រដ្ឋាភិបាលថៃអះអាងពីការពន្លឿនការផ្ទៀងផ្ទាត់អត្តសញ្ញាណជនរងគ្រោះ ក្នុងហេតុការណ៍ដួលរលំអគារ ក្នុងគ្រោះរញ្ជួយដី ដោយគ្រោងផ្តល់សំណង ១០ម៉ឺនបាត ក្នុងម្នាក់ ខណៈចំនួនអ្នកស្លាប់បានកើនដល់ជាង៤០នាក់ និង ៥០នាក់ទៀត កំពុងបាត់ខ្លួន ក្នុងនោះក៏មានពលករខ្មែរផងដែរ។
យោងតាមប្រភពសារព័ត៌មានថៃ Khaosod Post ចុះផ្សាយកាលពីថ្ងៃទី១៥ ខែមេសា ឆ្នាំ២០២៥ និងត្រូវបានផ្សព្វផ្សាយបន្តដោយអង្គការសង់ត្រាល់ ឱ្យដឹងថា សាស្ត្រាចារ្យ ថាវីដា អភិបាលរងក្រុងបាងកក បង្ហើបថា ទីក្រុងបាងកក កំពុងពន្លឿនការផ្ទៀងផ្ទាត់អត្តសញ្ញាណ ផ្តល់សំណងដល់ពលករដែលជាជនរងគ្រោះ ដោយសារការបាក់រលំអគារការិយាល័យសវនកម្ម ក្នុងម្នាក់ចំនួន១០ម៉ឺនបាត។ ប្រភពដដែលបន្តថា ការផ្តល់សំណងជំហានដំបូង គ្រោងធ្វើឡើងនៅថ្ងៃទី១៨ ខែមេសានេះ។
ការផ្តល់សំណងនេះ បន្ទាប់ពីមានកិច្ចអន្តរាគមន៍ ពីសហជីព សង្គមស៊ីវិលថៃ ភូមា កម្ពុជា និងអ្នកនយោបាយបក្សក្រៅរដ្ឋាភិបាលថៃ រួមទាំងសង្គមស៊ីវិលពីកម្ពុជា និងអង្គការអន្តរជាតិនានា ដែលធ្វើការលើកកម្ពស់សិទ្ធិពលករចំណាកស្រុកផងដែរ។
ប្រភពព័ត៌មានដដែល បន្តថា អ្នកនយោបាយ សង្គមស៊ីវិល និងប្រជាពលរដ្ឋថៃមួយចំនួន អំពាវនាវឲ្យនិយោជកទាំងអស់ រាយការណ៍ពីចំនួនកម្មករ-ពលករ ដោយការពិត។
គួរបញ្ជាក់ថា គ្រោះរញ្ជួយដីកម្រិត ៧,៧រិចទ័រ កាលពីថ្ងៃទី២៨ ខែមីនា ឆ្នាំ២០២៥ នៅប្រទេសថៃ បានបណ្តាលឱ្យអគារកំពុងសាងសង់កម្ពស់ជាង៣០ជាន់មួយកន្លែង ស្ថិតក្នុងសង្កាត់ចាក់តុចាក់ (Chatuchak) ក្នុងទីក្រុងបាងកក បានដួលរលំ។
ហេតុការណ៍នេះ បានបណ្តាលឱ្យពលករខ្មែរម្នាក់ ឈ្មោះ មាស សាវ៉ាង អាយុ ២៣ឆ្នាំ នៅខេត្តបន្ទាយមានជ័យ បានស្លាប់ និងពលការិនីខ្មែរម្នាក់ទៀត ឈ្មោះ សឿន សំណាង អាយុ ៤៤ឆ្នាំ នៅខេត្តកំពង់ធំ បានរងរបួសបាក់ជើង ខណៈពលករខ្មែរម្នាក់ទៀត ឈ្មោះ ឃិន សាខុន បានរងគ្រោះថ្នាក់របូតគន្លាក់ជង្គង់ ក្នុងឧបទ្ទវហេតុរញ្ជួយដីក្នុងប្រទេសថៃ។
ចំណែក គ្រួសារពលករខ្មែរដែលបាត់ខ្លួនចំនួន ៣នាក់ទៀត ក៏កំពុងរងចាំដំណឹងពីការរុករករបស់អាជ្ញាធរថៃ នៅទីតាំងអគាររលំនោះផងដែរ។
យោងតាមសារព័ត៌មានថៃ The Nation Thailand ចុះផ្សាយកាលពីរសៀលថ្ងៃទី១៥ ខែមេសា ឱ្យដឹងថា រដ្ឋបាលក្រុងបាងកក (BMA) បានរាយការណ៍ពីការរកឃើញសាកសពបន្ថែមទៀត នៅតំបន់ C នៃអគារកម្ពស់ ៣០ជាន់ ដែលបានដួលរលំនោះ ដែលនាំឱ្យចំនួនអ្នកស្លាប់កើនដល់ ៤៤នាក់ និងអ្នករបួស ៩នាក់ ក្នុងចំណោមមនុស្សសរុបចំនួន ១០៣នាក់ ដែលរងផលប៉ះពាល់ក្នុងឧបទ្ទវហេតុនេះ។ ចំណែកអ្នកបាត់ខ្លួនវិញ តាមប្រភពពីរដ្ឋបាលក្រុងបាងកក គឺនៅមាន ៥០នាក់ទៀត៕
