នៅថ្ងៃនេះ គឺជាការចាប់ផ្តើមដំបូងទីនៃការជំនុំជម្រះក្នុងសំណុំរឿងព្រហ្មទណ្ឌប្រឆាំង មេកងអង្គរក្ស២រូបរបស់លោក ហ៊ុន សែន នៅប្រទេសបារាំង បន្ទាប់ពីរឿងក្តីមួយនេះ បានកប់ទុកប្រមាណជិត៣០ឆ្នាំកន្លងទៅនេះ។
លោក សម រង្ស៊ី អតីតមេដឹកនាំគណបក្សសង្រ្គោះជាតិ ឱ្យដឹងនៅថ្ងៃទី១៩ ខែមីនានេះថា ដូចការគ្រោងទុក តុលាការយុត្តិធម៌ប្រទេសបារាំង ចាប់ផ្តើមដំណើការក្តីក្នុងសំណុំរឿងគប់គ្រាប់បែកដៃ កាលពីជិត៣០ឆ្នាំមុនហើយ។
តាមរយៈគណនីហ្វេសប៊ុករបស់ខ្លួន លោក សម រង្ស៊ី បញ្ជាក់ថា ការសើរើរឿងក្តីនេះ មកជំនុំជម្រះពីតុលាការបារាំង គឺក្រោយពីរូបលោកបានដាក់បណ្តឹងប្រឆាំងឧក្រិដ្ឋកម្មនេះ កាលពីខែធ្នូ ឆ្នាំ២០២១។
បើតាមលោក សម រង្ស៊ី តុលាការបារាំងនឹងបើកសវនាការលើអង្គសេចក្តីចំនួន៣ថ្ងៃ ដោយចាប់ផ្តើមពីថ្ងៃទី១៩ និងបញ្ចប់ទៅវិញនៅថ្ងៃទី២១ ខែមីនា ឆ្នាំ២០២៥។
នៅថ្ងៃបាតុកម្មអហិង្សា កាលពីខែមីនា ឆ្នាំ១៩៩៧ ដែលដឹកនាំដោយលោក សម រង្ស៊ី ដែលកាលណោះជាប្រធានគណបក្សជាតិខ្មែរ បានដឹកនាំបាតុករចំនួន២០០នាក់ ដើរដង្ហែជាក្បួន លុះមកដល់ម្តុំអគាររដ្ឋសភាចាស់ ក្បែរព្រះបរមរាជវាំង ត្រូវជនអនាមិកគប់គ្រាប់បែកដៃចំនួន៤គ្រាប់ ចូលហ្វូងបាតុករ។
ហេតុការណ៍នៅពេលនោះ បណ្តាលឱ្យមនុស្ស១៦នាក់ ត្រូវស្លាប់ភ្លាមៗនៅនឹងកន្លែងកើតហេតុ ខណៈមនុស្សជាង១០០នាក់ផ្សេងទៀត រងរបួសធ្ងន់ និងស្រាល។
អស់រយៈពេលជិត៣០ឆ្នាំមកនេះ គេសង្កេតឃើញថា នេះជាលើកទី១ហើយ ដែលជនរងគ្រោះមានស្លាប់ និងរបួសនៅក្នុងអំពើគប់គ្រាប់បែកដៃនេះ ត្រូវបានតុលាការសើរើ មកជំនុំជម្រះ និងស្វែងរកយុត្តិធម៌៕
