វិធានការចាប់ខ្លួន អភិបាលរងខេត្តកំពង់ស្ពឺ លោក ទិត វុទ្ធី និងមនុស្ស២នាក់ទៀត ដែលរងការចោទពីបទ ពុករលួយ រំលោភអំណាច លើជនជាតិចិនលើទំហំទឹកប្រាក់ប្រមាណជា ៤០ម៉ឺនដុល្លារនោះ ផ្តើមចេញពីការធានារត់ការ ដើម្បីបានអាជ្ញាប័ណ្ណរុករករ៉ែស្ពាន់នៅខេត្តប៉ៃលិន មិនបានសម្រេច។
ពួកគេទំាង៣នាក់នោះ ត្រូវបានអង្គភាពប្រឆាំងអំពើពុករលួយ (ACU) ចាប់ខ្លួននៅថ្ងៃទី៩ ខែមិនា ឆ្នាំ២០២៥នេះ ក្រោយមកតុលាការខេត្តកំពង់ស្ពឺបង្កាប់ឱ្យឃុំខ្លួននៅថ្ងៃដដែល។
បើតាមសេចក្តីប្រកាសរបស់តុលាការខេត្តកំពង់ស្ពឺ ចុះថ្ងៃទី៩ ខែមិនានេះ បុរសទាំង៣នាក់នោះ ត្រូវចោទពីបទ «រំលោភអំណាច ក្លែងបន្លំ ប្រើប្រាស់លិខិតក្លែង ក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង ប្រព្រឹត្តនៅខេត្តកំពង់ស្ពឺ ខេត្តប៉ៃលិន ខេត្តបាត់ដំបង ខេត្តព្រះវិហារ និងខេត្តស្ទឹងត្រែង កាលពីអំឡុងឆ្នាំ២០២៣» ។
ដោយឡែក បើតាមឯកសារដែលVODទទួលបាន ពីអង្គភាពប្រឆាំងអំពើពុករលួយ បុរស២នាក់ទៀត មានឈ្មោះ ហ៊វ ខន ឋានវរៈសេនិយ៍ត្រីយោធា ឬពាក់សក្តិ៤ និងម្នាក់ទៀត ជាអ្នកបកប្រែចិន ឈ្មោះ អ៊ីង សារឿន ដែលអង្គភាពប្រឆាំងអំពើពុករលួយ រកឃើញពីបទពុករលួយ រំលោភអំណាច សមគំនិត និងបទក្លែងបន្លំ ប្រើប្រាស់លិខិតក្លែង ជាដើម។
ការចាប់ខ្លួនបុរសទាំង៣នាក់នេះ ផ្តើមចេញពីការយកប្រាក់ពីអ្នកវិនិយោគជនជាតិចិនម្នាក់ ចំនួន ៤០ម៉ឺនដុល្លារ លើតម្លៃសរុប ៨០ម៉ឺនដុល្លារ ដែលត្រូវបង់ ដើម្បីបានអាជ្ញាប័ណ្ណវិនិយោគរ៉ែស្ពាន់ នៅខេត្តប៉ៃលិន ដែលប្រាក់នេះ ទទួលបានពីអ្នកវិនិយោគចិនម្នាក់ឈ្មោះ លី មិនឆាង(Li Minchang)។
បើតាមរបាយការណ៍កម្រាស់ជាង៤ទំព័រ ដែលយើងទទួលបានបញ្ជាក់ថា ដោយសារតែតំបន់រ៉ុករករ៉ៃដែលបានលើកឡើងក្នុងគម្រោងទំហំជាង ១០០គីឡូម៉ែត្រការ៉េ នៅខេត្តប៉ៃលិន ត្រូវក្រសួងពាក់ព័ន្ធផ្តល់អាជ្ញាប័ណ្ណឱ្យអ្នកវិនិយោគមួយរួចហើយ មិនអាចជ្រៀតជ្រែកបាន ជនត្រូវចោទទាំង៣នាក់នោះ បានក្លែងលិខិតប្រាប់ជនជាតិចិនជាម្ចាស់លុយថា ក្រសួងពាក់ព័ន្ធបានបដិសេធ។
ប្រភពនោះ បញ្ជាក់ថា ក្រោយមកក្រុមនេះ បានណែនាំអ្នកវិនិយោគចិនម្នាក់បន្ថែមទៀត ដោយបង្វែរទៅរក ទីតាំងរ៉ែ នៅភ្នំអន្លុង ខេត្តព្រះវិហារវិញ តែមិនបានសម្រេច រហូតមានការចាប់ខ្លួន ខណៈអ្នកទាំង៣នោះ ធ្លាប់ពាក់ព័ន្ធនឹងករណីដូចគ្នា នៅខេត្តស្ទឹងត្រែង៕
