តំណាងអ្នកតវ៉ាដីធ្លីនៅស្រុកសំបូរ ខេត្តក្រចេះ បានបដិសេធចំពោះការដែលក្រសួងពាក់ព័ន្ធចោទថា ពួកគាត់៦នាក់បានកៀងគរពលរដ្ឋផ្សេងទៀត ទៅទន្ទ្រានយកដីក្រុមហ៊ុនវៀតណាម ទំហំ៥២០ហិកតា ដោយដីនោះពួកបានអាស្រ័យមុនក្រុមហ៊ុនចូលមកដល់។
ការបដិសេធនេះ ក្រោយពីក្រសួងយុត្តិធម៌ បញ្ជាក់ថា កិច្ចសុំអន្តរាគមន៍របស់ពួកគេ កន្លងទៅ ក្រសួងទុកឱ្យតុលាការខេត្តក្រចេះ ដំណើរការនីតិវិធី ដោយក្រសួងសំអាងលើរបាយការណ៍របស់មន្ត្រីជំនាញ រកឃើញថា ពួកគេទាំង៦នាក់បានកៀងគរអ្នកទៅទន្ទ្រានដីក្រុមហ៊ុនទំហំ ៥២០ហិកតា អំឡុងឆ្នាំ២០២៤។
នេះបើតាមលិខិតឆ្លើយតបរបស់ក្រសួងយុត្តិធម៌ ចុះថ្ងៃទី១ ខែមេសា ឆ្នាំ២០២៥ ឆ្លើយតបទៅនឹងសំណើរសុំអន្តរាគមន៍ ពីតំណាងពលរដ្ឋ ដែលVOD ទទួលបាននៅថ្ងៃទី១០ខែមេសានេះ។
ជុំវិញបញ្ហានេះ តំណាងអ្នកតវ៉ាដីធ្លីនៅខេត្តក្រចេះ អ្នកស្រី អ៊ែល រ៉ូហ្សា ប្រាប់VODនៅថ្ងៃទី១០ ខែមេសានេះថា គាត់សុំបដិសេធទាំងស្រុង ចំពោះការបកស្រាយបែបចោទប្រកាន់លើពួកគាត់។ ស្ត្រីតវ៉ាដីធ្លីរូបនេះអះអាងថា ពួកគេជាង២០០គ្រួសារ បានអាស្រ័យលើដីនោះ មុនរដ្ឋាភិបាលដាក់ជាដីសម្បទានឱ្យក្រុមហ៊ុនវៀតណាម។
អ្នកស្រីបន្តថា គាត់ពិតជាមានក្ដីបារម្ភខ្លាំងពីសុវត្ថិភាព សិទ្ធិសេរីភាព និងជីវភាព ខណៈកំពុងទទួលរងនូវភាពអយុត្តិធម៌។
អ្នកស្រីថា៖ «គាត់រស់នៅតាំងពីជំនាន់៨០មក អយុត្តិធម៌ចំពោះពួកខ្ញុំទាំង៦រូបណាស់ មិនមែនតែខ្ញុំ៦រូបទេ ហើយមានសមត្ថភាពឯណាទៅកៀងគរពួកគាត់មកនោះ វាអយុត្តិធម៌ហើយហៅតែពួកខ្ញុំ៦រូបចោទប្រកាន់ពួកខ្ញុំ៦រូប ហើយប្រជាពលរដ្ឋទាំងអស់ហ្នឹង គាត់ចង់និយាយថា គាត់តវ៉ាថាដីគាត់ពិតប្រាកដបានហើយរស់នៅតាមហ្នឹង តាំងពីជំនាន់ជីដូនជីតា ហេតុអីមកចោទប្រកាន់ថាគាត់យកដីក្រុមហ៊ុន»។
បើតាមលិខិតរបស់ក្រសួង គណៈបញ្ជាការដឹកនាំយុទ្ធនាការ ពិនិត្យឃើញថា តាមពាក្យបណ្ដឹងចុះថ្ងៃទី១១ ខែកក្កដា ឆ្នាំ២០២៤ របស់ក្រុមហ៊ុនកសិកម្មយុវជនស្វាយរៀង បានបញ្ជាក់ថា កាលពីអំឡុងឆ្នាំ២០០៩-២០១០ ក្រុមហ៊ុន កាម៉ាដេនូ វេនឈីរ (ខេមបូឌា) លីមីធីត និងក្រុមហ៊ុនអិនខេ អេហ្គ្រី (ខេម-បូឌា) លីមីធីត បានទទួលការអនុញ្ញាតពីរាជរដ្ឋាភិបាលកម្ពុជា ក្នុងការវិនិយោគលើគម្រោង សម្បទានដី សេដ្ឋកិច្ចទំហំ ១៦ ៨៩២ហិកតា ដើម្បីធ្វើកសិឧស្សាហកម្ម (អំពៅ) និងសាងសង់រោងចក្រស្ករស មានទីតាំងនៅឃុំកោះខ្ញែរ ឃុំអូរគ្រៀង ឃុំសំបូរ និងឃុំក្បាលដំរី នៃស្រុកសំបូរ ខេត្តក្រចេះ កាលពីថ្ងៃទី១៩ ខែសីហា ឆ្នាំ២០០៩។
