រដ្ឋាភិបាលតាមរយៈក្រសួងមហាផ្ទៃ ណែនាំដល់អាជ្ញាធរខេត្តជាប់ព្រំដែនជាមួយប្រទេសថៃ ដោះស្រាយបញ្ហាប្រឈមនានា និងទប់ស្កាត់ការទាមទារប្រាក់កម្រៃសេវាក្រៅផ្លូវការពីប្រជាពលរដ្ឋខ្មែរ នៅពេលឆ្លងដែនចូលមកកម្ពុជាវិញ ក្នុងឱកាសពិធីបុណ្យចូលឆ្នាំខ្មែរ។
នេះបើតាមលិខិតមួយច្បាប់របស់រដ្ឋមន្ត្រីក្រសួងមហាផ្ទៃ លោក ស សុខា ផ្ញើទៅកាន់អភិបាលខេត្តជាប់ព្រំដែនថៃ ចុះថ្ងៃទី០៨ ខែមេសា ឆ្នាំ២០២៥នេះ ។
លោក ស សុខា រំឭកថា ជាទម្លាប់ក្នុងឱកាសពិធីបុណ្យចូលឆ្នាំខ្មែរ គឺមានប្រជាពលរដ្ឋខ្មែរជាច្រើនដែលកំពុងស្នាក់នៅនិងធ្វើការនៅប្រទេសថៃ តែងតែធ្វើដំណើរឆ្លងដែនត្រឡប់មកកម្ពុជាវិញ ដើម្បីជួបជុំគ្រួសារ ហើយស្ថានភាពនេះនឹងបង្កការកកស្ទះនៅទីស្នាក់ការត្រួតពិនិត្យច្រកទ្វារព្រំដែន ឬមានការរង់ចាំយូរក្នុងការបំពេញបែបបទ និងនីតិវិធីសម្រាប់ឆ្លងដែន។
លោកថា ជាមួយគ្នានេះ ខាងរដ្ឋាភិបាលថៃ ក៏បានលើកលែងថ្លៃទិដ្ឋការចេញចូលដល់ពលករខ្មែរ ឡាវ និងមីយ៉ាន់ម៉ា ដែលកំពុងស្នាក់នៅនិងធ្វើការស្របច្បាប់ក្នុងប្រទេសថៃ ចំនួន១ដង ដោយពុំបង់កម្រៃសេវាពាក់ព័ន្ធ ចាប់ពីថ្ងៃទី១ ខែមេសា ដល់ថ្ងៃទី១៥ ខែឧសភា ឆ្នាំ២០២៥។
ករណីនេះ ក្រសួងបានណែនាំដល់រដ្ឋបាលខេត្តជាប់ព្រំដែន ត្រូវចាត់វិធានការឱ្យបានសមស្របដើម្បីធានាសន្តិសុខ សុវត្ថិភាពសង្គម សណ្តាប់ធ្នាប់សាធារណៈ និងរបៀបរៀបរយនៅតាមច្រកទ្វារព្រំដែននិមួយៗ និងត្រូវដោះស្រាយបញ្ហាប្រឈមនានា កុំឱ្យមានការកកស្ទះនៅទីស្នាក់ការត្រួតពិនិត្យច្រកទ្វារព្រំដែន ដោយបង្កើនចំនួនមន្ត្រីប្រថាប់ត្រាផ្តល់ទិដ្ឋការចេញចូលឆ្លងដែន ព្រមទាំងត្រូវទប់ស្កាត់ និងចាត់វិធានការចំពោះបុគ្គលណា ដែលទាមទាររកកម្រៃសេវាក្រៅផ្លូវការពីប្រជាពលរដ្ឋខ្មែរនៅពេលឆ្លងដែន។
ក្រៅពីនោះ ក្រសួងក៏បានណែនាំឱ្យជូនដំណឹងទៅម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរទាំងអស់ ត្រូវផ្តល់កិច្ចសហការរក្សាតម្លៃសេវាដឹកជញ្ជូនឱ្យនៅដដែលផងដែរ។
បើតាមមន្ត្រីអង្គការសង់ត្រាល់ប្រចាំនៅប្រទេសថៃ លោក លឹង សុផុន គិតមកដល់ឆ្នាំ២០២៥ ពលករបម្រើការងារនៅប្រទេសថៃទាំងខុសច្បាប់ និងស្របច្បាប់មានប្រហែលជិត ៣លាននាក់។
តែយ៉ាងណា រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានឱ្យដឹងកាលពីថ្ងៃទី០១ ខែមិនា ឆ្នាំ២០២៥ថា ចំនួនពលករខ្មែរដែលធ្វើការនៅបរទេសក្នុងឆ្នាំ២០២៤ មានចំនួន ១លាន៣សែន៨ម៉ឺននាក់ ដោយក្នុងនោះពួកគេធ្វើការនៅប្រទេសថៃ កូរ៉េ ជប៉ុន ម៉ាឡេស៊ី ជាដើម។
លោកបន្តថា ពលករខ្មែរចំណាកស្រុកទៅធ្វើការនៅក្រៅប្រទេស បានកើនឡើងក្នុងឆ្នាំ២០២៤ បើធៀបនឹងឆ្នាំ២០២៣ ដែលមានចំនួន ១លាន៣សែន៥ម៉ឺននាក់។
យ៉ាងនេះក្តី ប៉ុន្មានថ្ងៃជាប់គ្នាទៅនេះ ពលរដ្ឋមួយចំនួនបានបង្ហោះវីដេអូ លើបណ្តាញសង្គម បង្ហាញពីបញ្ហាប្រឈមជាច្រើន មានការកកស្ទះច្រើនម៉ោង និងខ្លះត្រូវមន្ត្រីជំរិតទារប្រាក់ ពិសេសកើតឡើងលើពលករខ្មែរ ដែលគ្មានឯកសារឆ្លងដែនត្រឹមត្រូវ នៅពេលពួកគេត្រឡប់មកចូលរួមពិធីបុណ្យចូលឆ្នាំ។
ការសំអាងពីបញ្ហាប្រឈមនេះ ហាក់ដូចគ្នាទៅឆ្នាំមុនៗដែរ ទោះក្រសួងមហាផ្ទៃបានចេញសេចក្តីណែនាំ ឱ្យអាជ្ញាធរពាក់ព័ន្ធជួយទប់ស្កាត់ក្តី៕
