ប្រជាពលរដ្ឋដែលមានជម្លោះដីធ្លីនៅស្រុកសំឡូត ខេត្តបាត់ដំបង អំពាវនាវឱ្យមេដឹកនាំជួយទប់ស្កាត់ការបណ្ដេញចេញពីដីធ្លាប់អាស្រ័យផល ទំហំជាង៦០០ហិកតា ក្រោយពីអាជ្ញាធរបានព្រមានឱ្យចាកចេញ ដោយសំអាងថា ពួកគេជាង១០០គ្រួសារ បានរស់នៅ និងអាស្រ័យផលនៅទីនោះជាង២០ឆ្នាំមកហើយ។
តំណាងពលរដ្ឋនៅភូមិកំពង់ល្ពៅ ស្រុកសំឡូត លោក ព្រំ អាត អះអាងនៅថ្ងៃទី១ ខែមេសានេះថា ពួកគាត់បានមកអាស្រ័យផលលើដីនេះ តាំងពីដូនតាមកម្លេះ ដោយមានការទទួលស្គាល់ពីអាជ្ញាធរមូលដ្ឋាន ពោលគឺមុនការចុះអនុក្រឹត្យជាដីសម្បទានសង្គមកិច្ច។
លោកស្នើឱ្យរដ្ឋាភិបាលជួយកាត់ឆ្វៀលដី និងផ្ដល់បណ្ណកម្មសិទ្ធិជូនពួកគាត់ បានបន្តអាស្រ័យ ដោយសំអាងថា ពួកគាត់មានជីវភាពលំបាក ពឹងលើការធ្វើស្រែចម្ការប៉ុណ្ណោះ។
លោកថា៖ «ខ្ញុំទាំងអស់គ្នាជាប្រជាពលរដ្ឋ ស្នើឲ្យរាជរដ្ឋាភិបាល នាយករដ្ឋមន្ត្រី ជួយដោះស្រាយដីធ្លីហ្នឹងឲ្យបានដល់ពួកគាត់ផង ព្រោះគាត់មានសង្ឃឹមតែប៉ុណ្ណឹងទេ ការលំបាករបស់គាត់ គឺមានតែប៉ុណ្ណឹងហើយបើអត់ដីហ្នឹង គាត់ថាគាត់អត់រស់ទេ»។
ពលរដ្ឋម្នាក់ទៀត សុំមិនបញ្ចេញឈ្មោះ បង្ហាញក្ដីព្រួយថា បើសិនពួកគាត់បាត់បង់ដីដែលធ្លាប់អាស្រ័យផលនេះ។ គាត់ថា ពួកគាត់ជាពលរដ្ឋក្រីក្រ ពឹងតែលើដីធ្លាប់អាស្រ័យនេះ បើបាត់បង់ដីមានតែស្លាប់។
ប្រភពនោះបញ្ជាក់ថា បើរដ្ឋាភិបាលមិនអាចជួយបានទេ ពួកគាត់នឹងប្រឈមការចំណាកស្រុក កូនបោះបង់ការសិក្សា រួមទាំងជាប់បំណុលវណ្ឌក។
អ្នកស្រីថា៖ «ដំណាំពលរដ្ឋនៅហ្នឹង ហើយបើមិនឱ្យគាត់ចូលគាត់ទៅធ្វើអី ហើយគាត់ពឹងលើកន្លែងហ្នឹង បើឲ្យគាត់ទៅនៅកន្លែងផ្សេង បើសិនជាអាជ្ញាធរឬរដ្ឋគាត់ដកហូតដីហ្នឹងទៅវិញ ក៏គាត់អត់មានដីអាស្រ័យផលបន្តទៀត មានតែចំណាកស្រុកទៀតហ្នឹងឯង អ្នកស្រែអ្នកចម្ការគាត់ធ្វើដំណាំ ឬដាំដុះដោយពឹងទៅលើមេឃដីអាកាសធាតុអំណោយផល ក៏បានហូបគ្រប់គ្រាន់ តែបើអត់គាត់ អត់តាមហ្នឹងដែរ ទាំងអ្នកខ្លះគាត់លំបាក គាត់ទៅថៃទៅអី ចង់អស់ហើយនៅជំពាក់បំណុលធនាគារច្រើនកន្លែង សឹងតែម្ង៉ៃៗរកដើម្បីសងធនាគារហ្នឹងដែរ»។
VOD មិនអាចទាក់ទង អភិបាលខេត្តបាត់ដំបង លោក សុខ លូ ដើម្បីសុំការបញ្ជាក់ពីបញ្ហានេះបានទេ គិតត្រឹមម៉ោងផ្សាយនេះ ដោយទូរស័ព្ទតែគ្មានអ្នកទទួល។
មេឃុំកំពង់ល្ពៅ លោក ឡាច ហម ទទួលស្គាល់ថា ពលរដ្ឋនៅតំបន់នោះពិតជាជួបបញ្ហានោះមែន ប៉ុន្តែថា លោកមិនមានសិទ្ធិសម្រេចរឿងនេះទេ។
លោកថា៖ «កន្លែងនេះ អត់អាចនិយាយបានទេ ទាល់តែយើងមើលជាក់ស្ដែង គាត់កាត់សម្រាប់ពលរដ្ឋក្រីក្រដែលអត់មានដីប្រើប្រាស់ យើងនិយាយតែដីសម្រាប់ម៉ាឃុំកំពង់ល្ពៅហ្នឹង ឃុំណាក្រៅពីភូមិហ្នឹងទេនេះជាគោលការណ៍របស់រដ្ឋាភិបាល មិនមែនថ្នាក់ឃុំថ្នាក់ស្រុកទៅធ្វើបានទេ»។
