រដ្ឋាភិបាលកម្ពុជា ចូលរួមរំលែកទុក្ខ និងផ្តល់ថវិកាសម្រាប់រៀបចំបុណ្យសព ដល់ពលករខ្មែរម្នាក់ដែលស្លាប់ ក្នុងហេតុការណ៍បាក់អគារដោយសារគ្រោះរញ្ជួយដីនៅថៃ ស្របពេលដែលសង្គមស៊ីវិល និងអ្នកឃ្លាំមើល ជំរុញឱ្យមានការដោះស្រាយជាបន្ទាន់ ក្នុងការជួយដល់ពលករខ្មែរ ដែលរងគ្រោះដោយសារគ្រោះរញ្ជួយដី ទាំងនៅប្រទេសថៃ និងមីយ៉ាន់ម៉ា។
គ្រោះរញ្ជួយដីកម្រិត ៧,៧រិចទ័រ កាលពីថ្ងៃទី២៨ ខែមីនា នៅប្រទេសថៃ បានបណ្តាលឱ្យអគារកំពុងសាងសង់កម្ពស់ជាង ៣០ជាន់មួយកន្លែង ស្ថិតក្នុងសង្កាត់ ចាតុចាក់ (Chatuchak) ក្នុងទីក្រុងបាងកក បានដួលរលំ។ គ្រោះរញ្ជួយដីដូចគ្នានេះ ក៏បានកើតមាននៅប្រទេសមីយ៉ាន់ម៉ា(ភូមា) ដែលបានសម្លាប់មនុស្សរាប់រយនាក់ និងបំផ្លាញហេដ្ឋារចនាសម្ព័ន្ធក្នុងប្រទេសនេះអស់ជាច្រើនផងដែរ។
បើតាមប្រភពសារព័ត៌មានថៃ និងមន្ត្រីអង្គការសង់ត្រាល់ ក្នុងចំណោមពលករថៃ និងពលករបរទេសសរុបជាង ៣០០នាក់ ដែលធ្វើការនៅការដ្ឋានសំណង់អគារដែលបាក់រលំ ក្នុងប្រទេសថៃនោះ ក៏មានពលករខ្មែរផងដែរ។ តែយ៉ាងណា គេនៅពុំទាន់ដឹងពីចំនួនពលករខ្មែរជាក់លាក់ ដែលធ្វើការនៅទីនោះនៅឡើយទេ។
សេចក្តីប្រកាសព័ត៌មាន និងការផ្សព្វផ្សាយលើបណ្តាញសង្គមហ្វេសប៊ុករបស់ក្រសួងការងារ និងបណ្តុះបណ្តាលវិជ្ជាជីវៈកម្ពុជា ឱ្យដឹងថា គិតត្រឹមម៉ោង ៣:៣០នាទីរសៀលថ្ងៃទី៣១ ខែមិនា ឆ្នាំ២០២៥នេះ មានពលករខ្មែរម្នាក់ ឈ្មោះ មាស សាវ៉ាង អាយុ២៣ឆ្នាំ ដែលមានទីលំនៅនៅស្រុកម៉ាឡៃ ខេត្តបន្ទាយមានជ័យ ត្រូវបានបញ្ជាក់ថាស្លាប់ និងពលការិនីខ្មែរម្នាក់ ឈ្មោះ សឿន សំណាង អាយុ ៤៤ឆ្នាំ មានទីលំនៅនៅស្រុកបល្ល័ង ខេត្តកំពង់ធំ បានរងរបួសជើង ក្នុងហេតុការណ៍គ្រោះរញ្ជួយដី នៅប្រទេសថៃ។
ប្រភពដដែលបន្តថា ចំពោះសាកសពជនរងគ្រោះ អាជ្ញាធរកម្ពុជា និងសាច់ញាតិ បានរៀបចំឯកសារ និងទៅទទួលសពយកមកកម្ពុជាវិញ ខណៈស្ត្រីដែលរងរបួសជើង បានមកដល់ស្រុកកំណើតវិញ កាលពីថ្ងៃទី៣០ ខែមិនា។
នៅថ្ងៃទី០១ ខែមេសានេះ លោកនាយករដ្ឋមន្ត្រី ហ៊ុន ម៉ាណែត ក៏បានចូលរួមបច្ច័យបុណ្យដល់គ្រួសារសពពលករខ្មែរម្នាក់ ឈ្មោះ មាស សាវ៉ាង ចំនួន ១ម៉ឺនដុល្លារ តាមរយៈរដ្ឋមន្ត្រីក្រសួងការងារ ហើយក្រសួងការងារផ្ទាល់ ក៏បានជួយជាថវិកាដល់គ្រួសារសពចំនួន ២០លានរៀល អភិបាលខេត្តបន្ទាយមានជ័យ ២លានរៀល និងថវិការបស់សមាគមនិងអង្គការចំនួន២ទៀត ចំនួន ៣០លានរៀល។
