រដ្ឋាភិបាល បានសម្រេចលុបចោលគម្រោងអភិវឌ្ឍន៍ ពីក្រុមហ៊ុនចំនួន៤ និងបានប្រគល់ដីចំនួន ៤០ហិកតា នៅភ្នំខ្នងផ្សារ ខេត្តកំពង់ស្ពឺ ដល់ប្រជាសហគមន៍គ្រប់គ្រងសម្រាប់ជាប្រយោជន៍ ក្នុងការរកចំណូលពីវិស័យទេសចរ និងរក្សាទុកសម្រាប់ការអភិរក្សជីវៈចម្រុះ និងធនធានធម្មជាតិ។
នាយករដ្ឋមន្ត្រីកម្ពុជា លោក ហ៊ុន ម៉ាណែត បានឱ្យដឹងនៅក្នុងសំណេរលើទំព័រហ្វេសប៊ុករបស់លោក នៅថ្ងៃទី១៤ ខែមិនា ឆ្នាំ២០២៥នេះថា រដ្ឋាភិបាល បានសម្រេចលុបចោលគម្រោងអភិវឌ្ឍន៍នៅលើតំបន់ទេសចរណ៍ភ្នំខ្នងផ្សារ តាមរយ:ការដកមកវិញនូវដីទំហំ ៤០ហិកតា ដែលមានការបោះបង្គោលព្រំ ដើម្បីថែរក្សាឱ្យបាននូវស្ថានភាពដើមនៃធម្មជាតិ សម្រាប់បម្រើជាប្រយោជន៍ដល់សហគមន៍ប្រមាណ ១០០គ្រួសារ និងអ្នកទេសចរ ដោយមិនអនុញ្ញាតឱ្យមានការវិនិយោគនៅលើភ្នំឡើយ។
លោកបន្តថា កាលពីថ្ងៃទី១៣ ខែមិនា ម្សិលមិញនេះ ក្រសួងពាក់ព័ន្ធ និងប្រជាសហគមន៍ បាននាំគ្នាទៅដកបង្គោលព្រំដី ក្រោយពីមានការព្រមព្រៀងបញ្ឈប់គម្រោងវិនិយោគរបស់ក្រុមហ៊ុនចំនួន៤ នៅចំណុចភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ ដែលកំពុងបម្រើសេវាកម្មទេសចរណ៍។
តែយ៉ាងណា លោកពុំបានបញ្ជាក់ពីឈ្មោះរបស់ក្រុមហ៊ុនវិនិយោគទាំង៤ ដែលបានដកហូតដីមកវិញនោះទេ។
ចំណែកទំព័រហ្វេសប៊ុករបស់ក្រសួងបរិស្ថានវិញ ក៏បានឱ្យដឹងដែរថា ក្រុមការងារពិសេស បានសហការអភិរក្ស និងថែរក្សាតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញឱ្យបានល្អ សម្រាប់ផលប្រយោជន៍សាធារណៈ និងសហគមន៍នៅតំបន់នេះ។
ប្រភពដដែល បន្តថា ក្រុមការងាររបស់រដ្ឋាភិបាល នឹងសិក្សារៀបចំហេដ្ឋារចនាសម្ព័ន្ធគាំទ្រ និងសេវាកម្មគាំទ្រ ដូចជា ប្រព័ន្ធផ្គត់ផ្គង់ទឹក ផ្លូវ បន្ទប់ទឹក កន្លែងលក់អាហារ និងកន្លែងសង្គ្រោះបន្ទាន់ជាដើម ដើម្បីធ្វើឱ្យប្រសើរឡើងនូវការផ្តល់សេវាជូនអ្នកទេសចរជាតិ និងអន្តរជាតិ ដែលទៅកម្សាន្តនៅទីនេះ ក៏ដូចជាបម្រើដល់ប្រយោជន៍សហគមន៍ផងដែរ។
ការសម្រេចរបស់រដ្ឋាភិបាល បានធ្វើឡើងក្រោយពីលោកនាយករដ្ឋមន្ត្រី ហ៊ុន ម៉ាណែត និងមន្ត្រីពាក់ព័ន្ធមួយចំនួន បានចុះទៅពិនិត្យនៅតំបន់នោះផ្ទាល់ កាលពីថ្ងៃទី០៨ ខែមីនា។
ជុំវិញករណីនេះដែរ ប្រជាហគមន៍ការពារព្រៃឈើខេត្តកំពង់ស្ពឺ កាលពីពេលថ្មីៗនេះ ក៏បានស្នើដល់លោកនាយករដ្ឋមន្ត្រី ជួយទប់ស្កាត់បទល្មើសព្រៃឈើ ក្នុងឧទ្យានជាតិជួរភ្នំក្រវាញកណ្ដាល នៅចំណុចភ្នំខ្នងផ្សារ និងខ្នងក្រពើ ដែលជាកន្លែងទាក់ទាញភ្ញៀវទេសចរនេះផងដែរ។
ពួកគេថា ប្រភេទឈើដែលក្រុមជនល្មើសកាប់រំលំ នៅតំបន់ខ្នងផ្សារ រួមមាន ដើមម្រេញ ឬរាជកុល ឈើទាល គគីរ និងផ្ចឹកជាដើម ដែលមុខកាត់ ៣តឹកឡើងទៅ ដុះតាមជ្រលងភ្នំខ្ពង់រាប ខ្នងភ្នំ ចង្កេះភ្នំ និងឈើខ្លះទៀត ដុះតាមជម្រាលភ្នំ។
ឧទ្យានជាតិជួរភ្នំក្រវាញកណ្ដាល ដែលមានទំហំជាង ៤សែនហិកតា (៤០២.៣៥២) លាតសន្ធឹងក្នុងខេត្តចំនួន៣ គឺខេត្តកំពង់ស្ពឺ កោះកុង និងខេត្តពោធិ៍សាត់ និងជាព្រៃទឹកភ្លៀងដ៏ធំបំផុតមួយនៅកម្ពុជា បានទទួលរងការកាប់បំផ្លាញជាង២ទសវត្សរ៍មកហើយ៕
