អង្គការសង់ត្រាល់ អំពាវនាវដល់រដ្ឋាភិបាលកម្ពុជា ពិចារណាក្នុងការផ្តល់ជំនួយមនុស្សធម៌ ដល់សាច់ញាតិពលករខ្មែរដែលនៅបន្តបាត់ខ្លួនក្នុងឧបទ្ទវហេតុបាក់អាគារ ដោយសារគ្រោះរញ្ជួយដី នៅទីក្រុងបាងកក ប្រទេសថៃ ដើម្បីដោះស្រាយទុក្ខលំបាកផ្សេងៗ ខណៈការរុករកជនរងគ្រោះដែលកប់ក្នុងគំនរថ្មអាគារ ពីសំណាក់អាជ្ញាធរថៃ បាននិងកំពុងបន្តធ្វើ។
ក្នុងទំព័រហ្វេសប៊ុករបស់អង្គការសង់ត្រាល់ ដែលបានផ្សព្វផ្សាយនៅថ្ងៃទី០៧ ខែមេសានេះ បានឱ្យដឹងថា ក្រោយករណីបាក់រលំអគារ នៅក្រុងបាងកក អស់រយៈពេល១១ថ្ងៃ ចាប់តាំងពីថ្ងៃទី២៨ ខែមីនា ឆ្នាំ២០២៥កន្លងមកនេះ សាច់ញាតិពលករ-ពលការិនី ចំនួន ២គ្រួសារ ដែលរងគ្រោះដោយអគារបាក់រលំ នៅតែបន្តរងចាំដំណឹង នៅខាងមុខអគារ និងមានសង្ឃឹមថាសមាជិកគ្រួសារពួកគាត់នៅមានជីវិតរស់។
ប្រភពដដែល បន្តថា សាច់ញាតិទាំង ២គ្រួសារ ដែលនៅរងចាំកូន និងបងប្អូននោះ រួមមាន អ្នកស្រី ឆាយ សុភ័ណ ត្រូវជាម្តាយពលកររងគ្រោះ ឈ្មោះ ផល្លា រតនា (Phalla Ratana) រស់នៅភូមិ-ឃុំជ្រោយស្តៅ ស្រុកថ្មគោល ខេត្តបាត់ដំបង ដែលបានបាត់ខ្លួន និងបាត់ដំណឹង តាំងពីថ្ងៃទី២៨ ខែមីនា រហូតមកដល់ពេលនេះ។ ពលករ ផល្លា រតនា ជាជាងភ្លើងនៅអាគារដែលបាក់រលំនោះ ដោយធ្វើការងារនៅជាន់ទី២៦។
ចំណែក អ្នកនាង សាន់ ដែន ជាប្អូនស្រីពលកររងគ្រោះ ឈ្មោះ សាន់ សឿន និង ឈ្មោះ សុខ គិមសី ត្រូវជាបងថ្លៃស្រី រស់នៅភូមិតាម៉ា សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ។ ពលករទាំង២នាក់ប្តីប្រពន្ធ ដែលបាត់ខ្លួន និងបាត់ដំណឹង នៅថ្ងៃកើតហេតុ ធ្វើការជាជាងការ៉ូ នៅអាគារដែលបាក់រលំនោះ។
ករណីនេះ អង្គការសង់ត្រាល់ បានអំពាវនាវឱ្យរដ្ឋាភិបាលថៃ បន្តជួយសង្គ្រោះដល់ជនរងគ្រោះដែលជាពលករបរទេសទាំងអស់ រួមទាំងពលករកម្ពុជា ឲ្យបានឆាប់រហ័ស រួមទាំងការផ្តល់ជំនួយមនុស្សធម៌ ដោយមិនមានការរើសអើងឡើយ។ ទន្ទឹមនឹងនេះ សង់ត្រាល់ ក៏បានអំពាវនាវដល់រាជរដ្ឋាភិបាលកម្ពុជា ពិចារណាក្នុងការផ្តល់ជំនួយមនុស្សធម៌ ដល់សាច់ញាតិពលករខ្មែរ ដែលរងគ្រោះទាំងនេះផងដែរ ដើម្បីកាត់បន្ថយទុក្ខលំបាកផ្សេងៗ។
