អ្នកមានជម្លោះដីធ្លីនៅខេត្តក្រចេះ អះអាងថា មន្ត្រីបានបង្កើនសម្ពាធឱ្យពួកគាត់ ត្រូវតែចាកចេញពីដីធ្លាប់អាស្រ័យផល ដើម្បីបើកផ្លូវឱ្យក្រុមហ៊ុនវៀតណាម តាមការចង់បានរបស់រដ្ឋាភិបាល ដែលការណ៍នេះ ជំរុញឱ្យការព្រួយបារម្ភពីវិបត្តិពលរដ្ឋជិត ៣០០គ្រួសារ មានសមាជិករាប់ពាន់នាក់។
តំណាងជនរងគ្រោះដីធ្លី នៅឃុំកោះខ្ញែរ ស្រុកសំបូរ អ្នកស្រី អ៊ែល រ៉ូហ្សា ប្រាប់VODនៅថ្ងៃទី១២ ខែមិនានេះថា កាលពីថ្ងៃទី១០ខែមិនានេះ មន្ត្រីអះអាងថា មកពីក្រសួងកសិកម្ម បានចុះជួបពួកគាត់ជុំវិញជម្លោះជាមួយក្រុមហ៊ុនវៀតណាម។
អ្នកស្រីបន្តថា មន្ត្រីមកពីក្រសួង លោក ផេង គឹមស្រ៊ុន បានដាក់សម្ពាធឱ្យពួកគាត់ចេញពីដីធ្លាប់អាស្រ័យផលតាំងពីដូនតាមក ដើម្បីទុកដីនោះឱ្យក្រុមហ៊ុនវៀតណាម ដែលទទួលបានសិទ្ធិវិនិយោគពីរដ្ឋាភិបាល។
អ្នកស្រីបញ្ជាក់ថា មន្ត្រីនោះនិយាយគំរាមឱ្យពលរដ្ឋព្រមចាកចេញ ពីដីធ្លាប់អាស្រ័យផលនេះ ហើយយល់ព្រមទទួលដីសម្បទានប្រមាណ៣ហិកតា នៅខេត្តស្ទឹងត្រែងជំនួសវិញ ដោយអត់ហៅជួបជាក្រុមទេ។
អ្នកស្រីថា៖ «សំឡុតយើងម៉ង ហើយគំរាមកំហែងយើង លួងលោមយើងយកទៅអនុវត្តច្បាប់ គាត់ធ្វើយ៉ាងម៉េច ដាក់គំនាបឱ្យយើងធ្វើតាមគាត់ទាំងអស់ម៉ង ហើយហៅជួបម្តងម្នាក់ៗទេ។ […ខ្ញុំសួរគាត់ថា ] ប្រជាពលរដ្ឋកំពុងមានទុក្ខលំបាក បើសិនជាប្រជាពលរដ្ឋរងទុក្ខលំបាក ទៅសម្លាប់ខ្លួនគិតយ៉ាងម៉េច? គាត់ថាអើ សម្លាប់ៗទៅ ទឹកទន្លេមានតើ ទៅសម្លាប់ទៅ [សម្តីនេះ] បំបាក់ស្មារតីយើងតែហ្មង»។
ដោយឡែក តំណាងជនរងគ្រោះដីធ្លីម្នាក់ទៀត លោក ភេម ឡៃ និយាយថា លោកមិនអាចទទួលយកសំណើរនេះបានទេ ដោយលោកចង់បានដំណោះស្រាយ ជាជាងការស្នើឱ្យលោកចាកចេញពីដីដែលអាស្រ័យផលតាំងពីដូនតាមក។
ប្រភពបន្តថា ពួកគេកំពុងរស់ទាំងវេទនាដោយសារវិបត្តិជីវភាព បញ្ហាបំណុលវ័ណ្ឌក ជាពិសេសគឺបារម្ភពីសុវត្ថិភាពពួកគេជាខ្លាំង ខណៈរងនូវបទចោទ និងការគំរាមពីសំណាក់មន្រ្តីមានអំណាច។
លោកថា៖ «ខ្ញុំបារម្ភខ្លាចចាប់ពួកខ្ញុំហ្នឹង ចាប់ពួកខ្ញុំទាំងបំពានរាល់ថ្ងៃបារម្ភតែរឿងហ្នឹង។ ពួកគាត់និយាយខ្ញុំទទួលយកអត់បាន ក្នុងការគំរាមកំហែងក្នុងការដោះស្រាយ គឺអត់ស្របច្បាប់ អត់យោគយល់ មិនដូចសម្ដេចធិបតី គាត់ថា កន្លែងណាដែលគាត់ធ្លាប់រស់នៅហើយ គឺវាស់គិតគូរឲ្យគាត់ទៅ។ នេះមានអត់មានគិតអ៊ីចឹងផង គិតតែថាដីដែលក្នុងក្រវាត់របស់ក្រុមហ៊ុនហ្នឹង គឺជាដីក្រុមហ៊ុនទាំងអស់ ដល់អីចឹង ខ្ញុំទទួលយកម៉េចបាន »។
