អតីតព្រះវិន័យធម៌គណៈខេត្តតាកែវ លោក ជួន កក្កដា ត្រូវបានព្រះមហាក្សត្រ ត្រាស់បង្គាប់តែងតាំង ជាអនុរដ្ឋលេខាធិការក្រសួងធម្មការ និងសាសនា ក្រោយលាចាកសិក្ខាបទយ៉ាងប្រញាប់ប្រញាល កាលពីពេលថ្មីៗនេះ។
យោងតាមព្រះរាជក្រឹត្យ ចុះថ្ងៃទី២៨ ខែមីនា ឆ្នាំ២០២៥ ដែលត្រូវបានផ្សព្វផ្សាយនៅថ្ងៃទី០៤ ខែមេសានេះ ឱ្យដឹងថា ក្នុងនាមព្រះបរមនាម និងតាមព្រះរាជត្រាស់បង្គាប់របស់ព្រះមហាក្សត្រ ប្រមុខរដ្ឋស្តីទី លោក ហ៊ុន សែន បានតែងតាំងមុខតំណែង លោក ជួន កក្កដា និងលោក សួន សុធារ៉ា ជាអនុរដ្ឋលេខាធិការនៃក្រសួងធម្មការ និងសាសនា។
លោកបណ្ឌិត ជួន កក្កដា មានវ័យ ៤០ឆ្នាំ ជាអតីតព្រះភិក្ខុសង្ឃដ៏ល្បាញល្បីមួយអង្គនៅកម្ពុជា តាមរយៈការសម្តែងព្រះធម៌ទេសនា និងការបណ្តុះបណ្តាលព្រះសង្ឃនៅវត្តប្រាសាទនាងខ្មៅ ក្នុងខេត្តតាកែវ។ លោកបានលាចាកសិក្ខាបទក្នុងនាមជាព្រះវិន័យធម៌ កាលពីថ្ងៃទី១៩ ខែមីនា ថ្មីៗនេះ ក្រោយប្រើពេលវេលាជាបុព្វជិតជាង ២៧ព្រះវស្សា។
ការលាចាកសិក្ខាបទបែបតក់ក្រហល់ ឬប្រញាប់ជ្រុលនេះ ត្រូវបានសាធារណជនមានការភ្ញាក់ផ្អើល ដោយអ្នកខ្លះយល់ថា លោកត្រូវបានគេបង្ខិតបង្ខំឱ្យលាចាកសិក្ខាបទ ស្របពេលរដ្ឋាភិបាលបង្កើត ក្រុមជំនុំព្រះត្រៃបិដក ឡើងវិញ។
តែយ៉ាងណា លោក ជួន កក្កដា បានបញ្ជាក់កាលពីថ្ងៃទី២២ មិនាថា ការលាចាកសិក្ខាបទរបស់លោក មិនមែនការចាប់បង្ខំអ្វីឡើយ តែជាការសម្រេចចិត្តដោយខ្លួនឯង។
ចំណែក លោកនាយករដ្ឋមន្រ្តី ហ៊ុន ម៉ាណែត កាលពីថ្ងៃទី២៣ ខែមិនា ក៏បានចេញមុខឆ្លើយតបភ្លាមៗទៅនឹងមតិមួយចំនួនដែលថា រដ្ឋាភិបាលជាអ្នកនៅពីក្រោយ ឬពាក់ព័ន្ធនឹងការសឹករបស់ លោក ជួន កក្កដា នេះ ដោយថា សូម្បីតែរូបលោក និងភរិយាដែលជាអ្នកគាំទ្រដែរនោះ ក៏មិនចង់ឱ្យ លោក ជួន កក្កដា សឹកដូចគ្នា។
លោក ហ៊ុន ម៉ាណែត ក៏បានបង្ហាញពីភាពស្ងប់ស្ងែងទៅលើចំណេះដឹង និងឆន្ទៈរបស់ លោក ជួន កក្កដា ក្នុងវិស័យព្រះពុទ្ធសាសនា និងការអប់រំកុមារនៅកម្ពុជា ដោយលោកសម្រេចទូលស្នើព្រះមហាក្សត្រ ក្នុងការផ្តល់តំណែងដល់លោក ជួន កក្កដា ធ្វើជាអនុរដ្ឋលេខាធិកា ក្រសួងធម្មការ និងសាសនា ដើម្បីឱ្យលោកអាចបន្តជួយវិស័យពុទ្ធសាសនា និងសង្គមជាតិ៕
