ទីប្រឹក្សាគណបក្សកម្លាំងជាតិ លោក រ៉ុង ឈុន គ្រោងធ្វើសន្និសីទសារព័ត៌មានជុំវិញជំហររបស់លោក នៅថ្ងៃពុធស្អែកនេះ ខណៈឱសានវាទរយៈពេល១ខែ របស់តុលាការដែលបង្គាប់ឱ្យសងសំណងការខូចខាតទៅឱ្យគណៈកម្មាធិការចម្រុះកិច្ចការព្រំដែន បានចូលមកដល់។
សេចក្តីប្រកាសព័ត៌មានរបស់គណបក្សកម្លាំងជាតិ ចុះថ្ងៃទី១១ ខែមីនា ឆ្នាំ២០២៥នេះ បានឱ្យដឹងថា លោក រ៉ុង ឈុន គ្រោងធ្វើសន្និសីទសារព័ត៌មាន ស្តីពី «តុលាការបង្គាប់ឱ្យសងសំណងការខូចខាតទៅគណៈកម្មាធិការចម្រុះកិច្ចការព្រំដែន» នៅម៉ោង៩ព្រឹក ថ្ងៃទី១២ ខែមិនា នៅទីស្នាក់ការសមាគមគ្រូបង្រៀនកម្ពុជាឯករាជ្យ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
តែយ៉ាងណា លោក រ៉ុង ឈុន បានបដិសេធអត្ថាធិប្បាយជុំវិញបញ្ហានេះ នៅថ្ងៃនេះ ដោយប្រាប់ថាលោកនឹងជម្រាបព័ត៌មានលម្អិតនៅក្នុងសន្និសីទ នាថ្ងៃស្អែក។
កាលពីថ្ងៃទី១១ ខែកុម្ភៈ ឆ្នាំ២០២៥ តុលាការសាលាដំបូងរាជធានីភ្នំពេញ បានជូនដំណឹងទៅកាន់លោក រ៉ុង ឈុន និងសកម្មជននយោបាយ ២នាក់ទៀត ឱ្យបង់ប្រាក់ចំនួន ៤០០លានរៀល ឬប្រហាក់ប្រហែល ១០ម៉ឺនដុល្លារ ទៅឱ្យគណៈកម្មាធិការកិច្ចការព្រំដែន។ ការបង្គាប់របស់តុលាការដូចនេះធ្វើឡើង ក្រោយលោក រ៉ុង ឈុន និងសកម្មជននយោបាយទាំង ២រូប បានលើកឡើងក្នុងឆ្នាំ២០២១ ពីការបាត់បង់ដីកសិកម្មទៅលើប្រទេសជិតខាង អំឡុងពេលរដ្ឋាភិបាលបោះបង្គោលព្រំដែននៅខេត្តត្បូងឃ្មុំ។
ក្នុងសំណុំរឿង«ញុះញង់» ពាក់ព័ន្ធនឹងរឿងព្រំដែននេះ ទាំងលោក រ៉ុង ឈុន និងសកម្មជននយោបាយ២នាក់ទៀត រួមមាន កញ្ញា ស កណិការ និងលោក តុន និមល ត្រូវបានកាត់ទោសឲ្យជាប់ពន្ធនាគាររយៈពេលពី ២០ខែ ដល់ ២ឆ្នាំ។ ប៉ុន្តែពួកគាត់ត្រូវបានដោះលែងវិញ ក្រោយបានអនុវត្តទោសក្នុងពន្ធនាគារបានជាង ១០ខែ ហើយទោសនៅសល់ត្រូវបានតុលាការព្យួរ។
ពាក់ព័ន្ធនឹងករណីតុលាការតម្រូវឱ្យពួកគាត់ទាំង ៣នាក់ បង់ប្រាក់ពិន័យទៅដល់ដើមបណ្តឹងនេះដែរ ក៏មានអ្នកគាំទ្រលោក រ៉ុង ឈុន មួយចំនួន បាននាំគ្នារៃអង្គាសប្រាក់ ដើម្បីជួយបង់ទៅគណៈកម្មាធិការចម្រុះកិច្ចការព្រំដែននេះដែរ ខណៈមតិរបស់ពលរដ្ឋ និងអ្នកតាមដានសង្គមមួយចំនួន បានលើកឡើងថា មិនគួរមានការបង់ប្រាក់ទៅគណៈកម្មាធិការនេះទេ ព្រោះលោក រ៉ុង ឈុន និងសកម្មជននយោបាយ២នាក់ទៀត មិនបានប្រព្រឹត្តកំហុសដូចការចោទប្រកាន់៕
