គ្រោះរញ្ជួយដីកម្រិត៧,៧រ៉ិចទ័រ កាលពីថ្ងៃទី២៨ ខែមីនា ឆ្នាំ២០២៥ ដែលបណ្តាលឱ្យបាក់រលំអគារជាច្រើននៅក្នុងទីក្រុងបាងកក ប្រទេសថៃ ទីដែលពលករខ្មែរជាច្រើន កំពុងធ្វើជាកម្មករសំណង់នៅទីនោះ បានធ្វើឱ្យពួកគេទទួលរងគ្រោះទុក្ខជាន់លើទុក្ខ ខណៈដែលពួកគេមួយចំនួនធ្វើចំណាកស្រុកទៅធ្វើការនៅថៃ គឺដើម្បីរកប្រាក់មកដោះបំណុលដែលជំពាក់ធនាគារ។ បច្ចុប្បន្ន មានពលករខ្មែរប្រមាណជាង១លាននាក់ កំពុងធ្វើការនៅប្រទេសថៃ។
អ្នកស្រី សឿន សំណាង ដែលរងរបួសដោយសារគ្រោះរញ្ជួយដី នៅក្នុងទីក្រុងបាងកក ប្រទេសថៃ អាចរាប់ថា ជាពលរដ្ឋខ្មែរម្នាក់ ក្នុងចំណោមពលរដ្ឋខ្មែរជាង១លាននាក់ ដែលធ្វើចំណាកស្រុកទៅរកការងារធ្វើនៅប្រទេសថៃ ខណៈបច្ចុប្បន្នមានពលរដ្ឋខ្មែររហូតដល់ប្រមាណ ៥លាន៤ម៉ឺននាក់ កំពុងជំពាក់បំណុលធនាគារ ដែលមានទឹកប្រាក់រហូតដល់ជិត ៦០ពាន់លានដុល្លារអាមេរិក។
យោងតាមវីដេអូដែលបានបង្ហោះនៅលើបណ្តាញសង្គម បានបង្ហាញពីគ្រោះរញ្ជួយដីទាំងកណ្តាលថ្ងៃ បណ្តាលឱ្យបាក់រលំអគារនៅក្នុងទីក្រុងបាងកក កាលពីថ្ងៃទី២៨ ខែមីនា ហើយពលករជាកម្មករសំណង់ជាច្រើនបានស្រែក និងខំប្រឹងរត់ប្រសេចប្រសាចចេញពីអគារដែលកំពុងរង្គើរញ័រទាំងនោះ ហើយក្រោយមកអគារមួយចំនួន ក៏បានបាក់រលំ ខណៈមានកម្មករខ្លះកំពុងជាប់នៅក្នុងអគារនៅឡើយ។
អ្នកស្រី សឿន សំណាង វ័យ៤៤ឆ្នាំ ជាពលករខ្មែរម្នាក់ ស្ថិតនៅក្នុងចំណោមកម្មករសំណង់ដែលជាប់នៅក្នុងអគារដែលបានដួលរលំ ដោយសារគ្រោះរញ្ជួយដីនោះ។
ប៉ុន្តែ អ្នកស្រី សំណាង ដែលរងរបួសជើងត្រូវបានក្រុមអ្នកជួយសង្គ្រោះ ជួយយកចេញពីគំនរអគារបាក់បែកហើយបញ្ជូនទៅព្យាបាលនៅមន្ទីរពេទ្យថៃ ក្នុងក្រុងបាងកក កាលពីថ្ងៃទី២៩ ខែមីនា។
យ៉ាងណាក្តី ដោយសារគ្មានលទ្ធភាពបង់ប្រាក់ថ្លៃព្យាបាល អ្នកស្រី សំណាង ក៏បានសម្រេចចិត្តវិលត្រឡប់មកផ្ទះវិញ នៅភូមិវាលថ្នល់ ឃុំសាគ្រាម ស្រុកបា្រសាទបល្ល័ង្ក ខេត្តកំពង់ធំ កាលពីថ្ងៃទី៣០ខែមីនា។
