ទីប្រឹក្សាគណបក្សកម្លាំងជាតិ ឱ្យដឹងថា មានមន្រ្តីមូលដ្ឋានរបស់គណបក្សក្រៅរដ្ឋាភិបាលមួយនេះ ចំនួន២រូបបន្ថែមទៀតហើយ ត្រូវបានអាជ្ញាធរស្រុកចម្ការលើ ខេត្តកំពង់ចាម ចាប់ខ្លួន ហើយមូលហេតុនៅពីក្រោយនៃការចាប់ខ្លួននេះ គេនៅមិនទាន់ទម្លាយឱ្យដឹងនៅឡើយទេ។
លោក រ៉ុង ឈុន ទីប្រឹក្សាគណបក្សកម្លាំងជាតិ ឱ្យដឹងនៅថ្ងៃទី១៧ ខែមីនា ឆ្នាំ២០២៥ នេះថា មន្រ្តីគណបក្សប្រឆាំងមួយនេះចំនួន២នាក់ ត្រូវបានអាជ្ញាធរស្រុកចម្ការលើ ចាប់ខ្លួនក្នុងថ្ងៃផ្សេងគ្នា។ លោកបន្តថា ជនសង្ស័យទាំងពីរនាក់នេះ គឺជាអតីតក្រុមប្រឹក្សាឃុំ កូតាមកពីគណបក្សភ្លើងទៀន ប៉ុន្តែបច្ចុប្បន្នពួកគេ គឺជាសមាជិករបស់គណបក្សកម្លាំងជាតិ។
លោក រ៉ុង ឈុន បន្តថា លោក កាន់ គុណ ដែលជាជំទប់ទី២ឃុំតាប្រុក ត្រូវសមត្ថកិច្ចចាប់ខ្លួន កាលពីល្ងាចថ្ងៃទី១៦ ខែមីនា ឆ្នាំ២០២៥។ ដោយឡែក លោក ម៉ៅ ហេន ជំទប់ទី២ ឃុំជយោ ត្រូវបាននគរបាលចាប់ខ្លួននៅថ្ងៃនេះ គឺនៅថ្ងៃទី១៧ ខែមីនា។
បើមន្រ្តីជាន់ខ្ពស់របស់គណបក្សកម្លាំង ឱ្យដឹងថា រហូតមកដល់ពេលនេះ ទាំងសាច់ញាតិ និងមន្រ្តីគណបក្សកម្លាំងជាតិនៅមូលដ្ឋាន គឺមិនបានទទួលដំណឹងណាមួយថា ពួកគេត្រូវនគរបាលឃុំខ្លួននៅកន្លែងនៅឡើយទេ មកដល់ម៉ោងនេះ ហើយក៏រឹតតែមិនដឹងថា តើអ្នកទាំងពីរ ត្រូវប្រឈមមុខនឹងការចោទអ្វីដែរ។
បើតាមលោក រ៉ុង ឈុន ការអនុវត្តនីតិវិធីតែរបៀបនេះរបស់អាជ្ញាធរ មកលើគណបក្សក្រៅរដ្ឋាភិបាល ជាការបង្ហាញថា នេះជាការមិនអនុវត្តច្បាប់របស់អាជ្ញាធរ ហើយជារូបភាព នៃការបំភិតបំភ័យខាងនយោបាយ ដែលមិនគួរកើតឡើងនោះទេ។
អង្គការការពារសិទ្ធិមនុស្ស លីកាដូ(Licadho) បានចេញរបាយករណ៍ ដែលដាក់ចំណងជើងថា «អ្នកជាប់ឃុំដោយប្រើសិទ្ធិ» រកឃើញថា គិតមកដល់ពេលនេះ ទាំងអ្នកនយោបាយ ក្រុមអ្នកការពារបរិស្ថាន មេដឹកនាំសហជីព សកម្មជនដីធ្លី និងអ្នកដែលសកម្មក្នុងកិច្ចការសង្គមចំនួន ៦៥នាក់ហើយ ត្រូវចាប់ខ្លួន។ លីកាដូ ចាត់ទុកថា រដ្ឋាភិបាលកម្ពុជា និងស្ថាប័នដែលអះអាងជាអ្នកអនុវត្តច្បាប់ បានបន្តចាប់ ឃាត់ និងឃុំខ្លួនប្រឆាំងអ្នកនយោបាយ អ្នកការពារសិទ្ធិមនុស្ស សកម្មជនដីធ្លី និងអ្នកសារព័ត៌មានជាដើម ដោយសារតែពួកគេមានភាពសកម្ម ឬការបញ្ចេញមតិនៅលើបណ្តាញសង្គម។ តែអ្នកទាំងនោះ ត្រូវរងការចោទប្រកាន់ពីបទល្មើសព្រហ្មមួយចំនួនទៅវិញ៕