វីអូឌី មិនអាចសុំការអត្ថាធិប្បាយបន្ថែមជុំវិញស្ថានភាពពលករខ្មែរដែលរងគ្រោះក្នុងហេតុការណ៍រញ្ជួយដីនៅថៃ និងមីយ៉ាន់ម៉ាបន្ថែម ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានទេ។
យ៉ាងណា លោក កត្តា អ៊ន បានប្រាប់សារព័ត៌មានក្នុងស្រុកថា ក្រៅពីរកឃើញពលករខ្មែរម្នាក់ស្លាប់ និងម្នាក់ទៀតរងរបួសនេះ ក្រសួងក៏បានទទួលដំណឹងពីសាច់ញាតិថា នៅមានពលករខ្មែរ ២នាក់ទៀត បានបាត់ខ្លួនក្នុងហេតុការណ៍រលំអគារនោះ។ លោកបន្តថា ក្រសួងនឹងបន្តសហការជាមួយអាជ្ញាធរថៃ ដើម្បីស្វែងរក និងធ្វើតេស្តកោសល្យវិច័យលើសពជនរងគ្រោះ ដើម្បីបញ្ជាក់អត្តសញ្ញាណពួកគេ។
លោក លឹង សុផុន មន្ត្រីគម្រោងផ្នែកពលករចំណាកស្រុកនៃអង្គការសង់ត្រាល់ប្រចាំប្រទេសថៃ បានប្រាប់វីអូឌីថា គិតមកដល់ម៉ោងជាង ១រសៀលថ្ងៃទី០១ ខែមេសានេះ នៅមិនទាន់មានការវិវត្តអ្វីថ្មីនៅឡើយ ជុំវិញតួលេខពលករខ្មែរដែលរងគ្រោះ ដោយសារគ្រោះរញ្ជួយដីនេះនៅឡើយ ខណៈប្រតិបត្តិការរុករករបស់អាជ្ញាធរថៃ កំពុងធ្វើបន្ត។
លោកបន្តថា បញ្ហាគ្រោះរញ្ជួយដីនេះ បានដាក់បន្ទុកបន្ថែមលើជីវភាព និងការរស់នៅរបស់ពលករខ្មែរនៅប្រទេសថៃ ដោយសារតែពួកគេមិនអាចធ្វើការពេញម៉ោងបានដូចមុន ដែលធ្វើឱ្យបាត់បង់ចំណូល ព្រោះតែស្ថានភាពគ្រោះរញ្ជួយដីនៅថៃនេះ នៅបន្តប្រកាសអាសន្ន កាលពីថ្ងៃចន្ទម្សិលមិញ និងស្របពេលដែលពលករមួយចំនួន ក៏កំពុងរកប្រាក់ និងរៀបចំឯកសារដើម្បីតទិដ្ឋការរបស់ខ្លួន ដែលអស់សុពលភាពតាំងពីខែកុម្ភៈ ឆ្នាំ២០២៥មក។
ករណីនេះ លោកថា៖ «ត្រូវការចាំបាច់ណាស់ រឿងជំនួយពីរដ្ឋាភិបាល[កម្ពុជា] ទៅដល់ជនរងគ្រោះ ជាពិសេសគឺបងប្អូនពលករដែលគាត់មានបញ្ហាប្រឈមផ្សេងៗ ទាក់ទងទៅរឿងការរងរបួស ឬក៏រឿងការដែលពួកគាត់មានបញ្ហាប្រឈមនឹងការបាត់បង់ការងារ ហើយនិងគាត់មានគ្រោះថ្នាក់នៅក្នុងអគារ ដែលបានបាក់កន្លងមកហ្នឹង ដែលយើងបានមើលឃើញចឹង បើសិនជារដ្ឋមានវិធានការណាមួយជាក់លាក់ ដើម្បីជួយដល់បងប្អូនខ្មែរយើង ហើយនិងពលករខ្មែរយើង ដែលកំពុងតែមានបញ្ហាប្រឈម សូមឱ្យមានវិធានការដើម្បីជួយដោះស្រាយដល់ពួកគាត់»។
ជាមួយគ្នានេះដែរ លោក សុផុន បានឱ្យដឹងដែរថា ក្នុងរយៈពេល២ថ្ងៃចុងក្រោយនេះ ពលករខ្មែរដែលធ្វើការ និងរស់នៅប្រទេសថៃប្រមាណ ៨០០នាក់ បាននាំគ្នាស្នើសុំលិខិតធ្វើដំណើរត្រឡប់ទៅកាន់ប្រទេសកម្ពុជា ដើម្បីចូលរួមពិធីបុណ្យចូលឆ្នាំខ្មែរ និងស្របពេលនៅថៃ នៅមានការប្រកាសអាសន្នរឿងគ្រោះរញ្ជួយដីនៅឡើយ។
ចំណែក ក្រុមប្រឹក្សាជាតិតស៊ូ ដែលជាក្រុមទើបបង្កើតឡើង និងមានមូលដ្ឋាននៅក្រៅប្រទេស កាលពីថ្ងៃទី៣០ ខែមីនា បានទទូចឱ្យរដ្ឋាភិបាលកម្ពុជា ដោះស្រាយជាបន្ទាន់ទៅដល់គ្រួសារពលករខ្មែររងគ្រោះនៅប្រទេសថៃ និងមីយ៉ាន់ម៉ា ឬភូមា ដោយសារគ្រោះរញ្ជួយដីនេះដែរ។
អ្នកនាំពាក្យក្រុមប្រឹក្សាជាតិតស៊ូ លោក គឹម សុខ បានថ្លែងពីប្រទេសហ្វាំងឡង់ និងត្រូវបានផ្សព្វផ្សាយលើហ្វេសប៊ុកក្រុមប្រឹក្សាជាតិតស៊ូថា រដ្ឋាភិបាល លោក ហ៊ុន ម៉ាណែត ត្រូវបង្ហាញផែនការដោះស្រាយសមស្របមួយ សម្រាប់ជួយដល់ពលករខ្មែរ និងក្រុមគ្រួសារពួកគេ ដែលបានរងគ្រោះដោយការរញ្ជួយដីនៅប្រទេសថៃ និងភូមា ជាពិសេសពលករដែលរងគ្រោះក្នុងករណីបាក់រលំអគារនៅប្រទេសថៃ។
លោកថ្លែងថា៖ «លោក ហ៊ុន ម៉ាណែត ត្រូវបង្ហាញគម្រោងឱ្យបានជាក់លាក់ ក្នុងការផ្តល់ជំនួយសង្គមកិច្ច និងការការពារផលប្រយោជន៍ពាក់ព័ន្ធទាំងអស់ ដល់ប្រជាពលករខ្មែររងគ្រោះ និងក្រុមគ្រួសាររបស់ពួកគាត់ មិនមែនត្រឹមតែជាការផ្ញើសាររំលែកទុក្ខ ឬត្រឹមតែជាការផ្តល់ព័ត៌មានថា រដ្ឋាភិបាលបានកំពុងបន្តតាមដានស្ថានការណ៍វិវត្តន៍ ដូចប្រជាពលរដ្ឋសាមញ្ញនោះទេ ពីព្រោះរាជរដ្ឋាភិបាលមានកាតព្វកិច្ចតាមខ្លឹមសារនៃស្មារតីរដ្ឋធម្មនុញ្ញ ត្រូវតែដោះស្រាយបញ្ហាទុក្ខលំបាកវេទនារបស់ប្រជាពលរដ្ឋ ហើយនឹងការប្រឈមទាំងឡាយរបស់ពួកគាត់ដែលជាម្ចាស់ប្រទេស»។
លោក គឹម សុខ បន្តថា ដំណោះស្រាយជាបឋម ដែលក្រុមប្រឹក្សាជាតិតស៊ូ ស្នើយ៉ាងទទូចដល់រដ្ឋាភិបាល លោក ហ៊ុន ម៉ាណែត នោះការផ្តល់ជំនួយសង្គមកិច្ច និងការលុបចោលបំណុល ឬសងបំណុលទាំងអស់សម្រាប់ពលករខ្មែរដែលរងគ្រោះដោយការរញ្ជួយដី និងគ្រួសាររបស់ពួកគេ ខណៈពលករទាំងនោះ កំពុងជាប់បំណុលវ័ណ្ឌក។ លោកថា ទំហំបំណុលរបស់ពលករខ្មែរដែលរងគ្រោះ មិនធំរហូតដល់រដ្ឋាភិបាលត្រកូលហ៊ុន ដោះស្រាយមិនបាននោះទេ។
