ក្រុមអ្នកចាញ់បោកក្រុមហ៊ុនភូមិខ្មែរគ្រុប នៅខេត្តសា្វយរៀង ព្រមានតវ៉ាទ្រង់ទ្រាយធំជាថ្មីទៀត ដោយអះអាងថាពួកគេអស់ការអត់ធ្មត់ លើការសន្យាផ្តល់ប្លង់កម្មសិទ្ធិកាន់កាប់ដីធ្លីក្នុងភាពមិនច្បាស់លាស់ សម្រាប់ពួកគេជាង២ពាន់គ្រួសារ ខណៈពួកគេខ្លះទិញដី៤ឆ្នាំ មិនបានប្លង់។
គម្រោងជួបជុំគ្នានេះ ក្រោយអគ្គនាយកក្រុមហ៊ុនភូមិខ្មែរគ្រុប លោក សោម សុធា ត្រូវបានសមត្ថកិច្ចចាប់ខ្លួនជិត១ឆ្នាំទៅនេះ តែនៅតែគ្មានដំណោះស្រាយផ្តល់សំណងឱ្យជនរងគ្រោះនោះទេ។
តំណាងជនរងគ្រោះ អ្នកស្រី ចាន់ រតនា ប្រាប់VOD នៅថ្ងៃទី២៧ ខែមីនានេះថា ក្រសួងដែនដី បានផ្តល់ដំណឹងឱ្យអតិថិជនយកឯកសារពាក់ព័ន្ធ ទៅឱ្យក្រសួង ដើម្បីរៀបចំដំណើរការផ្តល់ប្លង់ដី ដែលពួកគេបានទិញនៅក្រុមហ៊ុនភូមិខ្មែរគ្រុប ក្នុងខេត្តស្វាយរៀង ក្រោយលោក សោម សុធា ត្រូវបានចាប់ខ្លួនពីបទឆបោក។
បើតាម អ្នកស្រី រតនា មានជនរងគ្រោះខ្លះ ក្នុងចំណោមអតិថិជនសរុបប្រមាណ២ពាន់នាក់ បានធ្វើតាមការណែនាំរបស់ក្រសួងរួចហើយ តែថាមកដល់ពេលនេះនៅតែមិនបានប្លង់។
អ្នកស្រី ចាន់ រតនា បានទិញដីក្នុងក្រុមហ៊ុននេះ អស់ជាង ៣ម៉ឺនដុល្លារ តែរយៈពេល៤ឆ្នាំហើយមិនបានប្លង់ទេ ដែលបញ្ហានេះ ក្រុមជនរងគ្រោះនឹងគ្រោងជួបជុំគ្នានៅខេត្តស្វាយរៀងជាថ្មីទៀត ដើម្បីរកដំណោះស្រាយ។
អ្នកស្រីថា៖ «យើងនឹងជួបជុំធ្វើ បើគ្មានដំណោះស្រាយនៅមុនចូលឆ្នាំហ្នឹង ព្រោះអីកាលមុនមកថាចែកប្លង់មុនចូលឆ្នាំឥឡូវវាដូចស្ងាត់ឈឹង។ នៅតែរឿងស្អីណា បច្ចុប្បន្នភាព! បច្ចុប្បន្នភាពហ្នឹង! អីក៏មិនចាត់វិធានការធ្វើដូចកាលឃោសនាលក់ឲ្យទៅ! វិទ្យុជាតិមានហ្នឹង ផ្សព្វផ្សាយទៅតាមរយៈភូមិឃុំសង្កាត់អីដូចពីមុន ធ្វើផ្សព្វផ្សាយអីក៏សម្បើមម៉េស! កាលដែលបោកហ្នឹង។ ហើយពេលផ្សព្វផ្សាយឱ្យប្រជាជនមកធ្វើបច្ចុប្បន្នភាព ប៉ុន្មាននាក់ហ្នឹងក៏វេទនាម៉េស! កាលបោកហ្នឹងម៉េចក៏ចេះជួយបោកគេ»។
