ស្ត្រីឈ្មោះ ចិន ស្រីដា ជាម្ចាស់លុយឱ្យភរិយាមន្ត្រីនគរបាលផ្កាយ១ខ្ចីហើយ ហើយត្រូវមន្ត្រីនគរបាលរូបនោះប្តឹងរហូតជាប់ពន្ធនាគារនោះ ត្រូវបានសាលាឧទ្ធរណ៍បាត់ដំបង សម្រេចដោះលែងឱ្យមានសេរីភាពវិញហើយ។
សេចក្តីប្រកាសព័ត៌មានរបស់សាលាឧទ្ធរណ៍បាត់ដំបង ឱ្យដឹងថា នៅថ្ងៃទី១១ ខែមេសានេះ សាលាឧទ្ធរណ៍បាត់ដំបង បានបើកសវនាការជាអសាធារណៈ ជំនុំជម្រះលើសំណុំរឿងសភាព្រហ្មទណ្ឌ(មុនអង្គសេចក្តី) លើសំណុំរឿង គំរាមកំហែងហែកកេរ្តិ៍ ដែលមានជនជាប់ចោទឈ្មោះ ចិន ស្រីដា អាយុ២៧ឆ្នាំ មានទីលំនៅនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។
ប្រភពដដែល បន្តថា ក្រោយធ្វើកិច្ចពិភាក្សាដេញដោលលើជនជាប់ចោទ ភាគីពាក់ព័ន្ធ និងបានពិនិត្យភស្តុតាង អង្គហេតុ និងអង្គច្បាប់ នាពេលសវនាការរួចមក ក្រុមប្រឹក្សាជំនុំជម្រះបានប្រកាសជាអសាធារណៈនូវសាលដីកា ដោយសម្រេចដោះលែងជនជាប់ចោទ ឈ្មោះ ចិន ស្រីដា ឱ្យមានសេរីភាព។
សភាព្រហ្មទណ្ឌនៃសាលាឧទ្ធរណ៍បាត់ដំបង នឹងបើកសវនាការលើសំណុំរឿងអង្គសេចក្តីនៅថ្ងៃទី២២ ខែមេសា ឆ្នាំ២០២៥ខាងមុខ។
កាលពីថ្ងៃទី១៨ ខែកុម្ភៈ ឆ្នាំ២០២៥ សាលាដំបូងខេត្តសៀមរាប ចេញសាលក្រមព្រហ្មទណ្ឌ ដោយសម្រេចផ្តន្ទាទោសជនជាប់ចោទ ឈ្មោះ ចិន ស្រីដា ដាក់ពន្ធនាគារ ២ឆ្នាំ និងបង្គាប់ឱ្យសំណងជំងឺចិត្តទៅឱ្យដើមបណ្តឹង ឈ្មោះ សម្បតិ្ត កុសល ចំនួន ៤លានរៀល ក្រោមការចោទពីបទ គំរាមកំហែងហែកកេរ្តិ៍។
តាមដំណើររឿង ឈ្មោះ ចិន ស្រីដា ដែលរងការចោទ ពីបទ គំរាមកំហែងហែកកេរ្តិ៍ នោះ គឺបានឱ្យលុយទៅភរិយាដើមបណ្តឹង លោក សម្បត្តិ កុសល អតីតស្នងការរងនៃស្នងការដ្ឋាននគរបាលខេត្តបន្ទាយមានជ័យ ខ្ចីជាបន្តបន្ទាប់ រហូត២ម៉ឺនដុល្លារ ដើម្បីរត់ការឱ្យ លោក សម្បត្តិ កុសល ឡើងតំណែងផ្កាយ២។
នៅពេលដែលឱ្យខ្ចីលុយរួច ម្ចាស់លុយ ឈ្មោះ ចិន ស្រីដា បានឆាតទៅទារលុយពី លោក សម្បត្តិ កុសល ដែលជាប្តីរបស់កូនបំណុល ហើយលោក សម្បត្តិ កុសល ក៏បានដាក់ពាក្យប្តឹងទៅសាលាដំបូងខេត្តសៀមរាបតែម្តង។
ក្រោយពីតុលាការខេត្តសៀមរាប បានកាត់ក្តីឱ្យ លោក សម្បត្តិ កុសល ឈ្នះក្តីលើម្ចាស់លុយដែលប្រពន្ធលោកបានខ្ចីនោះ អ្នកប្រើប្រាស់បណ្តាញសង្គមជាច្រើន បានផ្ទុះការរិះគន់ទៅលើចំណាត់ការរបស់តុលាការ ដោយអ្នកខ្លះថា ជារឿងអយុត្តិធម៌សម្រាប់ម្ចាស់លុយ ដែលឱ្យគេខ្ចីលុយហើយត្រូវជាប់គុកទៀត។ អ្នកខ្លះទៀតថា រកស៊ីចំណេញបង់ពន្ធជូនរដ្ឋហើយ រកប៉ះចំអ្នកមានអំណាច ម្ចាស់បំណុលជាប់គុកទៀត ខណៈមតិខ្លះទៀតថា អ្នកអនុវត្តច្បាប់រួមដៃគ្នាជាមួយអ្នកមានអំណាច ហើយអ្នកតូចតាចក្លាយជាជនរងគ្រោះទៅវិញ។
ស្របពេលមានការរិះគន់នេះ លោក សម្បត្តិ កុសល ក៏ត្រូវបានក្រសួងមហាផ្ទៃ ផ្ទេរតួនាទីពីស្នងការរងនគរបាលខេត្តបន្ទាយមានជ័យ ឱ្យទៅបម្រើការងារនៅនាយកដ្ឋានវិទ្យុទាក់ទងវិញ៕