អ្នកស្រី សំណាង បានលើកឡើងពីមូលហេតុដែលអ្នកស្រី និងគ្រួសារបានសម្រេចចិត្តចាកចេញពីស្រុកកំណើត ទៅធ្វើការជាពលករចំណាកស្រុកនៅប្រទេសថៃថា ដោយសារគ្រួសារជាប់បំណុលធនាគារជាង ១ម៉ឺនដុល្លារ ដែលខ្ចីយកមកទិញដីស្រែចម្ការ។
ប្រាក់ជាង ១ម៉ឺនដុល្លារនេះ អ្នកស្រីកំណត់រយៈពេល៨ឆ្នាំ ក្នុងការបង់រំលោះសងទៅធនាគារវិញក្នុងមួយខែ១លាន៥០ម៉ឺនរៀល។
ដោយសារតែមុខរបរលក់ដូរចាប់ហួយកំប៉ិកកំប៉ុកនៅផ្ទះលក់លែងដាច់ ហើយការធ្វើស្រែធ្វើចម្ការ ក៏មិនសូវបានផល ថែមទាំងកសិផល ដូចជា ស្រូវ និងដំឡូងមី គ្មានទីផ្សារលក់បានថោកមិនអាចប្រមូលប្រាក់បង់សងធនាគារបាន អ្នកស្រី សឿន សំណាង ក៏សម្រេចចិត្តខ្ចីប្រាក់ឯកជនពីក្រៅបន្ថែម ដើម្បីធ្វើលិខិតឆ្លងដែន ធ្វើចំណាកស្រុកទៅធ្វើការនៅប្រទេសថៃជាមួយប្តី និងកូនប្រុសម្នាក់ ហើយទុកឱ្យកូនស្រីម្នាក់នៅផ្ទះ ដើម្បីបន្តការសិក្សា។
អ្នកស្រីនិយាយថា ប៉ុន្តែជាអកុសលអ្នកស្រី ប្តី និងកូន បានទៅធ្វើការជាកម្មករសម្អាតនៅតាមអគារសំណង់ទើបតែបាន១២ថ្ងៃ មិនទាន់ទាំងបានបើកប្រាក់ខែម្តងផង ក៏ជួបគ្រោះរញ្ជួយដីបណ្ដាលឱ្យអ្នកស្រីរងរបួសជើងខាងឆ្វេង។
អ្នកស្រី សឿន សំណាង ត្រូវបានអង្គការមណ្ឌលព័ត៌មានស្ត្រីកម្ពុជា ស្រង់សម្តីមកចុះផ្សាយក្នុងសម្តីដើមថា៖ «សម្រេចចិត្តនៅក៏មិនដឹងរកអី ដូចថា វាពិបាកពេក ធ្វើការក៏វាមិនបានលុយ ខ្ញុំសុខចិត្តថានាំកូនមកថៃគេថាការងារស្រួល ខ្ញុំក៏សម្រេចចិត្តធ្វើលិខិតឆ្លងដែនមកថៃទៅ គ្រាន់ថាវាបានអាចដោះស្រាយជីវភាព តែទៅមិនទាន់បានមួយខែផង បែរជាជួបឧបទ្ទវហេតុ អស់ទាំងលុយទៅ អស់ទាំងលុយមកហ្នឹងឯង»។
បើទោះបីមកដល់ប្រទេសកំណើតវិញក៏ពិតមែន តែអ្នកស្រី សំណាង និយាយថា អ្នកស្រីមិនមានលទ្ធភាពទៅព្យាបាលជើងនៅមន្ទីរពេទ្យឡើយ ព្រោះតែត្រូវជំពាក់ប្រាក់គេបន្ថែមទៀត ថ្លៃធ្វើដំណើរ និងថ្លៃព្យាបាល។ ស្ថានភាព អ្នកស្រី សំណាង នៅពេលនេះ គឺត្រូវជាប់បំណុលធនាគារផង និងបំណុលឯកជនផង ខណៈជើងអ្នកស្រីនៅឈឺខ្លាំងមិនអាចដើរបានថែមទៀត។
