នគរបាលជាតិកម្ពុជា បន្តទម្លាក់កំហុសដាក់ភាគីថៃ ពីការមិនចាប់បញ្ជូន លី រតនរស្មី និងពេជ្រ គឹមស្រ៊ិន ឱ្យទៅតុលាការថៃដើម្បីកាត់ទោសក្នុងសំណុំរឿងឃាតកម្មលើ លោក លិម គិមយ៉ា ដែលបានអូសបន្លាយជិត៣ខែទៅនេះ ដោយសំអាងថា បញ្ហាចម្បងមកពីស្ថាប័នជំនាញថៃ មិនផ្តល់ឯកសារស៊ើបអង្កេតបន្ថែម តាមការស្នើសុំរបស់កម្ពុជា។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់VODនៅថ្ងៃទី១៨ ខែមិនានេះថា គិតមកដល់ពេលនេះ កម្ពុជាទទួលបានសំណើរពីភាគីថៃ និងទទួលបាននិវេទន៍ក្រហមពីប៉ូលីសអន្តរជាតិ ក៏ប៉ុន្តែថា កម្ពុជាមិនទាន់មានឯកសារផ្លូវការណាមួយ ដែលផ្តល់ដោយភាគីថៃ ដើម្បីកសាងបំពេញនីតិវិធី ក្នុងកិច្ចសហការណ៍ជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌនៅឡើយទេ។
លោកគូសបញ្ជាក់ថា ភាគីកម្ពុជាធ្លាប់ជួបផ្ទាល់ជាមួយភាគីថៃ ដើម្បីសុំរបាយការណ៍ស៊ើបអង្កេតលម្អិតបន្ថែម ប៉ុន្តែថាមកដល់ពេលនេះ កម្ពុជាមិនទទួលបានលទ្ធផលអ្វីទាំងអស់ពីភាគីថៃ។ បញ្ហានេះ លោកថា មិនអាចប្រាប់បានពីពេលវេលាជាក់លាក់ លើវិធានចាប់បញ្ជូនជនសង្ស័យទាំងពីរនាក់នេះបានទេ។
លោកថា៖ «អ្វីដែលជាប្រភពមូលដ្ឋានច្បាស់លាស់សម្រាប់ផ្ដល់ការស៊ើបអង្កេតបន្តនេះ វាស្ថិតក្នុងដៃភាគីថៃ ដូច្នេះយើងក៏នៅតែរងចាំឯកសារមួយចំនួន ដែលពាក់ព័ន្ធការងារជំនាញស៊ើបអង្កេតនៃភាគីទាំងសងខាង ពិភាក្សាគ្នាឱ្យបានច្បាស់លាស់ ហើយចំពោះគេលើកឡើងយ៉ាងណាយ៉ាងណីនោះ អាហ្នឹងសិទ្ធិរបស់គេទេ! ប៉ុន្តែគ្រាន់ថា ការលើកឡើងឲ្យមានការទទួលខុសត្រូវ ឱ្យចេះច្បាប់ ចេះទម្លាប់ ឱ្យដឹងរដ្ឋធម្មនុញ្ញរបស់ព្រះរាជាណាចក្រកម្ពុជាផង»។
លោក លិម គិមយ៉ា ត្រូវបានខ្មាន់កាំភ្លើងបាញ់សម្លាប់ក្នុងទីក្រុងបាងកកប្រទេសថៃ កាលពីថ្ងៃទី៧ ខែមករា ឆ្នាំ២០២៥ ខណៈលោក និងភរិយា ជាជនជាតិបារាំង ធ្វើដំណើរតាមរថយន្តចេញពីខេត្តសៀមរាប។
