គណបក្សភ្លើងទៀន លុបចោលគម្រោងធ្វើពិធីរំឭកខួបបែបជំនឿសាសនា ដើម្បីឧទ្ទិសកុសលជូនដល់វិញ្ញាណក្ខន្ធជនរងគ្រោះ ដែលបាត់បង់ជីវិតក្នុងរបបខ្មែរក្រហម ក្នុងខួប៥០ឆ្នាំ ដែលគ្រោងធ្វើនៅថ្ងៃទី១៧ ខែមេសានេះ ក្រោយពីអាជ្ញាធរក្រុង បដិសេធផ្តល់ទីតាំង នៅមជ្ឈមណ្ឌលប្រល័យពូជសាសន៍ជើងឯក។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ បានប្រាប់VOD នៅថ្ងៃទី១៧ខែមេសានេះថា មូលហេតុនៃការលុបចោលពិធីបែបសាសនានេះ ដោយសារសាលារាជធានីភ្នំពេញ មិនអនុញ្ញាតឱ្យប្រារព្ធពិធីនេះ នៅមជ្ឈមណ្ឌលប្រល័យពូជសាសន៍ជើងឯក តាមការគ្រោងទុក។
បើតាមប្រភពដដែល សំអាងថា ការបដិសេធនេះ ដោយយោងលើវត្តមាន ប្រធានាធិបតីចិន លោក ស៊ីន ជីនពីង មកបំពេញទស្សនកិច្ចនៅកម្ពុជា នាថ្ងៃទី១៧ ខែមេសានេះ។
លោកថា៖ «អីចឹងទេសាលារាជធានីភ្នំពេញ បានស្នើឱ្យយើងលើកពេល ការប្រារព្ធពិធីនេះទៅ២ថ្ងៃ ឬ៤ថ្ងៃ ក្រោយថ្ងៃ១៧មេសានេះទៅវិញ ដោយយល់ទៅលើហេតុផល មានទស្សនកិច្ចជាន់ខ្ពស់របស់លោកប្រធានាធិបតី លោក ស៊ី ជីនពីង នៅថ្ងៃទី១៧មេសានេះ[…] គណបក្សបានសម្រេចចិត្តថា មិនប្រារព្ធពិធីទេនៅឆ្នាំនេះ គឺយើងមិនអាចប្រារព្ធពិធីខុសថ្ងៃ១៧មេសាទេ»។
តាមលិខិតចុះថ្ងៃទី១ ខែមេសា ឆ្នាំ២០២៥ គណបក្សភ្លើងទៀន ជូនដំណឹងទៅសាលាក្រុង ពីគម្រោងរៀបចំពិធីបុណ្យបង្សុកូល ដើម្បីឧទ្ទិសកុសលជូនដល់វិញ្ញាណក្ខន្ធជនរងគ្រោះ ដែលបាត់បង់ជីវិត ក្នុងរបបកម្ពុជាប្រជាធិបតេយ្យខ្មែរក្រហម ក្នុងខួប៥០ឆ្នាំដែលត្រូវនឹងថ្ងៃទី១៧ ខែមេសា ឆ្នាំ២០២៥នេះ។
លិខិតដដដែល បញ្ជាក់ថា គណបក្សភ្លើងទៀន នឹងយកបរិវេណមជ្ឈមណ្ឌលប្រល័យពូជសាសន៍ជើងឯក ស្ថិតនៅភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ធ្វើពិធីនេះ តាមបែបជំនឿសាសនា រយៈពេលមួយព្រឹក ចំថ្ងៃទី១៧ខែមេសានេះ ដែលមានអ្នកចូលរួមប្រមាណ ២០០នាក់ និងព្រះសង្ឃ៥អង្គ។
យ៉ាងណា នៅថ្ងៃទី១០ ខែមេសាាលពីប៉ុន្មានង្់ជនរងគ្រោះ ដែលបាន រដ្ឋបាលរាជធានីភ្នំពេញ បានចេញលិខិតបដិសេធ និងបានព្រមានថា ក្នុងករណី គណបក្សនៅតែរៀបចំប្រារព្ធពិធីខាងលើ បង្កឱ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈនោះ ប្រធានគណបក្សត្រូវទទួលខុសត្រូវ ទាំងស្រុងចំពោះមុខច្បាប់ជាធរមាន។
យ៉ាងនេះក្តី ជំនួយឱ្យការលុបចោលគម្រោងប្រារព្ធខួបនៅមជ្ឈមណ្ឌលប្រល័យពូជសាសន៍នេះ គណបក្សភ្លើងទៀន និងគណបក្សឆន្ទៈខ្មែរ បានចេញសេចក្តីថ្លែងការណ៍រួម រំឭកពីទុក្ខវេទនារបស់ពលរដ្ឋខ្មែរដែលបានស្លាប់ជិត២លាននាក់ ត្រឹមរយៈពេលជិត២ឆ្នំា ដោយការធ្វើទារុណកម្ម ពីសំណាក់ក្រុមខ្មែរក្រហម។
ប្រភពនោះបញ្ជាក់ថា ប្រវត្តិសាស្ត្រដ៏ជូរចត់នេះ បានបង្រៀនឱ្យមានសាមគ្គីភាពក្នុងចំណោមប្រជាជាតិខ្មែរ ដើម្បីកសាងសង្គមមួយ ដែលចាក់ឫសដោយសច្ចៈធម៌ មេត្តាធម៌ និងការគោរពសិទ្ធិមនុស្ស ហើយថាប្រជាជនកម្ពុជា នៅតែប្រាថ្នាចង់បានលទ្ធិប្រជាធិបតេយ្យ សេរីពហុបក្សពិតប្រាកដ។
លើសពីនេះ គណបក្សទាំងពីរនោះ បានផ្ញើសារថា យើងនឹងនៅតែតស៊ូដោយគ្មានការភ័យខ្លាចនឹងការគាបសង្កត់ ដើម្បីនាំមកនូវសេរីភាព និងយុត្តិធម៌ក្នុងសង្គមកម្ពុជា ស្របតាមស្មារតីនៃរដ្ឋធម្មនុញ្ញកម្ពុជា និងកិច្ចព្រមព្រៀងសន្តិភាពទីក្រុងប៉ារីស។
របបខ្មែរក្រហម មុនដួលរលំ ត្រូវបានគេដឹងជាទូទៅថា មហាអំណាចចិន ជាអ្នកគាំទ្រ និងឧបត្ថម្ភទាំងស្បៀង និងសព្វាវុធ ដល់របបវាលពិឃាតមួយនេះ៕