លោក លឹង សុផុន មន្ត្រីគម្រោងផ្នែកពលករចំណាកស្រុកនៃអង្គការសង់ត្រាល់ប្រចាំប្រទេសថៃ បានប្រាប់វីអូឌីបន្ថែមថា តាមការសង្កេតរបស់លោកនៅទីតាំងកើតហេតុ ឃើញថា ការកាយគំនរថ្មបាក់បែកដែលគរដូចភ្នំនោះ គឺធ្វើបានប្រមាណ ៣០ភាគរយ គិតមកដល់ពេលនេះ ហើយអាជ្ញាធរថៃបាននិងកំពុងបន្តការងារយ៉ាងសកម្មផងដែរ បើទោះជានៅមិនទាន់បានកំណត់ពេលជាក់លាក់នៃការបញ្ចប់ការរុករកក៏ដោយ។
ចំណែក ពលរដ្ឋខ្មែរទាំង ២គ្រួសារ ដែលកំពុងរងចាំដំណឹងពីសាច់ញាតិរបស់ខ្លួនដែលបាត់ខ្លួន នៅមុខគំនរអាគារនោះ ក៏កំពុងជួបផលលំបាកក្នុងជីវភាពផងដែរ ដោយសារតែពួកគាត់ មិនមានកន្លែងស្នាក់នៅស្រួលបួល ដោយពេលខ្លះស្នាក់នៅតាមសំយាបផ្ទះ សំយាបអគារ ឬតូបក្បែរទីតាំងកើតហេតុ និងខ្វះខាតថវិកាសម្រាប់ចំណាយប្រចាំថ្ងៃជាដើម។
ករណីនេះហើយ ដែលអង្គការសង់ត្រាល់ បានអំពាវនាវដល់រដ្ឋាភិបាលកម្ពុជា ផ្តល់ជាជំនួយមនុស្សធម៌ដល់សាច់ញាតិរបស់ពលករខ្មែរដែលបាត់ខ្លួន ដែលភាគច្រើនជាស្ត្រី ដើម្បីឱ្យពួកគាត់មានកន្លែងស្នាក់នៅសមរម្យ និងមានអាហារទទួលទានគ្រប់គ្រាន់ អំឡុងពេលរងចាំដំណឹង។
លោក សុផុន និយាយថា៖ «ព្រោះការរងចាំរបស់គាត់ហ្នឹង គឺតាំងពីថ្ងៃទី២៩[ខែមិនា]មករហូតដល់ពេលនេះ យើងឃើញថា វាច្រើនថ្ងៃមកហើយ ជាង១០ថ្ងៃហើយដែលគាត់ធ្វើការរងចាំហ្នឹង ហើយមានការរៀបចំពីរដ្ឋាភិបាលថៃដែរ កន្លែងសម្រាក កន្លែងស្នាក់នៅរបស់សាច់ញាតិដែលរងចាំនោះ យើងឃើញមានជនជាតិថៃ ហើយនិងពលករជនជាតិភូមាហ្នឹង ឃើញរៀបចំកន្លែង ឃើញដូចមានម៉ាស៊ីនត្រជាក់ម៉ាស៊ីនអីនៅកន្លែងរងចាំ។ ប៉ុន្តែយើងឃើញខ្មែរយើង គាត់ដេកដូចខ្ញុំលើកឡើងខាងដើមចឹង[គាត់សម្រាកតាមសំយាបផ្ទះ សំយាបតូប សំយាបអគារជាដើម]គាត់ដេកនៅកន្លែងនេះបន្តិចទៅកន្លែងនោះបន្តិចទៅ ជួនកាលទៅគេហៅទៅដេកនៅតូបផ្សេងៗទៅ ព្រោះនៅម្តុំហ្នឹង មានកន្លែងតូបកន្លែងអីស្រឡះអាចដេកបាន គាត់ថាលំបាកសម្រាប់ពួកគាត់»។
ក្នុងវីដេអូឃ្លីបរយៈពេលជាង ២នាទី ដែលសង់ត្រាល់បានផុសលើហ្វេសប៊ុកនោះ សាច់ញាតិពលករខ្មែរម្នាក់ ដែលកំពុងរងចាំនៅមុខគំនរអគារបាក់បែក ក្នុងទីក្រុងបាងកក បាននិយាយថា ពួកគាត់នៅមិនទាន់អស់សង្ឃឹមនៅឡើយទេ ដរាបណាអាជ្ញាធរថៃ នៅមិនទាន់រកឃើញសាច់ញាតិរបស់ពួកគេដែលបាត់ខ្លួន។
