ប្រព័ន្ធច្បាប់គ្រួសារហ៊ុន រងការស្តីបន្ទោសពីក្រុមជនរងគ្រោះថា កំពុងធ្វើជាជម្រកឧក្រិដ្ឋជនឆបោក ហ៊ី គឹមហុង ដោយថា ពួកគេជិត៨ពាន់គ្រួសារ ជួបវិបត្តិបំណុលច្រើនឆ្នាំ រហូតស្លាប់ជិត២០នាក់ ដោយអំពើឆបោកនេះ មិនទទួលបានយុត្តិធម៌ តែមេឆបោកបែរជាដំណើរការទីផ្សារឡើងវិញ ទាំងគ្មានការរំខានពីស្ថាប័នពាក់ព័ន្ធ។
ការរិះគន់នេះ ក្រោយទំព័រហ្វេសប៊ុករបស់ក្រុមហ៊ុនពិភពដីមាសនៅថ្ងៃទី៥ ខែមីនា ឆ្នាំ២០២៥ បានបង្ហោះសារពីដំណើរការរៀបចំកែលំអរ និងបង្កើតគម្រោងអភិវឌ្ឍន៍ ដែលក្រុមហ៊ុនឆបោកនេះថាជាកិច្ចសហការគាំទ្រ និងជំរុញការទទួលខុសត្រូវចំពោះអតិថិជនទាំងអស់។
ជនរងគ្រោះម្នាក់ប្រាប់ VOD ក្នុងលក្ខខណ្ឌមិនបញ្ចេញឈ្មោះថា គម្រោងថ្មីនេះ គ្រាន់តែជាល្បិចបោកពលរដ្ឋបន្តតែប៉ុណ្ណោះ ដោយថា ក្រោយជនឆបោក ហ៊ី គឹមហុង ចេញពីពន្ធនាគារមិនបានសងសំណងតាមការសន្យានោះទេ។
ប្រភពបន្តថា ខ្លួនចាញ់បោកក្រុមហ៊ុនពិភពដីមាសចំនួន ១៥០០០ដុល្លារ ក្នុងនោះខ្ចីធនាគារចំនួន ១ម៉ឺនដុល្លារ ដែលធ្វើឱ្យប្រឈមវិបត្តិបំណុលវណ្ឌកក្នុងពេលបច្ចុប្បន្ន។
លោកថា៖ «និយាយឱ្យចំយល់ឃើញថា វា(បោក)តាមប្រព័ន្ធវាមក តាំងពីលើមក គេរៀបចំធ្វើអ៊ីចឹងម៉ង! គេមិនឱ្យខ្មែរមានម៉ង ដល់តែខ្មែរណាមានតិចតួចបង់ធនាគារទៅ បង់យូៗអស់អាលីងចឹងទៅ។ មានតែឲ្យខាងព័ត៌មានជួយផ្សព្វផ្សាយ ឱ្យបានខ្លាំងបន្តិចទៅ ក្រែងលោរគេជួយគេអីអ៊ីចឹងទៅ មិនដឹងម៉េចទេ! ដូចពិបាកដល់ហើយ»។
បើតាមក្រុមជនរងគ្រោះ មានអ្នកសា្លប់កើនជិត២០នាក់ហើយ ក្នុងនោះមានទាំងអ្នកធ្វើអត្តឃាតដោយចងករ និងខ្លះគ្មានលុយព្យាបាលជំងឺ ដោយសារចាញ់បោកអតីតឧកញ៉ា ហ៊ី គឹមហុង ធ្វើឱ្យជួបវិបត្តិបំណុលធ្ងន់ធ្ងរ។
គណនីហ្វេសប៊ុកឈ្មោះ សេង ហាន់ បានបង្ហោះសារក្នុងន័យដើមដោយភ្ជាប់រូបភាព លោក ហ៊ី គឹមហុង ថា៖ «ចង់ទៅសួរម្ចាស់ក្រុមហ៊ុនផ្ទាល់ តើចង់លក់ដី ឬក៏រៀបចំគម្រោងបោកបន្ត បើសិនជាលក់ បងប្អូនរបស់ខ្ញុំហាមមិនឱ្យលក់ជាដាច់ខាត់ ទុកឱ្យតុលាការចាត់ចែងទៅតាមច្បាប់»។
ដោយឡែក ហ្វេសប៊ុកឈ្មោះ ប៉ែន សុលីលី បញ្ចេញមតិថា រឿងក្រុមហ៊ុនពិភពដីមាស ដែលមានទីតាំងស្ថិតនៅភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ដែលបានឆបោកលុយប្រជាពលរដ្ឋរាប់រយលានដុល្លារ ហើយសំណុំរឿងនេះ កំពុងតែជំនុំជម្រះនៅសាលាដំបូងរាជធានីភ្នំពេញ ពលរដ្ឋស្នើសុំឲ្យអភិបាលខណ្ឌព្រែកព្នៅ ចុះត្រួតពិនិត្យក្រុមហ៊ុនមានអាជ្ញាប័ណ្ណត្រឹមត្រូវដែរឬទេ។
ជុំវិញរឿងនេះ VOD មិនអាចសុំការឆ្លើយតបពីអភិបាលខណ្ឌព្រែកព្នៅ លោក ធឹម សំអាន បានទេ ដោយទូរសព្ទមិនអាចទាក់ទងបាន។