ស្ត្រីរូបនេះ បាននិយាយក្នុងសម្តីដើមថា៖ «ជួយដោះស្រាយខ្ញុំផង ខ្ញុំថាចង់ទៅថារកឱ្យបានត្រឹមដោះស្រាយក្នុងជីវភាពគ្រួសារ ដល់មកអាលុយក៏ជំពាក់ ខ្លួនក៏ត្រូវឈឺ មិនដឹងធ្វើយ៉ាងណាទេ អង្គុយមួយកន្លែងហ្នឹង។ បើខ្ញុំចង់ឱ្យជួយដោះស្រាយរឿងជំពាក់គេទៅថៃ ហើយនិងជួយព្យាបាលជើងហ្នឹង ព្រោះស្ថានភាពកាន់តែធ្ងន់ទៅៗ»។
ខណៈអ្នកស្រី សំណាង មានសំណាងបានរួចរស់ជីវិតវិលត្រឡប់មកស្រុកកំណើតវិញ យុវជនខ្មែរម្នាក់ បានស្លាប់នៅក្នុងអគារដែលដួលរលំ ដោយសារគ្រោះរញ្ជួយដីនោះ។
ក្រុមគ្រួសារ បានទ្រហ៊ោយំនៅពេលដែលរថយន្តសង្គ្រោះរបស់ថៃ បានដឹកសាកសពពលករខ្មែរមួយរូបឈ្មោះ មាស សាវ៉ាង អាយុ ២៣ឆ្នាំ ចូលដល់ផ្ទះនៅភូមិបាល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ កាលពីល្ងាចថ្ងៃទី៣១ ខែមីនា ឆ្នាំ២០២៥។ យុវជន សាវ៉ាង ដែលជាកម្មករសំណង់ បានស្លាប់នៅក្នុងអគារដែលដួលរលំដោយសារគ្រោះរញ្ជួយដី នៅក្រុងបាងកក កាលពីថ្ងៃទី២៨ ខែមីនា។
មន្ត្រីកម្ពុជាជាច្រើននាក់ ក្នុងនោះមានទាំង លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈផងដែរ បានទៅចូលរួមពិធីបុណ្យសពនៅផ្ទះ លោក មាស សាវ៉ាង កាលពីថ្ងៃទី១ ខែមេសា ឆ្នាំ២០២៥។ លោក ហេង សួរ បាននាំថវិការបស់លោកនាយករដ្ឋមន្ត្រី ហ៊ុន ម៉ាណែត និងលោកស្រី ពេជ ចន្ទមុន្នី ហ៊ុនម៉ាណែត ចំនួន១ម៉ឺនដុល្លារ និងថវិកាពីក្រសួងការងារ និងជំនួយពីការបរិច្ចាគផ្សេងទៀតសរុប៥២លានរៀល ទៅជូនគ្រួសារសពជនរងគ្រោះ។
ជាមួយគ្នានេះ លោក ហេង សួរ កាលពីល្ងាចថ្ងៃទី១ ខែមេសា ក៏បាននាំយកថវិការបស់ លោក ហ៊ុន ម៉ាណែត និងលោកស្រី ពេជ ចន្ទមុន្នី ហ៊ុនម៉ាណែត ចំនួន ១០លានរៀល ទៅប្រគល់ជូន អ្នកស្រី សឿន សំណាង នៅភូមិវាលថ្នល់ ឃុំសាគ្រាម ស្រុកប្រាសាទបល្ល័ង្ក ផងដែរ។
