ប្រព័ន្ធយុត្តិធម៌រងការស្តីបន្ទោសថា បានរួមដៃសម្លាប់សមាជិកគ្រួសារអ្នកចាញ់បោកអតីតឧកញ៉ា ឡេង ចាន់ណា ដែលធ្វើឱ្យពួកគេ៧០០០គ្រួសារ ប្រឈមនឹងវិបត្តិបំណុលធ្ងន់ធ្ងរជាង១ឆ្នាំទៅនេះ ដែលធ្វើឱ្យខ្លះស្លាប់ និងខ្លះទៀតកំពុងជួបវិបត្តិផ្លូវចិត្ត គ្មានលុយព្យាបាលជំងឺ។
ជនរងគ្រោះម្នាក់ លោក ផ្លើយ ផ្លុំ រស់នៅខេត្តសៀមរាប ប្រាប់VODនៅថ្ងៃទី១ ខែមេសានេះថា លោកខ្ចីលុយធនាគារចំនួន៣ម៉ឺន៥ពាន់ដុល្លារ យកទៅវិនិយោគក្នុងក្រុមហ៊ុនឆបោករបស់អតីតឧកញ៉ា ឡេង ចាន់ណា ក្រោយជឿជាក់លើការអូសទាញថា ក្រុមហ៊ុននេះមានរដ្ឋាភិបាលជាខ្នងបង្អែក។
យ៉ាងណា លោកថា ក្រោយចាញ់បោកក្រុមហ៊ុននេះ ភរិយារបស់លោកបានស្លាប់ កាលពីជាង១ឆ្នាំមុន ដោយសារជួបវិបត្តិផ្លូវចិត្តរីងរៃ និងរួមរឹតដោយជំងឹប្រចាំកាយ ខណៈលោកបានចំណាកស្រុកទៅប្រទេសថៃ ដើម្បីរកលុយដោះបំណុល។
លោកថា៖ «មូលហេតុ(ស្លាប់) រឿងលុយ យើងដាក់ជាមួយនឹងក្រុមហ៊ុននេះឯង! ដាក់ទៅវាមានការស្ទះទៅ ក៏មិនបានបង់ធនាគារគាត់ក៏មានអារម្មណ៍ ណាមួយគាត់ទឹកនោមផ្អែមផង។ គាត់គិតច្រើនរកអី មិនបានបង់ធនាគារ។ ខាងម៉ែខ្ញុំគាត់កាលគេមកទារដីស្រែ ដូចថាគាត់ភ័យ ធ្វើឱ្យ(កើតជំងឺ)បេះដូង»។
ដោយឡែក អ្នកចាញ់បោកម្នាក់ទៀតរស់នៅខេត្តសៀមរាប អ្នកស្រី ផាក វ័យ៥៧ឆ្នាំ បានដង្ហោយហៅរកយុត្តិធម៌ ដោយថាបច្ចុប្បន្នគាត់ធ្លាក់ខ្លួនឈឺធ្ងន់ និងគ្មានលុយព្យាបាលជំងឺ ក្រោយចាញ់បោកអស់ចំនួន ១ម៉ឺន២ពាន់ដុល្លារអាមេរិកជាកម្ចីធនាគារ។
អ្នកស្រីថា៖ «ជួយផ្សព្វផ្សាយដល់សម្តេចពុក សម្តេចម៉ែ ឱ្យជួយពន្លឿនរកអីមិនបានបង់អង្គការទេ! ម៉ាកាក់ម៉ារៀលក៏អត់មានមើលខ្លួន។ ជួយជនរងគ្រោះផង ព្រោះគាត់លំបាកវេទនាណាស់ ខ្ញុំមិនដែលជួបប្រទះអីទេ(មុនចាញ់បោកអតីតឧកញ៉ា ឡេង ចាន់ណា)។ សុំជួយ! ឱ្យសម្តេចពុកសម្តេចម៉ែដោះសា្រយពន្លឿន! សុំឱ្យបងផ្សព្វផ្សាយឱ្យខ្ញុំផង»។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ ស្តីបន្ទោសថា រដ្ឋាភិបាលគ្រួសារហ៊ុន គ្មានមនសិការដោះស្រាយទុក្ខរាស្រ្តទេ តែបែរជាគិតតែពីរក្សាអំណាចខ្លួនការពារបក្សពួកខ្លួនប៉ុណ្ណោះ។ លោកថា ប្រព័ន្ធដឹកនាំបែបនេះ មិនយូរទេនឹងដួលរលំក្រោមចលនាមហាជន បើមិនប្រញាប់កែប្រែ។
