រដ្ឋាភិបាល តាមរយៈក្រសួងមហាផ្ទៃ បានបញ្ចេញព័ត៌មានពីឆន្ទៈ បង្កើនវិធានការពារភ្ញៀវទេសចរ និងអ្នកវិនិយោគិន ក្រោមការរីករាលដាលនៃបទឧក្រិដ្ឋចាប់ជំរិត និងករណីឆបោកតាមអនឡាញ ដែលជាក្តីបារម្ភ ទាមទារឱ្យរដ្ឋាភិបាលទប់ស្កាត់ ដោយប្រសិទ្ធភាព ទើបអាចស្តារជីវភាពពលរដ្ឋបាន។
អគ្គស្នងការនគរបាលជាតិ លោក ស ថេត បាននិយាយក្នុងលិខិតណែនាំមួយ ចុះថ្ងៃទី១១ ខែមិនា ឆ្នាំ២០២៥នេះថា កត្តាសុខសន្តិភាព បានធ្វើឱ្យកម្ពុជា មានភាពរីកចម្រើនយ៉ាងឆាប់រហ័ស ធ្វើឱ្យភ្ញៀវទេសចរបរទេសមានកំណើនជាលំដាប់ រៀងរាល់ឆ្នាំ។
ប៉ុន្តែលោកទទួលស្គាល់ថា ភ្ញៀវទេសចរមួយចំនួនតូច បានទទួលរងគ្រោះ ដែលទាមទារឱ្យសមត្ថកិច្ច ជួយដោះស្រាយ និងសង្គ្រោះឱ្យបានទាន់ពេលផងដែរ។
បើតាម លោក ស ថេត ដើម្បីមានមូលដ្ឋានច្បាស់លាស់ ក្នុងការកំណត់ហេតុការណ៍ ឬឧប្បត្តិហេតុទាំងនោះ ខ្លួនបានដាក់ចេញនូវគំរូឯកភាព ស្តីពីបែបបទ នីតិវិធី នៃការទទួលពាក្យបណ្ដឹង និងដោះស្រាយបណ្ដឹងសម្រាប់ភ្ញៀវទេសចរ និងអ្នកវិនិយោគិនបរទេស។
បើតាម លោក ស ថេត ភ្ញៀវទេសចរ និងអ្នកវិនិយោគិនបរទេស ដែលមានបំណងដាក់ពាក្យបណ្ដឹងមកស្ថាប័នមានសមត្ថកិច្ច សាម៉ីបណ្តឹងត្រូវសរសេរពាក្យបណ្តឹងដោយឯងផ្ទាល់ ពីកម្មវត្ថុពាក្យបណ្ដឹង ដំណើររឿងហេតុ និងសំណូមពររបស់សាម៉ីបណ្ដឹង ដាក់មកស្ថានប័នពាក់ព័ន្ធ។
អង្គភាពទទួលពាក្យបណ្ដឹង ត្រូវចុះទៅកាន់កន្លែងកើតហេតុ ដើម្បីបើកការស៊ើបអង្កេតបឋម ដោយសហការជាមួយនគរបាលមានសមត្ថកិច្ចមូលដ្ឋាន។
អង្គភាពនគរបាលយុត្តិធម៌គ្រប់ជាន់ថ្នាក់ ត្រូវស្រាវជ្រាវប្រមូលភស្តុតាង កំណត់អត្តសញ្ញាណ ឃាត់ខ្លួនជនល្មើស រៀបចំសំណុំរឿងបញ្ជូនទៅតុលាការ ស្របតាមច្បាប់ ស្តីពី នីតិវិធីព្រហ្មទណ្ឌ ដែលបានកំណត់ឱ្យមានប្រសិទ្ធភាព។
វិធាននេះ ក្រោយពីកម្ពុជារកឃើញសំបុកឧក្រិដ្ឋជនឆបោក និងចាប់ជំរិតជាបន្តបន្ទាប់នៅតាមបណ្តាខេត្តមួយចំនួន ដែលជាការគំរាមកំហែងដល់វិស័យទេសចរ វិស័យវិនិយោគ ដែលជាប្រភពឆ្នាំងបាយរបស់ប្រជាពលរដ្ឋ។
អគ្គស្នងការនគរបាលជាតិកម្ពុជា កាលពីថ្ងៃទី២៤ ខែតុលា ឆ្នាំ២០២៤ បានឆ្មក់ចូលទីតាំងមួយកន្លែង ក្នុងស្រុកគងពិសី ខេត្តកំពង់ស្ពឺ ដែលសង្ស័យថា ជាកន្លែងបង្ខាំងមនុស្ស ធ្វើទារុណកម្ម និងធ្វើប្រតិបត្តិការឆបោកតាមប្រព័ន្ធអនឡាញ ឃាត់ខ្លួនមនុស្សបានជាង១ពាន់នាក់ ដែលថា ភាគច្រើនជាជនជាតិចិន។
ដូចគ្នានេះដែរ សំបុកក្រុមឧក្រិដ្ឋជនច្រើនកន្លែងទៀតក្នុងឆ្នាំ២០២៥ ត្រូវបានរកឃើញនៅក្រុងព្រះសីហនុ ក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ ជាខេត្តជាប់ព្រំដែន។
លើសពីនេះ ក៏រកឃើញផងដែរសំបុកពួកឧក្រិដ្ឋជននៅខេត្តមណ្ឌលគិរី ជាខេត្តជាប់ព្រំដែនវៀតណាម។
កាលពីសប្តាហ៍មុន ពោលគឺនៅថ្ងៃទី៦ ខែមិនានេះ សមត្ថកិច្ចបានឆ្មក់ចូលអាគារមួយកន្លែង ស្ថិតនៅក្រុងច្បាមន បានឃាត់ខ្លួនជនបរទេសសរុប ជិត៣០០នាក់ ក្នុងនោះជនជាតិចិនមាន ២៤៧នាក់។
របាយការណ៍របស់អង្គការសហប្រជាជាតិទទួលបន្ទុកសិទ្ធិមនុស្ស(UNHCHR) កាលពីចុងខែសីហា ឆ្នាំ២០២៣ បាននិយាយថា មនុស្សប្រមាណ ១០ម៉ឺននាក់ ជាជនបរទេស ត្រូវបានចាប់បង្ខំឱ្យធ្វើការងារឆបោកតាមប្រព័ន្ធអនឡាញនៅក្នុងប្រទេសកម្ពុជា។
ទាំងអស់នេះ បញ្ជាក់ថា បទឧក្រិដ្ឋក្នុងប្រទេសកម្ពុជា ប៉ុន្មានឆ្នាំជាប់គ្នាទៅនេះ មិនថយចុះទេ ដែលការណ៍នេះ ធ្វើឱ្យរដ្ឋាភិបាល រងការស្តីបន្ទោសថា វិធានការបង្ក្រាបមិនចំសំបុកមេខ្លោង ពួកឧក្រិដ្ឋជន ដែលការណ៍នេះ បន្តការគំរាមដល់អ្នកវិនិយោគ ភ្ញៀវទេសចរ និងជីវភាពប្រជាពលរដ្ឋជាម្ចាស់ប្រទេស៕
