មេដឹកនាំកំពូលចិន លោក ស៊ី ជីនពីង នឹងធ្វើដំណើរមកកាន់ប្រទេសមួយចំនួនក្នុងតំបន់អាស៊ី រួមទាំងប្រទេសកម្ពុជា នៅសប្តាហ៍ក្រោយនេះ ចំពេលសង្គ្រាមពាណិជ្ជកម្មកើតឡើងរវាងចិន និងអាមេរិក ខណៈអាមេរិកទុកពេល៩០ថ្ងៃ ឱ្យប្រទេសចំនួន៧៥ រួមទាំងកម្ពុជា ធ្វើការចរចាការដំឡើងពន្ធគយបដិការនេះ។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១១ ខែមេសា ឆ្នាំ២០២៥ ឱ្យដឹងថា តបតាមការអញ្ជើញរបស់ព្រះមហាក្សត្រកម្ពុជា ប្រធានាធិបតីចិន លោក ស៊ី ជីនពីង នឹងមកបំពេញទស្សនកិច្ចផ្លូវរដ្ឋ នៅកម្ពុជា ចាប់ពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥នេះ។
ប្រភពដដែលបន្តថា ក្នុងដំណើរទស្សនកិច្ចនោះ លោក ស៊ី ជីនពីង នឹងចូលគាល់ព្រះមហាក្សត្រ នៅព្រះបរមរាជវាំង និងជួបជាមួយប្រធានព្រឹទ្ធសភា លោក ហ៊ុន សែន និងនាយករដ្ឋមន្ត្រី លោក ហ៊ុន ម៉ាណែត ស្តីពីការពង្រឹងពង្រីកទំនាក់ទំនងទ្វេភាគី និងផ្លាស់ប្តូរយោបល់ អំពីបញ្ហាតំបន់ និងអន្តរជាតិ ដែលមានការចាប់អារម្មណ៍ដូចគ្នា។
បើតាមក្រសួងការបរទេសកម្ពុជា ដំណើរទស្សនកិច្ចផ្លូវរដ្ឋរបស់មេដឹកនាំកំពូលចិន នាពេលនេះ នឹងធ្វើឱ្យចំណងមិត្តភាពជាប្រពៃណីរបស់ប្រទេសទាំងពីរ កាន់តែរឹងម៉ាំថែមទៀត ហើយទស្សនកិច្ចនេះ ក៏នឹងបង្កើនសារៈសំខាន់បន្ថែមទៀតដល់ចំណងមិត្តដែកថែម និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រជាជាតិទាំង២ផងដែរ។
ក្នុងដំណើរទស្សនកិច្ចនេះដែរ កម្ពុជារំពឹងថា នឹងមានការចុះហត្ថលេខាលើឯកសារជាច្រើន ដើម្បីលើកកម្ពស់កិច្ចសហប្រតិបត្តិការក្នុងវិស័យនានាផងដែរ។ គេសង្កេតឃើញថា ដំណើរទស្សនកិច្ចរបស់មេដឹកនាំកំពូលចិន មកកម្ពុជានៅពេលនេះ ស្របពេលដែលសង្គ្រាមពាណិជ្ជកម្ម រវាងចិន និងអាមេរិក កំពុងតែមានកម្តៅខ្លាំង ក្នុងនោះអាមេរិក បានសម្រេចដំឡើងពន្ធគយលើទំនិញដែលនាំចូលពីចិនដល់ទៅ ១៤៥ភាគរយ។
ចំណែក បណ្តាប្រទេសផ្សេងៗ ក្នុងនោះមានកម្ពុជាផងដែរ អាមេរិកសម្រេចពន្យាពេលដាក់ពន្ធគយរយៈពេល ៩០ថ្ងៃ ហើយកំណត់បន្ទាត់ពន្ធត្រឹម ១០ភាគរយស្មើគ្នា។ នេះបើតាមការប្រកាសពីសេតវិមានអាមេរិក កាលពីថ្ងៃទី១០ ខែមេសា៕
