សាលាដំបូងរាជធានីភ្នំពេញ ចេញដីកាកោះឱ្យទីប្រឹក្សាគណបក្សកម្លាំងជាតិ លោក រ៉ុង ឈុន ចូលទៅបំភ្លឺពាក់ព័ន្ធបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
នេះបើតាមដីកាកោះចុះថ្ងៃទី២ ខែមេសា ឆ្នាំ២០២៥ ដែលចេញដោយ លោក សេង ហៀង តំណាងអយ្យការអមសាលាដំបូងរាជធានីភ្នំពេញ។
លោក សេង ហៀង បង្គាប់ឱ្យលោក រ៉ុង ឈុន ចូលមកកាន់សាលាដំបូងរាជធានីភ្នំពេញ នៅថ្ងៃទី២៣ ខែមេសា ឆ្នាំ២០២៥ វេលាម៉ោង ៨:៣០នាទីព្រឹក ដើម្បីចូលរួមសវនាការ។
លោក សេង ហៀង បញ្ជាក់ថា ការកោះហៅឱ្យ លោក រ៉ុង ឈុន ចូលរួមសវនាការនេះ ដើម្បីដំណើររឿងពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម (ការមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម) ប្រព្រឹត្តនៅប្រទេសកម្ពុជា ក្នុងឆ្នាំ២០២៤។
បើតាមដីកានោះ លោក រ៉ុង ឈុន អាយុ៥៥ឆ្នាំ ជនជាតិខ្មែរ មានអាសយដ្ឋាននៅផ្ទះលេខ៨៨ ផ្លូវលេខ៩ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
លោក រ៉ុង ឈុន ធ្លាប់ត្រូវបានសមត្ថកិច្ចចាប់ខ្លួន កាលពីយប់ថ្ងៃទី៣១ ខែកក្កដា ឆ្នាំ២០២០ និងឃុំខ្លួនអស់រយៈពេល ១៥ខែ ១១ថ្ងៃ ចោទពីបទញុះញង់បង្កឲ្យមានភាពវឹកវរដល់សន្តិសុខសង្គម។
ចំណាត់នេះ ក្រោយពីលោក រ៉ុង ឈុន ចុះទៅកាន់ព្រំដែនកម្ពុជា-វៀតណាម ខេត្តត្បូងឃ្មុំ និងក្រោយមកបានចេញសេចក្តីថ្លែងការណ៍ថា ការបោះបង្គោលព្រំដែនថ្មី បានចូលដីកម្ពុជាប្រហែល៥០០ម៉ែត្រ ប៉ុន្តែគណៈកម្មាធិការព្រំដែនរបស់រដ្ឋាភិបាលបានប្តឹង លោក រ៉ុង ឈុន ពីបទញុះញង់។
សំណុំរឿងនេះ លោក រ៉ុង ឈុន និងសហការី២នាក់ទៀត ត្រូវតុលាការបង្គាប់ឱ្យបង់ប្រាក់ ប្រមាណជា៤០០លានរៀល ឬ១០ម៉ឺនដុល្លារ តែតាមរយៈនៃការរៃអង្គាស ពីអ្នកគាំទ្ររយៈពេល១ខែរួចមក គណបក្សកម្លាំងជាតិ អំឡុងដើមខែមីនា សុំបង់ទៅតុលាការចំនួន២០លានរៀល ជាដំណាក់ៗ ដោយសំអាងពីខ្វះលទ្ធភាព៕
