ស្ត្រីខ្មែរម្នាក់ទៀត ដែលអះអាងថា ត្រូវបានគេបង្ខាំង នៅប្រទេសចិន មិនឱ្យមកជួបបងប្អូននៅកម្ពុជា រយៈពេល៦ឆ្នាំទៅនេះ បានអំពាវនាវរកកិច្ចអន្តរាគមន៍ពីរដ្ឋាភិបាល ឱ្យជួយសង្គ្រោះ ដើម្បីបានមកថែបងពិការ នៅកម្ពុជាដែលជាស្រុកកំណើតរបស់ខ្លួនវិញ។
នេះបើតាមវីដេអូរយៈជិត១នាទីដែលអ្នកប្រើប្រាស់បណ្តាញសង្គម ចែករំលែកតៗគ្នា ដែលVODទើបទទួលបាននៅថ្ងៃទី២១ ខែមេសា ឆ្នាំ២០២៥នេះ។
ស្ត្រីនោះថា៖ «ខ្ញុំសូមលើកម្រាមដៃ១០ដល់សម្តេចតេជោ ហ៊ុន សែន ខ្ញុំឈ្មោះ ញ៉ែម ស្រីលក្ខ នៅភូមិឫស្សីស្រស់ សង្កាត់និរោធ ខណ្ឌច្បារអំពៅ។ ខ្ញុំចង់ត្រឡប់ទៅផ្ទះវិញ ខ្ញុំចង់ជួបជុំបងខ្ញុំ ព្រោះខ្ញុំត្រូវទទួលបន្ទុកចិញ្ចឹមបងពិការ។ ខ្ញុំមានតែម្រាមដៃ១០ សូមសម្តេចតេជោជួយផង។ ខ្ញុំនៅនេះគេឃាត់ខ្ញុំ គេអត់ឱ្យទៅជួបបងប្អូនខ្ញុំទេ ជួយខ្ញុំផង។ ខ្ញុំមក៦ឆ្នាំហើយ ខ្ញុំចង់ទៅជួបបងប្អូនខ្ញុំវិញ ជួយខ្ញុំផង»។
VODមិនអាចទាក់ទងក្រសួងការបទេសកម្ពុជា ដើម្បីសុំការបញ្ជាក់ពីបញ្ហានេះបានទេ គិតត្រឹមម៉ោងផ្សាយនេះ។
ប៉ុន្តែ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្រាប់ VOD ថា លោកស្រីមិនដឹងច្បាស់រឿងនេះទេ ប៉ុន្តែថា បើស្ត្រីនោះពិតជាជនរងគ្រោះពិតមែន រដ្ឋាភិបាលនឹងមិនទុកជនរងគ្រោះចោលទេ។
លោកស្រីថា៖ «ព័ត៍មានដែលបានមក រដ្ឋាភិបាលមិនដែលទុកចោលទេ ហើយយើងក៏បានអំពាវនាវដែរថា កុំឱ្យចេះតែប្រថុយប្រថាន។ រឿងនេះគាត់ទៅ៦ឆ្នាំហើយបើតាមខ្ញុំដឹង ហើយមានកាសែតពីរហើយដែលសួរខ្ញុំ។ បើទៅ៦ឆ្នាំ មានន័យថា គាត់ទៅស្រុកគេ៦ឆ្នាំហើយ[…] អីចឹងគាត់អាចមានទំនាក់ទំនងច្រើននៅក្នុងប្រទេសហ្នឹង អីចឹងទុកឱ្យសមត្ថកិច្ចគេធ្វើការសិនទៅ បើសិនជាគាត់ដាក់ពាក្យមិនអីទេ តែបើគាត់បង្ហោះហ្វេសប៊ុកពិបាករកណាស់»។
តាមសេចក្តីរាយការណ៍នានា ស្ត្រីរូបនោះ ត្រូវបានចាញ់បោកមេខ្យល់ ឱ្យទៅរៀបការជាមួយជនជាតិចិន ហើយធ្លាប់ស្វែងរកកិច្ចអន្តរាគមន៍ច្រើនដង ពីរដ្ឋាភិបាល តែមិនបានជោគជ័យ ខណៈរងការធ្វើទារុណកម្មពីសំណាក់ប្តី ជាជនជាតិចិន។
សមាគមការពារសិទ្ធិមនុស្សអាដហុក (ADHOC) ធ្លាប់រកឃើញថា ក្នុងរយៈពេលជាង ១១ខែ ឆ្នាំ២០២៤ ខេត្តកំពង់ចាម និងខេត្តត្បូងឃ្មុំ គឺជាខេត្ត ដែលមានតួលេខស្ត្រីខ្មែររងគ្រោះដោយអំពើជួញដូរមនុស្សទៅប្រទេសចិនច្រើនជាងគេ។
តាមអាដហុកនៅពេលនោះ ចាប់តាំងពីខែមករា រហូតដល់ថ្ងៃទី១៦ ខែធ្នូ ឆ្នាំ២០២៤ ខ្លួនបានធ្វើអន្តរាគមន៍ និងជួយស្ត្រីដែលរងគ្រោះ ដោយអំពើជួញដូរទៅប្រទេសចិន នៅខេត្តត្បូងឃ្មុំ ចំនួន ៨ករណី ខេត្តកំពង់ចាម ៧ករណី ខេត្តព្រៃវែង ៣ករណី ខេត្តស្វាយរៀង ៣ករណី ខេត្តក្រចេះ ២ករណី រាជធានីភ្នំពេញ ៣ករណី និងខេត្តបន្ទាយមានជ័យ ១ករណី។
របាយការណ៍នេះ ហាក់ស៊ីគ្នានឹងការអះអាងរបស់លោកស្រី ជូ ប៊ុនអេង នៅពេលនេះដែរ ដោយអ្នកស្រីថា ជាបន្តបន្ទាប់ស្ថាប័នជំនាញនេះ តែទទួលព័ត៌មានពីក្រសួងការបរទេសពីវិធានជួយសង្គ្រោះស្ត្រីខ្មែររងគ្រោះពិតប្រាកដដែលមានកិច្ចសហការពីសមត្ថកិច្ចចិន៕