ឃាតកម្មនេះ កើតឡើងក្រោយពីលោក លិម គិមយ៉ា រិះគន់គ្រួសារហ៊ុន រឿងធ្វើឱ្យឆេះរូបព្រះឆាយាល័ក្ខណ៍ព្រះមហាក្សត្រ ក្នុងកម្មវិធីព្រឹត្តិការណ៍ «សាទរកម្ពុជា» កាលពីយប់ឆ្លងឆ្នាំសកល ឆ្លងចូលឆ្នាំ២០២៥ ដែលរៀបចំដោយលោក ហ៊ុន ម៉ានី កូនប្រុសលោក ហ៊ុន សែន ។
ក្រោយចាប់ខ្មាន់កាំភ្លើង ជាជនជាតិថៃបាន តុលាការព្រហ្មទណ្ឌថៃ បានចេញដីកាឱ្យនាំខ្លួន ជនសង្ស័យ លី រតនរស្មី ដែលបុរសរូបនោះ ជាទីប្រឹក្សា លោក ហ៊ុន សែន ។
ដោយឡែក ប៉ូលីសអាំងទែប៉ូល ក៏បានចេញនិវេទន៍ក្រហមឱ្យតាមចាប់ខ្លួនបុរសម្នាក់ទៀត គឺ ពេជ្រ គឹមស្រ៊ិន ដែលគេស្គាល់ថា ជាមនុស្សស្និទ្ធនឹងអភិបាលក្រុងភ្នំពេញ លោក ឃួង ស្រេង ខណៈជនសង្ស័យត្រូវបានកាមេរ៉ាសុវត្ថិភាព ចាប់បានពីទំនាក់ទំនងជាមួយខ្មាន់កាំភ្លើងនៅកន្លែងកើតហេតុ។
ជុំវិញការអះអាងរបស់ លោក ឆាយ គឹមខឿន នេះ តំណាងរាស្ត្រគណបក្សសង្គ្រោះជាតិ លោក សួន សូរីដា ចាត់ទុកថា ជាលេសដោះសារគេចចេញពីការទទួលខុសត្រូវតែប៉ុណ្ណោះ ដោយថា ទោះបីមិនចាប់បញ្ជូនទៅភាគីថៃ តែក៏ត្រូវហៅជនសង្ស័យទាំង២នោះមកស៊ើបអង្កេតលើទឹកដីកម្ពុជាដែរ ព្រោះអ្នកស្លាប់ជាជនជាតិខ្មែរ។
មួយវិញទៀត លោកថា ការមិនខ្វល់ខ្វាយរកយុត្តិធម៌បែបនេះ ដោយសារអ្នកស្លាប់ជាអ្នកនយោបាយប្រឆាំងរដ្ឋាភិបាល តែបើជនរងគ្រោះជាមន្រ្តីបក្សកាន់អំណាចវិញ រដ្ឋាភិបាលកម្ពុជាប្រហែលមិនសង្ងំស្ងៀមដូចនេះទេ។
លោកថា៖ «វាមិនចាំបាច់ចាប់ហើយត្រូវបញ្ជូនទៅថៃទេ ឲ្យតែដំណាក់កាលទីមួយចាប់ជនហ្នឹងសិន រដ្ឋាភិបាលចាប់ជនហ្នឹងសិន ហើយរឿងបញ្ជូន ឬមិនបញ្ជូន អាហ្នឹងចាំមើលទៅតាមក្រោយទៅ។ បើរដ្ឋាភិបាលថាអត់ទេ អត់បញ្ជូនទេ គឺត្រូវតែស៊ើបអង្កេត ត្រូវតែកាត់ក្ដីឲ្យជនហ្នឹងនៅស្រុកខ្មែរ អាហ្នឹងគឺរដ្ឋាភិបាលកម្ពុជាធ្វើចំណាត់ការបែបហ្នឹងទៅ បើធ្វើចំណាត់ការបែបហ្នឹង អាហ្នឹងគឺវាជារូបភាពមួយដែលធ្វើឲ្យមហាជនខ្មែរហ្នឹងអាចនឹងស្ងប់ចិត្តខ្លះ»។
