ជនរងគ្រោះថា ការចាត់មេធាវីរដ្ឋាភិបាលឱ្យចូលខ្លួនរកយុត្តិធម៌ក្នុងរឿងក្តីអតីតឧកញ៉ា ឡេង ចាន់ណា ហាក់ជាចេតនាជួយបិទបាំងទង្វើមន្រ្តីស្និទ្ធមេដឹកនាំ ដែលពាក់ព័ន្ធជ្រៅក្នុងបទឧក្រិដ្ឋឆបោក ធ្វើឱ្យយុត្តិធម៌ត្រូវជាប់គាំងជាង១ឆ្នាំទៅនេះ បណ្តាលឱ្យជនរងគ្រោះខ្លះមានសមាជិកគ្រួសារស្លាប់ ក្រោមវិបត្តិបំណុលធ្ងន់ធ្ងរ។
ជនងរងគ្រោះម្នាក់ លោក អៀ សុផល ដែលចាញ់បោកលុយជិត២ម៉ឺនដុល្លារ ជាលុយខ្ចីធនាគារ ប្រាប់VODថា លោកគ្មានជំនឿលើមេធាវីរដ្ឋាភិបាលទេ ដោយថាជាង១ឆ្នាំទៅនេះជនរងគ្រោះនៅតែមិនទទួលបានសំណង ទោះមានការចាប់ខ្លួនអតីតឧកញ៉ា ឡេង ចាន់ណា ក្តី។
លោកថា៖ «បើចំពោះខ្ញុំផ្ទាល់ វាគ្រាន់តែជាលេសមួយនោះទេ គ្រាន់តែជាលេសមួយដើម្បីឲ្យប្រជាពលរដ្ឋហៅថា ឱ្យមានចិត្តស្ងប់រំងាប់ កុំឱ្យមានអំពើហិង្សា និងការតវ៉ាបាតុកម្ម។ អ៊ីចឹងបើតាមការគិតរបស់ខ្ញុំ គេយកមេធាវីហ្នឹង តំណាងឲ្យប្រជាពលរដ្ឋរាប់ពាន់គ្រួសារដែលចាញ់បោក ឧកញ៉ា ឡេង ចាន់ណា វាគ្រាន់តែជាយុទ្ធសាស្រ្តជាល្បិចមួយតែប៉ុណ្ណឹងឯង»។
ជនរងគ្រោះម្នាក់ទៀត លោក ផ្លើយ ផ្លុំ ប្រាប់ថា ភរិយារបស់លោកបានស្លាប់ កាលពីជាង១ឆ្នាំមុន ដោយសារវិបត្តិផ្លូវចិត្តរីងរៃ និងរួមរឹតដោយជំងឹប្រចាំកាយ ក្រោយខ្ចីលុយធនាគារ ៣ម៉ឺន៥ពាន់ដុល្លារ យកទៅវិនិយោគក្នុងក្រុមហ៊ុនឆបោករបស់អតីតឧកញ៉ា ឡេង ចាន់ណា។
លោកថា៖ «គ្រួសារខ្ញុំបានស្លាប់ ដោយសារមូលហេតុរឿងលុយយើងដាក់ជាមួយនឹងក្រុមហ៊ុននេះឯង។ ដាក់ទៅ វាមានការស្ទះទៅ ក៏រកអីអត់បានបង់ធនាគារ គាត់ក៏មានអារម្មណ៍ (ឈឺចិត្ត) ណាមួយ គាត់ទឹកនោមផ្អែមផង គាត់គិតច្រើន គាត់ពិបាកចិត្តរកអី មិនបានបង់ធនាគារវ័ណ្ឌក»។
កន្លងទៅ អតីតឧកញ៉ា ឡេង ចាន់ណា ធ្លាប់និយាយថា ក្រុមហ៊ុនប្រ៊ីលានស៊ីធី មាន លោក ហ៊ុន ម៉ាណែត ជាខ្នងបង្អែក។
យ៉ាងណា នាយករដ្ឋមន្រ្តីកម្ពុជា លោក ហ៊ុន ម៉ាណែត បានបដិសេធការលើកឡើងនេះ តាមរយៈលិខិតមួយសន្លឹក កាលពីខែកុម្ភៈ ឆ្នាំ២០២៤ ទាំងគ្មានការស៊ើបអង្កេតណាមួយកើតឡើង។
ទោះជាបែបណា លោក ស៊ាន បូរ៉ាត់ មន្រ្តីស្និទ្ធិលោក ហ៊ុន ម៉ាណែត ធ្លាប់និយាយបែបអូសទាញថា អ្នករកស៊ីក្នុងក្រុមហ៊ុនឆបោកប្រ៊ីលាន នឹងមានវាសនារកលុយបានច្រើនតាមការខិតខំរៀងៗខ្លួន តាមរយៈការបង្កើតទីផ្សារលក់ផលិតផលសុខភាព ដីធ្លី និងផ្ទះល្វែង ជាដើម។
