត្តា អ៊ន ធ្លាប់ការពារថា ករណីវិវាទការងារនៅក្រុមហ៊ុនណាហ្គា ក្រសួងបានដោះស្រាយមកជាហូរហែ។ មួយវិញទៀតលោកថា ក្រុមហ៊ុនក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារ ចូលគណនីធនាគារអតីតបុគ្គលិក ដែលក្រុមហ៊ុនបានបញ្ចប់កិច្ចសន្យាការងារចំនួន ៣៧៣នាក់ រួចមកហើយដែរ។
ដោយឡែក លោក ឃុន ថារ៉ូ មន្ត្រីកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ ក៏ធ្លាប់និយាយថា ដើម្បីបញ្ចប់វិវាទនេះ វាទាល់តែភាគីក្រុមហ៊ុន និងក្រសួងការងារ មានឆន្ទៈផ្សះផ្សាបញ្ចប់វិវាទ ពាក់ព័ន្ធនឹងការទទួលយកកូដករឱ្យចូលធ្វើការងារវិញ និងការទទួលស្គាល់សហជីព ។
វិវាទនៅក្រុមហ៊ុនណាហ្គាវើលដ៏ ផ្តើមចេញពីក្រុមហ៊ុនណាហ្គាវើលដ៍ បានបញ្ឈប់បុគ្គលិកប្រមាណ ១ ៣០០នាក់ កាលពីខែមេសា ឆ្នាំ២០២១ ដែលភាគច្រើនជាប្រធាននិងសមាជិកសហជីព អំឡុងពេលផ្ទុះជំងឺកូវីត-១៩ ដែលថៅកែអះអាងពីមូលហេតុជួបវិបត្តិហិរញ្ញវត្ថុ។
ប៉ុន្តែភាគីបុគ្គលិកដែលបានបញ្ឈប់ អះអាងថា ជាចេតនារបស់ថៅកែ ដើម្បីបំបាត់សហជីពឯករាជ្យ ក្នុងក្រុមហ៊ុនដែលតែងតែជំរុញលក្ខខណ្ឌការងារ ការពារសិទ្ធិបុគ្គលិក។
ការជំរុញលក្ខខណ្ឌការងារនៅក្រុមហ៊ុននេះ ត្រូវបានគេមើលឃើញថា ជាការតស៊ូមតិធំជាងគេក្នុងប្រទេសកម្ពុជា ដែលបានអះអាងបន្លាយរហូតជាង៣ឆ្នាំ ទោះប្រធានសហជីព កញ្ញា ឈឹម ស៊ីថរ ត្រូវបានចាប់ដាក់ពន្ធនាគាររហូតពីរលើក។
ភាពជាប់គាំងនៃការរកដំណោះសា្រយនេះ ជំរុញឱ្យមានការព្រួយបារម្ភថា កម្មករនិងបុគ្គលិកច្រើនកន្លែងទៀត នឹងត្រូវបានគេរំលោភសិទ្ធិការងារ ដោយយកគំរូមិនល្អចេញពីក្រុមហ៊ុនណាហ្គាវើលដ៍នេះ បើក្រសួងពាក់ព័ន្ធរបស់រដ្ឋាភិបាល មិនអាចចាប់បង្ខំឱ្យថៅកែបរទេស គោរពច្បាប់របស់កម្ពុជាបាន៕