យ៉ាងណា លោកថា ដីដែលពលរដ្ឋកំពុងតវ៉ានោះ រដ្ឋាភិបាលបានចេញអនុក្រឹត្យដោយដាក់ជាដីសម្បទានសង្គមកិច្ច សម្រាប់ពលរដ្ឋដែលមានជីវភាពក្រីក្រ ក្នុងអំឡុងឆ្នាំ២០២២មកម្លេះ។
ដោយឡែក អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី និយាយថា បើដូចពលរដ្ឋអះអាងមែន លោកចង់ឃើញរដ្ឋាភិបាល ពិចារណាលើវិធាន កាត់ឆ្វៀលដីឱ្យពលរដ្ឋបន្តអាស្រ័យផល ដោយថា ការបណ្តេញចេញបង្កទុក្ខលំបាកដល់ពលរដ្ឋ និងប៉ះពាល់មាត់រដ្ឋាភិបាល។
លោកថា៖ «បើសិនជាអាជ្ញាធរបណ្ដេញគាត់ចេញឲ្យគាត់ទៅនៅឯណាទៅណាទៀត ហើយពេលហ្នឹងមាននាំមានបញ្ហាកើតឡើងទៀតហើយ ពេលដែលប្រជាពលរដ្ឋគាត់អត់ព្រមចេញ បើអ៊ីចឹងចាប់ផ្តើមការចោទប្រកាន់តាមប្រព័ន្ធតុលាការទៀត ហើយថាទៅធ្វើកាន់កាប់ឈូសឆាយរុករានអ៊ីចឹងទៅ ឬក៏ដាក់ឱសានវាទដាក់គ្រឿងចក្រទៅកាយទៅបំផ្លាញគេ ចាប់ខ្លួនដាក់ពន្ធនាគារ ចឹងទៅនេះជាបទពិសោធន៍អត់ល្អទេ»។
យោងតាមអនុក្រឹត្យ ចុះថ្ងៃទី១៧ ខែធ្នូ ឆ្នាំ២០២២ ស្ដីពី ការកំណត់ផ្ទៃដីទំហំជាង ១ពាន់ហិកតា (១ ០២១ហិកតា) នៃដែនជម្រកសត្វព្រៃភ្នំសំកុស ជាតំបន់សហគមន៍ សម្រាប់អនុវត្តកម្មវិធីសម្បទានដីសង្គមកិច្ចជូនប្រជាពលរដ្ឋក្រីក្រ គ្មានដីពិតប្រាកដ ស្ថិតនៅក្នុងភូមិកំពង់ល្ពៅ ឃុំកំពង់ល្ពៅ ស្រុកសំឡូត ខេត្តបាត់ដំបង។
បន្ថែមពីនេះ បើតាមលិខិតចុះថ្ងៃទី១៨ ខែធ្នូ ឆ្នាំ២០២៤ រដ្ឋបាលស្រុកសំឡូត តម្រូវឱ្យពលរដ្ឋនៅតំបន់នោះ ត្រូវរុះរើផ្ទះសម្បែងដោយខ្លួនឯងជាកំហិត។
រដ្ឋបាលស្រុកសំឡូត ព្រមានថា ចំពោះពលរដ្ឋដែលមិនចាកចេញដោយខ្លួនឯង រដ្ឋបាលស្រុកនឹងចាត់វិធានរុះរើ ហើយមិនទទួលខុសត្រូវ ពីការខូចខាតនិងបាត់បង់ទ្រព្យសម្បត្តិឡើយ។
យ៉ាងណា កម្ពុជា បានផ្តល់សច្ចាប័ន ជាមួយអង្គការសហប្រជាជាតិ ចាប់ពីឆ្នាំ១៩៩២មក លើកតិការសញ្ញាអន្តរជាតិ ស្តីពីសិទ្ធិសេដ្ឋកចិ្ច សង្គមកិច្ច និងវប្បធម៌ ដែលរាប់បញ្ជូលទាំងសិទ្ធិលំនៅដ្ឋានសមរម្យ និងការធានាសិទ្ធិរស់រានមានជីវិតផងដែរ។
បើតាមចំនុច៦ នៃកតិការសញ្ញាអន្តរជាតិ ការបណ្តេញចេញដោយបំពាន គឺជាការរំលោភបំពានដ៏កម្រោល លើសិទ្ធិមនុស្សជាច្រើន ដែលបានទទួលស្គាល់ជាអន្តរជាតិ រួមទាំងសិទ្ធិមានផ្ទះសម្បែង អាហារ ទឹក សុខភាព ការអប់រំ ការងារ សន្តិសុខ សេរីភាពចាកផុតពីការប្រព្រឹត្តឃោឃៅ អមនុស្សធម៌។
លើសពីនេះ មាត្រា៣៥ នៃរដ្ឋធម្មនុញ្ញកម្ពុជា ចែងថា «សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ»៕