ជុំវិញបញ្ហានេះ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ផេង គីមស្រ៊ុន បដិសេធមិនឆ្លើយនឹងសំនួរ VOD ជុំវិញការលើកឡើងរបស់អ្នកមានជម្លោះដីធ្លីនេះ ដោយជំរុញឱ្យសួរអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ជំនួស តែVODមិនអាចទាក់ទងបាន។
សម្រាប់ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា ប្រសិនបើករណីនេះ ពិតដូចពលរដ្ឋលើកឡើងមែន ជាការសោកស្ដាយជាខ្លាំង ដោយថា ជាទង្វើមួយដែលមិនសមរម្យ ព្រោះក្នុងនាមជាមន្រ្តី គឺមានកាតព្វកិច្ចស្វែងរកដំណោះស្រាយ និងបម្រើពលរដ្ឋ។
បន្ថែមពីនេះ លោកថា រដ្ឋាភិបាល រួមទាំងអាជ្ញាធរពាក់ព័ន្ធ គួរតែពន្លឿនការដោះស្រាយបញ្ចប់វិវាទដីធ្លីនេះ ជូនពលរដ្ឋឱ្យបានឆាប់រហ័ស ដែលពលរដ្ឋអាចទទួលយកបាន ដោយមិនត្រូវដាក់សម្ពាធ។
លោកថា៖ «ជាសញ្ញាមួយអវិជ្ជមានខ្លាំងណាស់សម្រាប់ពលរដ្ឋយើង ដែលគាត់ធ្វើស្រែ ធ្វើចម្ការ ហើយគាត់សំអាងតែទៅលើដីធ្លី ហើយបាត់ដីពីដូនតា។ […] អាហ្នឹងគាត់ប្រឈមទាំងបញ្ហារឿងចំណាកស្រុក ជំពាក់លុយធនាគារ ចំណាកស្រុកទាំងគ្រួសារ។ វាវេទនាណាស់ រស់នៅស្រុកគេទៀត អត់ផ្ទះអត់សម្បែង ហើយក្មេងៗបានអីធ្វើការសិក្សា អាចពេលខ្លះបញ្ហាហ្នឹង បង្កឱ្យមានអំពើហិង្សាក្នុងគ្រួសារ […] ពេលខ្លះអាចធ្លាក់ខ្លួននៅក្នុងការជួញដូរមនុស្សទៀត»។
ជុំវិញបញ្ហាដីធ្លីនេះដែរ តំណាងពលរដ្ឋចំនួន ៦នាក់ ក៏រងសម្ពាធពីតុលាការដែរ ដោយក្រុមហ៊ុនបានប្តឹង ចោទពីបទហិង្សា ម្ដងរួចមកហើយ ដែលពួកគាត់បានឡើងទៅបំភ្លឺនៅតុលាការច្រើនដង។
បើតាមប្រភពដដែល ជិត១ឆ្នាំទៅនេះ ពួកគាត់បានឡើងមកភ្នំពេញ រកកិច្ចអន្តរាគមន៍ពីមេដឹកនាំញឹកញាប់ រួមទាំងក្រសួងពាក់ព័ន្ធរបស់រដ្ឋាភិបាលផងដែរ ឱ្យជួយទប់ស្កាត់ការរំលោភយកដី ពីសំណាក់ក្រុមហ៊ុនវៀតណាមនេះ ប៉ុន្តែថាមកដល់ពេលនេះគ្មានដំណោះស្រាយទេ។
ពួកគាត់ថា ចំពេលយុត្តិធម៌ត្រូវបានស្ថាប័នជាតិកប់ចោល ក្រុមហ៊ុនវៀតណាម បានបង្កើនការប្រើដៃតុលាការ ប្តឹងចោទប្រកាន់តំណាងពួកគាត់ជាជនរងគ្រោះទៅវិញ ហើយពេលនេះរងសម្ពាធពីក្រសួងបង្ខំឱ្យចាកចេញពីដីធ្លាប់អាស្រ័យផល ទៅទទួលយកដីនៅខេត្តស្ទឹងត្រែង ដើម្បីបើកផ្លូវឱ្យក្រុមហ៊ុនវៀតណាម ដែលរំលោភបំពានដីធ្លីពួកគាត់ទៅវិញ។
របាយការណ៍នានា រកឃើញថា គោលនយោបាយផ្តល់ដីសម្បទានរបស់រដ្ឋាភិបាល មិនបានជួយលើកកម្ពស់ជីវភាពពលរដ្ឋនៅសហគមន៍ក្រីក្រទេ។ តែផ្ទុយទៅវិញ វាហាក់បានពង្រីកអយុត្តិធម៌ និងជំរុញឱ្យមានការបណ្តេញចេញទៅវិញ៕
