លោក សាងលី សារាក់ អ្នកផលិតមាតិកានៅគណនីហ្វេសប៊ុក Business Advisor ដែលទើបនឹងបាននៅក្រៅឃុំថ្មីៗនេះ ត្រូវបានតុលាការដាក់ឱ្យស្ថិតនៅក្រោមការពិនិត្យពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា៤៩៤ និង៤៩៥ នៃក្រមព្រហ្មទណ្ឌ ជុំវិញភាពសកម្មរបស់លោក ដែលបានអប់រំយុវជន ឱ្យចេះគិតបែបស៊ីជម្រៅជុំវិញបញ្ហាដែលបានកើតឡើងក្នុងសង្គម។
វិធាននេះ ជំរុញឱ្យមានការរិះគន់ធ្ងន់ៗពីឃ្លាំមើល ដែលបានរិះគន់ថា ពីការឆ្លុះបញ្ចាំងពីចរិតដឹកនាំបែបឧក្រិដ្ឋ ដែលចាំបាច់ត្រូវកែលម្អ ក្រោមដំបូលរដ្ឋធម្មនុញ្ញ ដែលបានចង់កាតព្វកិច្ចពីប្រព័ន្ធប្រជាធិបតេយ្យសេរីពហុបក្ស។
សេចក្តីរាយការណ៍នានា បញ្ជាក់ថា លោក សាងលី សារ៉ាក់ ត្រូវសមត្ថកិច្ចខេត្តកណ្តាលចាប់ខ្លួននៅថ្ងៃទី២៧ ខែមិនា ឆ្នាំ២០២៥ ហើយត្រូវបានដោះលែងវិញ នៅថ្ងៃទី៣១ ខែមីនា ឆ្នាំ២០២៥ ពោលគឺមានរយៈពេល៤ថ្ងៃ។
ម្ចាស់គណនីហ្វេសប៊ុក Business Advisor លោក សាងលី សារ៉ាក់ បានបញ្ចេញព័ត៌មានតិចតួច លើគណនីហ្វេសប៊ុករបស់ខ្លួន ក្រោយមានការដោះលែង ពាក់ព័ន្ធនឹងការចាប់ឃាត់ខ្លួន។
កាលពីថ្ងៃទី៣១ ខែមិនា លោកបានលើកឡើងថា នៅពេលចាប់ឃាត់ខ្លួន អាជ្ញាធរបានហៅលោកទៅពន្យល់ជុំវិញខ្លឹមសារនៃពាក្យពេចន៍ ដែលលោកបានបង្ហោះ ហើយថា ពេលនេះលោកមានសុវត្ថិភាពវិញហើយ។
ប៉ុន្តែបើតាមដីកាសម្រេចដាក់ជនត្រូវចោទឱ្យនៅក្រោមការត្រួតពិនិត្យតាមផ្លូវតុលាការ ចុះថ្ងៃទី៣០ ខែមីនា ឆ្នាំ២០២៥ ដែលVODទទួលបាននៅថ្ងៃទី២ ខែមេសានេះ ម្ចាស់គណនីហ្វេសប៊ុក Business Advisor មានអាយុ៣១ឆ្នាំរូបនេះ ត្រូវបានចៅក្រមស៊ើបសួរសាលាដំបូងខេត្តកណ្តាល លោក ស៊ាន ណារ៉ា ដាក់ឱ្យស្ថិតនៅក្រោមការពិនិត្យ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប្រព្រឹត្តិនៅចំណុចភូតាមាត្រា៤៩៤ និង៤៩៥ នៃក្រមព្រហ្មទណ្ឌ។
តុលាការ បានដាក់លក្ខខណ្ឌចំនួន ៤ចំណុច ទៅលើម្ចាស់គណនីហ្វេសប៊ុក Business Advisor អនុវត្តក្នុងដំណាក់កាលបាននៅក្រៅឃុំនេះ ដោយមិនត្រូវផ្លាស់ប្តូរទីលំនៅ ដោយគ្មានការអនុញ្ញាតពីចៅក្រមស៊ើបសួរ ត្រូវឆ្លើយតបការកោះហៅពីគ្រប់បុគ្គល ដែលចាត់តាំងដោយចៅក្រមស៊ើបសួរ។