លោកថា៖ «បើមិនអ៊ីចឹងទេ! គឺកម្លាំងតស៊ូប្រជាពលរដ្ឋគាត់ងើបឡើងហើយ ព្រោះមិនអាចឈឺចាប់គាត់មិនសុខចិត្តស្លាប់ដោយឥតអំពើអ៊ីចឹងទេ! មានតែការងើបតស៊ូឡើង។ បើគាត់តវ៉ា គាត់សុំឲ្យមានការបោះឆ្នោត គាត់សុំឲ្យមានការគ្រប់គ្រងដោយរដ្ឋដោយត្រឹមត្រូវ ប៉ុន្តែនៅតែមានអ្នកដែលធ្វើបាបប្រជាពលរដ្ឋគ្រប់គ្នា ទាំងពួកឧកញ៉ា ទាំងអស់ គឺថាជាប្រព័ន្ធម៉ង!។ បានថា ធ្វើអីអត់កើតទេ គាត់អាកាត់អត់កើត ដោយសារជាប្រព័ន្ធដោយសារមានក្រុមគ្រួសារ និងបក្ខពួកខាងថ្នាក់ដឹកនាំ»។
ដោយឡែក ប្រធានសមាគមការពារសិទ្ធិមនុស្សអាដហុក លោក នី សុខា និយាយថា យុត្តិធម៌ពិតប្រាកដមិនមែនត្រឹមតែចាប់ខ្លួនជនឆបោកដាក់ពន្ធនាគារទេ តែក៏ត្រូវរឹបអូសទ្រព្យមកសងជនរងគ្រោះ និងដាក់ទោសអ្នកពាក់ព័ន្ធ ទោះតួនាទីខ្ពស់ក្នុងជួររដ្ឋាភិបាលក្តី។
លោកថា៖ «នៅពេលដែលក្រុមហ៊ុនមានការរកស៊ីមិនត្រឹមត្រូវ រកស៊ីទុច្ចរិត មានការបោកប្រាស់ធ្វើឲ្យខូចខាតផលប្រយោជន៍របស់ប្រជាពលរដ្ឋ គឺអាជ្ញាធរមិនអាចនៅព្រងើយកន្តើយបានទេ គឺត្រូវតែមានវិធានការទៅតាមច្បាប់ ដើម្បីធានាបាននូវផលប្រយោជន៍របស់ភាគីដែលទទួលរងគ្រោះ។ ខ្ញុំគិតថា រឿងទាំងអស់នេះ អាជ្ញាធរគួរតែស្រូតរូតធ្វើយ៉ាងណា ដើម្បីស្រាវជ្រាវរកឲ្យឃើញ មានមូលដ្ឋានច្បាស់លាស់នៅក្នុងការពន្យល់ប្រជាពលរដ្ឋ ក៏ដូចជាដើម្បីដោះស្រាយនូវទ្រព្យសម្បត្តិមួយចំនួនណា ដែលនៅមានដោះស្រាយ ដើម្បីសងទៅដល់បំណុលរបស់ប្រជាពលរដ្ឋ»។
ជ្រុងមួយនៃរឿងនេះ លោក ស៊ាន បូរ៉ាត់ មន្រ្តីស្និទ្ធិ លោក ហ៊ុន ម៉ាណែត ត្រូវបានក្រុមជនរងគ្រោះចោទថា ជាបុគ្គលសំខាន់ដែលអូសទាញឱ្យពួកគេជឿជាក់ យកលុយទៅរកស៊ីក្នុងក្រុមហ៊ុនរបស់អតីតឧកញ៉ា ឡេង ចាន់ណា ក្រោយរូបភាពវិនិយោគបានការប្រាក់ ៤ភាគរយក្នុងមួយខែ។
