អ្នកប្រកបមុខរបរអូសរទេះ នៅច្រកទ្វារអន្តរជាតិប៉ោយប៉ែត ត្រូវគេអះអាងមកថា កំពុងប្រឈមនឹងបញ្ហាជីវភាព ក្រោមវិធានរឹតបន្តឹងពីមន្ត្រីច្រក ដែលបញ្ហានេះ សមាគមមួយចង់ឱ្យរដ្ឋាភិបាលរកដំណោះស្រាយឱ្យពួកគេអាចរស់បានក្រោមដំបូលច្បាប់ ដូចក្រុមហ៊ុនធំៗ ដែលមានប្រាក់វាល់លានផងដែរ។
នេះបើតាម លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធប្រចាំនៅក្រុងប៉ោយប៉ែត និយាយនៅក្នុងកម្មវីធីមួយនៅមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស(សង់ត្រាល់) កាលពីថ្ងៃទី២៥ ខែមីនានេះ ជុំវិញប្រធានបទ «សេចក្តីព្រួយបារម្ភរបស់កម្មករសេដ្ឋកិច្ចក្រៅប្រព័ន្ធ និងអ្នករកស៊ី អូសរទេះ ដឹកឥវ៉ាន់ តាមច្រកព្រំដែនកម្ពុជា-ថៃ»។
លោក ឌិន ពុទ្ធី និយាយថា នៅមុនកម្ពុជាផ្ទុះជំងឺកូវីដ-១៩ និងអំឡុងពេលកម្ពុជាផ្ទុះកូវីដ-១៩ អ្នកមានមុខរបរអូសរទេះនៅច្រកទ្វារអន្តរជាតិនេះ អាចរកប្រាក់បានសម្រាប់ចិញ្ចឹមគ្រួសារ។ ប៉ុន្តែថា នៅឆ្នាំ២០២៤ និង២០២៥នេះ អ្នកប្រកបមុខរបរសេដ្ឋកិច្ចក្រៅប្រព័ន្ធនេះ បានជួបបញ្ហាជាច្រើន រួមទាំងការចាប់ខ្លួន និងដកហូតរទេះ ក្រោមវិធានការរឹតបន្តឹងពន្ធគយ។
លោកបញ្ជាក់ថា ក្រៅពីវិធាននេះ កម្មករអូសរទេះ ក៏ត្រូវបានមន្ត្រីខិលខូចខ្លះ យកលុយក្រៅផ្លូវការដែលគេហៅថាបង់ក្បាលឡាន និងរទេះទៀតផង។
សម្រាប់ លោក ឌិន ពុទ្ធី បច្ចុប្បន្ននេះ កម្មករអូសរទេះ រកប្រាក់បានត្រឹមជួយជញ្ជូនវ៉ាលីភ្ញៀវប៉ុណ្ណោះ មិនអាចដឹកឥវ៉ាន់តិចតួច ជាម្ហូបអាហារដូចមុនបានទេ ធ្វើឱ្យពួកគាត់ជួបបញ្ហាជីវភាពធ្ងន់ធ្ងរ។
លោកកត់សម្គាល់ថា បញ្ហានេះហាក់ផ្តល់ឱកាសឱ្យក្រុមហ៊ុនធំ ដែលមានប្រាក់រាប់រយលានដុល្លារ អាចរកស៊ីបានតែពលរដ្ឋមានមុខរបរតូចតាចកាន់តែជួបការលំបាកខាងជីវភាព។
បញ្ហានេះ លោកចង់ឱ្យអាជ្ញាធរពាក់ព័ន្ធ និងរដ្ឋាភិបាល គួរពិចារណាថា ចំពោះពលរដ្ឋដែលដឹកនាំទំនិញចេញចូលត្រូវបង់ពន្ធក្នុងកម្រិតណាមួយ ដែលអាចឱ្យអ្នកសេដ្ឋកិច្ចក្រៅប្រព័ន្ធ អាចរកស៊ីស្របច្បាប់នៅទីនោះបាន ជាជាងប្រើតែវិធានចាប់ និងបិទខ្ទប់ ទុកឱកាសឱ្យតែក្រុមហ៊ុនធំៗ ធ្វើឱ្យពួកគេប្រឈមនឹងដាច់បាយ។