សម្រាប់ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន ចាត់ទុកការបណ្តោយឱ្យអតីតឧកញ៉ា ហ៊ី គឹមហុង រស់នៅក្រៅសំណាញ់ច្បាប់ និងថែមទាំងឱ្យក្រុមហ៊ុនដំណើរការបន្តដោយមិនរឹបអូសទ្រព្យមកសងពលរដ្ឋបែបនេះ ឆ្លុះបញ្ចាំងថា តុលាការកំពុងរួមដៃជាមួយឧក្រិដ្ឋជនដើម្បីបោកពលរដ្ឋ។
លោកថា៖ «ខ្ញុំយល់ថា តាមពិតរដ្ឋាភិបាលក៏ដូចជាខាងតុលាការ គួរតែឲ្យឧកញ៉ា ហ៊ី គឹមហុង សងសំណងទៅដល់ប្រជាពលរដ្ឋជាមុនសិន មុនដំណើរការក្រុមហ៊ុនរបស់គាត់ហ្នឹង! បើមិនអ៊ីចឹងទេ ត្រូវចាប់គាត់ដាក់គុកហើយរឹបអូសទ្រព្យសម្បត្តិរបស់គាត់ យកទៅសងប្រជាពលរដ្ឋទើបជាការត្រឹមត្រូវ។ បែរជាឲ្យគាត់រួចខ្លួនហើយ ដោះលែងគាត់ហើយ! គាត់អត់សងលុយប្រជាពលរដ្ឋហើយ ឲ្យក្រុមហ៊ុនរបស់គាត់ដំណើរការទៀត អ៊ីចឹងមានន័យថា ដូចពាក្យសម្ដី លោក ហ៊ុន ម៉ាណែត និយាយអ៊ីចឹងឯង រក្សាមេមាន់ដើម្បីយកពងហ្នឹង! មានន័យថា ទុកឲ្យឧកញ៉ា ហ៊ី គឹមហុង រកលុយឲ្យគណបក្សប្រជាជនត្រកូលហ៊ុនដើម្បីយកទៅពង្រឹងអំណាច»។
យ៉ាងណា ក្រោយផ្ទុះរឿងក្រុមឧក្រិដ្ឋជនរកស៊ីខាងវិស័យអចនទ្រព្យ បោកពលរដ្ឋជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ នាយករដ្ឋមន្រ្តីកម្ពុជា លោក ហ៊ុន ម៉ាណែត ធ្លាប់ផ្ញើសារថា ការមិនចាត់ការលើក្រុមអ្នកជំនួញបោកពលរដ្ឋ ជាយុទ្ធសាស្រ្តរក្សាទុកមេមាន់ដើម្បីយកពងឱ្យពលរដ្ឋ។
លោកថា៖ «រដ្ឋាភិបាលពិតណាស់ មិនងាកចាប់ៗនោះទេ! យើងមិនអាចយករូបមន្តសម្លាប់មេមាន់នោះទេ យើងត្រូវធ្វើម៉េចឲ្យមេមាន់នៅរស់ ដើម្បីយកពងទៅនាំឲ្យបងប្អូនប្រជាពលរដ្ឋនេះជាគោលដៅធំ»។
ប៉ុន្តែ សារនយោបាយ រក្សាទុកមេមាន់ដើម្បីយកពង រងការរិះគន់ថា កំពុងបង្កើនវិបត្តិបំណុលធ្ងន់ធ្ងរដល់អ្នកចាញ់បោកក្រុមឧកញ៉ា ដែលកំពុងប្រឈមនឹងវិធានរឹបអូសពីធនាគារ ជាក់ស្តែងក្នុងករណីជនរងគ្រោះចាញ់បោកអតីតឧកញ៉ា ហ៊ី គឹមហុង នេះជាដើម។
អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ជុំវិញអំពើឆបោកនេះដែរ ក្រោយយុត្តិធម៌សម្រាប់អ្នកចាញ់បោក អតីតឧកញ៉ា ហ៊ី គឹមហុង ត្រូវបានកប់ចោលច្រើនឆ្នាំ និងមានអ្នកស្លាប់កើនឡើងជិត២០នាក់ តែនៅតែគ្មានដំណោះស្រាយនោះ ក្រុមជនរងគ្រោះបានធ្វើយុទ្ធនាការលើបណ្តាញសង្គមចោទថា ឧបសគ្គរារាំងដល់ការស្វែងរកយុត្តិធម៌សម្រាប់ពួកគេ អាចជាប់ពាក់ព័ន្ធមន្ត្រីមានអំណាច នៅពីក្រោយក្រុមហ៊ុនឆបោកនេះ ដោយក្នុងនោះពួកគេបានរំលេចមុខអនុប្រធានគណបក្សប្រជាជនកម្ពុជា លោកស្រី ម៉ែន សំអន និងអតីតប្រធានរដ្ឋសភា លោក ហេង សំរិន ផងដែរ៕
