ពលរដ្ឋមានបញ្ហាដីធ្លីនៅឃុំកំពង់ល្ពៅ ស្រុកសំឡូត ខេត្តបាត់ដំបង បានច្រានចោលការចោទប្រកាន់របស់អាជ្ញាធរ ដោយថា ពួកគេជាង១០០គ្រួសារពិតជាប្រឈមនឹងការបណ្តេញចេញពីដីធ្លាប់អាស្រ័យផលជាង២០ឆ្នាំពិតមែន មិនដូចការបកស្រាយរបស់អាជ្ញាធរនោះទេ។
កាលពីថ្ងៃទី១ ខែមេសា ឆ្នាំ២០២៥ ពលរដ្ឋ បានប្រាប់VODថា ពួកគេជាង១០០គ្រួសារ ប្រឈមនឹងការបណ្តេញពីដីធ្លាប់អាស្រ័យផល លើទំហំដីជាង ៦០០ហិកតា ទោះពួកគេធ្លាប់អាស្រ័យផលជាង២០ឆ្នាំក្តី។
ក្រៅពីប្រាប់VOD ពួកគេក៏បានបង្ហោះវីដេអូលើបណ្តាញសង្គម អំពាវនាវឱ្យមេដឹកនាំជួយអន្តរាគមន៍ ទប់ស្កាត់ការព្រមានបណ្តេញនេះ ក្រោមហេតុផលទាមទារយុត្តិធម៌។
ពលរដ្ឋ៖ «សូមសម្ដេច ជួយរកយុត្តិធម៌ជូនកូនចៅផង។ កូនចៅរស់នៅម្ភៃឆ្នាំប្លាយហើយ ដូច្នេះសម្ដេចជួយកូនចៅផង»។
បន្ទាប់ពីVOD បានចុះផ្សាយរឿងនេះ រដ្ឋបាលស្រុកសំឡូត បានចេញលិខិតបដិសេធកម្រាស់៣សន្លឹក ដោយអះអាងថា ជារឿងមិនពិត។
រដ្ឋបាលស្រុកសំឡូត បញ្ជាក់ថា មានពលរដ្ឋប្រមាណជា២៦គ្រួសារប៉ុណ្ណោះ ស្ថិតក្នុងជម្រើសនៃការដោះស្រាយដែលត្រូវផ្តល់ដីលំនៅឋាន១ប្លង់ទំហំ (ទ៣០ម គុណ៥០ម) និងដីស្រែមួយគ្រួសារទំហំ ២ហិកតា។
ប៉ុន្តែថា ការសម្របសម្រួលអំឡុងខែកុម្ភៈ ឆ្នាំ២០២៥ បានបរាជ័យ ដោយសារពលរដ្ឋទាំងនោះមិនទទួលយក ដោយទាមទារយកដីកាន់កាប់ជាក់ស្តែងទំហំ ២២១,៨ហិកតា ក្រៅពីនេះពួកគេក៏ទាមទារឱ្យដោះស្រាយដីសម្រាប់គ្រួសារ ១៣៧គ្រួសារទៀត ដែលអាជ្ញាធរថាជាសាច់ញាតិរបស់ពួកគេទាំងអស់ ដែលអាជ្ញាធរមិនអាចដោះស្រាយបាន។
យ៉ាងណា អ្នកមានបញ្ហាធ្លីម្នាក់សុំមិនបញ្ចេញឈ្មោះ បានអះអាងថា អ្វីដែលពួកគាត់ប្រាប់VODថា ជាការពិត ដោយសំអាងថាពួកគេមានបញ្ហាដីធ្លីនៅតំបន់នេះ មានចំនួន០៣ ភូមិ ជាង ១០០គ្រួសារ លើដីទំហំជាង៦០០ហិកតា ហើយថាអ្វីដែលអាជ្ញាធរបកស្រាយជារឿងមិនពិត។
