ពលរដ្ឋខ្មែរនៅក្រៅប្រទេសបន្តរំឭកយុត្តិធម៌ លោក លិម គិមយ៉ា តាមរយៈការធ្វើបុណ្យខួបគម្រប់១០០ថ្ងៃ នៅប្រទេសបារាំង ខណៈរដ្ឋាភិបាលកម្ពុជាបន្តលាក់ជនសង្ស័យ លី រតនរស្មី និង ពេជ្រ គឹមស្រ៊ិន ជិត៤ខែទៅនេះ ខណៈគណបក្សប្រឆាំង ដាក់ការសង្ស័យថា គ្រួសារហ៊ុននៅពីក្រោយឃាតកម្មនេះ។
ប្រធានចលនាជាតិតស៊ូ លោក សម រង្ស៊ី បង្ហោះសារលើហ្វេសប៊ុកកាលថ្ងៃទី១៦ ខែមេសា អំពាវនាវឱ្យមានការចូលរួមកម្មវិធីបុណ្យគម្រប់ ១០០ថ្ងៃ នៃឃាតកម្មលើលោក លិម គិមយ៉ា។
ប្រភពបន្តថា កម្មវិធីបុណ្យធ្វើឡើងនៅថ្ងៃអាទិត្យ ទី២០ ខែមេសា ឆ្នាំ២០២៥ ស្ថិតនៅប្រទេសបារាំង។
លោក សម រង្ស៊ី និយាយថា លោក លិម គិមយ៉ា ជាតំណាងរាស្រ្តគណបក្សសង្រ្គោះជាតិ ខ្មែរសញ្ជាតិបារាំង ត្រូវបានឃាតករបាញ់សម្លាប់យ៉ាងសាហាវព្រៃផ្សៃបំផុត នៅទីក្រុងបាំងកក ប្រទេសថៃ។
លោកថា ឃាតករជនជាតិថៃឈ្មោះ អេកាឡាក់ ភេណយ និងជនសង្ស័យសំខាន់ឈ្មោះ លី រតនរស្មី ពេជ្រ គឹមស្រិន និងបក្ខពួក កំពុងលាក់ខ្លួនក្នុងប្រទេសកម្ពុជា ក្រោមការការពារពីលោក ហ៊ុន សែន។
លើសពីនេះ កាលពីថ្ងៃសៅរ៍ ទី១២ ខែមេសា កូនប្រុសលោក លិម គិមយ៉ា គឺលោក លិម តូម៉ា ក៏បានបង្ហោះសារលើហ្វេសប៊ុករបស់លោក ដោយនិយាយថា ឪពុករបស់ខ្ញុំ អាយុ៧៤ឆ្នាំ ត្រូវបានគេបាញ់សម្លាប់ ហើយថា ថ្ងៃទី២០ មេសានេះ ជាខួបគម្រប់១០០ថ្ងៃ នៃឃាតកម្មលើឪពុកខ្ញុំ លើទឹកដីប្រទេសថៃ។
សម្រាប់ លោក លិម តូម៉ា និយាយថា ចាប់ពីថ្ងៃនេះទៅ យើងលែងបាននៅជាមួយគាត់ទៀតហើយ ព្រោះមានមនុស្សមួយក្រុមបានសម្រេចចិត្តធ្វើឃាតគាត់ គឺបាញ់សម្លាប់គាត់។
ប្រភពបន្តថា យើងបានជួបចៅក្រមបារាំង នឹងស្នើសុំកិច្ចសហប្រតិបត្តិការជាមួយប្រព័ន្ធយុត្តិធម៌ថៃ ក្នុងសប្តាហ៍នេះ ដើម្បីផ្លាស់ប្តូរព័ត៌មានដែលមានជាប់ពាក់ព័ន្ធបន្ថែម ជុំវិញករណីឃាតកម្មបាញ់សម្លាប់មួយនេះ។
ប្រភពបន្ថែមទៀតថា ការធ្វើឃាតនេះ បានកើតឡើងនៅក្នុងប្រទេសថៃ ប៉ុន្តែជនសង្ស័យសំខាន់គឺ លី រតនរស្មី និង ពេជ្រ គឹមស្រ៊ិន ជាជនជាតិខ្មែរ ហើយកំពុងលាក់ខ្លួននៅក្នុងប្រទេសកម្ពុជា។
សម្រាប់ លោក តូម៉ា ចោទជាសំណួរថា តើប៉ូលីសខ្មែរនឹងចាប់ខ្លួនជនសង្ស័យទាំង២នាក់ គឺ លី រតនរស្មី និង ពេជ្រ គឹមស្រ៊ិន នេះដើម្បីស្វែងរកការពិត និងមូលហេតុអ្វីដែលពួកគេបានសម្រេចចិត្តសម្លាប់ឪពុកគាត់ ដែលមានមនសិការជាតិលើប្រទេសកម្ពុជា និងប្រជាពលរដ្ឋខ្មែរដែរឬទេ?