បើតាមលោក គឹម សុខ ពលករខ្មែរដែលចំណាកស្រុកទៅធ្វើការនៅក្រៅប្រទេសទាំងប្រថុយប្រថាន គឺដោយសារតែពួកគាត់ជួបការលំបាក មិនអាចរកការងារក្នុងស្រុកដែលមានប្រាក់កម្រៃសមល្មមនឹងផ្គត់ផ្គង់ជីវភាព និងមានបំណុលវ័ណ្ឌកជាដើម ហើយក្នុងកាលៈទេសៈដែលជួបគ្រោះរញ្ជួយដីនេះទៀត កាន់តែធ្វើឱ្យពួកគាត់ជួបការលំបាកថែមទៀត។
ករណីនេះ លោកថា៖ «ដូច្នេះ ក្រុមប្រឹក្សាជាតិតស៊ូ ទទូចហើយទទូចទៀត ដាច់ខាតរដ្ឋាភិបាលត្រកូលហ៊ុន ត្រូវតែបង់សងបំណុលជំនួសប្រជាពលករខ្មែររងគ្រោះ និងក្រុមគ្រួសាររបស់ពួកគាត់»។
អ្នកស្រី សឿង សំណាង អាយុ៤៤ឆ្នាំ ជាកម្មករសំណង់ដែលរងរបួសក្នុងហេតុការណ៍រលំអគារ ដោយសារការរញ្ជួយដីនៅថៃ និងបានត្រឡប់មកស្រុកកំណើតក្នុងខេត្តកំពង់ធំវិញនោះ ឱ្យដឹងថា នៅថ្ងៃកើតហេតុ អ្នកស្រីនិងពលករផ្សេងទៀត បានលឺសូរសំឡេង និងមានភាពរំញ័រនៃអគារ ដូច្នេះអ្នកស្រីបានរត់ចុះពីជាន់ទី១៦នៃអគារដែលបាក់រលំនោះ ហើយក៏បណ្តាលឱ្យរបួសបាក់កែងជើងខាងឆ្វេង។
អ្នកស្រីបន្តថា ដោយសារមិនមានប្រាក់ព្យាបាលនៅថៃ និងកំពុងជាប់បំណុលផងនោះ អ្នកស្រីក៏ចងការប្រាក់គេ និងទទួលបានថវិការៃអង្គាសពីពលរដ្ឋខ្មែរនៅថៃខ្លះ ដើម្បីត្រឡប់មកព្យាបាលរបួសនៅស្រុកកំណើតក្នុងប្រទេសកម្ពុជាវិញ។ នេះបើយោងតាមសាច់ញាតិរបស់អ្នកស្រី បញ្ជាក់ប្រាប់ក្រុមការងារអង្គការសង់ត្រាល់។
ប្រភពដដែល បន្តថា បច្ចុប្បន្ន អ្នកស្រី សំណាង ត្រូវបានមន្ត្រីពាក់ព័ន្ធជួយអន្តរាគមន៍បញ្ជូនទៅព្យាបាលនៅមន្ទីរពេទ្យក្នុងខេត្តកំពង់ធំ។ តែយ៉ាងណា អង្គការសង់ត្រាល់ សង្ឃឹមថា រដ្ឋាភិបាល និងមន្ត្រីក្រោមឱវាទគ្រប់ជាន់ថ្នាក់ នឹងបន្តយកចិត្តទុកដាក់ លើការជួយសង្គ្រោះពលករខ្មែររូបនេះ រហូតដល់ជាសះស្បើយ ដើម្បីមានលទ្ធភាពបន្តការដោះបំណុល និងទ្រទ្រង់ជីវភាព ចិញ្ចឹមកូនៗ។
បើតាមសារព័ត៌មាន The Nation news គិតត្រឹមថ្ងៃទី០១ ខែមេសានេះ អ្នកស្លាប់ក្នុងគ្រោះរញ្ជួយដីនៅប្រទេសថៃ មានចំនួន ១២នាក់ និងអ្នករងរបួស ៩នាក់ ខណៈក្រុមអ្នកជួយសង្គ្រោះ កំពុងបន្តស្វែងរកជនរងគ្រោះប្រមាណជាង ៧០នាក់ទៀត ដែលសង្ស័យថាបាត់ខ្លួនក្នុងគំនរអគារ។
ចំណែក នៅក្នុងប្រទេសមីយ៉ាន់ម៉ាវិញ តាមប្រភពពីសារព័ត៌មាន PDC China News ដែលស្រង់របាយការណ៍ព័ត៌មានពីក្រុមប្រឹក្សារដ្ឋរបស់ប្រទេសមីយ៉ាន់ម៉ា កាលពីថ្ងៃចន្ទ គឺចំនួនអ្នកស្លាប់បានកើនឡើងដល់ ២ ០៥៦នាក់ និងរបួស ៣៩០០នាក់ និងជិត២៧០នាក់ទៀត ត្រូវបានរាយការណ៍ថាបាត់ខ្លួន៕