បើតាមអង្គការសង់ត្រាល់ បន្ទាប់ពីក្រសួងការងារ និងអាជ្ញាធរពាក់ព័ន្ធ បាននាំយកទៅព្យាបាលនៅមន្ទីរពេទ្យបង្អែកខេត្តកំពង់ធំមួយរយៈ អ្នកស្រី សឿន សំណាង ត្រូវបានបញ្ជូនមកសម្រាកព្យាបាលនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ នៅរាជធានីភ្នំពេញ ហើយក្រុមគ្រូពេទ្យជំនាញបានធ្វើការវះកាត់ជើងឆ្វេងរបស់អ្នកស្រី ដែលរងរបួសប្រកបដោយសុវត្ថិភាពហើយ នៅថ្ងៃទី២ ខែមេសានេះ ដោយការចំណាយទាំងអស់បូករួមទាំងការធ្វើដំណើរ និងការហូបចុក គឺទទួលបានការឧបត្ថម្ភពីលោក ហ៊ុន ម៉ាណែត។
VOD មិនអាចទាក់ទង លោក កត្តា អ៊ន អ្នកនាំពាក្យក្រសួងការងារ ដើម្បីស្នើសុំធ្វើអត្ថាធិប្បាយពីវិធានការរបស់ក្រសួង ដើម្បីជួយដល់ពលករខ្មែរដែលកំពុងជួបការលំបាកនៅប្រទេសថៃបានទេ នៅថ្ងៃទី២ ខែមេសានេះ។ ប៉ុន្តែ លោក កត្តា អ៊ន ត្រូវបានព័ត៌មានក្នុងស្រុកស្រង់សម្តីថា ក្រសួងការងារ នឹងជួយសម្របសម្រួលជាមួយនិយោជកថៃឲ្យមានការទទួលខុសត្រូវ និងផ្តល់នូវប្រាក់សំណងអត្ថប្រយោជន៍ផ្សេងៗ ដល់ពលករខ្មែរដែលទទួលរងគ្រោះក្នុងគ្រោះរញ្ជួយដីនោះ។
រហូតមកដល់ថ្ងៃទី២ ខែមេសានេះ ក្រៅតែពីពលករខ្មែរម្នាក់បានស្លាប់ និងម្នាក់រងរបួសខាងលើ គេមិនទាន់ឃើញមានតួលេខអ្វីថ្មីបន្ថែមទៀតនៅឡើយ ខណៈក្រុមអ្នកជួយសង្គ្រោះថៃ កំពុងមមាញឹកបន្តរុករកជនរងគ្រោះនៅតាមគំនរអគារបាក់បែក ដោយសារគ្រោះរញ្ជួយដីទាំងនោះនៅឡើយ។
ពាក់ព័ន្ធនឹងពលរដ្ឋខ្មែរដែលទទួលរងគ្រោះដោយសារគ្រោះរញ្ជួយដីនៅថៃនេះ ក្រុមប្រឹក្សាជាតិតស៊ូ បានទទូចឱ្យរដ្ឋាភិបាលកម្ពុជា ត្រូវតែលុបចោលនូវបំណុលទាំងអស់ សម្រាប់ពលករខ្មែររងគ្រោះ និងក្រុមគ្រួសារ ឬក៏រដ្ឋាភិបាល ត្រូវបង់សងបំណុលជំនួសពលកររងគ្រោះ និងក្រុមគ្រួសារ ដោយចាប់ពីថ្ងៃនេះទៅ មិនត្រូវតម្រូវឱ្យពលកររងគ្រោះបង់សងទៅធនាគារ និងមីក្រូហិរញ្ញវត្ថុទៀតនោះទេ។
ក្រុមប្រឹក្សាជាតិដែលទើបបង្កើតថ្មីនេះ បានអះអាងថា ខ្លួនបានសិក្សាច្បាស់ណាស់ថា ទំហំនៃបំណុលរបស់ពលករខ្មែរដែលរងគ្រោះនៅឯប្រទេសថៃ និងប្រទេសភូមា មិនធំរហូតដល់រដ្ឋាភិបាលត្រកូលហ៊ុន ដោះស្រាយមិនបាននោះទេ ហើយថា បើរដ្ឋាភិបាលស្រែកថា ដោះស្រាយមិនកើតទេ លុះត្រាណាតែ លោក ហ៊ុន ម៉ាណែត មិនមានបំណងដោះស្រាយជូនប្រជាពលរដ្ឋ។
