ប្រព័ន្ធយុត្តិធម៌រងការស្តីបន្ទោសថា បានបណ្តែតបណ្តោយឱ្យជនរងគ្រោះចាញ់បោកក្រុមឧកញ៉ាស្លាប់ជាបន្តបន្ទាប់ ដោយសារតែឥទ្ធិពលក្រុមឧកញ៉ាខិលខូច ដែលជាការព្រួយបារម្ភ ពីចរន្តងើបតវ៉ាទ្រង់ទ្រាយធំ ដើម្បីទាមទារយុត្តិធម៌ បើជនរងគ្រោះកាន់តែច្រើនប្រឈមនឹងដាច់បាយ ដោយសារវិបត្តិបំណុលនោះ។
ការរិះគន់នេះ ក្រោយជនរងគ្រោះចាញ់បោកអតីតឧកញ៉ា ហ៊ី គឹមហុង មានអ្នកសា្លប់កើនជិត២០នាក់ ក្រោមវិបត្តិបំណុលធ្ងន់ធ្ងរ ខណៈជនរងគ្រោះខ្លះទៀត កំពុងប្រឈមនឹងសេចក្តីស្លាប់ជាបន្តបន្ទាប់ដោយសារគ្មានលុយព្យាបាលជំងឺ។
ពលរដ្ឋម្នាក់ចាញ់បោកក្រុមហ៊ុនពិភពដីមាស ក្នុងទំហំទឹកប្រាក់ជិត២ម៉ឺនដុល្លារ ដែលជាលុយខ្ចីធនាគារ គឺលោក ខេន សុខខាន់ វ័យ៥៥ឆ្នំា រស់នៅខេត្តកំពង់ចាម ប្រាប់VODថា រាល់ថ្ងៃលោកគ្មានលុយបង់ធនាគារទេ និងកំពុងធ្លាក់ខ្លួនឈឺធ្ងន់ធ្ងរ ប្រឈមនឹងសេចក្តីស្លាប់។
លោកថា៖ «ខ្ញុំឈឺទៀតលោកគ្រូឯងមើល! កើតជំងឺមហារីក! រកអីអត់បានសោះចប់! អ៊ីចឹងបានខ្ញុំថាចង់ឱ្យក្រុមហ៊ុន ពិភពដីមាស ជួយខ្ញុំផង! ព្រោះអីខ្ញុំឈឺដេកកន្ទេល ហូបបាយអត់កើតទេ បានតែបបរតិចៗ នៅតែថ្ងៃទៅទេ សូម្បីតែថ្នាំពេទ្យ ក៏គ្មានលុយទិញ ដេកចាំតែងាប់។ ចង់ស្នើឲ្យរដ្ឋាភិបាលជួយ សម្តេចពុកសម្តេចម៉ែជួយឱ្យតែធ្វើម៉េចឱ្យតែបានដកដើមមកវិញ»។
ជាមួយគ្នានេះ ជនរងគ្រោះម្នាក់ទៀត អ្នកស្រី ញឹម បឿន អាយុ៣៦ឆ្នំា រស់នៅខេត្តកំពត ប្រាប់ថា គាត់ចាញ់បោកក្រុមហ៊ុនពិភពដីមាសអស់ជិត៣ម៉ឺនដុល្លារ និងបានដាក់ពាក្យបណ្ដឹងរកយុត្តិធម៌តាំងពីឆ្នាំ២០២៣ តែនៅតែគ្មានដំណោះស្រាយ។
ប្រភពបន្តថា ក្រោយចាញ់បោកក្រុមហ៊ុននេះ កូនៗរបស់អ្នកស្រី២នាក់ បានបង្ខំចិត្តបោះបង់ការសិក្សា ខណៈប្តីរបស់គាត់បច្ចុប្បន្នក៏កំពុងធ្លាក់ខ្លួនឈឺធ្ងន់ធ្ងរដែរ។
អ្នកស្រីថា៖ «ចង់ឲ្យដល់សម្ដេចពុក សម្តេចម៉ែ ឱ្យគាត់ជួយពន្លឿនដោះស្រាយឱ្យប្រជាពលរដ្ឋ បើទុកអ៊ីចឹង មានតែប្រជាពលរដ្ឋវេទនារងទុក្ខគ្រប់បែបយ៉ាងទាំងអស់។ ខ្ញុំរាល់ថ្ងៃនិយាយរួមទៅ ដូចអណ្តើកចូលភ្លើងអ៊ីចឹងវេទនាបំផុត តាំងពីចូលក្រុមហ៊ុនពិភពដីមាស ខ្ញុំព្រាត់ប្រាស់ ប្តីទៅរកស៊ីបាត់! កូនក៏អត់មានអ្នកណានៅជាមួយ។ និយាយរួមទៅ វេទនា! លើសមិនដឹងប្រហែសស្អី! និយាយមិនកើត។ មានតែឱ្យគាត់ជួយដោះស្រាយឲ្យប្រជាពលរដ្ឋ! ទុកអ៊ីចឹងអត់កើតទេ ងាប់អស់ហើយ រាល់ថ្ងៃខ្ញុំសម្ពាធ ឥលូវចង់ផ្លូវចិត្តមួយទៀតពិបាកចិត្តពេក»។