នៅថ្ងៃទី១៣ ខែវិច្ឆិកា ឆ្នាំ២០០៩ និងកិច្ចសន្យាស្តីពីការវិនិយោគ ថ្ងៃទី១១ ខែវិច្ឆិកា ឆ្នាំ២០១០ ធ្វើឡើងរវាងក្រុមហ៊ុន និងក្រសួងកសិកម្ម រុក្ខាប្រមាញ់ និងនេសាទ។
ក្រោយមក មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ បានចុះវាស់វែង និងកាត់ឈ្វៀល ធ្វើការចុះបញ្ជីដីជាកម្មវត្ថុនៃគម្រោងវិនិយោគ ជាដីឯកជនរបស់រដ្ឋ និងផ្ដល់ប័ណ្ណកម្មសិទ្ធិដីសម្បទានសេដ្ឋកិច្ចចំនួន ៦៣ប័ណ្ណ មានផ្ទៃដីសរុបចំនួន ១៤ ៩២១,៤៩ (មួយម៉ឺនបួនពាន់ប្រាំបួនរយម្ភៃមួយក្បៀសសែសិបប្រាំបួន)ហិកតា។
នៅអំឡុងឆ្នាំ២០២៤ ក្រុមហ៊ុនកសិកម្មយុវជនស្វាយរៀង ឯ.ក នឹងអាជ្ញាធរខេត្ត រកឃើញដីមួយផ្នែកទំហំ ៦០,១៨ (ហុកសិបក្បៀសដប់ប្រាំបី)ហិកតា ត្រូវបានទន្ទ្រានចូលកាន់កាប់ដោយខុសច្បាប់ ដោយបុគ្គល ៦នាក់ មាន លោក ភេម ឡៃ កាន់កាប់ដីទំហំ ២០,៧០ហិកតា, លោក ស៊ឹង ករុណា ទំហំ ១១,៨៣ហិកតា, លោក ប្រុក ភារម្យ ទំហំ១,៧៨ហិកតា, លោក ឌុច សាគី ទំហំ ៥,០៣ហិកតា, អ្នកស្រី អែល រ៉ូហ្សា ទំហំ ៩,២០ហិកតា និងលោក អ៊ុន សុខុម ទំហំ ១១,៦៤ហិកតា បានធ្វើសកម្មភាពកៀងគរ ញុះញង់ និងដឹកនាំពលរដ្ឋ ចូលទៅទន្ទ្រាន និងកាន់កាប់ដីទំហំ ៥២០ហិកតា ដែលបានចុះបញ្ជីរួច។
បច្ចុប្បន្ន សំណុំរឿងនេះ សាលាដំបូងខេត្តក្រចេះ កំពុងស៊ើបអង្កេតនៅឡើយ និងចាត់ការលើករណីនេះឱ្យបានត្រឹមត្រូវ និងយុត្តិធម៌ស្របតាមច្បាប់ និងនីតិវិធីជាធរមាន។
សម្រាប់ពលរដ្ឋមានជម្លោះដីធ្លីជនជាតិដើមភាគតិចពូនង អ្នកស្រី ញែម ផុម បានអះអាងថា ពួកគាត់មិនបានចូលទៅទន្រ្ទានយកដីក្រុមហ៊ុននោះទេ មានតែក្រុមហ៊ុនទេដែលរំលោភយកដីពលរដ្ឋ ដែលអាស្រ័យផលតាំងពីជំនាន់ម្ដាយឪពុកគាត់។
ប្រភពបន្តថា គាត់ជាពលរដ្ឋក្រីក្រគ្មានអ្វីជាទីពឹងក្រៅពីដីនេះទេ ពួកគាត់ស្នើរដ្ឋាភិបាលជួយរកយុត្តិធម៌ជូនពួកគាត់ផង។
អ្នកស្រីថា៖«មិនមែនការពិតទេ រឿងហ្នឹងគេបំផុសបំផុលបង្ខូចពួកគាត់ទេ ការពិតអត់មានទេ មានតែក្រុមហ៊ុនទេដែលបំពានយកដីពលរដ្ឋ បើឱ្យពលរដ្ឋបំពានដីក្រុមហ៊ុនគ្មានទេខាងក្រុមហ៊ុន គេចោទថាយើងយកដីក្រុមហ៊ុន គឺមិនពិតទេ ខ្ញុំធ្វើស្រែរាល់ថ្ងៃធ្វើទាំងវេទនា ឥលូវដីភូមិប៉ះខាងបរិស្ថានដីស្រែប៉ះខាងក្រុមហ៊ុន ឥលូវពិបាកណាស់ ជីវភាពខ្វះខាតទៀត រកល្ងាចខ្វះព្រឹករកព្រឹកខ្វះល្ងាច»។
