មន្រ្តីគណបក្សភ្លើងទៀន៣រូប ត្រូវបានដោះលែងនៅថ្ងៃនេះ ក្រោយពីពួកគេបានអនុវត្តទោសចប់ស្ថាពរនៅក្នុងពន្ធនាគារ ក្រោមបទចោទក្លែងស្នាមមេដៃ ក្នុងការបង្កើតគណបក្សបេះដូងជាតិ តែយ៉ាងណាការចោទប្រកាន់នេះ ត្រូវបានសាច់ញាតិរបស់មន្រ្តីគណបក្សជំទាស់ធ្លាប់ច្រានចោល ដោយចាត់ទុកការចាប់ខ្លួននេះ គឺជាការគំរាមកំហែង និងបំភិតបំភ័យស្មារតីខាងនយោបាយ។
លោក ខឿន វីរ៉ាត់ ដែលជាប្រធានចលនាយុវជនរបស់គណបក្សភ្លើងទៀនប្រចាំរាជធានីភ្នំពេញ មុនពេលចាប់ខ្លួន នៅពេលនេះលោកទទួលបានសេរីភាពមកវិញហើយ បន្ទាប់ពីរូបគេបានអនុវត្តទោសដោយពេញលេញ នៅក្នុងពន្ធនាគារ។
នៅលើបណ្តាញសង្គមហ្វេសប៊ុករបស់មន្រ្តីគណបក្សប្រឆាំងជាច្រើន នៅថ្ងៃទី២៤ ខែមីនានេះ ពួកគេបានបង្ហោះសារព្រោងព្រាតពីការជូនដំណឹង អំពីការស្រោចទឹករបស់ លោក ខឿន វីរ៉ាត់។ ដូចគ្នានេះដែរ ភរិយារបស់មន្រ្តីគណបក្សប្រឆាំងរូបនេះ គឺលោកស្រី ថាច់ ចន្ធូ ក៏បាននិយាយក្នុងគណនីហ្វេសប៊ុកដែរថា នៅរសៀលថ្ងៃនេះ លោកស្រីនឹងនាំស្វាមីទៅស្រោចទឹកតាមប្រពៃណីសាសនា នៅវត្តមួយក្បែរពន្ធនាគារព្រៃស។
ការជ្រើសរើសពេលវេលានៅថ្ងៃនេះ ដើម្បីទទួលទឹកមន្តពីព្រះសង្ឃ នោះក៏ព្រោះតែការបញ្ជូនចេញពីពន្ធនាគារ គឺគេរៀបចំឡើងនៅពេលយប់។ ហេតុនេះ ការបញ្ជូនអ្នកដែលត្រូវដោះលែងមកឱ្យព្រះសង្ឃប្រោះព្រំយកសេរីសួស្តីនេះ គឺមិនបានធ្វើភ្លាមៗដូចលើកមុនៗឡើយ ព្រោះការផ្តល់សេរីភាពរបស់មន្រ្តីពន្ធនាគារ ក្នុងពេលសព្វថ្ងៃនេះ គឺគេតែងអនុវត្តតែនៅពេលយប់។
ដូចគ្នានេះដែរ លោកស្រី ថាច់ ចន្ធូ បានបង្ហោះសារនៅលើគណនីហ្វេសប៊ុក ដោយនិយាយថា ស្វាមីរបស់ខ្លួន និងស្រ្តីជាប់ឃុំម្នាក់ទៀត ត្រូវបានគេបញ្ជូនចេញពីពន្ធនាគារ មកដល់ផ្ទះនៅពាក់កណ្តាលអាធាត្រ។
ប្រភពបន្តថា៖ «សូមជម្រាបជូនដំណឹងដល់អ៊ុំ ពូមីង បងប្អូន ឲ្យបានជ្រាបថា ស្វាមីនាងខ្ញុំ លោក ខឿន វីរ៉ាត់ និងលោកស្រី នូ សិទ្ធារី ត្រូវបានមន្រ្តីពន្ធនាគារដោះលែង និងជូនមកដល់ផ្ទះនៅវេលាម៉ោង ០២:០០ នាទីយប់ថ្ងៃទី២៤ ខែមីនា ឆ្នាំ២០២៥ ហើយ » ។
នៅថ្ងៃនេះ ក្រៅពីលោក ខឿន វីរ៉ាត់ ក៏នៅមានអ្នកស្រី នូ សុទ្ធារី មន្រ្តីគណបក្សប្រឆាំង និងលោក តូច ថឹង ជាប្រធានគណៈកម្មាធិការប្រតិបត្តិគណបក្សភ្លើងទៀនប្រចាំខេត្តកំពង់ចាម មុនពេលចាប់ខ្លួន ក៏ត្រូវបានគេដោះលែងដូចគ្នាដែរ។
លោក ខឿន វីរ៉ាត់ ថ្លែងនៅចំពោះមុខអ្នកកាសែត នៅរសៀលថ្ងៃនេះ ក្រោយបញ្ចប់ពិធីស្រោចទឹកមន្តថា ជំហររបស់លោកនៅតែមានភក្តីភាពជានិច្ច ជាមួយគណបក្សក្រៅរដ្ឋាភិបាល។ លោកនឹងមិនងាករេចេញពីអ្នកប្រជាធិបតេយ្យឡើយ។ ជាងនេះទៀត អ្វីដែលលោករៀនសូត្របានពីការបាត់បង់សេរីភាព នៅក្នុងពន្ធនាគារនេះ វាជាការពង្រឹងស្មារតីលោកបន្ថែមទៀត ក្នុងបុព្វហេតុប្រជាធិបតេយ្យ និងសិទ្ធិមនុស្ស ឱ្យកាន់តែរឹងម៉ាំជាងមុន។