សម្រាប់លោក លិម តូម៉ា អះអាងថា មេដឹកនាំកម្ពុជា លោក ហ៊ុន សែន បានប្រើមនុស្សឲ្យមកនិយាយបញ្ចុះបញ្ចូលឪពុកគាត់ជាច្រើនដង ឲ្យចូលរួមធ្វើការជាមួយក្នុងរដ្ឋាភិបាល តែត្រូវឪពុកលោកប្រកែក បដិសេធ។
ប្រភពបន្តទៀតថា បើសិនជាឪពុកលោកយល់ព្រមតាមការបញ្ចុះបញ្ចូលរបស់ លោក ហ៊ុន សែន តើគាត់ត្រូវគេធ្វើឃាតឬទេ? តើរដ្ឋអំណាចកម្ពុជាធ្វើការស៊ើបអង្កេតការស្លាប់នេះទេ?
តំណាងរាស្រ្តបក្សសង្គ្រោះជាតិ លោក ម៉ែន សុថាវរិន្រ្ទ ប្រាប់VODនៅថ្ងៃទី១៧ ខែមេសានេះថា យុត្តិធម៌លោក លិម គិមយ៉ា មិនត្រូវបំភ្លេចនោះទេ ដរាបណា ឃាតករពិតនៅពីក្រោយ មិនទាន់ត្រូវចាប់ខ្លួន។
លោកបន្តថា ពលរដ្ឋខ្មែរក្រៅប្រទេស នឹងបន្តបន្លឺសំឡេងទាមទារ យុត្តិធម៌ជូនគ្រួសារលោក លិម គិមយ៉ា និងជំរុញឱ្យអាជ្ញាធរបារាំង សហការជាមួយតុលាការថៃ វែកមុខឃាតករពិត បាញ់សម្លាប់លោក លិម គិមយ៉ា។
លោកអំពាវនាវពលរដ្ឋខ្មែរគ្រប់ទិសទី មេត្តាចូលរួមពិធីបុណ្យខួបគម្រប់១០០ថ្ងៃ លោក លិម គិមយ៉ា ដែលប្រព្រឹត្តិទៅនៅថ្ងៃទី២០ ខែមេសា ឆ្នាំ២០២៥ ស្ថិតក្នុងវត្តសង់សៀម៉ាន ជាយក្រុងប៉ារីស ប្រទេសបារាំង។
ម្យ៉ាងវិញទៀត លោកថា កម្មវិធីនេះក៏ជាការផ្ញើសារថា ពលរដ្ឋខ្មែរក្រៅប្រទេសមិនបំភ្លេចវីរៈភាព លោក លិម គិមយ៉ា និងបន្តទាមទារឱ្យចាប់ខ្លួនមេខ្លោង នៅពីក្រោយឃាតកម្មដ៏ឃោរឃៅនេះមកផ្តន្ទាទោស។
លោកថា៖ «ខ្ញុំសូមឱ្យបងប្អូនខ្មែរទាំងអស់ ដើម្បីលើកទឹកចិត្តក្រុមគ្រួសារ លោក លិម គិមយ៉ា ថាប្រជាពលរដ្ឋខ្មែរយើង នៅតែរំឭកពីគុណបំណាច់លោក លិម គិមយ៉ា ដែលគាត់ធ្វើជាតំណាងរាស្ត្រអតីតតំណាងរាស្ក្រ ហើយនឹងជួយគ្រួសារ លោក លិម គិមយ៉ា កុំឱ្យគាត់នៅឯកាតែម្នាក់ឯង ព្រោះឥឡូវនេះឃើញគ្រួសារលោក លិម គិមយ៉ា នៅតែមានទំនាក់ទំនងជាមួយគណបក្សសង្គ្រោះជាតិរហូតចឹង គឺយើងចង់លើកទឹកចិត្តឱ្យក្រុមគ្រួសារ កុំឱ្យបាក់ទឹកចិត្តយើង ក្នុងនាមគណបក្សសង្គ្រោះជាតិនឹងជួយដើម្បីរកយុត្តិធម៌ជូនគ្រួសារទាំងលោក លិម គិមយ៉ា និងលោក កែម ឡី ទាំងអស់»។