គាត់ថា៖ «មកនៅឆ្នាំ៩០ជាងទាំងអស់គ្នា អ្វីដែលខាងស្រុកលើកឡើង មិនមែនជាការពិតទេ មិនមែនតែបងប្អូនសាច់ញាតិគាត់ គឺអ្នកភូមិ២ភូមិផ្សេងទៀត ដែលគាត់កំពុងអាស្រ័យផលលើដី សុំុំឱ្យមានការដោះស្រាយ មិនមែនមានតែបងប្អូនសាច់ញាតិឯងទេ គឺពលរដ្ឋផ្សេងទៀតដែលគាត់រស់នៅលើដីហ្នឹងហើយគាត់ស្នើសុំឱ្យមានការ ព្រោះថ្ងៃទៅសាលាស្រុក គាត់បានស្នើឱ្យដោះស្រាយ ដើម្បីប៉ុន្តែអត់មានឃើញដំណោះស្រាយអី គាត់រស់នៅគាត់ខ្វះខាត គាត់រកម្ងៃ៉ចាយម្ងៃ៉ ហើយបើសិនជាដកហូតដីគាត់ គាត់អត់មានអីពឹងទៀតទេ បើថាយកពីពួកគាត់ឱ្យអ្នកផ្សេង ចឹងពួកគាត់ក្លាយជាអ្នកមានហី បើគាត់មិនក្រីក្រ»។
តាមលិខិតបំភ្លឺរបស់រដ្ឋបាលស្រុកសំឡូត ដីដែលពលរដ្ឋតវ៉ានោះ ជាដែនជម្រកសត្វព្រៃភ្នំសំកុស ក្រោមការគ្រប់គ្រង និងការការពាររបបស់ក្រសួងបរិស្ថាន។
ប្រភពនោះ បញ្ជាក់ថា ក្រោយរដ្ឋបាលខេត្តបាត់ដំបង បានពិនិត្យឃើញថា ដីនៅចំណុចនោះមានព្រៃរិចរិល មានប្រជាពលរដ្ឋខ្វះដី ដើម្បីធ្វើកសិកម្ម និងមានសំណើសុំពីក្រុមប្រឹក្សាឃុំកំពង់ល្ពៅ ស្រុកសំឡូតផងនោះ អាជ្ញាធរពាក់ព័ន្ធបានសម្រេចយកទីតាំងដីនោះ ដាក់ជាដីសម្បទានដីសង្គមកិច្ច។
ការបំភ្លីដដែល បញ្ជាក់ទៀតថា នៅឆ្នាំ២០២១ ក្រសួងបានឯកភាព កាត់ដីទំហំ ១០២១ហិកតា ចេញពីដែនជម្រកសត្វព្រៃភ្នំសំកុស ជាសហគមន៍ សម្រាប់អនុវត្តសម្បទានដីសង្គមកិច្ចថ្នាក់មូលដ្ឋាន ជូនប្រជាពលរដ្ឋក្រីក្រគ្មានដីពិតប្រាកដ។
នៅថ្ងៃទី២១ ខែកញ្ញា ឆ្នាំ២០២៣ រដ្ឋបាលស្រុកសំឡូត បានចេញ សជណ ស្តីពី ហាមឃាត់បញ្ឈប់មិនឱ្យប្រជាពលរដ្ឋចូលទៅកាប់ឆ្ការព្រៃទន្ទ្រានយកដី និងដាំដំណាំលើដីទំហំ ១០២១ហិកតា ស្ថិតនៅដែនជម្រកសត្វព្រៃភ្នំសំកុស ដែលរដ្ឋាភិបាលត្រៀមកាត់ឆ្វៀល ដើម្បីធ្វើសម្បទានសង្គមកិច្ច និងការអភិវឌ្ឍសេដ្ឋកិច្ចមូលដ្ឋាន ជូនប្រជាពលរដ្ឋ ក្រីក្រ ខ្វះដី ពិតប្រាកដ ម្តងទៀត។
បន្ទាប់មកនៅថ្ងៃទី១៩ ខែកុម្ភៈ ឆ្នាំ២០២៥ ការប្រជុំសម្រុះសម្រួលជាមួយប្រជាពលរដ្ឋ ២០គ្រួសារ ដែល អាស្រ័យផល ក្នុងទីតាំងសម្បទានដីសង្គមកិច្ចមូលដ្ឋានក្នុង ឃុំកំពង់ល្ពៅ ស្រុកសំឡូត មុនការប្រកាសតំបន់ វិនិច្ឆ័យនៃគម្រោងបែងចែកដីដើម្បីសង្គមកិច្ច ដោយមានការស្នើសុំពី លោកអនុភូមិ និងលោកមេឃុំ ស្នើសុំបន្ថែម ប្រជាពលរដ្ឋចំនួន ០៦គ្រួសារ ដែលស្នើថ្មី សរុបជារួមគឺមាន ២៦គ្រួសារ។
