ក្រសួងមហាផ្ទៃ បានសម្រេចផ្ទេរភារកិច្ចមន្ត្រីនគរបាលផ្កាយ១ម្នាក់ ឈ្មោះ សម្បត្តិ កុសល ពីស្នងការរងនគរបាលខេត្តបន្ទាយមានជ័យ ឱ្យទៅបម្រើការងារនៅនាយកដ្ឋានវិទ្យុទាក់ទង ស្របពេលមន្ត្រីរូបនេះ ឈ្នះក្តីក្នុងសំណុំរឿងគំរាមកំហែងហែកកេរ្តិ៍ លើម្ចាស់បំណុល ដែលនាំឱ្យសាធារជនមានការរិះគន់។
ប្រកាសរបស់រាជរដ្ឋាភិបាល ស្តីពីការផ្ទេរភារកិច្ចមន្ត្រីនគរបាល ចុះថ្ងៃទី២០ ខែមករា ឆ្នាំ២០២៥ ដែលត្រូវបានគេផ្សព្វផ្សាយនៅថ្ងៃទី០៩ ខែមេសានេះ បានសម្រេចផ្ទេរភារកិច្ច លោក ឧត្តមសេនីយ៍ត្រី(ផ្កាយ១) សម្បត្តិ កុសល ពីស្នងការរងនៃស្នងការដ្ឋាននគរបាលខេត្តបន្ទាយមានជ័យ ឱ្យទៅបម្រើការងារនៅនាយកដ្ឋានវិទ្យុទាក់ទង ចំណុះអគ្គស្នងការដ្ឋាននគរបាលជាតិវិញ។
តែក្នុងប្រកាសនោះ ពុំបានបញ្ជាក់ពីមូលហេតុនៃការផ្ទេរភារកិច្ចមន្ត្រីនគរបាលផ្កាយ១នេះទេ។
លោក សម្បត្តិ កុសល ដែលជាអតីតស្នងការរងនគរបាលខេត្តបន្ទាយមានជ័យ ក៏ជាដើមបណ្តឹង ប្តឹងម្ចាស់លុយ រហូតតុលាការខេត្តសៀមរាប ចោទស្រ្តីម្ចាស់លុយ ពីបទ គំរាមកំហែងហែកកេរ្តិ៍ ឱ្យជាប់ពន្ធនាគារ២ឆ្នាំ និងសងជំងឺចិត្តដល់ដើមបណ្តឹងចំនួន ៤លានរៀល ឬស្មើ១ពាន់ដុល្លារ។
តាមដំណើររឿង ម្ចាស់លុយ ឈ្មោះ ចិន ស្រីដា ដែលរងការចោទ ពីបទគំរាមកំហែងហែកកេរ្តិ៍ បានឱ្យភរិយាដើមបណ្តឹង លោក សម្បត្តិ កុសល ខ្ចីលុយជាបន្តបន្ទាប់ រហូត២ម៉ឺនដុល្លារ តែភរិយា លោក សម្បត្តិ កុសល គេចវេសមិនព្រមសង។
ហេតុផលនេះ ទើបម្ចាស់បំណុល គំរាមទម្លាយសារសំឡេង កូនបំណុលខ្ចីលុយដើម្បី រត់ការឡើងតំណែង បើកូនបំណុលនៅតែគេចវេសមិនព្រមសង ដែលបញ្ហានេះធ្វើឱ្យ លោក សម្បត្តិ កុសល ប្តឹងម្ចាស់បំណុល រហូតឈ្នះក្តីនៅតុលាការខេត្តសៀមរាប ។
ក្រោយពីតុលាការកាត់ក្តីឱ្យ លោក សម្បត្តិ កុសល ឈ្នះក្តី អ្នកប្រើប្រាស់បណ្តាញសង្គមជាច្រើន បានផ្ទុះការរិះគន់ទៅលើចំណាត់ការរបស់តុលាការ ដោយអ្នកខ្លះថា ជារឿងអយុត្តិធម៌សម្រាប់ម្ចាស់លុយ ដែលឱ្យគេខ្ចីលុយហើយត្រូវជាប់ គុកទៀត។ អ្នកខ្លះទៀតថា រកស៊ីចំណេញបង់ពន្ធជូនរដ្ឋហើយ រកប៉ះចំអ្នកមានអំណាច ម្ចាស់បំណុលជាប់គុកទៀត ខណៈមតិខ្លះទៀតថា អ្នកអនុវត្តច្បាប់រួមដៃគ្នាជាមួយអ្នកមានអំណាច ហើយអ្នកតូចតាចក្លាយជាជនរងគ្រោះទៅវិញ៕