តែយ៉ាងណា មន្រ្តីជាន់ខ្ពស់រូបនេះ ដែលពាក់ព័ន្ធជ្រៅក្នុងអំពើបោកប្រាស់នេះ ត្រូវបានតុលាការចាត់ទុកត្រឹមជាសាក្សីក្នុងអំពើឆបោកនេះតែប៉ុណ្ណោះ ខណៈបច្ចុប្បន្នកំពុងរស់នៅដោយមានសេរីភាពក្រៅសំណាញ់ច្បាប់។
លោក ស៊ាន បូរ៉ាត់ ជាអនុប្រធានយុវជនគណបក្សប្រជាជនកម្ពុជាថ្នាក់កណ្ដាល ដែលមានលោក ហ៊ុន ម៉ាណែត ជាប្រធាន។ ក្នុងជួររដ្ឋាភិបាលវិញ លោកជារដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអង្គភាពប្រឆាំងអំពើពុករលួយផងដែរ។
អតីតឧកញ៉ា ឡេង ចាន់ណា ធ្លាប់ប្រាប់ពលរដ្ឋមុនពេលជាប់ពន្ធនាគារថា ក្រុមហ៊ុនខ្លួនមាននាយករដ្ឋមន្រ្តីកម្ពុជា លោក ហ៊ុន ម៉ាណែត ជាខ្នងបង្អែក។
តែយ៉ាងណា នាយករដ្ឋមន្រ្តីកម្ពុជា លោក ហ៊ុន ម៉ាណែត បានបដិសេធការលើកឡើងនេះ តាមរយៈលិខិតមួយសន្លឹក ចុះថ្ងៃទី២១ ខែកុម្ភៈ ឆ្នាំ២០២៤ ទាំងគ្មានការស៊ើបអង្កេតណាមួយកើតឡើង។
កាលពីខែឧសភា ឆ្នាំ២០២៤ លោក ហ៊ុន ម៉ាណែត បានប្រគល់ភារកិច្ចឱ្យ លោក គី តិច មេធាវីរដ្ឋាភិបាលការពារក្តីឱ្យជនរងគ្រោះ តែចាប់ពីមេធាវីរូបនោះជួយការពារក្តីជិតមួយឆ្នាំទៅនេះ ជនរងគ្រោះនៅតែមិនទទួលបានសំណងមកវិញ។
អតីតឧកញ៉ា ឡេង ចាន់ណា ត្រូវបានចាប់ខ្លួននៅថ្ងៃទី១៣ ខែមីនា ឆ្នាំ២០២៤ ក្រោយពីជនរងគ្រោះផ្ទុះការតវ៉ាជាបន្តបន្ទាប់រយៈពេលប្រមាណ ១ខែ ដែលមានអ្នកចាញ់បោកប្រមាណ ៧០០០គ្រួសារ គិតជាទឹកប្រាក់ជាង ៣០០លានដុល្លារអាមេរិក។
បើតាមតុលាការខេត្តសៀមរាប អ្នកស្រី ឡេង ចាន់ណា ត្រូវជាប់ចោទច្រើនបទល្មើស រួមមាន បទ ឆបោកមានស្ថានទម្ងន់ទោស ជាក្រុមមានការចាត់តាំង បទសម្អាតប្រាក់ និងបទមិនបំពេញកាតព្វកិច្ចចំពោះឧបករណ៍អាចជួញដូរបាន។
យ៉ាងណា ជនរងគ្រោះចាញ់បោកអតីតឧកញ៉ា ឡេង ចាន់ណា នៅប្រទេសកូរ៉េវិញ អះអាងថា ពួកគេកំពុងរៀបចំគម្រោងតវ៉ាទ្រង់ទ្រាយធំលើទឹកដីប្រទេសកូរ៉េ ដើម្បីបង្ហាញទុក្ខវេទនា ក្រោយយុត្តិធម៌របស់ពួកគេត្រូវជាប់គាំងជាង១ឆ្នាំ ធ្វើឱ្យជួបវិបត្តិបំណុលធ្ងន់ធ្ងរ ខណៈជនរងគ្រោះក្នុងស្រុករងការគំរាមចាប់ខ្លួនពីអាជ្ញាធរ បើសិនមានការប្រមូលផ្តុំណាមួយកើតឡើង៕