តែថា ប្រជាពលរដ្ឋទាំង២៦.គ្រួសារនោះ មិនព្រមទទួលយកដំណោះស្រាយ ដែលអង្គប្រជុំស្នើឡើងឱ្យពួកគាត់ទាំង ២៦គ្រួសារ ទទួលយកដីលំនៅឋានទំហំ ៣០ម គុណ ៥០ម និងដីស្រែទំហំ២ក្នុងគ្រួសារ លើសពីនេះ ពួកគេទាមទារឱ្យដោះស្រាយដីឱ្យ ១៣៧គ្រួសារទៀត ដែលអាជ្ញាធរជាសាច់ញាតិ ដែលថាខ្លួនមិនអាចដោះស្រាយបាន។
តំណាងពលរដ្ឋម្នាក់ទៀត ថ្លែងសុំមិនបញ្ចេញឈ្មោះដោយបារម្ភពីសុវត្ថិភាព ប្រាប់VODថា ពួកគាត់សុំបដិសេធចំពោះការបកស្រាយរបស់អាជ្ញាធរខេត្ត ថាពលរដ្ឋទៅទន្ទ្រានដី ទំហំ២២១.៨ហិកតា ខណៈពួកគាត់ ១៣៤គ្រួសារ រស់អាស្រ័យផលលើដីនោះតាំងពីឆ្នាំ១៩៩០ជាង។
បន្ថែមពីនេះ ពួកគាត់ក៏ទទូចឱ្យរដ្ឋាភិបាលជួយដោះស្រាយ និងរកយុត្តិធម៌ជូនពួកគាត់ផង។
លោកថា៖ «បើគេនៅថាអ៊ីចឹងហើយ គេយកដីអស់ទៀត ចប់ម៉ង អត់មានអីទៀតទេ បដិសេធដូចអ្វីដែលចៅហ្វាយស្រុកលើកឡើងហ្នឹង អត់ទទួលយកបានទេ បើទទួលងាប់អស់ហើយ ពលរដ្ឋខាងកំពង់ល្ពៅហ្នឹងខាងបីភូមិហ្នឹង ដាច់ខ្យល់ហ្មង អាហ្នឹងដាច់ស្លាប់ដោយខ្លួនឯងហ្មង សុំទាមទារឲ្យរកយុត្តិធម៌អាហ្នឹងដើម្បីឲ្យរកយុត្តិធម៌ដោះស្រាយឱ្យសម្ដេចពុក សម្ដេចម៉ែ ជួយរកយុត្តិធម៌ឲ្យកូនចៅផង ព្រោះគេយកដីកូនចៅអស់កូនចៅបានអីរស់»។
សម្រាប់អ្នកសម្របសម្រួលអង្គការការពារសិទ្ធិមនុស្ស លីកាដូប្រចាំខេត្តបាត់ដំបង លោក អ៊ិន គង់ជិត យល់ថា ប្រសិនបើដូចអ្វីដែលពលរដ្ឋអះអាង អាជ្ញាធរពាក់ព័ន្ធគួរតែចុះទៅពិនិត្យម្ដងទៀត ដើម្បីបញ្ជាក់ពីស្ថិតិជាក់ស្ដែង។
លោកថា៖ «អាជ្ញាធរខេត្តធ្វើការជំរឿន និងស្រាវជ្រាវអំពីស្ថិតិនៃប្រជាពលរដ្ឋនៅតំបន់នោះ ដែលគាត់ធ្លាប់អាស្រ័យផលកន្លងមក ឲ្យបានជាក់លាក់ឡើងវិញ យើងគិតថា យកពួកគាត់ដែលធ្លាប់រស់នៅ និងអាស្រ័យផលលើសពីដប់ឆ្នាំ ដែលពួកគាត់រស់នៅតំបន់ហ្នឹង គួរតែផ្តល់ដីទាំងនោះឲ្យប្រជាពលរដ្ឋដែលធ្លាប់កាន់កាប់អាស្រ័យផលប្រើប្រាស់ ដែលអាចជាលក្ខខណ្ឌមួយ អាចពិចារណាផ្តល់ឲ្យគាត់បានដីសម្រាប់ធ្វើសម្បទានសង្គមកិច្ចដល់ប្រជាពលរដ្ឋ ហើយដល់ពេលប្រជាពលរដ្ឋគាត់នៅហ្នឹងដែរ អត់ផ្តល់ឲ្យគាត់វាជារឿងអយុត្តិធម៌សម្រាប់គាត់»៕