បើតាមក្រុមជនរងគ្រោះ មានអ្នកសា្លប់កើនជិត ២០នាក់ហើយ ក្នុងនោះមានទាំងអ្នកធ្វើអន្តឃាតដោយចងក និងខ្លះគ្មានលុយព្យាបាលជំងឺ ដោយសារជួបវិបត្តិបំណុលធ្ងន់ធ្ងរ ក្រោយចាញ់បោកអតីតឧកញ៉ា ហ៊ី គឹមហុង។
ជុំវិញរឿងនេះតំណាងរាស្រ្តគណបក្សសង្រ្គោះជាតិ លោក អ៊ុំ សំអាន ស្តីបន្ទោសប្រព័ន្ធតុលាការកម្ពុជាថា ការពារតែអ្នកមានលុយមានអំណាច ហើយថាជាតុលាការដែលញាំញីដោយអំពើពុករលួយ ទើបធ្វើឱ្យយុត្តិធម៌សម្រាប់ជនរងគ្រោះត្រូវបានកប់ចោលបែបនេះ។
លោក សំអាន មើលឃើញថា ចរន្តងើបតវ៉ាទ្រង់ទ្រាយធំដើម្បីប្រឆាំងភាពអត់ឃ្លាន នឹងកើតមានក្នុងពេលឆាប់ៗ បើមេដឹកនាំនៅតែបន្តអូសបន្លាយពេល មិនរកដំណោះស្រាយឱ្យជនរងគ្រោះ ដែលកំពុងជួបវិបត្តិបំណុលធ្ងន់ធ្ងរបានទេនោះ។
លោកថា៖ «អាចប្រជាពលរដ្ឋអត់ទ្រាំមិនបាន ហើយក្រពះគាត់អត់ដើរ! អាហ្នឹងមនុស្សយើងលែងខ្លាចស្លាប់ អាចគាត់ងើបឡើងស្រុះគ្នាធ្វើបាតុកម្មផ្អើលទីក្រុងភ្នំពេញហ្នឹង ហើយអាចឈានទៅដល់បាតុកម្មទម្លាក់មេដឹកនាំប្រទេស ពីការកាន់អំណាចផងដែរ ដោយសារតែមេដឹកនាំប្រទេសហ្នឹង គប់គិតជាមួយឧកញ៉ាហ្នឹងមិនព្រមឲ្យតុលាការហ្នឹង ចាត់ការទៅលើឧកញ៉ា និងរឹបអូសទ្រព្យសម្បត្តិរបស់ឧកញ៉ាហ្នឹង យកមកសងប្រជារាស្ត្រ ដូច្នេះប្រជាពលរដ្ឋនៅពេលទឹកដល់ច្រមុះហើយ គាត់ប្រាកដជាលែងខ្លាចស្លាប់ អាចនឹងចេញតវ៉ាទ្រង់ទ្រាយធំនៅទូទាំងប្រទេសហើយ»។
ដោយឡែក ប្រធានសមាគមការពារសិទ្ធិមនុស្សអាដហុក លោក នី សុខា ជំរុញឱ្យរដ្ឋាភិបាលគួរពន្លឿនដោះស្រាយករណីនេះឱ្យបានឆាប់ បើបន្តអូសបន្លាយយូរទៀត លោកថាវាឆ្លុះបញ្ចាំងពីការមិនទទួលខុសត្រូវ និងកម្សោយក្នុងការអនុវត្តច្បាប់នៅកម្ពុជា។