លោកថា៖«គាត់រកស៊ីចឹញ្ចិមតែគ្រួសារ ចឹញ្ចិមត្រឹមតែម៉ារស់ មិនមែនយកទៅធ្វើមានបាន ធ្វើសេដ្ឋីឯណាគាត់រកបានតែតិចតួចៗ គ្រាន់ចិញ្ចឹមឆ្នាំង ឥលូវគេចាប់រទេះគាត់ទុករាប់ខែ ខ្លះគេចាប់ឡានគាត់ទុក[…]ដាច់បាយដាច់ទឹកធ្វើឱ្យពលរដ្ឋដាច់បាយដាច់ទឹក ធ្វើឱ្យស្ថានភាពជីវភាពពលរដ្ឋហ្នឹង កាត់តែដុនដាបទៅៗ »។
VODមិនអាចសុំការបញ្ជាក់ពីអភិបាលខេត្តបន្ទាយមានជ័យ លោក អ៊ុំ រាត្រី បានទេ គិតត្រឹមម៉ោងផ្សាយនេះ។ យ៉ាងណា ការទុកពលរដ្ឋជួបគ្រោះអត់ឃ្លាន ហាក់ផ្ទុយទៅនឹងយុទ្ធសាស្ត្រជាតិរបស់រដ្ឋាភិបាល ដែលបានប្តេជ្ញាចិត្តពង្រឹងយន្តការគាំពារអ្នកប្រកបរបរសេដ្ឋកិច្ចក្រៅប្រព័ន្ធ។
នាយករដ្ឋមន្ត្រីកម្ពុជា លោក ហ៊ុន ម៉ាណែត និយាយអំឡុងខែកញ្ញា ឆ្នាំ២០២៣ថា យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ដើម្បីជួយដល់អ្នកប្រកបរបរសេដ្ឋកិច្ចក្រៅប្រព័ន្ធ ដោយមិនទុកនរណាម្នាក់ចោលឡើយ ដែលថា មន្ត្រីពាក់ព័ន្ធត្រូវអនុវត្តឱ្យមានប្រសិទ្ធភាព។
លោកថា៖ «ក្នុងថ្ងៃនេះ ខ្ញុំមានការជឿជាក់យ៉ាងមុតមាំថា យុទ្ធសាស្ត្រជាតិនេះ នឹងក្លាយជាប្រទីបបំភ្លឺ និងត្រួសត្រាយផ្លូវ និងជាទុនយ៉ាងសំខាន់សម្រាប់កម្ពុជា ក្នុងការតម្រង់ទិសការអភិវឌ្ឍសង្គមសេដ្ឋកិច្ចសំដៅឈានឆ្ពោះទៅរកការសម្រេចបាននូវការអភិវឌ្ឍប្រកបដោយចីរភាព បរិយាប័ន្ន និងភាពធន់យ៉ាងពិតប្រាកដ សមស្របតាមគោលការណ៍ មិនបោះបង់ពលរដ្ឋខ្មែរណាម្នាក់ ទាំងក្នុងន័យអភិវឌ្ឍន៍ទាំងក្នុងន័យចូលរួមនៅក្នុងការដំណើរការនៃការអភិវឌ្ឍ»។
យ៉ាងណា ប្រមាណជា៨ខែក្រោយមក ពោលគឺនៅថ្ងៃទី២៨ ខែឧសភា ឆ្នាំ២០២៤ ពលរដ្ឋមានមុខរបរជាអ្នកអូសរទេះជិត១០០នាក់ បានតវ៉ា និងប៉ះទង្គិចជាមួយអាជ្ញាធរច្រកទ្វារអន្ដរជាតិប៉ោយប៉ែត ខេត្ដបន្ទាយមានជ័យ។
អំឡុងការបះទង្គិចនោះ អ្នកប្រើប្រាស់បណ្តាញសង្កម បានបង្ហោះវីដេអូពីសកម្មភាពអាជ្ញាធរប្រើហិង្សាលើក្មេងស្រីម្នាក់ ពាក់ព័ន្ធនឹងមុខរបរអូសរទេះនេះ។ រីឯពលរដ្ឋមួយចំនួន ត្រូវបានសមត្ថកិច្ចឃាត់ខ្លួនរយៈពេលខ្លី។
បើតាមប្រភពខាងលើ ជីវភាពអ្នកប្រកបមុខរបរអូសរទេះ នៅច្រកទ្វារអន្តរជាតិប៉ោយប៉ែត ចាប់ផ្តើមធ្លាក់ចុះចាប់ពីពេលនោះមក ក្រោមវិធានរឹតបន្តឹងរបស់មន្ត្រីច្រក រីឯជីវភាពរបស់អ្នកប្រកបរបរសេដ្ឋកិច្ចក្រៅប្រព័ន្ធ របរអូសរទេះ ធ្លាក់ក្នុងស្ថានភាពដុនដាបខ្លាំង៕