កាលពីថ្ងៃទី៨ ខែធ្នូ ឆ្នាំ២០២៤ ក្រសួងរៀបចំដែនដី ផ្តល់ដំណឹងឱ្យអតិថិជនដែលបង់ប្រាក់តាមដំណាក់កាល ឬបង់រំលោះប្រចាំខែ ទិញដី ឬផ្ទះ ក្នុងគម្រោងនៅភូមិមរតកត្រូវផ្អាកបង់ប្រាក់ចូលក្រុមហ៊ុនបណ្ដោះអាសន្ន។
ប្រភពបន្តថា អតិថិជនដែលបានបង់ប្រាក់ថ្លៃលក់ទិញដីឡូតិ៍គ្រប់ចំនួន១០០% និងអ្នកកំពុងបង់ប្រាក់រំលោះប្រចាំខែ ត្រូវដាក់ពាក្យស្នើសុំចុះបញ្ជីផ្ទេរកម្មសិទ្ធិ និងធ្វើបច្ចុប្បន្នភាពព័ត៌មាននៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តស្វាយរៀង។
អន្តរាគមន៍របស់ក្រសួងដែនដី ក្រោយជនរងគ្រោះរាប់រយនាក់ បានផ្ទុះការតវ៉ាជាច្រើនលើកនៅមុខសាលាខេត្តស្វាយរៀង ដើម្បីទាមទារយុត្តិធម៌ ដោយអ្នកខ្លះថា៤ឆ្នាំហើយ បានទិញដី និងផ្ទះក្នុងក្រុមហ៊ុនភូមិខ្មែរគ្រុប តែមិនបានប្លង់នោះទេ។
ជនរងគ្រោះម្នាក់ទៀត លោក សំ វុត្ថា ប្រាប់ VOD ថា ជនរងគ្រោះនឹងតវ៉ាជាថ្មីទៀត ដើម្បីជំរុញឱ្យស្ថាប័នពាក់ព័ន្ធពន្លឿនដំណោះស្រាយករណីអំពើឆបោកនេះ។
លោក សំ វុត្ថា បានទិញដីក្នុងក្រុមហ៊ុន លោក សោម សុធា ដោយបង់លុយចំនួន១ម៉ឺន២ពាន់ដុល្លារអាមេរិក តែរយៈពេល៤ឆ្នាំហើយមិនទាន់បានដីនោះទេ។
លោកថា៖ «នៅបង!ទទេ! គ្មានលេចឮដំណឹងអីថា ក្នុងចំណោម២ពាន់ប្លង់ជាង ដែលអ្នករងគ្រោះរបស់ពួកខ្ញុំ ដែលតវ៉ាហ្នឹង។ អត់មានហៅម្នាក់ណាមួយទៅចេញប្លង់ ឬក៏ផ្ទេរកម្មសិទ្ធិអីឲ្យច្បាស់លាស់ ដើម្បីឲ្យពួកខ្ញុំហ្នឹងមានថាទំនុកចិត្តទៅលើគម្រោងហ្នឹង វាអត់មានផង។ ពួកខ្ញុំរឿងនេះទៅធ្វើបច្ចុប្បន្នភាព មិនដឹងថា! ដូចខ្ញុំនិយាយម៉ិញចឹង មិនដឹងថាក្រសួងមុខដូចម៉េចទេបង»។
ជុំវិញរឿងនេះ VOD បានព្យាយាមទាក់ទងអ្នកនាំពាក្យសាលាខេត្តស្វាយរៀង លោក រស់ ផារិទ្ធិ និង លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ តែគ្មានការឆ្លើយតប។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ហៅការបន្តអូសបន្លាយពេលបែបនេះ ឆ្លុះបញ្ចាំងពីការមិនទទួលខុសត្រូវ និងបង្កើតការមិនទុកចិត្តដល់ពលរដ្ឋចំពោះស្ថាប័នរដ្ឋ។
