អគ្គស្នងការនគរបាលជាតិកម្ពុជា បានអះអាងពីការបន្តរកឃើញសំបុកឧក្រិដ្ឋជនអនឡាញ ពីកន្លែងទៀតនៅក្រុងប៉ោយប៉ែត ខេត្តបន្ទាយមានជ័យ មានជនសង្ស័យជាង ៦០នាក់ មេខ្លោងជាជនជាតិថៃ ដែលថាពួកគេប្រើប្រាស់ទឹកដីកម្ពុជា ដើម្បីធ្វើសកម្មភាពទៅប្រទេសដទៃផ្សេងទៀត។
នគរបាលជាតិកម្ពុជា បាននិយាយក្នុងលិខិតចុះថ្ងៃទី២៥ ខែមីនាថា នៅថ្ងៃទី២២ ខែមីនា ឆ្នាំ២០២៥ សមត្ថកិច្ចខេត្តបន្ទាយមានជ័យ បានចុះបង្ក្រាបទីតាំង២កន្លែង ដែលថាជាទីតាំងលួចលាក់ប្រព្រឹត្ត បទល្មើសតាមប្រព័ន្ធអនឡាញ ក្រោមការគ្រប់គ្រងរបស់ «ក្រុមឧក្រិដ្ឋជនជនជាតិថៃ» ប្រមាណ ០៧នាក់ នៅភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។
ប្រភពនោះ បន្តថា ក្នុងប្រតិបត្តិការឆ្មក់ចូលនោះ រកឃើញជនជាតិថៃសរុប ៦៣នាក់ ស្ត្រី ៣០នាក់ ក្នុងនោះ កុមារចំនួន២នាក់ និងរកឃើញវត្ថុតាងមួយចំនួន ដូចជា កុំព្យូទ័រចំនួន៣៣គ្រឿង ទូរសព្ទដៃចំនួន៦៥គ្រឿង អត្តសញ្ញាណប័ណ្ណថៃចំនួន៦៥ និងលិខិតឆ្លងដែនថៃចំនួន២ច្បាប់។
សម្រាប់នគរបាលជាតិ ជនជាតិថៃចំនួន ៥៦នាក់ នគរបាលជាតិកម្ពុជា នឹងស្នើសុំកិច្ចសហការជាមួយនគរបាលភូមិន្ទថៃ ដើម្បីសម្របសម្រួលរៀបចំបែបបទបណ្តេញចេញពីកម្ពុជា ដោយឡែកជនសង្ស័យ៧នាក់ផ្សេងទៀត កំពុងបន្តនីតិវិធី នៅស្នងការដ្ឋាននគរបាលខេត្តបន្ទាយមានជ័យ។
ជុំវិញបទឧក្រិដ្ឋអនឡាញនេះ កាលពីថ្ងៃទី២២ ខែកុម្ភៈ ឆ្នាំ២០២៥ កម្ពុជាបានឆ្មក់ចូលទីតាំងពីរកន្លែង ក្នុងក្រុងប៉ោយប៉ែត បានឃាត់ខ្លួនជនបរទេសចំនួន ២៣០នាក់ ភាគច្រើនជនជាតិថៃ ដែលថា មេក្លោងជាជនជាតិចិន រកឃើញក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត។
ករណីដូចគ្នានេះ សមត្ថកិច្ចបានរកឃើញនៅខេត្តព្រះសីហនុ ខេត្តកណ្តាល កំពង់ស្ពឺ ក្រុងបាវិត ខេត្តស្វាយរៀង និងក្រុងសែនមនោរម្យ ក្នុងខេត្តមណ្ឌលគិរី។
របាយការណ៍នានា បានរកឃើញថា ប៉ុន្មានឆ្នាំចុងក្រោយនេះ កម្ពុជាក្លាយជាជម្រកពួកឧក្រិដ្ឋជន ដែលការរកឃើញបែបនេះ ក្រោយពីបក្សកាន់អំណាចប្រើវិធានបិទខ្ទប់សំឡេងរិះគន់ ប្រើប្រព័ន្ធតុលាការធ្វើជាឧបករណ៍នយោបាយ និងរំលាយគណបក្សសង្គ្រោះជាតិ ធ្វើឱ្យប្រព័ន្ធដឹកនាំបាត់បង់ប្រព័ន្ធត្រួតពិនិត្យអំណាច ដែលគេរកឃើញថា ធ្វើឱ្យពលរដ្ឋក្លាយជាជនរងគ្រោះនៃអំពើពុករលួយជិត១០ឆ្នាំទៅនេះ៕