មិនត្រូវចាកចេញក្រៅដែនដី នៃព្រះរាជាណាចក្រកម្ពុជា និងត្រូវបង្ហាញខ្លួននៅចំពោះសមត្ថកិច្ច នៅប៉ុស្តិ៍ នគរបាលតាខ្មៅ ក្រុងតាខ្មៅ ខេត្តកណ្តាល រាល់ដើមសប្តាហ៍ទី១នៃខែនីមួយៗ។
លោក សាងលី សារ៉ាក់ មិនបានបដិសេធជុំវិញឯកសារដែលVODទទួលបាននេះទេ ដោយគ្រាន់តែអះអាងថា លោកសុំមិនធ្វើអត្ថាធិប្បាយជុំវិញរឿងនេះ។
ជាការសង្កេត លោក សាងលី សារ៉ាក់ ម្ចាស់គណនីហ្វេសប៊ុក Business Advisor ដែលតែងតែបង្ហោះសារបែបបណ្តុះផ្នត់គំនិតឱ្យយុវជនគិតបែបស៊ីជម្រៅ ជុំវិញការពង្វក់ឱ្យសេពស្រវឹង តាមរយៈអូសទាញផ្តល់រង្វាន់ បញ្ហាគ្រឿងញៀន និងបញ្ហាបូរណភាពទឹកដីជាដើម ដែលធ្វើឱ្យគណនីហ្វេសប៊ុករបស់លោក មានអ្នកតាមដានជិត២លាននាក់(១,៩លាន)។
សារមួយក្នុងចំណោមសារជាច្រើនទៀត ដែល លោក សារាក់ បានលើកឡើងមុនការចាប់ឃាត់ខ្លួនលោកបានផ្តល់ជាគំនិតថា៖ «បងប្អូនបង្កើតនៅអាចមានគំនិតមិនល្អដាក់គ្នា ចុះទម្រាំអ្នកនៅខាងកើត និងខាងលិចផ្ទះយើងឲ្យទុកចិត្តម្តេចបាន?»។
ជុំវិញបញ្ហានេះ ប្រធានក្រុមប្រឹក្សាឃ្លាំលកម្ពុជាលោក ម៉ែន ណាត និយាយថា ការលើឡើងរបស់ម្ចាស់គណនីនេះមិនមានអ្វីខុសទេ ទោះគាត់បានរកចំនូលខ្លះពីបណ្តាញសង្គម។
ប៉ុន្តែ លោកថា ផ្ទុយទៅវិញមេដឹកនាំទេដែលមានកំហុសធ្ងន់។ លោកថា កំហុសនៅត្រង់ថា រដ្ឋាភិបាលមិនបានលើកទឹកចិត្ត ដល់អ្នកដែលផ្តល់ចំណេះដឹងដល់ប្រជាពលរដ្ឋឱ្យចេះគិតបែបស៊ីជម្រៅ ដើម្បីប្រយោជន៍ជាតិ និងបម្រើឆ្នាំងបាយប្រជាពលរដ្ឋទេ។
លោកគូសបញ្ជាក់ថា វិធាននេះ ជាការលើកទឹកចិត្តពួកឧក្រិដ្ឋជន ដែលកំពុងឆបោកប្រជាពលរដ្ឋ និងលើកទឹកចិត្តដល់ប្រទេស ដែលមានមហិច្ឆតាលេបទឹកដីខ្មែរ តាមរយៈខ្ចីដៃអាជ្ញាធរខ្មែរ ដើម្បីបិទបាំងការពិត។
លោកថា៖ «ពួកមេដឹកនាំបច្ចុប្បន្នហ្នឹង ជាប្រភេទមេដឹកនាំជនទុច្ចរិត។ កាលណាតែជនទុច្ចរិតដឹកនាំស្រុក គឺដឹកនាំបែបបងធំ ចឹងហើយពួកហ្នឹងគឺមិនទុកពួកដែលល្អជាដៃគូធ្វើការជាមួយទេ អ្នកណាដែលនិយាយអំពីយុត្តិធម៌សង្គម និយាយអំពីការអប់រំ អំពើល្អ គឺកម្ចាត់គេចោល ព្រោះហ្នឹងជាបែបផែនរបស់ជនឧក្រិដ្ឋដឹកនាំស្រុក»។