អ្នកនាងថា៖ «ហើយការដែលខ្ញុំអង្គុយចាំនេះ ក៏នៅសង្ឃឹម សង្ឃឹមថាបងប្អូនយើងនៅមានជីវិតទាំងអស់គ្នា ពួកខ្ញុំអត់ទាន់អស់សង្ឃឹមទេ ព្រោះដរាបណាពួកខ្ញុំអត់ឃើញគាត់ចេញមក ជារូបភាពយ៉ាងម៉េច បែបយ៉ាងម៉េច ពួកខ្ញុំអត់ទាន់អស់សង្ឃឹម»។
VOD មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានទេ។
នៅថ្ងៃចន្ទនេះដែរ ក្រុមគ្រួសារសាច់ញាតិពលករខ្មែរ និងពលករមីយ៉ាន់ម៉ា(ភូមា) ដែលបាត់ខ្លួនក្នុងអគារការិយាល័យសវនកម្មថៃ ដែលបាក់រលំ ក៏បានដាក់ញត្តិជូនអភិបាលក្រុងបាងកកផងដែរ ដោយស្នើតាមដានព័ត៌មានជុំវិញអ្នករបួស និងអ្នកស្លាប់ ចាប់តាំងពីថ្ងៃកើតហេតុដែលអគារនេះបាក់រលំ ខណៈពួកគេបានធ្វើតេស្ត DNA រួចហើយ ហើយបានរាយការណ៍ទៅប៉ូលិសរួចរាល់ហើយដែរ។
គួរបញ្ជាក់ថា គ្រោះរញ្ជួយដីកម្រិត ៧,៧រិចទ័រ កាលពីថ្ងៃទី២៨ ខែមីនា ឆ្នាំ២០២៥ នៅប្រទេសថៃ បានបណ្តាលឱ្យអគារកំពុងសាងសង់កម្ពស់ជាង ៣០ជាន់មួយកន្លែង ស្ថិតក្នុងសង្កាត់ចាក់តុចាក់ (Chatuchak) ក្នុងទីក្រុងបាងកក បានដួលរលំ។ គ្រោះរញ្ជួយដីដូចគ្នានេះ ក៏បានកើតមាននៅប្រទេសមីយ៉ាន់ម៉ា(ភូមា) ដែលបានសម្លាប់មនុស្សរាប់រយនាក់ និងបំផ្លាញហេដ្ឋារចនាសម្ព័ន្ធក្នុងប្រទេសនេះអស់ជាច្រើនផងដែរ។
បើតាមប្រភពសារព័ត៌មានថៃ និងមន្ត្រីអង្គការសង់ត្រាល់ ក្នុងចំណោមពលករថៃ និងពលករបរទេសសរុបជាង ៣០០នាក់ ដែលធ្វើការនៅការដ្ឋានសំណង់អគារដែលបាក់រលំ ក្នុងប្រទេសថៃនោះ ក៏មានពលករខ្មែរផងដែរ។ តែយ៉ាងណា គេនៅពុំទាន់ដឹងពីចំនួនពលករខ្មែរជាក់លាក់ ដែលធ្វើការនៅទីនោះនៅឡើយទេ។
ចំណែក ក្រសួងការងារកម្ពុជា បានឱ្យដឹងជាបន្តបន្ទាប់ដែរថា គិតមកដល់ថ្ងៃទី៤ ខែមេសានេះ មានពលករខ្មែរម្នាក់ ឈ្មោះ មាស សាវ៉ាង អាយុ ២៣ឆ្នាំ នៅខេត្តបន្ទាយមានជ័យ បានស្លាប់ និងពលការិនីខ្មែរម្នាក់ទៀត ឈ្មោះ សឿន សំណាង អាយុ ៤៤ឆ្នាំ នៅខេត្តកំពង់ធំ បានរងរបួសបាក់ជើង ក្នុងហេតុការណ៍បាក់រលំអគារ ខណៈពលករខ្មែរម្នាក់ទៀត ឈ្មោះ ឃិន សាខុន បានរងគ្រោះថ្នាក់របូតគន្លាក់ជង្គង់ ក្នុងឧបទ្ទវហេតុរញ្ជួយដីក្នុងប្រទេសថៃ៕