តំណាងរាស្រ្តបក្សសង្គ្រោះជាតិម្នាក់ទៀត លោក សួន សូរីដា និយាយថា កម្មវិធីបុណ្យនេះ ក៏ជាការបង្ហាញឱ្យឃើញថា ពលរដ្ឋខ្មែរក្រៅប្រទេស មិនបំភ្លេចវីរៈភាពដ៏អង់អាចក្លាហានរបស់ លោក លិម គិមយ៉ា ដើម្បីបុព្វហេតុជាតិមាតុភូមិនោះទេ។
លោកបន្តថា ខ្មែរនៅក្រៅប្រទេស នឹងបន្តបន្លឺសំឡេងទាមទារយុត្តិធម៌សម្រាប់ លោក លិម គិមយ៉ា បន្តទៀត ដរាបណា មេដឹកនាំគ្រួសារហ៊ុន បន្តលាក់បាំងជនសង្ស័យរួមដៃក្នុងសំណុំរឿងឃាតកម្មនេះ។
សម្រាប់លោក សូរីដា យល់ថា ដរាបណាមេដឹកនាំគ្រួសារហ៊ុន បន្តលាក់ជនសង្ស័យ លី រតនរស្មី និង ពេជ្រ គឹមស្រ៊ិន មហាជននៅតែដាក់ការសង្ស័យថា រដ្ឋាភិបាលកម្ពុជា អាចមានជាប់ពាក់ព័ន្ធករណីនេះ។
ការណ៍នេះ លោក រំឭកថា បើមេដឹកនាំគ្រួសារហ៊ុន ត្រូវក្លាហានលាងជម្រះមន្ទិលសង្ស័យរបស់មហាជនគឺត្រូវចាប់បញ្ជូន លី រតនរស្មី និងពេជ្រ គឹមស្រ៊ិន ឱ្យតុលាការថៃឬអាជ្ញាធរបារាំង ដើម្បីផ្តន្ទាទោសតាមច្បាប់។
លោកថា៖ «វាជារឿងអយុត្តិធម៌មែនទែន ពីព្រោះយើងដឹងហើយថាមិនមែន លោក គិមយ៉ា ទាល់តែជាតំណាងរាស្រ្តទើបមហាជនស្វែងរកយុត្តិធម៌ទេ សូម្បីតែប្រជាពលរដ្ឋខ្មែរសាមញ្ញក្រីក្រក៏ដោយ កាលណាមានឃាតកម្មបាញ់សម្លាប់នៅប្រទេសគេ រដ្ឋាភិបាលកម្ពុជា ត្រូវតែចាត់វិធានការក្នុងនាមជារដ្ឋាភិបាលដែលឈឺឆ្អាល ចំពោះសុខទុក្ខរបស់ប្រជាពលរដ្ឋខ្លួន ចឹងខ្ញុំគិតថាការដែលបាញ់សម្លាប់ លោក លិម គិមយ៉ានៅកណ្ដាលទីក្រុងបាងកកនេះ ខ្ញុំគិតថា វាជារឿងមួយដែលអាចទាក់ទងទៅរឿងនយោបាយពីព្រោះយើងមើលលោក លិម គិមយ៉ា ជាអ្នកនយោបាយ»។
VODមិនទាន់អាចសុំការបំភ្លឺ ពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានទេ ដោយលោកចុចផ្តាច់ ខណៈសំណួរតាមប្រព័ន្ធតេឡេក្រាម ក៏លោកមិនឆ្លើយតប។
យ៉ាងណា កន្លងទៅ សំណុះរឿងឃាតកម្មនេះ លោក ឆាយ គឹមខឿន ធ្លាប់ទម្លាក់កំហុសដាក់ភាគីថៃ ជុំវិញភាពយឺតយ៉ាវនៃការចាប់បញ្ជូន លី រតនរស្មី និង ពេជ្រ គឹមស្រ៊ិន នេះ។