លោកថា បន្ទាត់នយោបាយបែបនេះ ប្រជាពលរដ្ឋនឹងបន្តរងគ្រោះយូរឆ្នាំទៀត បើគ្មានចរន្តផ្លាស់ប្តូរ។
លោកថា៖«ប្រជាពលរដ្ឋកាលណាមានមេដឹកនាំបែបហ្នឹង គាត់ពិបាកប្រកបមុខរបរអាជីវកម្មក្នុងការរកស៊ី ដូចជា ឧទាហរណ៍គាត់ធ្វើស្រែធ្វើចម្ការហើយ ក៏ពិបាកលក់ផលិតផលទិញដីទិញធ្លីបានហើយ ត្រូវគេបំពាន គេរឹបអូស ប្រជាពលរដ្ឋខ្ចីលុយធនាគារទៅបណ្ដាក់ទុន ជាមួយនឹងពួកអ្នកមានប្រាក់ ដូចជាក្រុមឧកញ៉ានេះ ក្រុមអាជ្ញាធរនោះទៅឧកញ៉ាហ្នឹង ឆបោកអស់រលីងពីខ្លួនរហូតដល់អ្នកខ្លះស្លាប់ខ្លួន រងគ្រោះដោយសាររឿងអស់ហ្នឹង ហើយមិនដែលបានទទួលយុត្តិធម៌អំពីសង្គមមួយហ្នឹងទេ»។
សម្រាប់ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ហៅវិធានការឃាត់ខ្លួន និងការឃុំខ្លួនទៅលើមនុស្សមួយចំនួន ដែលពួកគេសកម្មចែកចាយព័ត៌មានដែលបានកើតឡើងក្នុងសង្គម ដើម្បីកែលម្អភាពអសកម្មមន្ត្រីសារធាណៈ និងជាប្រយោជន៍អប់រំប្រជាពលរដ្ឋ វាបង្កផលប៉ះពាល់ដល់សេរីភាពបញ្ចេញមតិ និងសេរីភាពទទួលបានព័ត៌មាន។
លោកគូសបញ្ជាក់ថា បច្ចុប្បន្ន បណ្តាញសង្គមបានក្លាយជាកន្លែងបញ្ចេញមតិដ៏សំខាន់មួយ តែផ្ទុយទៅបើសេរីភាពនេះរងការគំរាម ពលរដ្ឋនឹងលែងហ៊ានបញ្ចេញមតិ ពេលនោះបញ្ហាសង្គមវាកើតឡើង។ យ៉ាងណា លោកចង់ឃើញអាជ្ញាធរពាក់ព័ន្ធ ក៏ដូចជាតុលាការគួរចែកឱ្យដាច់ រវាងសេរីភាពបញ្ចេញមតិ សិទ្ធិទទួលព័ត៌មាន និងបទល្មើស ដើម្បីកុំឱ្យពលរដ្ឋមានការយល់ច្រឡំ។
លោកថា៖ «ម្យ៉ាងវិញទៀត ប្រទេសកម្ពុជា ជាប្រទេសដែលប្រកាន់លទ្ធិប្រជាធិបតេយ្យ សេរីពហុបក្សប្រទេសដែលប្រកាន់លទ្ធិប្រជាធិបតេយ្យ សេរីភាពនៅក្នុងការបញ្ចេញមតិ វាជាមូលដ្ឋានគ្រឹះសម្រាប់លទ្ធិប្រជាធិបតេយ្យ។ សេរីភាពក្នុងការបញ្ចេញមតិដើរតួនាទីសំខាន់ ដើម្បីជំរុញក្នុងការវិវឌ្ឍទៅអភិវឌ្ឍន៍លទ្ធិប្រជាធិបតេយ្យ អ៊ីចឹងមានសេរីភាពក្នុងការបញ្ចេញមតិ គួរណាស់តែត្រូវបានលើកកម្ពស់ ហើយនិងផ្ដល់សេរីភាពឲ្យបានពេញលេញ ចំពោះសេរីភាពក្នុងការបញ្ចេញមតិ យោងទៅតាមច្បាប់ជាតិ និងច្បាប់អន្តរជាតិ ដែលកម្ពុជាបានទទួលស្គាល់ ហើយនិងត្រូវបែងចែកឱ្យដាច់អំពីសេរីភាពក្នុងការបញ្ចេញមតិហើយនឹងបទល្មើស»៕