លោកថា៖ «ខ្ញុំជឿថា ប្រហែលជាក្រោយអំពីសិក្សាលក់ទំនិញនៅទីផ្សារប្រ៊ីលាននេះទៅ ប្រហែលជាលែងចង់ទៅប្រទេសកូរ៉េហើយ ខ្ញុំជឿជាក់ដូច្នេះឯង ដោយសារការរកលុយនៅទីនេះ មានលក្ខណៈងាយស្រួល តាមរយៈការបង្កើតបណ្តាញលក់ឱ្យគេ លក់ផលិតផល ហើយក្នុងមួយថ្ងៃៗ គឺលុយលោតចូលក្នុងទូរសព្ទយើងនៅពេលណាដែលយើងប្រឹងប្រែងកាន់តែខ្លាំង លុយលោតចូលកាន់តែខ្លាំង»។
ជនរងគ្រោះម្នាក់ទៀតដែលកំពុងចំណាកស្រុកនៅប្រទេសថៃ លោក អង យូហៃ ប្រាប់ថា លោកបានចាញ់បោកទាំងគ្រួសារសរុបជាង ៥ម៉ឺនដុល្លារ ក្រោយការជឿជាក់លើ លោក ស៊ាន បូរ៉ាត់ មន្រ្តីស្និទ្ធលោក ហ៊ុន ម៉ាណែត ដែលតែងតែថ្លែងនៅតាមវេទិកាសាធារណៈជាមួយអ្នកស្រី ឡេង ចាន់ណា ឃោសនាឱ្យពលរដ្ឋជឿជាក់លើក្រុមហ៊ុនប្រ៊ីលានស៊ីធី។
លោកថា៖ «សុទ្ធតែជឿជាក់លើឯកឧត្តម ស៊ាន បូរ៉ាត់ ហើយនិង ឡេង ចាន់ណា ព្រមទាំងសម្តេច(ហ៊ុន ម៉ាណែត) ចុះទៅសម្ពោធ។ ចឹងជឿជាក់ថា ពួកគាត់មិនបោកពលរដ្ឋទេ តែចុងក្រោយពួកខ្ញុំទឹកភ្នែក មិនចេញប្រជាពលរដ្ឋពិបាកខ្លាំងណាស់បងអើយ ម្នាក់ៗសឹងតែចងករសម្លាប់ខ្លួនអស់ហើយ អ្នកខ្លះមកប្រទេសថៃ ទាំងខុសច្បាប់ក៏មានដែរ។ សព្វថ្ងៃរស់ទាំងត្រដរទេ បើយើងមិនប្រឹងមានអង្ករណាច្រកឆ្នាំង បើសេចក្តីសង្ឃឹមយើងខំសន្សំរាប់ឆ្នាំ គេបោកអស់រលីងពឹងប្រាក់ខែមួយខែបានតែ១ម៉ឺនបាត ខំរកចង់ងាប់ចុងក្រោយគេមកបោក ស្តាយគំនិតស្តាយចិត្តដែលធ្លាប់ទុកចិត្ត»។
លោក ស៊ាន បូរ៉ាត គឺជាអនុប្រធានអង្គភាពប្រឆាំងអំពើពុករលួយ មានឋានៈស្មើរដ្ឋមន្រ្តី និងជារដ្ឋលេខាធិការក្រសួងអប់រំ យុវជន និងកីឡា ព្រមទាំងជាប្រធានសហព័ន្ធកីឡាបាល់បោះកម្ពុជាផងដែរ។
ក្នុងគណបក្សកាន់អំណាច លោក ស៊ាន បូរ៉ាត់ អនុប្រធានយុវជនគណបក្សប្រជាជនកម្ពុជាថ្នាក់កណ្ដាល ដែលមាន លោក ហ៊ុន ម៉ាណែត ជាប្រធាន។
យ៉ាងណា មន្រ្តីស្និទ្ធមេដឹកនាំ ដែលត្រូវគេសង្ស័យថា នៅពីក្រោយបទឧក្រិដ្ឋឆបោករូបនេះ ត្រូវបានតុលាការចាត់ទុកថា ត្រឹមតែជាសាក្សីក្នុងរឿងឆបោកនេះទៅវិញ។
តំណាងរាស្រ្តគណបក្សសង្គ្រោះជាតិ លោក អ៊ុំ សំអាន យល់ឃើញថា ការចាត់ទុក លោក ស៊ាន បូរ៉ាត់ ក្នុងនាមជាសាក្សីបែបនេះ វាជាតម្រុយបង្ហាញពីសេណារីយូគប់គិតគ្នាជាប្រព័ន្ធរវាងស្ថាប័នតុលាការ និងមន្រ្តីឆបោក ដើម្បីបើកភ្លើងខៀវឱ្យ លោក ស៊ាន បូរ៉ាត់ មានឱកាសរួចខ្លួនពីសំណាញ់ច្បាប់។