លោកថា៖ «ធ្វើឲ្យជះឥទ្ធិពលទៅដល់ភាគីអ្នកដែលរងគ្រោះហ្នឹង កាន់តែធ្ងន់ធ្ងរ ហើយបង្ហាញអំពីរូបភាពមួយនៃអយុត្តិធម៌សង្គមហ្នឹង! កាន់តែមានភាពខ្លាំងឡើងៗ ដូច្នេះទេខ្ញុំយល់ថាទោះបីយ៉ាងណាក៏ដោយ ក៏សមត្ថកិច្ចពិសេសគឺតុលាការគួរតែមានវិធានការបន្ថែមទៀត បន្តទៅទៀត ឲ្យបានម៉ឺងម៉ាត់ចំពោះបុគ្គលណា ឬក៏អ្នកដែលរកស៊ីមិនត្រឹមត្រូវណា ដែលគាត់មានគំនិតនៅក្នុងភាពទុច្ចរិតមិនស្មោះត្រង់ហ្នឹង! គឺថាគួរតែមានវិធានការផ្លូវច្បាប់ឲ្យបានម៉ឺងម៉ាត់ ចៀសវាងកុំឲ្យគាត់រួចផុតពីសំណាញ់ច្បាប់»។
VOD មិនអាចសុំការឆ្លើយតបពី អ្នកនាំពាក្យក្រសួងយុត្តិធម៌ លោក ជិន ម៉ាលីន បានទេ ដោយលោកបញ្ជាក់ថា លោកនិយាយតែជាមួយតែសារព័ត៌មានដែលស្របច្បាប់ទេ។
យ៉ាងណា ក្រោយផ្ទុះរឿងក្រុមឧក្រិដ្ឋជនរកស៊ីខាងវិស័យអចនទ្រព្យ បោកពលរដ្ឋជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ នាយករដ្ឋមន្រ្តីកម្ពុជា លោក ហ៊ុន ម៉ាណែត ធ្លាប់ផ្ញើសារថា ការមិនចាត់ការលើក្រុមអ្នកជំនួញបោកពលរដ្ឋ ជាយុទ្ធសាស្រ្តរក្សាទុកមេមាន់ដើម្បីយកពងឱ្យពលរដ្ឋ។
លោកថា៖ «រដ្ឋាភិបាលពិតណាស់មិនងាកចាប់ៗនោះទេ! យើងមិនអាចយករូបមន្តសម្លាប់មេមាន់នោះទេ យើងត្រូវធ្វើម៉េចឲ្យមេមាន់នៅរស់ ដើម្បីយកទៅនាំឲ្យបងប្អូនប្រជាពលរដ្ឋ នេះជាគោលដៅធំ»។
សារនយោបាយ រក្សាទុកមេមាន់ដើម្បីយកពង រងការរិះគន់ថា កំពុងបង្កើនវិបត្តិបំណុលធ្ងន់ធ្ងរដល់អ្នកចាញ់បោកក្រុមឧកញ៉ា ដែលកំពុងប្រឈមនឹងវិធានរឹបអូសពីធនាគារ ជាក់ស្តែងដូចក្នុងករណីជនរងគ្រោះចាញ់បោកអតីតឧកញ៉ា ហ៊ី គឹមហុង នេះជាដើម។
អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទ ឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ជុំវិញអំពើឆបោកនេះដែរ ក្រោយយុត្តិធម៌សម្រាប់អ្នកចាញ់បោក អតីតឧកញ៉ា ហ៊ី គឹមហុង ត្រូវបានកប់ចោលច្រើនឆ្នាំ និងមានអ្នកស្លាប់កើនឡើងជិត ២០នាក់ តែនៅតែគ្មានដំណោះស្រាយនោះ ក្រុមជនរងគ្រោះបានធ្វើយុទ្ធនាការលើបណ្តាញសង្គមចោទថា ឧបសគ្គរារាំងដល់ការស្វែងរកយុត្តិធម៌សម្រាប់ពួកគេ អាចជាប់ពាក់ព័ន្ធមន្ត្រីមានអំណាច នៅពីក្រោយក្រុមហ៊ុនឆបោកនេះ ដោយក្នុងនោះ ពួកគេបានរំលេចមុខអនុប្រធានគណបក្សប្រជាជនកម្ពុជា លោកស្រី ម៉ែន សំអន និងអតីតប្រធានរដ្ឋសភា លោក ហេង សំរិន ផងដែរ៕