សម្រាប់ ប្រធានក្រុមអ្នកច្បាប់អមរិន្ទ លោក សុខ សំអឿន យល់ថា បើតាមដីការបស់ថៃឬនិវេទន៍ក្រហមរបស់ប៉ូលីសអន្តរជាតិ អាចជាភស្តុតាងជំរុញឱ្យមានការចាប់ខ្លួនជនសង្ស័យ ប៉ុន្តែវាអាស្រ័យលើឆន្ទៈរបស់ថ្នាក់ដឹកនាំទៅវិញទេ។
លោកថា៖ «យើងបានដីកាបង្កាប់ឱ្យតាមចាប់ខ្លួនពីតុលាការថៃហើយ ខ្ញុំថាអាហ្នឹងដូចជាគ្រប់គ្រាន់ហើយ ជាទស្សនៈខ្ញុំ ក៏ប៉ុន្តែក្រែងល៎ អាជ្ញាធរខ្មែរត្រូវអ្វីផ្សេងៗទៀត ខ្ញុំមិនដឹងដែរ»។
ដោយឡែក ប្រធានអង្គការប្រជាធិបតេយប្រចាំនៅប្រទេសអូស្រ្តាលី លោក ស៊ឹង សែនករុណា ក៏ធ្លាប់អះអាងថា ការបន្តលាក់បាំងជនសង្ស័យរបស់មេដឹកនាំកម្ពុជា ឆ្លុះបញ្ចាំងថា ខ្លួនពិតជាមានជាប់ពាក់ព័ន្ធករណីឃាតកម្មនេះ។
លោកថា ដើម្បីកុំឱ្យខ្មាស់បរទេសគឺតុលាការថៃ ប៉ូលីសអន្តរជាតិអាំងទែប៉ូល និងភាគីបារាំង មេដឹកនាំកម្ពុជា ត្រូវចាប់បញ្ជូនជនសង្ស័យទាំងពីរនាក់នោះឱ្យតុលាការថៃ ដើម្បីសួរចម្លើយនិងផ្តន្ទាទោស។
លោកថា៖ «ការដែលបន្តលាក់បាំងនេះ គឺគេអាចមានមន្ទិលសង្ស័យថា វាជាប់ពាក់ព័ន្ធនឹងអ្នកមានអំណាចនៅកម្ពុជា ដែលគេមានការព្រួយបារម្ភថា បើបញ្ជូនជនសង្ស័យ លី រតនរស្មី និងពេជ្រ គឹមស្រ៊ិន ទៅនឹងធ្វើឱ្យមានការបែកធ្លាយអ្នកនៅពីខាងក្រោយខ្នងជាដើម។ ចឹងរឿងដែលមិនចាប់បញ្ជូនហ្នឹង វាអាចប៉ះពាល់ដល់មុខមាត់ថ្នាក់ដឹកនាំ ទើបមិនហ៊ាននោះ»។
កាលពីថ្ងៃទី២៤ ខែមករា បារាំងតាមរយៈឯកអគ្គរដ្ឋទូតបារាំងប្រចាំនៅកម្ពុជា ធ្លាប់លើកឡើងពីយុត្តិធម៌ លោក លិម គិមយ៉ា នៅចំពោះមុខ លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជាផងដែរ។
កាលថ្ងៃទី១៥ ខែមករា នគរបាលអន្តរជាតិអាំងទែប៉ូល (Interpol) បានចេញនិវេទន៍ក្រហម (Red notice) ឱ្យស្វែងរកចាប់ខ្លួនអ្នកផ្តល់តម្រុយ ឱ្យបាញ់សម្លាប់លោក លិម គិមយ៉ា។
ជុំវិញបញ្ហានេះ មន្ត្រីបក្សប្រឆាំងដាក់ការចោទថា ការបន្តលាក់បាំងជនសង្ស័យទាំងក្នុងសំណុំរឿងឃាតកម្មនេះ បញ្ជាក់ថា គ្រួសារហ៊ុន នៅជាមេខ្លោងនៅពីក្រោយឃាតកម្មនេះ៕