លោកថា៖ «យើងឃើញភស្តុតាងវីឌីអូផ្សេងៗហ្នឹងច្បាស់ក្រឡែតថា ស៊ាន បូរ៉ាត់ នៅពីក្រោយខ្នង ជាមេខ្លោង គប់គិតជាមួយ ឡេង ចាន់ណា ដើម្បីបោកប្រាស់ប្រជាពលរដ្ឋ។ ដល់កោះហៅជាសាក្សីចឹង! អាចគ្រាន់តែឆ្លើយបំភ្លឺ អត់ឃាត់ខ្លួន ព្រោះថាក្នុងនាមជាសាក្សី មិនមែនជាអ្នកដែលពាក់ព័ន្ធការឆបោកផង ជាមេខ្លោងនៅពីក្រោយខ្នងផងហ្នឹង។ យើងអាចសន្និដ្ឋានពួកគេគប់គិតគ្នាឱ្យ លោក ស៊ាន បូរ៉ាត់ រួចខ្លួន»។
អតីតឧកញ៉ា ឡេង ចាន់ណា ត្រូវបានចាប់ខ្លួននៅថ្ងៃទី១៣ ខែមីនា ឆ្នាំ២០២៤ ក្រោយពីជនរងគ្រោះផ្ទុះការតវ៉ាជាបន្តបន្ទាប់ រយៈពេលប្រមាណ ១ខែ ដែលមានអ្នកចាញ់បោកប្រមាណ ៧០០០គ្រួសារ គិតជាទឹកប្រាក់ជាង ៣០០លានដុល្លារអាមេរិក។
ជុំវិញរឿងនេះ VOD មិនអាចសុំការឆ្លើយតបពី មេធាវីរដ្ឋាភិបាល លោក គី តិច និងអ្នកនាំពាក្យសាលាដំបូងខេត្តសៀមរាប លោក យិន ស្រ៊ាង បានទេដោយទូរសព្ទពុំអាចទាក់ទងបាន។
យ៉ាងណា លោក គី តិច ប្រធានក្រុមមេធាវីរបស់រដ្ឋាភិបាល ដែលចូលខ្លួនធ្វើជាតំណាងឱ្យជនរងគ្រោះ បានបញ្ជាក់ក្នុងសន្និសីទសារព័ត៌មាន កាលពីខែតុលា ឆ្នាំ២០២៤ថា មានជនរងគ្រោះចំនួនជិត ៥ពាន់នាក់ ស្ម័គ្រចិត្តឱ្យក្រុមមេធាវីលោកការពារសំណុំរឿងរបស់ពួកគេ និងបន្តប្រមូលឯកសារពីក្រុមអ្នកចាញ់បោកនៅក្រៅប្រទេសបន្តទៀត។
យន្តការនេះ ធ្វើឡើងតាមបញ្ជារបស់លោក ហ៊ុន ម៉ាណែត កាលពីខែឧសភា ឆ្នាំ២០២៤ តែចាប់ពីមេធាវីរូបនោះជួយការពារក្តីជិតមួយឆ្នាំទៅនេះ ជនរងគ្រោះនៅតែមិនទទួលបានសំណងមកវិញនោះទេ ខណៈពួកគេបានលក់ដីស្រែ ខ្លះចំណាកស្រុក ក្រោមសម្ពាធបំណុល។
តុលាការខេត្តសៀមរាប កាលពីខែមេសា ឆ្នាំ២០២៤ បានប្រកាសថា បានបង្កកគណនីធនាគារ ក្រុមហ៊ុន ប្រ៊ី លានស៊ីធី ចំនួន១៨៣គណនី។
តែក្រុមជនរងគ្រោះ និយាយថា ទោះបីមានការចាប់ខ្លួនអតីតឧកញ៉ា ឡេង ចាន់ណា និងមានវិធានបង្កកគណនីធនាគាក្តី តែពួកគេថាមិនបានទទួលប្រាក់ដើមមកវិញទេ ។
បើតាមតុលាការខេត្តសៀមរាប អ្នកស្រី ឡេង ចាន់ណា ត្រូវជាប់ចោទច្រើនបទល្មើស រួមមាន បទ ឆបោកមានស្ថានទម្ងន់ទោស ជាក្រុមមានការចាត់តាំង បទសម្អាតប្រាក់ និងបទមិនបំពេញកាតព្វកិច្ចចំពោះឧបករណ៍អាចជួញដូរបាន។
ប៉ុន្តែលោក ស៊ាន បូរ៉ាត់ ដែលជាមន្ត្រីមានឥទ្ធិពលក្នុងការអូសទាញអតិថិជន ក្នុងអំពើឆបោកនេះដែរ បន្តរស់នៅក្រៅសំណាញ់ច្បាប់នៅឡើយ និងត្រូវបានតុលាការចាត់ទុកថា ជាសាក្សី បើទោះបីជាមានភស្តុតាងបង្ហាញថា មន្រ្តីរូបនេះជាមេខ្លោងនៅពីក្រោយអំពើឆបោកជាមួយអតីតឧកញ៉ា ឡេង ចាន់ណា ក្តី៕