លោកថា៖ «ខ្ញុំអត់បានប្រព្រឹត្តកំហុសថាខ្ញុំបានធ្វើ ប៉ុន្តែក្នុងរយៈពេល២ឆ្នាំមកនេះ ខ្ញុំចាត់ទុកថាជាវិស្សមកាលនយោបាយរបស់ខ្ញុំ។ ខ្ញុំមកនៅក្នុងពន្ធនាគារដែលបានរៀនសូត្រ ហើយអរគុណដែលការអនុវត្តរបស់មន្រ្តីពន្ធនាគារមួយចំនួនយកចិត្តទុកដាក់។ ប៉ុន្តែមួយចំនួនទៀតនៅតាមពន្ធនាគារ ជាពិសេសថ្មីៗនេះ គឺមិនបានអនុវត្តទៅតាមបទបញ្ជាផ្ទៃក្នុងរបស់ពន្ធនាគារទេ »។
មន្រ្តីគណបក្សជំទាស់ទាំងបីរូបនេះ ត្រូវបានអាជ្ញាធរចាប់ខ្លួន ក្នុងបទចោទដូចគ្នានឹង លោក សៀម ភ្លុក ដែរ ពាក់ព័ន្ធនឹងការក្លែងស្នាមមេដៃ នៃការបង្កើតគណបក្សបេះដូងជាតិ។ តែសម្រាប់ លោក តូច ថឹង ដែលជាខ្មែរកម្ពុជាក្រោម ត្រូវបានគេបំបែកនៃការឃុំខ្លួននៅឯពន្ធនាគារ ម៤ ក្នុងខេត្តពោធិ៍សាត់។
កាលពីថ្ងៃទី២៤ ខែមីនា ឆ្នាំ២០២៣ លោក ជុំ សង្វា ចៅក្រមជំនុំជម្រះនៃតុលាការក្រុងភ្នំពេញ បានផ្តន្ទាទោសលោក សៀម ភ្លុក ដាក់ពន្ធនាគារ២ឆ្នាំកន្លះ ខណៈមន្រ្តីនយោបាយ១២រូបផ្សេងទៀត ម្នាក់ៗត្រូវជាប់ពន្ធនាគារ២ឆ្នាំ ក្នុងចោទដូចគ្នាដែរ។ ប៉ុន្តែនៅក្នុងចំណោមពួកគេ មានតែមនុស្ស៤នាក់ទេ ដែលត្រូវចាប់ខ្លួន ក្រៅពីនោះនៅក្រៅឃុំទាំងអស់។
ទាក់ទិនរឿងនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ(Licadho) មានប្រសាសន៍ថា ការផ្តល់សេរីភាពចំពោះអ្នកជាប់ឃុំ គឺមិនមានកំណត់នៅក្នុងច្បាប់ថាត្រូវអនុវត្តពេលយប់ ឬថ្ងៃទេ។ ប៉ុន្តែជានីតិវិធី និងដើម្បីមានភាពងាយស្រួល គេតែងអនុវត្តក្នុងពេលវេលាសមស្របណាមួយ ជាជាងពេលយប់ ហើយការអនុវត្តគោលការណ៍ ក្នុងជំហានចុងក្រោយរបស់មន្រ្តីអនុវត្តច្បាប់នេះ វាហាក់ជារឿងមន្ទិលសង្ស័យដែរ ពីការដាក់ឱ្យអ្នកជាប់ឃុំ មានសេរីភាពតែនៅពេលរាត្រីបែបនេះ។
លោកបន្តថា៖ «នៅក្នុងនីតិវិធីនៃការដោះលែង អត់មានឃើញការចែងនៃការដោះលែងយប់ឬថ្ងៃទេ ប៉ុន្តែជាទូទៅយើងឃើញការដោះលែងហ្នឹងនៅពេលថ្ងៃ។ ការដោះលែងពេលថ្ងៃ ដើម្បីគឺងាយនឹងទទួលជនជាប់ឃុំហ្នឹងពីក្រុមគ្រួសារ និងទាក់ទងនឹងសុវត្ថិភាពរបស់ពួកគេដែរ។ ប៉ុន្តែបើដោះលែងនៅពេលយប់វាអាចប៉ះពាល់ទៅនឹងសុវត្ថិភាពអីអញ្ចឹងទៅ »។
VOD មិនអាចស្នើសុំការបំភ្លឺបានភ្លាមៗទេ ពីអ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃនៅថ្ងៃនេះ។ ក្រសួងមហាផ្ទៃ រកឃើញថា ស្នាមមេដៃ ដែលគណបក្សបេះដូងជាតិ ដាក់មកដើម្បីបង្កើតគណបក្សកាលពីឆ្នាំ២០២១ មានភាពមិនស្មោះត្រង់។
មានមន្រ្តីគណបក្សនយោបាយចំនួន ១២នាក់ ត្រូវរងបណ្តឹងនិងចោទប្រកាន់កាលណោះ។ ប៉ុន្តែលោក សៀម ភ្លុក ដែលជាស្ថាបនិកគណបក្សប្រឆាំងមួយនេះ អះអាងថា តាមពិតស្នាមមេដៃទាំងនោះ មិនមែនជាស្នាមមេដៃដែលក្លែងបន្លំទេ។ ផ្ទុយទៅវិញ អ្វីដែលអាជ្ញាធរចាប់ថ្នាក់ថាមានកំហុសផ្នែកបច្ចេកទេសនេះ វាគ្រាន់តែជាចេតនាទុច្ចរិតខាងរឿងនយោបាយប៉ុណ្ណោះ៕