លោកបកស្រាយថា កម្ពុជាទទួលបានសំណើរពីភាគីថៃ និងទទួលបាននិវេទន៍ក្រហមពីប៉ូលីសអន្តរជាតិក៏ពិតមែន ក៏ប៉ុន្តែថា កម្ពុជាមិនទាន់មានឯកសារផ្លូវការណាមួយ ដែលផ្តល់ដោយភាគីថៃ ដើម្បីបំពេញនីតិវិធីក្នុងកិច្ចសហការផ្នែកច្បាប់ ក្នុងវិស័យព្រហ្មទណ្ឌនៅឡើយទេ។
លោក ឆាយ គឹមខឿន គូសបញ្ជាក់ថា ភាគីកម្ពុជា ធ្លាប់ជួបផ្ទាល់ជាមួយភាគីថៃ ដើម្បីសុំរបាយការណ៍ស៊ើបអង្កេតលម្អិតបន្ថែម ប៉ុន្តែថា មកដល់ពេលនេះ កម្ពុជាមិនទទួលបានលទ្ធផលអ្វីទាំងអស់ពីភាគីថៃ។
បញ្ហានេះ លោកថា មិនអាចប្រាប់បានពីពេលវេលាជាក់លាក់ លើវិធានចាប់បញ្ជូនជនសង្ស័យទាំងពីរនាក់នេះបានទេ។
លោកថា៖ «អ្វីដែលជាប្រភពមូលដ្ឋានច្បាស់លាស់ សម្រាប់ផ្ដល់ការស៊ើបអង្កេតបន្តនេះ វាស្ថិតក្នុងដៃភាគីថៃ ដូច្នេះយើងក៏នៅតែរងចាំឯកសារមួយចំនួន ដែលពាក់ព័ន្ធការងារជំនាញស៊ើបអង្កេតនៃភាគីទាំងសងខាង ពិភាក្សាគ្នាឱ្យបានច្បាស់លាស់ ហើយចំពោះគេលើកឡើងយ៉ាងណាយ៉ាងណីនោះ អាហ្នឹងសិទ្ធិរបស់គេទេ! ប៉ុន្តែគ្រាន់ថា ការលើកឡើងឲ្យមានការទទួលខុសត្រូវ ឱ្យចេះច្បាប់ ចេះទម្លាប់ ឱ្យដឹងរដ្ឋធម្មនុញ្ញរបស់ព្រះរាជាណាចក្រកម្ពុជាផង»។
ដោយឡែក ប្រធានអង្គការប្រជាធិបតេយ្យប្រចាំប្រទេសអូស្រ្តាលី លោក ស៊ឹង សែនករុណា យល់ថា អំពើនិទណ្ឌភាពនៅកម្ពុជា នឹងត្រូវបានបញ្ចប់ បើកម្លាំងមហាជនរួមគ្នាទាមទារយុត្តិធម៌។
លោកបន្តថា រយៈពេលជិត៤ខែទៅនេះ មហាជននិងគ្រួសារលោក លិម គិមយ៉ា នៅតែដាក់ការសង្ស័យថា ករណីឃាតកម្មនេះជារឿងនយោបាយ ហើយមានជាប់ពាក់ព័ន្ធ នឹងមេដឹកនាំកម្ពុជាផងដែរ។
លោកថា៖ «ករណីឃាតកម្មលើ លោក លិម គិមយ៉ា វាជាការបង្ហាញអំពីការធ្វើនយោបាយ ដោយយកគ្នាជាសត្រូវ យកគ្នាស្លាប់និងរស់ ដោយអត់មានដែលគេហៅថា ការយោគយល់អំពីនិន្នាការ និងទស្សនៈនយោបាយផ្សេងគ្នា ដោយប្រើមធ្យោបាយគ្រប់រូបភាព ដើម្បីធ្វើទុក្ខបុកម្នេញគ្នារហូតដល់ការសម្លាប់ក៏អាចធ្វើទៅបានដែរ ហើយការសម្លាប់ទៀតសោធនៅពេលដែលបុគ្គលនយោបាយ ឬក៏អ្នកវិភាគនយោបាយ ឬក៏អ្នកវិភាគសង្គម អ្នកធ្វើកិច្ចការងារសង្គមណា ត្រូវបានធ្វើឃាត តែអំពើយុត្តិធម៌ដែលផ្ដល់ជូនអ្នករងគ្រោះ គ្រួសារអ្នករងគ្រោះ គឺឆ្ងាយដូចជើងមេឃ ដោយគ្មានការយកចិត្តទុកដាក់ពីរដ្ឋាភិបាលដែលដឹកនាំប្រទេសសព្វថ្ងៃនេះ ហើយនេះគឺជាអ្វីដែលយើងមើលឃើញថា ជារឿងមួយដែលមិនអាចទទួលបាននូវយុត្តិធម៌»។
លោក លិម គិមយ៉ា តំណាងរាស្ត្រគនបក្សសង្គ្រោះជាតិកូតាពីគណបក្សសិទ្ធិមនុស្ស របស់លោក កឹម សុខា ត្រូវបានគេបាញ់សម្លាប់ក្នុងទីក្រុងបាងកក ប្រទេសថៃ កាលពីថ្ងៃទី៧ ខែមករា ឆ្នាំ២០២៥ ខណៈលោកនិងភរិយាជាជនជាតិបារំាង ធ្វើដំណើរចេញពីខេត្តសៀមរាប នៃប្រទេសកម្ពុជា ។
ក្រោយឃាតកម្មកើតឡើង តុលាការថៃ បានចេញដីការឱ្យចាប់ខ្លួន លី រតនរស្មី ជាទីប្រឹក្សាលោក ហ៊ុន សែន មេដឹកនាំកម្ពុជា។
បន្ទាប់មកទៀត នៅថ្ងៃទី១៥ ខែមករា ប៉ូលិសអន្តរជាតិអាំងទែប៉ូល (Interpol) បានចេញនិវេទន៍ក្រហម (Red notice) ឱ្យស្វែងរកចាប់ខ្លួនអ្នកផ្តល់តម្រុយឱ្យបាញ់សម្លាប់ លោក លិម គិមយ៉ា គឺជនសង្ស័យឈ្មោះ ពេជ្រ គឹមស៊្រិន ។
ពេជ្រ គឹមស៊ិន ត្រូវគេស្គាល់ថា ជាមនុស្សនឹងលោក ឃួង ស្រេង អភិបាលរាជធានីភ្នំពេញ ដែលញឹកញាប់គេសង្កេតឃើញតាមវេទិការសាធារណៈ លោក ឃួង ស្រេង តែងតែលុតក្រាបសំពះគ្រួសារហ៊ុន។
មួយវិញទៀត ឃាតកម្មនេះ កើតឡើងក្រោយពីលោក លិម គិមយ៉ា រិះគន់គ្រួសារហ៊ុន រឿងធ្វើឱ្យឆេះរូបព្រះឆាយាល័ក្ខណ៍ព្រះមហាក្សត្រ ក្នុងកម្មវិធីព្រឹត្តិការណ៍ «សាទរកម្ពុជា» កាលពីយប់ឆ្លងឆ្នាំសកល ឆ្លងចូលឆ្នាំ២០២៥ ដែលរៀបចំដោយលោក ហ៊ុន ម៉ានី កូនប្រុសលោក ហ៊ុន សែន ។
យ៉ាងណា ជិត៤ខែទៅនេះ ជនសង្ស័យ លី រតនរស្មី និងពេជ្រ គឹមស៊្រិន ត្រូវបានគេដឹងថានៅបន្តលាក់ខ្លួនក្នុងប្រទេសកម្ពុជា ដែលការណ៍នេះ រងការរិះគន់ថា គ្រួសារហ៊ុន ជាប់ពាក់ព័ន្ធនឹងការរៀបចំគម្រោងឱ្យធ្វើឃាតលើ លោក លិម គិមយ៉ា ដែលជាតំណាងរាស្ត្រគណបក្សសង្គ្រោះជាតិ៕