លោក គឹម សុខ អ្នកនាំពាក្យក្រុមប្រឹក្សាជាតិតស៊ូ បានថ្លែងកាលពីថ្ងៃទី៣០ ខែមីនាថា បើរដ្ឋាភិបាល លោក ហ៊ុន ម៉ាណែត ផ្តល់ព័ត៌មានមកថា មិនអាចដោះស្រាយទៅរួចទេ គឺលុះត្រាណា លោក ហ៊ុន សែន និងលោក ហ៊ុន ម៉ាណែត គ្មានចិត្តមេត្តាអាណិតអាសូរដល់ប្រជាពលរដ្ឋរងគ្រោះ សូម្បីតែបន្តិចដែលពួកគាត់កំពុងតែរងគ្រោះបាត់បង់ជីវិតព្រាត់ប្រាស់គ្រួសារ យ៉ាងអណោចអធម ហើយប្រឈមទៅនឹងបំណុលវ័ណ្ឌកនៅឯប្រទេសកម្ពុជាទៀត។
លោកថា៖ «ប្រជាពលករទាំងនោះ មិនត្រឹមតែរងគ្រោះ ដោយសារគ្រោះរញ្ជូយដីនៅក្នុងប្រទេសថៃ ឬមីយ៉ាន់ម៉ានោះទេ ចំណុចចាប់ផ្តើមនៃការរងគ្រោះធំបំផុត សម្រាប់ពួកគាត់គឺការដឹកនាំដ៏អន់ពុករលួយស៊ីជម្រៅនិងបក្ខពួកនិយមនៃរដ្ឋាភិបាលក្រុមគ្រួសារហ៊ុន។ ទី១អ្នកដឹកនាំនៃរដ្ឋាភិបាលក្រុមគ្រួសារហ៊ុន គុបគិតជាមួយអ្នកជំនួញខាងវិស័យហិរញ្ញវត្ថុ បើកធនាគារមីក្រូហិរញ្ញវត្ថុនៅទូទាំងប្រទេសរាប់រយ បញ្ចុះបញ្ចូលប្រជាពលរដ្ឋ ទៅខ្ចីលុយក្នុងអត្រាការប្រាក់ខ្ពស់ ដែលប្រជាពលរដ្ឋពិបាករកលទ្ធភាពសងត្រឡប់ទៅវិញ»។
តាមរបាយការណ៍របស់ក្រសួងការងារ កាលពីឆ្នាំ២០២៣ មានពលករខ្មែរចំនួន១លាន៣សែននាក់ កំពុងធ្វើការនៅក្រៅប្រទេស ក្នុងនោះមានប្រទេសថៃ កូរ៉េខាងត្បូង ជប៉ុន ម៉ាឡេស៊ី ហុងកុង សិង្ហបុរី និងប្រទេសមួយចំនួនទៀត ក្នុងនោះនៅប្រទេសថៃច្រើនជាងគេ។ ប៉ុន្តែបើតាមអង្គការសង់ត្រាល់ បង្ហាញថា ពលករខ្មែរដែលកំពុងធ្វើការនៅក្រៅប្រទេស មានចំនួនប្រហែល២លាន២សែននាក់។
ទាក់ទងនឹងបញ្ហាបំណុលដែលជាកត្តាចម្បងធ្វើឱ្យប្រជាពលរដ្ឋខ្មែរ បង្ខំចិត្តធ្វើចំណាកស្រុក ដើម្បីរកប្រាក់មកបង់សងធនាគារ ការិយាល័យឥណទានកម្ពុជា (CBC) បានចេញផ្សាយរបាយការណ៍ កាលពីពេលថ្មីៗនេះថា ក្នុងឆ្នាំ២០២៤ មានពលរដ្ឋខ្មែរជាង៥លាន៤ម៉ឺននាក់ កំពុងប្រើប្រាស់កម្ចីពីប្រព័ន្ធធនាគារក្នុងទំហំទឹកប្រាក់ជិត៦០ពាន់លានដុល្លារអាមេរិក៕