បញ្ហានេះ លោកថា ហាក់ដើរផ្ទុយពីគោលនយោបាយរបស់រដ្ឋាភិបាល ដែលចង់បញ្ចប់ជម្លោះដីធ្លីឱ្យបានឆាប់។
លោកថា៖ «អ្វីដែលសំខាន់ គឺអាជ្ញាធរនិងក្រសួងពាក់ព័ន្ធ គួរតែជំរុញនិងពន្លឿននីតិវិធីក្នុងការដោះស្រាយសម្រាប់ពួកគាត់ ដើម្បីកុំឲ្យពួកគាត់ហ្នឹង អូសពេលវេលាយូរ ហើយអាចនឹងជួបផលលំបាក ក៏រងគ្រោះជាយថាហេតុបន្ថែមទៀតទៅលើរឿងទាំងអស់គ្នា ហើយជាធម្មតា បើបងប្អូនប្រជាពលរដ្ឋរងចាំដំណោះស្រាយយូរ! លោកតែងតែទាមទារតវ៉ាដើម្បីធ្វើម៉េចឲ្យមានដំណោះស្រាយឲ្យបានលឿន នេះជាបទពិសោធន៍កន្លងមក! អាអូសបន្លាយកន្លងមក ដំណោះស្រាយកាន់តែយូរ បញ្ហាទាមទារការតវ៉ារបស់ពលរដ្ឋអាចនឹងកើតមានដែរ»។
អគ្គនាយកក្រុមហ៊ុនភូមិខ្មែរគ្រុប លោក សោម សុធា ត្រូវបានសមត្ថកិច្ចចាប់ខ្លួន កាលពីថ្ងៃទី១៧ ខែមិថុនា ឆ្នាំ២០២៤ ក្រោមបទចោទឆបោកពលរដ្ឋ តាមរយៈប្រមូលលុយពីពលរដ្ឋក្រោមរូបភាពវិនិយោគ សន្យាឱ្យការប្រាក់ ៤.៤ភាគរយក្នុងមួយខែ និងពាក់ព័ន្ធលក់ដីខ្យល់ឱ្យអ្នកភូមិរាប់រយគ្រួសារនៅខេត្តស្វាយរៀង។
ជនរងគ្រោះនិយាយថា ការជឿជាក់យកលុយទៅទិញដីក្នុងក្រុមហ៊ុន លោក សោម សុធា ព្រោះឃើញ លោក ដួង តារា អតីតជំនួយការ លោក ហ៊ុន សែន បានថ្លែងការពារគម្រោងលក់ដីឡូតិ៍និងផ្ទះរបស់ លោក សោម សុធា ដោយចំហរ។
បុគ្គលសំខាន់២រូបនេះ គឺលោក សោម សុធា និងជំនួយការ លោក ហ៊ុន សែន គឺលោក ដួង ដារ៉ា ត្រូវបានចាប់ខ្លួនពាក់ព័ន្ធអំពើឆបោកពលរដ្ឋដូចគ្នា។
យ៉ាងណា ការចាប់ខ្លួនមេឆបោកតែមិនផ្តល់សំណងឱ្យជនរងគ្រោះនេះ រងការរិះគន់ថា គ្រាន់ជាល្បិចរំលត់កំហឹងជនរងគ្រោះប៉ុណ្ណោះ ដែលបង្កក្តីបារម្ភថាបើប្រព័ន្ធច្បាប់មិនអាចរកយុត្តិធម៌ឱ្យពលរដ្ឋបាន នឹងជំរុញឱ្យពួកគេអស់សង្ឃឹមលើការដឹកនាំរបស់រដ្ឋាភិបាលពេលនោះចរន្តងើបតវ៉ាពីពលរដ្ឋនឹងកើតមាន ដើម្បីប្រឆាំងភាពអយុត្តិធម៌ក្នុងសង្គម៕