ករណីនេះ អ្នកនាំពាក្យក្រសួងយុត្តិធម៌ លោក ជិន ម៉ាលិន សុំមិនធ្វើអត្ថាធិប្បាយ។ ដោយឡែក សម្រាប់ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី ជំរុញឱ្យមានការដោះស្រាយក្រៅប្រព័ន្ធតុលាការ ស្របតាមគោលនយោបាយ ឈ្នះឈ្នះ និងយន្តការគណៈកម្មការសូរិយោដី ដែលសំដៅដល់ការសម្របសម្រួលដោយផ្ដល់ឱ្យភាគីទាំងសងខាង ទទួលទាំងអស់គ្នា។
បន្ថែមពីនេះ លោកចង់ឃើញរដ្ឋាភិបាល ពន្លឿនដោះស្រាយបញ្ចប់បញ្ហានេះ ជាជាងអូសបន្លាយពេលបែបនេះ បើអាចទម្លាក់បទចោទតែម្ដង ព្រោះបញ្ហានេះបានអូសបន្លាយមកជាយូរហើយ។
លោកថា៖«រឿងនេះវាអាចធ្វើទៅបាន មិនមានអីដែលធ្វើមិនបាននោះទេ តុលាការគាត់កុំទទួលក្ដីរឿងនេះ ព្រះរាជអាជ្ញាទម្លាក់បទចោទនេះ ចេញហើយបង្វិលរឿងនេះមកឲ្យគណៈកម្មការយន្តការដោះស្រាយក្រៅប្រព័ន្ធតុលាការ ដែលមានស្រាប់គឺជារឿងមួយដែលល្អ មិនមានរឿងអីដែលមិនអាចធ្វើបាននោះទេ យើងចូលចិត្តតែប្ដឹងផ្ដល់ទៅតាមផ្លូវតុលាការ ហើយយើងដឹងហើយតាមផ្លូវតុលាការ បទចោទគឺសុទ្ធតែពាក់ព័ន្ធនឹងព្រហ្មទណ្ឌ វាធ្វើឲ្យមានការឈ្នះមានចាញ់ មានអ្នករត់ចោលស្រុករត់ចោលផ្ទះសម្បែង មានអ្នកខ្លះព្រាត់ប្រាសប្រពន្ធកូន បាត់បង់ការងារធ្វើឲ្យស្ថានភាពជីវភាពកាន់តែលំបាក»។
បើតាមអាដហុក ជុំវិញសំណុំរឿងនេះ តុលាការខេត្តក្រចេះ នឹងកោះហៅឱ្យតំណាងអ្នកតវ៉ាដីធ្លីទាំងនោះ ចូលទៅបំភ្លឺជាថ្មីទៀតនៅចុងខែមេសានេះ តាមបណ្តឹងរបស់ក្រុមហ៊ុន។
ជុំវិញបញ្ហាដីធ្លីនេះដែរ កាលពីថ្ងៃទី២១ ខែមករា ឆ្នាំ២០២៥ តុលាការខេត្តក្រចេះ បានកោះហៅតំណាងពលរដ្ឋចំនួន ៦នាក់ តាមបណ្តឹងរបស់ភាគីក្រុមហ៊ុន ដោយចោទពីបទហិង្សា។
បើតាមប្រភពដដែល ជិត១ឆ្នាំទៅនេះ ពួកគាត់បានឡើងមករាជធានីភ្នំពេញ រកកិច្ចអន្តរាគមន៍ពីមេដឹកនាំញឹកញាប់ រួមទាំងក្រសួងពាក់ព័ន្ធរបស់រដ្ឋាភិបាលផងដែរ ឱ្យជួយទប់ស្កាត់ការរំលោភយកដី ពីសំណាក់ក្រុមហ៊ុនវៀតណាមនេះ ប៉ុន្តែថាមកដល់ពេលនេះគ្មានដំណោះស្រាយទេ។
ពួកគាត់ថា ចំពេលយុត្តិធម៌ត្រូវបានស្ថាប័នជាតិកប់ចោល ក្រុមហ៊ុនវៀតណាម បានបង្កើនការប្រើដៃតុលាការ ប្តឹងចោទប្រកាន់តំណាងពួកគាត់ជាជនរងគ្រោះទៅវិញ ហើយពេលនេះរងសម្ពាធពីក្រសួងបង្ខំឱ្យចាកចេញពីដីធ្លាប់អាស្រ័យផល ទៅទទួលយកដីនៅខេត្តស្ទឹងត្រែង ដើម្បីបើកផ្លូវឱ្យក្រុមហ៊ុនវៀតណាម ដែលរំលោភបំពានដីធ្លីពួកគាត់ទៅវិញ៕
