គណបក្សកម្លាំងជាតិ ចាត់ទុកស្ថាប័នសារព័ត៌មានVOA និង RFA បានបំពេញតួនាទីយ៉ាងសំខាន់ ក្នុងការចូលរួមលើកស្ទួយសេរីភាព និងលិទ្ធិប្រជាធិបតេយ្យ ផ្តល់ព័ត៌មានពិតប្រកបដោយតម្លាភាពដល់ពលរដ្ឋដែលកំពុងរស់នៅប្រទេស ដែលមានការរឹតត្បិតសេរីភាពសារព័ត៌មាន រួមទាំងកម្ពុជា។
នេះបើតាមសេចក្តីថ្លែងការណ៍ស្តីពី ការបិទវិទ្យុសំឡេងសហរដ្ឋអាមរិក និងការផ្អាកជំនួយដល់វិទ្យអាស៊ីសេរី ចេញផ្សាយនៅថ្ងៃទី១៨ ខែមីនា ឆ្នាំ២០២៥នេះ។
បើតាមគណបក្សកម្លាំងជាតិ ការសម្រេចចិត្តបិទវិទ្យុVOA និងអាស៊ីសេរីនេះ ជាការបាត់បង់ឱកាសទទួលបានព័ត៌មានពិតថ្មីៗ ស្តីពីស្ថានភាពនយោបាយ លទ្ធិប្រជាធិបតេយ្យ យុត្តិធម៌សង្គម សិទ្ធិមនុស្ស បរិស្ថាន និងសេដ្ឋកិច្ច ជាដើម។
ប្រពភពដដែលថា វិទ្យុសម្លេងសហរដ្ឋអាមេរិក (VOA) និងវិទ្យុអាស៊ីសេរី (RFA) គឺជាស្ថាប័នផ្សព្វផ្សាយសារព័ត៌មានឯករាជ្យ មានគណនេយ្យភាព និងតម្លាភាពដល់សង្គម។
ក្នុងន័យនេះ គណបក្សកម្លាំងជាតិ អំពាវនាវដល់រដ្ឋាភិបាលសហរដ្ឋអាមេរិក បន្តគាំទ្រដល់ស្ថាប័នវិទ្យុទាំងពីរនេះ ដើម្បីលើកស្ទួយការផ្សព្វផ្សាយសារព័ត៌មានឯករាជ្យ និងតម្លាភាពដល់ប្រជាពលរដ្ឋកម្ពុជា ក៏ដូចជាប្រជាពលរដ្ឋនៅក្នុងបណ្តាប្រទេសមួយចំនួន ដែលមានសារព័ត៌មានសេរីតិចតួច ឬគ្មានសោះ។
ជុំវិញការបិទវិទ្យុទាំងពីរនេះ ប្រធានគណបក្សកាន់អំណាច លោក ហ៊ុន សែន សរសេរសារលើហ្វេសប៊ុកខ្លួនថា ប្រធានាធិបតីអាមេរិក លោក ដូណាល់ ត្រាំ មានសេចក្តីក្លាហានចេញដឹកនាំពិភពលោក ដើម្បីប្រយុទ្ធប្រឆាំងព័ត៌មានក្លែងក្លាយ ដោយចាប់ផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន។
សម្រាប់ លោក ហ៊ុន សែន នេះជាការរួមចំណែកដ៏ធំដើម្បីលុបបំបាត់ព័ត៌មានក្លែងក្លាយ ព័ត៌មានភូតកុហក លាបពណ៌ បង្កចលាចលស្ទើរពេញពិភពលោក ដែលចេញមកពីក្បាលម៉ាស៊ីនឃោសនាដែលលោកប្រធានាធិបតី ត្រាំ បញ្ឈប់ការផ្តល់ថវិកា។
លោក ហ៊ុន សែន ធ្លាប់បើកយុទ្ធនាការ កម្ចាត់សារព័ត៌មានឯករាជ្យ ចាប់ពីឆ្នាំ២០១៧មក និងជាបន្តបន្ទាប់រហូតបច្ចុប្បន្ន ចំពេលដែលពលរដ្ឋបោះឆ្នោតដកសេចក្តីទុកចិត្តយ៉ាងគំហុក ហើយងាកទៅគាំទ្រគណបក្សសង្គ្រោះជាតិ ដែលជាគណបក្សប្រឆាំង ដែលការនេះ ធ្វើឱ្យលោក ហ៊ុន សែន ប្រើតុលាការរំលាយគណបក្សប្រឆាំងចេញពីឆាកនយោបាយចាប់ពីពេលនោះមក។
យ៉ាងណា អង្គការអ្នកការសែតគ្មានព្រំដែន បានដាក់ចំណាត់ថ្នាក់កម្ពុជានៅលេខរៀងទី១៥១ ក្នុងចំណោម ១៨០ប្រទេស លើពិភពលោកក្នុងឆ្នាំ២០២៤។ ចំណាត់ថ្នាក់នេះ មានន័យថា កម្ពុជាជាប្រទេសមានការគំរាមកំហែងដល់សេរីភាពសារព័ត៌មាន«ធ្ងន់ធ្ងរ»៕
